Manda ti pensé tongana Jéhovah na Jésus

1-2. E doit ti ndoye Jéhovah tongana nyen? Tongana nyen la Jésus afa so lo ndoye Jéhovah na bibe ti lo kue?

JÉSUS afa commandement ti Nzapa so ayeke kota mingi ahon atanga ni na ngoi so lo tene: “Mo doit ti ndoye Jéhovah Nzapa ti mo na bê ti mo kue, na âme ti mo kue, na ngangu ti mo kue nga na bibe ti mo kue.” (Luc 10:27). Jésus afa polele commandement so ayeke kota mingi na yâ ti Ndia ti Moïse. Tongaso, e yeke ndoye Jéhovah na aye kue so e yeke na ni. Ye so andu anzara ti bê ti e, atënë ti bê ti e nga na ngangu ti e. A ndu nga fason so e yeke pensé na ni. Tâ tënë, e peut lâ oko ape ti comprendre kue fason so Jéhovah ayeke pensé na ni. Me e peut ti comprendre nzoni mingi apensé ti Jéhovah tongana e gi ti hinga “bibe ti Christ” ndali ti so Jésus apensé tâ gï tongana Babâ ti lo.—1 aCor. 2:16.

² Jésus aye lani Jéhovah na bibe ti lo kue. Lo hinga lani ye so Babâ ti lo aye ti tene lo sara na lo leke na bê ti lo ti sara ni atâa so ti sara ni lo doit ti bâ pasi. So Jésus azia li ti lo gï na ndö ti ye so bê ti Babâ ti lo aye, lo zia pëpe si mbeni ye nde aga kota mingi na yâ ti fini ti lo.

3. Nyen la bazengele Pierre amanda na mbage ti Jésus? Nyen la Pierre awa amba ti lo aChrétien ti sara? (1 Pierre 4:1).

³ Pierre na amba ti lo abazengele ayeke lani na pasa ti duti na terê ti Jésus nga ala bâ tongana nyen la lo yeke pensé lani. Na ngoi so Pierre asû kozo lettre ti lo, lo wa aChrétien ti mû oko bibe so Christ ayeke na ni tongana ye ti bira.a (Diko 1 Pierre 4:1.) Pierre asara kua na mbeni tënë ti aturugu na ngoi so lo tene: ‘Ala mû tongana ye ti bira.’ Tongaso, tongana aChrétien amanda ti pensé tongana Jésus, ala yeke wara ye so ala bezoin ni ti tiri na asioni nzara kue nga na dunia so Satan akomande ni.—2 aCor. 10:​3-5; aÉph. 6:12.

4. Nyen la e yeke bâ na yâ ti article so?

⁴ Na yâ ti article so, e yeke gi ti hinga fason so Jésus ayeke pensé na ni nga e yeke bâ tongana nyen la e peut ti mû tapande ti lo. E yeke hinga tongana nyen la e peut (1) ti mû tapande ti fason so Jéhovah ayeke pensé na ni so ayeke aidé e ti tene apensé ti e ague oko (2) ti sara terê ti e kete nga (3) ti bata bibe ti e nzoni na lege so e zia bê ti e na ndö ti Jéhovah na lege ti sambela.

MÛ TAPANDE TI FASON SO JÉHOVAH AYEKE PENSÉ NA NI

5. Tongana nyen la na mbeni ngoi Pierre apensé tongana Jéhovah ape?

⁵ Bâ so na mbeni ngoi Pierre apensé tongana Jéhovah ape. Jésus atene na abazengele ti lo so lo yeke gue na Jérusalem, kâ akota zo ti bungbi ti Nzapa ti aJuif ayeke gbu lo, ala yeke pika lo nga ala yeke fâ lo (Mat. 16:21). Pierre ahinga so Jésus ayeke Messie so Nzapa atene lo yeke sö azo ti Lo. Ni la peut-être asara si a yeke lani ngangu na Pierre ti yeda so Jéhovah ayeke zia si a fâ Jésus (Mat. 16:16). Tongaso, Pierre amû Jésus, lo gue na lo ayo kete na lo tene na lo: “Bâ mawa ti terê ti mo, Seigneur; ye ni so ayeke si ande na mo oko pëpe.” (Mat. 16:22). Jésus na Pierre amä terê na ndö ti tënë so ape ndali ti so Pierre apensé tongana Jéhovah ape.

6. Tongana nyen la Jésus afa so pensé ti lo ague oko ti na Jéhovah?

⁶ Pensé ti Jésus ague lani tâ oko na ti Babâ ti lo ti yayu. Jésus atene na Pierre, atene: “Hon na peko ti mbi kâ, Satan! Mo yeke mbeni tênë ti pikango gere ndali ti mbi, ngbanga ti so mo yeke na pensé ti Nzapa pëpe, me ti azo.” (Mat. 16:23). Peut-être Pierre ayeke lani na nzoni bibe, me Jésus ake wango ti lo ni. So ayeke mbeni ye ti manda ndali ti e. Jéhovah aye lani ti tene Jésus asara ye ti bê ti lo wani ape. Na lege ti ye so asi so Pierre amanda mbeni kpengba ye so ayeke ti pensé tongana Nzapa.

7. Tongana nyen la a si na mbeni ngoi, Pierre afa so lo ye ti changé bango ndo ti lo ti gue oko na ti Jéhovah? (Bâ foto.)

⁷ Na nda ni, Pierre afa so lo ye ti manda ti pensé tongana Jéhovah. Ngoi alingbi lani awe ti tene azo so afâ ganza ape aga azo ti Nzapa. Nzapa afa na Pierre ti gue ti fa tënë na Corneille so ayeke duti oko ti akozo zo ti amara so aga aChrétien. AJuif ayeke kpe ka azo so ayeke aJuif ape kpengo, tongaso Pierre adoit lani ti changé bango ndo ti lo si lo fa tënë na azo so ayeke aJuif ape. Na ngoi so Pierre ahinga pensé ti Jéhovah na ndö ti azo so ayeke aJuif ape, lo changé bango ndo ti lo. Ni la na ngoi so Corneille ahunda na Pierre ti ga na ndo ti lo, lo gue sân ti “ke”. (Kus. 10:​28, 29). Lo fa tënë na Corneille na azo ti da ti lo na ala wara batême.—Kus. 10:​21-23, 34, 35, 44-48.

8. Tongana nyen la e peut ti fa so pensé ti e ague oko na ti Jéhovah? (1 Pierre 3:8).

⁸ Ambeni ngu na pekoni, Pierre awa amba ti lo aChrétien ti “duti na bibe oko”. (Diko 1 Pierre 3:8.) So e yeke awakua ti Jéhovah e peut ti duti na bibe oko tongana e gi ti mû tapande ti apensé ti Jéhovah so ayeke na yâ ti Bible. Na tapande, Jésus awa lani adisciple ti lo ti zia Royaume na kozo ndo na yâ ti fini ti ala (Mat. 6:33). Wango so apeut ti pusu mbeni wafango tënë ti congrégation ti e ti mû desizion ti sara mbeni kua ti ngoi kue. E yeke tene na lo ape ti sara mbeni ye nde so ayeke sara si gigi ayapu na lo, me a yeke nzoni e tene nzoni tënë ti ye so lo leke ti sara nga e hunda na lo ti aidé lo.

MANDA TI SARA TERÊ TI MO KETE

9-10. Tongana nyen la Jésus afa so lo sara terê ti lo kete mingi?

⁹ Na bï so na ndade ni a fâ Jésus, lo fa na Pierre nga na tanga ti abazengele mbeni kpengba ye ti manda na ndö ti sarango terê kete. Kozo na ni, Jésus atokua Pierre na Jean ti leke aye ndali ti ndangba kobe ti Seigneur so Jésus na ala ayeke te kozo ti tene lo kui. Mbeni ye so peut-être ala leke ni ndali ti kobe ni ayeke ti sara kue ti tene mbeni bassine na mbeni bongo aduti dä ti tene a sukula gere ti azo so aga nga a mbô ni. Me zo wa la ayeke sara terê ti lo kete ti sukula gere ti amba ti lo?

¹⁰ Jésus aku kungo ape ti sara kua so. Lo fa so lo sara terê ti lo kete mingi. Lo sara mbeni ye so mbeni zo ti kua la adoit fade ti sara ni na ahon gbungo li ti abazengele ti lo. Jésus azi abongo ti lo ti ndö ni, lo mû mbeni bongo lo kanga na yâ ti lo, lo tö ngu na yâ ti mbeni bassine na lo komanse ti sukula gere ti ala (Jean 13:​4, 5). Ti sukula gere ti abazengele ti lo 12, so Judas so ayeke kä ande lo ayeke na popo ni, a peut lani ti mû ngoi. Me Jésus asara terê ti lo kete lo sukula gere ti ala kue. Na pekoni, lo kanga bê lo fa na ala nda ti ye so lo sara, lo tene: “Ala mä yâ ti ye so mbi sara na ala so? Ala yeke iri mbi ‘Maître’ nga ‘Seigneur,’ na ala yeke na raison, ndali ti so mbi yeke ni. Tongaso, tongana mbi so mbi yeke Seigneur nga Maître, mbi sukula gere ti ala, ala nga ala doit ti sukula gere ti mba na popo ti ala.”—Jean 13:​12-14.

11. Tongana nyen la Pierre afa so lo manda ti sara terê ti lo kete? (1 Pierre 5:5). (Bâ nga foto.)

¹¹ Pierre amanda sarango terê kete na mbage ti Jésus. Na peko ti so Jésus akiri na yayu, Pierre asava mbeni koli so a dü lo na bubango gere (Kus. 1:​8, 9; 3:​2, 6-8). Gbâ ti azo abâ miracle so na ala ga gbani na terê ti Pierre (Kus. 3:11). Me Pierre aye lani ti gboto lê ti azo ni na ndö ti lo ape atâa so lo kono na ndo so azo aye kota ndo mingi. Lo sara terê ti lo kete lo tene na ala ti mû gonda na Jéhovah nga na Jésus na ngoi so lo tene: “Na lege ti iri ti [Jésus], so ti tene na lege ti mabe ti e na yâ ti iri ti lo la asara si koli so awara ngangu, koli so ala bâ lo na ala hinga lo.” (Kus. 3:​12-16). Atënë so Pierre atene na yâ ti mbeni lettre ti lo na aChrétien ti fa so ala bezoin ti sara terê ti ala kete adabe ti e na fason so Jésus akanga mbeni bongo na yâ ti lo na lo sukula gere ti abazengele ti lo.—Diko 1 Pierre 5:5.

12. Tongana ti so Pierre asara, tongana nyen la e peut ti ngbâ ti gi ti sara terê ti e kete?

¹² E peut ti mû tapande ti Pierre ti ngbâ ti gi ti sara terê ti e kete. Girisa ape so vrai sarango terê kete angbâ gï na tënë ti yanga ape. Tënë so Pierre asara kua na ni so a kiri peko ni na “sarango terê kete”, a fa so sarango terê kete andu fason so e yeke pensé na ni na ndö ti e nga na amba ti e. E yeke sara anzoni ye na amba ti e ndali ti so e ye Jéhovah nga e ye azo, me pëpe ndali ti so e ye ti tene a gonda e. E yeke fa so e sara terê ti e biani kete tongana e yeke na ngia ti sara kua ndali ti Jéhovah nga na amba ti e même tongana azo abâ ye so e sara ape.—Mat. 6:​1-4.

“ALA BATA BIBE TI ALA NZONI”

13. Ti ‘bata bibe ti e nzoni’ aye ti tene nyen?

¹³ Ti ‘bata bibe ti e nzoni’ aye ti tene nyen? (1 Pi. 4:7). Chrétien so abata bibe ti lo nzoni ayeke sara kue ti mû adesizion so ague oko na bango ndo ti Jéhovah. Lo hinga so mbeni ye so ayeke kota ahon songo ti lo na Jéhovah ayeke dä ape. Lo bâ terê ti lo kete na hingango so lo hinga aye kue ape. Lo yeke fa so lo zia bê ti lo na Nzapa na lege so lo yeke sambela Jéhovah lakue ti fa lege na lo.

14. Tongana nyen la na mbeni ngoi Pierre azia bê ti lo na Jéhovah ape?

¹⁴ Na ndangba bï so na ndade ni Jésus akui, lo gboto mê ti adisciple ti lo, lo tene: “Na bï so, ala kue ayeke pika gere ti ala ndali ti aye so ayeke si na mbi.” Sân mbeto, Pierre atene: “Même tongana atanga ni kue apika gere ti ala ndali ti ye so ayeke si na mo, mbi, mbi yeke pika gere ti mbi oko pëpe!” Na bï ni so, Jésus mû wango so na ambeni disciple ti lo: “Ala lango pëpe na ala ngbâ ti sambela lakue.” (Mat. 26:​31, 33, 41). Tongana Pierre amä wango so Jésus amû fade, ka sân mbeto lo yeke tene so lo yeke disciple ti lo. Me Pierre atene ni hinga Jésus ape, na lo regretté ngangu.—Mat. 26:​69-75.

15. Tongana nyen la Jésus abata bibe ti lo nzoni na ndangba bï ti lo na sese?

¹⁵ Jésus azia lani bê ti lo kue na Jéhovah. Atâa so lo yeke mbilimbili-kue lo sambela Jéhovah fani mingi. Ni la a mû na lo ngangu ti sara ye so Jéhovah aye ti tene lo sara (Mat. 26:​39, 42, 44; Jean 18:​4, 5). Kite ayeke dä ape so Pierre agirisa lâ oko ape so Jésus asambela lani fani mingi na ndangba bï ti lo na sese.

16. Tongana nyen la Pierre afa so lo bata bibe ti lo nzoni? (1 Pierre 4:7).

¹⁶ A si na mbeni ngoi, Pierre amanda ti zia bê ti lo mingi na Jéhovah na lege ti sambela. Jésus so azingo na kuâ atene na Pierre nga na tanga ti abazengele so ala yeke wara yingo vulu ti aidé ala ti fa nzoni tënë. Ye oko, Jésus atene na ala ti ku na Jérusalem juska ala wara yingo vulu ni (Luc 24:49; Kus. 1:​4, 5). Nyen la Pierre asara lani na ngoi so lo yeke ku? Pierre na amba ti lo aChrétien “angbâ gï ti sambela”. (Kus. 1:​13, 14). Ambeni ngoi na pekoni, na yâ ti kozo lettre ti Pierre, lo wa amba ti lo aChrétien ti bata bibe ti ala nzoni nga ti zia bê ti ala na Jéhovah na lege ti sambela. (Diko 1 Pierre 4:7.) Pierre amanda ti zia bê ti lo na Jéhovah nga lo ga mbeni pilier na yâ ti congrégation.—aGal. 2:9.

17. Atâa akode wa la e yeke na ni so a dü e dungo na ni, nyen la e bezoin ti ngbâ ti sara? (Bâ nga foto.)

¹⁷ Ti bata bibe ti e nzoni, e doit ti sambela Jéhovah fani mingi. E bâ so e bezoin ti ngbâ ti sambela Jéhovah ti fa lege na e même tongana e pensé so a yeke ngangu na e ape ti sara ambeni ye. Tongaso, na ngoi so e yeke mû akota desizion, e doit ti sambela Jéhovah ti fa lege na e, e duti na confiance so lo hinga ye so ayeke nzoni mingi ndali ti e.

18. Tongana nyen la e peut ti changé fason so e yeke pensé na ni ti mû tapande ti fason so Jéhovah ayeke pensé na ni nzoni mingi?

¹⁸ A nzere na e mingi so Jéhovah aleke e na mbeni fason so e peut ti mû tapande ti asarango ye ti lo (Gen. 1:26). Tâ tënë, e peut ti sara ye tâ gï tongana Jéhovah ape (És. 55:9). Me, tongana Pierre, e ye ti ngbâ ti manda ti pensé tongana Jéhovah, ti ngbâ ti gi ti sara terê ti e kete nga ti bata bibe ti e nzoni.