Ngbâ ti tambela na lege ti mabe

1. Ngbanga ti nyen la Paul ayeke na ngia ndali ti fason so lo vivre na ni lani?

A SI na mbeni ngoi, bazengele Paul abâ so a yeke fâ lo na yâ ti kete ngoi, me tongana lo pensé na fason so lo vivre na ni lani, lo yeke na ngia mingi. Lo tene: “Mbi kpe loro ni ahunzi awe, mbi sara ye alingbi na tënë ti mabe awe.” (2 Tim. 4:​6-8). Paul amû lani nzoni desizion ti mû fini ti lo ti sara na Jéhovah na lo bâ so lo zia ngia na bê ti Jéhovah. E nga kue e ye ti mû anzoni desizion na ti zia ngia na bê ti Jéhovah. E peut ti sara ni tongana nyen?

2. Ti tambela na lege ti mabe aye ti tene nyen?

² Paul atene tënë so na ndö ti lo wani nga na amba ti lo aChrétien so ayeke be-ta-zo, lo tene: “E yeke tambela na lege ti mabe, me pëpe na lege ti ye so lê abâ.” (2 aCor. 5:7). Paul aye ti tene nyen la? Na yâ ti Bible, na ambeni ngoi, tënë “tambela” aye ti sara tënë ti fason so mbeni zo asoro ti vivre na ni. Tongana mbeni zo ayeke tambela na lege ti ye so lê ti lo abâ, lo yeke mû adesizion so aluti gï na ndö ti aye so lo bâ, so lo mä nga so anzere na lo wala anzere na lo ape. Me zo so ayeke tambela na lege ti mabe ayeke mû adesizion so afa so lo yeke na confiance na Jéhovah Nzapa. Aye so lo sara afa so lo hinga biani so Nzapa ayeke futa lo nga lo hinga so lo yeke bâ nzoni tongana lo sara ye alingbi na awango ti Jéhovah so ayeke na yâ ti Bible.—Ps. 119:66; aHéb. 11:6.

3. Tongana e tambela na lege ti mabe anzoni ye wa la e yeke wara? (2 aCorinthien 4:18).

³ Tâ tënë, e kue na ambeni ngoi e yeke mû adesizion so ague oko na ye so e bâ, e mä nga so anzere na e wala anzere na e ape. Me tongana e luti gï na ndö ti aye so e bâ wala e mä na ngoi so e yeke mû akota desizion, e peut ti wara akpale. Ngbanga ti nyen? Ngbanga ti so aye so e bâ nga e mä ayeke lakue na lege ni ape. Même tongana ayeke na lege ni, tongana e tambela gï na lege ti ye so lê ti e abâ, e peut ti sara sanka ti awango ti Nzapa nga na ye so bê ti lo aye (Zo-ti. 11:9; Mat. 24:​37-39). Me tongana e tambela na lege ti mabe, e yeke mû adesizion so “anzere biani na lê ti Seigneur.” (aÉph. 5:10). Ti sara ye alingbi na awango ti Nzapa ayeke sara si e duti na siriri ti bê nga e duti biani na ngia (Ps. 16:​8, 9; És. 48:​17, 18). Tongana e ngbâ ti tambela na lege ti mabe, e yeke wara ande fini ti lakue lakue.—Diko 2 aCorinthien 4:18.

4. Tongana nyen la mbeni zo apeut ti hinga wala lo yeke tambela na lege ti mabe wala na lege ti ye so lê abâ?

⁴ Tongana nyen la e peut ti hinga wala e yeke tambela na lege ti mabe wala na lege ti ye so lê abâ? Ti hinga ni a yeke nzoni e hunda terê ti e: Nyen la ayeke fa lege na e na ngoi so e yeke mû adesizion? Eskê gï aye so e bâ la ayeke fa lege na e? Wala e sara confiance na awango ti Jéhovah ti fa lege na e? Zia e bâ fadeso tongana nyen la e peut ti ngbâ ti tambela na lege ti mabe na yâ ti aye ota so ayeke kota mingi: na ngoi so e yeke soro kua ti nginza, na ngoi so e yeke soro mbeni zo ti sara mariage na lo nga na ngoi so e wara afango lege so alondo na bungbi ti Jéhovah. Na yâ ti ye ni oko na oko, e yeke bâ aye so e doit ti gbu li na ndö ni tongaso si e mû anzoni desizion.

NA NGOI SO MO YEKE SORO KUA TI NGINZA

5. Na ngoi so e yeke soro kua ti nginza, nyen la a yeke nzoni e gbu li na ndö ni?

⁵ E kue e ye ti wara aye so e na afami ti e, e bezoin ni (Zo-ti. 7:12; 1 Tim. 5:8). Ambeni kua ayeke dä so a payé zo dä nzoni mingi. Akua tongaso apeut ti aidé zo ti wara nginza so lo bezoin ni ndali ti lango oko oko nga ti bata mbeni ndali ti kekereke. Me ti ambeni kua amû lege na zo ti wara gï aye so lo na azo ti sewa ti lo abezoin ni. Na ngoi so e yeke mû desizion ti yeda ti sara mbeni kua, a yeke na lege ni ti hinga a yeke payé e oke. Me tongana ayeke gï ye so e pensé na ni la, andâ ye so lê abâ la ayeke fa lege na e.

6. Tongana nyen la e peut ti tambela na lege ti mabe na ngoi so e yeke soro kua ti nginza? (aHébreu 13:5).

⁶ Tongana e yeke tambela na lege ti mabe, e yeke gi nga ti hinga ye so kua ni apeut ti sara na ndö ti songo ti e na Jéhovah. E peut ti hunda terê ti e: ‘Eskê na sarango kua ni mbi yeke sara ambeni ye so Jéhovah ake?’ (aProv. 6:​16-19). ‘Eskê kua ni ayeke sara si mbi sara kua ti Jéhovah mingi ape nga peut-être a yeke sara si mbi gue ayo na azo ti sewa ti mbi teti mbeni ngoi so aninga?’ (aPhil. 1:10). Tongana kiringo tënë na ahunda so ayeke en, a yeke na lege ti ndara ape ti yeda na kua ni même tongana a yeke ngangu ti wara kua. So e yeke tambela na lege ti mabe, e yeke mû adesizion so afa so e hinga so nyen na nyen, Jéhovah ayeke mû na e aye so e bezoin ni.—Mat. 6:33; diko aHébreu 13:5.

7-8. Tongana nyen la mbeni ita-koli na Amérique du sud afa so lo tambela na lege ti mabe? (Bâ nga foto.)

⁷ Bâ tongana nyen la ita-koli Javier,a so ayeke na Amérique du sud, abâ lani so a yeke kota ye ti tambela na lege ti mabe. Lo tene: “Mbi zia lani demande ti sara mbeni kua so a yeke payé mbi akono fani use ahon ti so mbi yeke wara na a nzere na mbi mingi.” Ye oko, Javier aye lani mingi ti sara kua ti pionnier. Lo kiri lo tene: “A leke lani ti tene kota zo so ayeke bâ ndo na ndö ti kua ni na yâ ti kodro ni kue asara lisoro na mbi ndali ti kua ni. Kozo na lisoro ni, mbi sambela Jéhovah ti aidé mbi ndali ti so mbi hinga biani so lo hinga ye so ayeke nzoni mingi ndali ti mbi. Na place ti kua ti mbi, mbi ye lani ti wara ambeni kua nga ti tene a payé mbi akono, me mbi yeke sara kua ni so ape tongana akanga lege na mbi ti sara kua ti Jéhovah mingi.”

⁸ Javier atene: “Na ngoi ti lisoro ni, kota zo ni atene so a yeke hunda ande na mbi fani mingi ti sara kua ahon l’heure. Na nengo zo, mbi fa na lo so mbi yeke sara ni ape ndali ti vorongo Nzapa ti mbi.” Tongaso, Javier ake ti sara kua ni. Yenga use na pekoni, lo komanse kua ti pionnier. Ambeni ngoi na pekoni na yâ ti ngu ni so, lo wara mbeni kua so amû ngoi ti lo mingi ape. Lo tene: “Jéhovah amä sambela ti mbi na lo mû na mbi mbeni kua so amû lege na mbi ti sara kua ti pionnier. Mbi yeke na ngia mingi so mbi yeke na mbeni kua so amû lege na mbi ti mû ngoi mingi ti sara kua ndali ti Jéhovah nga ndali ti aita ti mbi.”

9. Nyen la mo manda na lege ti ye so asi na Trésor?

⁹ Ka tongana e bâ so kua so e yeke sara fadeso amû lege na e ape ti tambela na lege ti mabe? Bâ ye so asi na Trésor so ayeke na Congo Démocratique. Lo tene: “Fini kua ti mbi ayeke mbeni kua so mbi ye lani mingi ti sara. A payé lani mbi ahon kua so mbi yeke sara kozo fani ota nga azo ane mbi mingi.” Me fani mingi Trésor ayeke manke abungbi ndali ti so lo yeke sara kua ahon l’heure. A yeke pusu nga lani lo ti kanga lê na ndö ti aye so a yeke sara na place ti kua ni so ayeke na lege ni ape. Trésor aye lani ti ke kua ni, me lo gi bê ti lo so lo yeke wara mbeni kua ape. Nyen la aidé lani lo? Lo tene: “Habakuk 3:​17-19 a-aidé mbi ti comprendre so même tongana mbi ke kua ni si mbi wara nginza mingi ape, nyen na nyen Jéhovah ayeke bâ lege ti mbi. Tongaso, mbi ke kua ni.” Lo tene: “Gbâ ti azo so ayeke mû azo na kua apensé so tongana a payé zo nzoni ndali ti mbeni kua, lo yeke dö aye kue lo zia, na tapande sewa ti lo nga na vorongo Nzapa ti lo, ti sara kua ni. Mbi yeke na ngia so mbi bata lani songo ti mbi na Jéhovah nga na azo ti sewa ti mbi. Ngu oko na pekoni, Jéhovah a-aidé mbi ti wara mbeni nzoni kua so amû lege na mbi ti wara aye so mbi yeke na bezoin ni nga ti wara ngoi mingi ti sara kua ti Jéhovah. Tongana e zia Jéhovah kozo, teti mbeni ngoi e peut ti wara kpale ti nginza, me Jéhovah ayeke bâ lege ti e.” Tâ tënë, tongana e sara confiance na awango ti Jéhovah nga na azendo ti lo, e yeke ngbâ ti tambela na lege ti mabe nga lo yeke sara tufa na ndö ti e.

NA NGOI SO MO YEKE SORO MBENI ZO TI SARA MARIAGE NA LO

10. Nyen la apeut ti sara si e tambela na lege ti ye so lê abâ na ngoi so e yeke soro mbeni zo ti sara mariage na lo?

¹⁰ Mariage ayeke mbeni cadeau so alondo na Jéhovah na a yeke na lege ni ti duti na nzara ti sara mariage. Na ngoi so mbeni ita-wali ayeke pensé na mbeni ita-koli so apeut ti sara mariage na lo, peut-être lo yeke bâ asarango ye ti ita-koli ni, pendere ti lo, bango ndo ti azo na ndö ti lo, nginza so lo yeke ni, akua so lo yeke sara na yâ ti sewa nga na aye so ita-koli ni ayeke sara ti zia ngia na bê ti lo.b Aye so kue ayeke kota ye. Ye oko, tongana gï aye ni so la lo yeke bâ, lo peut ti tambela na lege ti ye so lê abâ.

11. Tongana nyen la e peut ti tambela na lege ti mabe na ngoi so e yeke soro mbeni zo ti sara mariage na lo? (1 aCorinthien 7:39).

¹¹ Jéhovah ayeke duti na ngia mingi ndali ti aita-koli na aita-wali so asara ye alingbi na awango ti lo na ngoi so ala yeke soro mbeni zo ti sara mariage na lo. Na tapande, ala sara ye alingbi na wango ti Bible so ahunda ti “kpengba koli wala wali awe” kozo ti bâ terê na mbeni zo ndali ti mariage (1 aCor. 7:36). Ala yeke gi mbilimbili ti bâ wala zo so ala ye ti sara mariage na lo ayeke na asarango ye so Jéhovah atene nzoni koli ti wali wala nzoni wali ti koli adoit ti duti na ni (aProv. 31:​10-13, 26-28; aÉph. 5:33; 1 Tim. 5:8). Tongana mbeni zo so ayeke Témoin ape asara nzara ti ala, ala yeke sara ye alingbi na wango so a hunda ti sara mariage “gï na yâ ti Seigneur” tongana ti so a fa na 1 aCorinthien 7:39. (Diko ni.) Ala yeke ngbâ ti tambela na lege ti mabe ndali ti so ala hinga so Jéhovah apeut ti aidé ala ti kanga nzara ti bê ti ala.—Ps. 55:22.

12. Nyen la mo manda na lege ti tapande ti Rosa?

¹² Bâ tapande ti Rosa so ayeke pionnier na Colombie. Kua ti lo asara si lo yeke wara terê fani mingi na mbeni koli so ayeke Témoin ape so akomanse ti sara nzara ti lo. Rosa aye lo. Lo tene: “Lo kpa nzoni koli. Lo yeke aidé azo ti ndo so lo yeke dä nga na bango ni lo yeke biani nzoni zo. Lo yeke sara ye na mbi na nzoni bê. Lo yeke na asarango ye kue so mbi ye na mbage ti mbeni koli, me lo yeke Témoin ape”. Lo kiri lo tene: “A yeke lani ngangu na mbi ti tene na lo so mbi ye ape. Na ngoi ni so, mbi bâ lani so mbi yeke gï mbi oko nga mbi ye ti sara mariage, me mbi wara mbeni ita-koli ape.” Me Rosa azia lani li ti lo gï pëpe na ndö ti ye so lo bâ. Lo gbu lani li ti lo na ndö ti ye so desizion ti lo apeut ti sara na ndö ti songo ti lo na Jéhovah. Tongaso, lo zia si ye oko atingbi lo na koli ni encore ape na lo mû ngoi mingi ti sara kua ti Jéhovah. Kete na pekoni, a tisa lo na Ekole ti awafango nzoni tënë ti Royaume na fadeso lo yeke pionnier spécial. Rosa atene: “Jéhovah asara si mbi yeke na ngia mingi.” A yeke lakue kete ye ape ti sara ye so Jéhovah aye e sara, mbilimbili tongana e ye mbeni ye mingi. Me tongana e zia si apensé ti Jéhovah afa lege na e, e yeke bâ nzoni dä lakue.

NA NGOI SO MO WARA AFANGO LEGE SO ALONDO NA BUNGBI TI JÉHOVAH

13. Nyen la apeut ti pusu e ti tambela na lege ti ye so lê abâ na ngoi so e wara fango lege na mbage ti bungbi Jéhovah?

¹³ E yeke wara ka afango lege ti bungbi ti Jéhovah na lege ti a-ancien, surveillant ti circonscription, bureau ti filiale wala na lege ti Bebungbi. Afango ye so ayeke ti aidé e ti voro Jéhovah. Me na ambeni ngoi, e peut ti comprendre ape mbeni ye so aita afa na e ti sara. E peut ti bâ gï akpale so apeut ti si na peko ti ye so a fa na e ti sara. E peut même ti komanse ti bâ gï awokongo ti aita-koli so afa ye ni na e.

14. Nyen la ayeke aidé e ti tambela na lege ti mabe na ngoi so bungbi ti Jéhovah afa na e mbeni ye ti sara? (aHébreu 13:17).

¹⁴ Tongana e yeke tambela na lege ti mabe, e yeke na confiance so Jéhovah la ayeke fa lege na bungbi ti lo nga lo hinga ye so ayeke nzoni mingi ndali ti e. A sara si e yeke nduru ti mä yanga na e yeke sara ni na nzoni bibe. (Diko aHébreu 13:17.) E hinga so mango yanga ayeke sara si beoko aduti na yâ ti congrégation (aÉph. 4:​2, 3). E yeke nga na confiance so atâa so aita so ayeke mû li ni ayeke mbilimbili-kue ape, tongana e mä yanga ti ala, Jéhovah ayeke sara tufa na ndö ti e (1 Sam. 15:22). Tongana ngoi ni alingbi, lo yeke leke ye kue so a bezoin biani ti leke ni.—Mi. 7:7.

15-16. Nyen la a-aidé lani mbeni ita-koli ti tambela na lege ti mabe atâa so lo yeke na kite na ndö ti fango lege so lo wara? (Bâ nga foto.)

¹⁵ Gbu li na ndö ti mbeni ye so asi so afa so tongana e tambela na lege ti mabe e yeke bâ nzoni dä. Na Pérou, atâa so Espagnol la a yeke tene ni mingi na yâ ti kodro ni, gbâ ti azo ayeke tene yanga ti kodro ti ndo so ala yeke dä. Mbeni yanga ti kodro ni ayeke Quechua. Teti angu mingi, aita so ayeke tene Quechua ayeke gi azo so ayeke tene ni na yâ ti territoire ti ala. Ye oko, ti sara ye alingbi na andia ti azo ti gouvernement, a sara achangement na yâ ti kode ti gingo azo ni (aRom. 13:1). Ambeni ita agi bê ti ala so afini kode ni so ayeke sara si kua ti fango tënë aga ngangu. So aita asara ye alingbi na achangement ni, Jéhovah asara tufa na ndö ti a-effort so ala sara ti gi azo so ayeke tene Quechua.

¹⁶ Kevin so ayeke ancien na yâ ti mbeni congrégation ti yanga ti Quechua ayeke na popo ti azo so agi bê ti ala. Lo tene: “Mbi hunda lani terê ti mbi: ‘Fadeso, e yeke wara azo so ayeke tene Quechua tongana nyen?’” Nyen la Kevin asara lani? Lo tene: “Mbi gbu li na ndö ti aProverbe 3:5. Mbi gbu nga li na ndö ti Moïse. Lo doit lani ti sigi na azo ti Israël na Égypte, lo mû mbeni lege so na bango ni ayeke gue na ala na kuâ, lege so lo mû asara si a yeke ngangu ape ti tene azo ti Égypte awara ala. Me lo mä yanga ti Jéhovah, na Jéhovah asara tufa na ndö ti lo na mbeni fason so apika bê mingi.” (Ex. 14:​1, 2, 9-11, 21, 22). Kevin ayeda lani ti fa tënë na mbeni kode nde. Ye ti peko ni ayeke nyen? Lo tene: “Fason so Jéhovah asara tufa na ndö ti e ahon gbungo li ti mbi. Kozo, na fango tënë e yeke tambela ngbii na e yeke wara gï zo oko wala use so ayeke tene yanga ti Quechua. Fadeso e yeke fa tënë gï na yâ ti aterritoire so gbâ ti azo so ayeke tene Quechua ayeke dä. A sara si e yeke sara lisoro na azo mingi, e yeke na gbâ ti avisite nga na a-étude. Azo mingi ayeke ga na abungbi.” Biani, tongana e tambela na lege ti mabe, Jéhovah ayeke futa e lakue.

17. Nyen la mo manda na yâ ti article so?

¹⁷ E bâ fade tongana nyen ti ngbâ ti tambela na lege ti mabe na yâ ti aye ota so ayeke kota mingi. Me e doit ti ngbâ ti tambela na lege ti mabe na yâ ti aye kue so e yeke sara na yâ ti gigi ti e, na tapande angia so e yeke soro ti sara wala aye so e yeke sara na ngoi so e yeke wu terê ti e nga na ngoi so e yeke mû desizion na ndö ti mandango mbeti wala batango amolenge. Atâa desizion wa la e doit ti mû, a yeke nzoni e zia pëpe si gï aye so lê abâ la afa lege na e, me a yeke nzoni e gbu nga li na ndö ti songo ti e na Jéhovah, awango ti lo nga na zendo so lo mû ti bâ lege ti e. Tongana e sara ni, e yeke wara lege ti “tambela ande na iri ti Jéhovah Nzapa ti e lakue lakue nga kpu na kpu.”—Mi. 4:5.