Maboko ti Jéhovah ayeke nduru ape

1. Tongana nyen la Moïse afa so lo sara confiance na Jéhovah na ngoi so lo yeke sigi na azo ti Israël na Égypte?

MBETI na aHébreu asara tënë ti gbâ ti azo so ayeke lani na mabe na Jéhovah. Moïse so ayeke oko ti ala ayeke lani na kota mabe (aHéb. 3:​2-5; 11:​23-25). Lo fa so lo yeke na mabe na ngoi so lo yeke sigi na azo ti Israël na Égypte. Lo sara lani mbeto ti Pharaon na aturugu ti lo ape. So lo yeke na confiance na Jéhovah, lo hon na azo ti Israël na yâ ti Kota Ngu-Bengba nga na pekoni na yâ ti benyama (aHéb. 11:​27-29). Mingi ti azo ti Israël ayeke lani na confiance encore ape so Jéhovah ayeke bâ lege ti ala me Moïse angbâ ti sara confiance na lo. Lo yeke lani na raison ti sara confiance na Jéhovah, ndali ti so lo mû ngu na kobe na azo ti Israël na yâ ti benyama so ahule.a—Ex. 15:​22-25; Ps. 78:​23-25.

2. Ngbanga ti nyen la Nzapa ahunda Moïse atene: “Maboko ti Jéhovah ayeke nduru mingi”? (Nombre 11:​21-23).

² Atâa so Moïse ayeke lani na kota mabe, ngu oko tongaso na peko ti so Jéhovah azi azo ti Israël na lege ti miracle, lo hunda terê ti lo wala Jéhovah apeut ti mû nyama na azo ti Lo. Moïse apeut lani ape ti imaginé tongana nyen la Jéhovah apeut ti mû nyama alingbi na azo kutu mingi so asara camp na yâ ti benyama. Tongaso, Jéhovah ahunda Moïse: “Maboko ti Jéhovah ayeke nduru mingi?” ( Diko Nombre 11:​21-23.) Ge, tënë “maboko ti Jéhovah” aye ti sara tënë ti yingo vulu ti Nzapa wala ngangu so lo yeke sara na aye. Ti vrai ni, hundango tënë ti Jéhovah na Moïse lani ayeke so: ‘Eskê ti vrai ni mo pensé so mbi peut ti sara ape ye so mbi tene mbi yeke sara?’

3. Ngbanga ti nyen la a yeke kota ye ti tene e gbu li na ndö ti hunda so Jéhovah ahunda na Moïse?

³ Eskê a si awe so mo hunda terê ti mo wala Jéhovah ayeke mû na mo na azo ti sewa ti mo aye so ala bezoin ni? Tongana a si na mo awe wala ade, zia e bâ ndani so Moïse na azo ti Israël ayeke lani na confiance ape so Jéhovah ayeke mû na ala ye so ala bezoin ni. E yeke bâ nga ambeni versê ti Bible so apeut ti aidé e ti duti na confiance so Jéhovah apeut lakue ti mû maboko na e.

MANDA YE NA LEGE TI TAPANDE TI MOÏSE NA AZO TI ISRAËL

4. Nyen la asara si azo ti Israël mingi akomanse ti duti na kite so Jéhovah ayeke mû na ala aye so ala bezoin ni?

⁴ Ngbanga ti nyen la azo ti Israël akomanse ti duti na kite so Jéhovah ayeke mû na ala aye so ala bezoin ni? A ninga awe la azo ti Israël nga na “gbâ ti azo nde nde” so asigi na Égypte ayeke tambela na yâ ti benyama ti gue na Sese ti zendo (Ex. 12:38; Deut. 8:15). Gbâ ti azo so ayeke azo ti Israël ape nga na azo ti Israël ayeke te lani manne na ala ye ni encore ape, tongaso ala komanse ti dema terê (Nom. 11:​4-6). Ala komanse ti pensé na kobe so ala yeke te lani na Égypte. So azo ni ayeke dema na terê ti Moïse, lo pensé lani so lo doit ti gi na ala nyama, me lo hinga ndo so lo yeke wara ni dä ape.—Nom. 11:​13, 14.

5-6. Nyen la e peut ti manda na lege ti ye so gbâ ti azo ni apusu azo ti Israël ti sara?

⁵ Azo so ayeke azo ti Israël ape akiri lani singila na Jéhovah ape ndali ti aye so lo mû na ala, na azo ti Israël akomanse ti pensé tongana ala. Mara ti ye tongaso apeut nga ti si na e. Tongana azo so angoro e ayeke kiri singila ape, e nga kue e peut ti komanse ti duti na ngia ape na aye so Jéhovah amû na e. A peut ti si tongana aye so e yeke na ni ândö akomanse ti manke e wala e komanse ti sara bê na terê ti azo ndali aye so ala yeke na ni. Me e yeke duti na ngia mingi tongana e manda ti duti na ngia na aye so e yeke na ni.

⁶ Azo ti Israël adoit lani ti girisa ape so Nzapa atene na ala so tongana ala si na fini ndo ti ala, ala yeke wara aye so ala bezoin ni gbani gbani. Zendo so adoit lani ti ga tâ tënë na Sese ti zengo me pëpe na ngoi so ala yeke tambela na yâ ti benyama. E nga kue e peut ti duti na ngia tongana e pensé mingi ape na ndö ti aye ti ngoi so, me na ndö ti anzoni ye so Jéhovah amû zendo ti mû na e na yâ ti fini dunia. E peut nga ti gbu li na ndö ti aversê so apeut ti aidé e ti sara confiance mingi na Jéhovah.

7. Ngbanga ti nyen la e peut ti duti sûr so Jéhovah ayeke aidé e lakue?

⁷ Mo peut ti hunda terê ti mo na ndani so Nzapa ahunda Moïse, lo tene: “Maboko ti Jéhovah ayeke nduru mingi?” Na ngoi so Jéhovah ahunda Moïse na tënë so ayeke na Nombre 11:​23, lo ye lani ti tene lo gbu li na ndö ti aye use: (1) Ngangu ti Lo ayeke mingi. (2) Lo peut ti sara kua na ngangu ti lo ni na ndo kue même na ando so ayo. Nzapa apeut ti mû gbâ ti anyama ti tengo ni na azo ti Israël atâa so ala yeke na yâ ti benyama so ayo. Nzapa afa na ala ngangu ti lo “na lege ti ngangu maboko, ngangu maboko so lo yôro ni”. (Ps. 136:​11, 12). Tongaso, tongana e yeke na yâ ti ngangu kpale, e peut ti duti sûr so Jéhovah apeut ti mû maboko na e oko oko kue na ndo kue so e yeke dä.—Ps. 138:​6, 7.

8. Nyen la ayeke aidé e ti sara pëpe oko faute so gbâ ti azo ti Israël asara lani na yâ ti benyama? (Bâ nga foto.)

⁸ Jéhovah asara ye alingbi na zendo ti lo, lo mû gbâ ti adodoro na azo ti lo. Ye oko, azo ti Israël akiri singila na Nzapa ndali ti miracle so ape. Me gbâ ti ala aga azo so asara bê ti ye. Na yâ ti lango oko na ndambo, ala ro gbâ ti adodoro ahon ti so ala doit fade ti ro. Jéhovah asara ngonzo ngangu na terê ti “azo so asara bê ti ye” na lo futi ala (Nom. 11:​31-34). E peut ti manda ye na lege ti tapande so. E doit ti sara hange si e sara bê ti ye ape. Atâa e yeke zo ti mosoro wala wayere, a yeke nzoni ye so aduti na kozo ndo na yâ ti fini ti e ayeke ti ‘bungbi amosoro ndali ti e wani na yayu’ na lege so e gi ti duti na kpengba songo na Jéhovah nga na Jésus (Mat. 6:​19, 20; Luc 16:9). Tongana e sara ni, e peut ti duti sûr so Jéhovah ayeke mû na e aye so e bezoin ni.

9. Nyen la e peut ti duti na confiance kue na ni?

⁹ Jéhovah ayeke nduru ti aidé azo ti lo laso. Me, a ye ti tene ape so e yeke wara lâ oko ape kpale ti nginza wala kobe ayeke manke e ape.b Me e peut biani ti duti na confiance so Jéhovah ayeke duti lakue dä ndali ti e. Lo yeke mû maboko na e na yâ ti akpale nde nde so e yeke wara. Tongana nyen la e peut ti fa so e yeke na confiance so Jéhovah ayeke mû na e aye so e bezoin ni? Zia e bâ aye use so na yâ ni e peut ti fa ni: (1) na ngoi so e yeke na kpale ti nginza nga (2) na ngoi so e yeke pensé na kekereke.

NA NGOI SO E YEKE NA KPALE TI NGINZA

10. Akpale wa la apeut ti ga na e kpale ti nginza?

¹⁰ So aye ti ngoi so aga nduru ti hunzi, e peut ti ku ti tene kpale ti nginza ague na li ni mingi. Kpale ti poroso, bira, akota kpale tongana ngu so asuku amû ndo wala sese so ayengi, wala afini kobela so amû ndo apeut ti sara si e dépensé nginza sân ti ku terê ti e na ni wala apeut ti sara si e perdre kua ti e, aye ti e wala da ti e. Peut-être e doit ti gi mbeni fini kua na fini ndo so e yeke dä wala e pensé ti gue na sewa ti e na mbeni ndo tongaso si ala wara ye so ala bezoin ni. Nyen la apeut ti aidé e ti mû adesizion so afa so e sara confiance na Jéhovah?

11. Nyen la apeut ti aidé mo ti gbu lê ni na ngoi so mo wara kpale ti nginza? (Luc 12:​29-31).

¹¹ A yeke kota ye mingi ti fa agingo bê ti mo na Jéhovah (aProv. 16:3). Hunda lo ti mû na mo ndara so mo bezoin ni ti mû anzoni desizion nga ti tene lo mû na mo siriri ti bê tongaso si kpale ni asara si bê ti mo ‘aduti gï na nduzu’ ape. (Diko Luc 12:​29-31.) Ngbâ ti hunda lo ti aidé mo ti duti na ngia na aye so mo yeke tâ na bezoin ni ti vivre (1 Tim. 6:​7, 8). Sara recherche na yâ ti ambeti ti e ti hinga anzoni ye so mo peut ti sara na ngoi so mo yeke na kpale ti nginza. Azo mingi atene so avidéo nga na a-article so ayeke na ndö ti jw.org na ndö ti kpale ti nginza a-aidé ala.

12. Ahunda wa la apeut ti aidé mbeni Chrétien ti mû anzoni desizion ndali ti sewa ti lo?

¹² Bê ti ambeni zo apusu ala ti sara kua so ahunda ti tene ala voyagé ayo na azo ti sewa ti ala, me fani mingi na pekoni ala bâ so ayeke sioni desizion. Kozo ti sara mbeni fini kua, pensé gï pëpe na nginza so mo yeke wara, me gbu li ti bâ wala ayeke aidé mo na azo ti sewa ti mo ti ngbâ nduru na Jéhovah (Luc 14:28). Hunda terê ti mo: ‘Tongana mbi hon ayo na wali wala koli ti mbi ayeke sara nyen na mariage ti e? Eskê mbi yeke wara lege ti gue na abungbi, ti fa tënë nga ti duti na terê ti aita?’ Tongana mo yeke na amolenge, mo bezoin nga ti hunda terê ti mo na kota hunda so: ‘Tongana mbi yeke na terê ti amolenge ti mbi ape mbi lingbi ti fa ye na ala “alingbi na fango lege nga na wango ti gbotongo mê so alondo na Jéhovah” tongana nyen?’ (aÉph. 6:4). Zia si apensé ti Jéhovah afa lege na mo, me pëpe apensé ti afami wala akamarade so abâ na nene ni ape amama-ndia ti Bible.c Fani mingi a hunda na Tony, so ayeke na Asie de l’ ouest, ti sara kua na kodro-wande. Me na peko ti so lo sambela ndali ni nga lo sara lisoro na wali ti lo, lo ke kua ni nga lo leke ti tene ala dépensé nginza mingi ape. Laso, Tony atene: “Mbi wara pasa ti aidé gbâ ti azo ti hinga Jéhovah nga amolenge ti e aye Jéhovah mingi. Sewa ti e ahinga so tongana e sara ye alingbi na tënë so ayeke na Matthieu 6:​33, Jéhovah ayeke bâ lege ti e.”

NA NGOI SO E YEKE PENSÉ NA KEKEREKE

13. Aye wa la ayeke na lege ni so e peut ti sara ni laso ti aidé e ti wara ande aye so e bezoin ni na ngoi so e ga mbakoro?

¹³ E peut nga ti fa so e sara confiance mingi na Jéhovah na ngoi so e yeke leke aye ndali ti ngoi so e yeke ga ande mbakoro. Bible awa e ti sara kua ngangu tongaso si e peut ti wara aye so e yeke ande na bezoin ni na yâ ti angoi so ayeke ga (aProv. 6:​6-11). A yeke na lege ni ti bata mbeni ye ndali ti kekereke tongana e yeke na moyen ti sara ni. Tâ tënë, nginza apeut ti aidé e na ngoi so e yeke na bezoin ti ambeni ye (Zo-ti. 7:12). Me e doit ti sara pëpe si nginza aga ye so ayeke kota mingi na yâ ti fini ti e.

14. Tongana nyen la aHébreu 13:5 apeut ti aidé e ti gi bê ti e ahon ndö ni ape na ndö ti kekereke?

¹⁴ Jésus afa mbeni toli so afa so a yeke ye ti buba ti bungbi gbâ ti nginza sân ti duti na “mosoro na mbage ti Nzapa.” (Luc 12:​16-21). Zo oko ahinga ape ye so ayeke si kekereke (aProv. 23:​4, 5; Jacq. 4:​13-15). So e yeke adisciple ti Christ, e yeke wara mbeni kpale so ayeke nde. Jésus atene so e doit ti duti nduru ti ‘yeda ti zia aye’ ti e kue ti ga adisciple ti lo (Luc 14:​33, kete tënë na gbe ni). Akozo Chrétien so ayeke na Judée ayeke lani na ngia ti sara tongaso (aHéb. 10:34). Laso, gbâ ti aita aperdre aye ti ala ndali ti so ala ke ti mû mbage ti mbeni bungbi ti poroso (Apoc. 13:​16, 17). Nyen la a-aidé ala ti sara tongaso? Ala yeke na confiance kue na zendo ti Jéhovah so: “Mbi yeke zia ande mo lâ oko pëpe nga mbi yeke girisa mo lâ oko pëpe.” (Diko aHébreu 13:5.) E yeke sara ye so e peut ti sara ti wara aye so e yeke na bezoin ni ndali ti kekereke nga tongana mbeni ye so e ku terê ti e na ni ape asi, e yeke na confiance so Jéhovah ayeke aidé e.

15. Bango ndo wa la a yeke nzoni ababâ na amama so ayeke aChrétien aduti na ni na ndö ti amolenge ti ala? (Bâ nga foto.)

¹⁵ Na ambeni ndo, azo ayeke dü amolenge ndali ti so ala ye ti tene amolenge ni awara gbâ ti nginza tongaso si ala bâ lege ti ala na ngoi so ala ga mbakoro. Me Bible atene so ababâ na amama la adoit ti bâ lege ti bezoin ti amolenge (2 aCor. 12:14). Tâ tënë, tongana ababâ na amama aga mbakoro, amolenge ti ala apeut ti mû na ala nginza nga na ambeni ye, na amolenge mingi ayeke na ngia ti mû na ababâ na amama ti ala aye so ala bezoin ni (1 Tim. 5:4). Me ababâ na amama so asara confiance na Jéhovah ahinga so ala yeke duti na ngia mingi tongana ala aidé amolenge ti ala ti ga awakua ti Jéhovah ahon ti tene ala aidé ala ti tene kekereke ala wara gbâ ti nginza tongaso si ala bâ lege ti ala.—3 Jean 4.

16. Tongana nyen la ababâ na amama apeut ti aidé amolenge ti ala tongaso si tongana ala kono ala peut ti bâ lege ti ala wani? (aÉphésien 4:28).

¹⁶ Na lege ti tapande ti mo, fa na amolenge ti mo ti sara confiance na Jéhovah na ngoi so mo yeke aidé ala ti tene ande ala wani abâ lege ti abezoin ti ala. Na ngoi so ala ngbâ kete, fa na ala so a yeke kota ye ti sara kua ngangu (aProv. 29:21; diko aÉphésien 4:28.) Na ngoi so ala yeke kono, aidé ala ti diko mbeti nzoni na ekole. Ababâ na amama apeut ti sara recherche ti wara amama-ndia ti Bible nga ti aidé amolenge ti mû nzoni desizion na ndö ti mandango mbeti. Ye so ala yeke gi ayeke ti aidé amolenge ti ala ti wara lege ala wani ti bâ lege ti abezoin ti ala nga ti fa tënë mingi wala même ti ga pionnier.

17. Nyen la e peut ti duti sûr na ni?

¹⁷ Awakua ti Jéhovah so ayeke be-ta-zo apeut ti duti sûr so lo yeke na ngangu nga lo ye ti bâ lege ti abezoin ti ala. Na ngoi so e yeke pusu nduru na hunzingo ti aye ti ngoi so, a peut ti duti kete ye ape ti sara confiance na Jéhovah. Me atâa nyen la asi, zia e leke na bê ti e ti ngbâ ti duti na confiance so Jéhovah ayeke sara kua na ngangu ti lo ti mû na e aye so e bezoin ni. Zia e duti sûr so Jéhovah ayeke na ngangu ti aidé e lakue atâa ndo wa la e yeke dä.