Ti ga akota kamarade ti aita ayeke sara nzoni na e

1-2. Mbeni ye so ayeke kota mingi na lê ti Jéhovah ayeke so wa? Nyen la lo ye ti tene e sara?

FASON so e yeke sara ye na azo ayeke kota mingi na lê ti Jéhovah. Jésus afa na e so e doit ti ndoye amba ti e tongana terê ti e wani (Mat. 22:​37-39). Ye so afa so e doit ti sara ye na nzoni bê même na azo so ayeke voro Jéhovah ape. Tongana e sara ni andâ e mû tapande ti Jéhovah Nzapa so lo “sara si lâ ti lo asu na ndö ti azo ti sioni nga na azo ti nzoni. Nga, lo sara si ngu-nzapa apika na ndö ti azo ti mbilimbili nga na azo so ayeke mbilimbili pëpe.”—Mat. 5:45.

² Atâa so Jéhovah aye azo kue, lo ye mingi azo so ayeke sara ye na lege ni (Jean 14:21). Lo ye ti tene e sara ye tongana lo. Lo wa e ti ‘ndoye aita ngangu’ nga ti fa na ala “tâ yengo terê”. (1 Pi. 4:8; aRom. 12:10). Ndoye so ayeke tongana ti so e ye na mbeni fami wala mbeni kota kamarade ti e.

3. Nyen la e doit ti girisa ape na ndö ti ndoye?

³ Ndoye ayeke tongana mbeni keke wala fleur so e lu so e doit ti bâ lege ni si akono. Bazengele Paul awa aChrétien, atene: “Zia yengo terê ti ala ti aita angbâ ti gue.” (aHéb. 13:1). Jéhovah aye ti tene e ngbâ ti gi ti ye amba ti e. Article so ayeke fa na e ndani so a yeke nzoni e ga nduru mingi na amba ti e aChrétien nga tongana nyen la e peut ti ngbâ ti sara ni.

NDANI SO A YEKE NZONI E GA NDURU MINGI NA MBA

4. Tongana ti so Psaume 133:1 afa, tongana nyen la e peut ti sara kue ti ngbâ ti bâ na nene ni beoko so ayeke na popo ti e na aita? (Bâ nga afoto.)

⁴ Diko Psaume 133:1. E yeda na tënë ti zo ti sungo psaume so, so lo tene ti duti kamarade ti azo so aye Jéhovah ayeke “nzoni mingi” nga ‘anzere mingi’. Me tongana ti so mbeni zo apeut ti bâ pëpe pendere ti mbeni keke so lo yeke bâ ni lâ na lâ, e peut ti bâ pëpe pendere ti beoko so ayeke na popo ti e aChrétien. E yeke bâ ka aita fani mingi, peut-être e yeke bâ ala fani mingi na yâ ti yenga. Tongana nyen la e peut ti ngbâ ti bâ ala na nene ni? Tongana e mû ngoi ti gbu li ti bâ tongana nyen la congrégation ayeke tâ na bezoin ti aita nga e yeke tâ na bezoin ti ala, e yeke ye ala mingi.

5. Tongana azo abâ so e ye terê na popo ti e ayeke sara ala tongana nyen?

⁵ Ambeni zo so aga na bungbi ti kozo ni si abâ ndoye so ayeke na popo ti e apika bê ti ala mingi. A peut ti sara si ala bâ so ala wara tâ tënë awe. Jésus atene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:35). Bâ ye so asi na Chaithra so ayeke manda mbeti na université so aTémoin ti Jéhovah ayeke manda Bible na lo. A tisa lo lani ti ga na mbeni kota bungbi ti lango ota, lo yeda. Na peko ti kozo lango ni, lo tene na ita so ayeke manda Bible na lo, lo tene: “Babâ na mama ti mbi agbu mbi lâ oko na kate ape. Me na kota bungbi ti ala gï na yâ ti lango oko, azo 52 agbu mbi na kate ti ala. Mbi bâ so Jéhovah asara kua na azo so ti sara si mbi bâ so a ye mbi. Mbi ye ti duti na yâ ti sewa so.” Chaithra angbâ lani ti manda Bible na lo wara batême na 2024. Tâ tënë, tongana afini zo abâ anzoni ye so e sara, na tapande ndoye so e fa na mba, mingi ni, ayeke pusu ala ti voro Jéhovah.—Mat. 5:16.

6. Tongana nyen la ti ga nduru mingi na aita ayeke bata e?

⁶ Ti ga nduru mingi na aita ti e apeut ti bata e. Paul awa amba ti lo aChrétien, lo tene: “Ala ngbâ ti wa terê na popo ti ala lâ oko oko, . . . si bê ti mbeni zo na popo ti ala akpengba pëpe ndali ti ngangu so siokpari ayeke na ni ti handa zo.” (aHéb. 3:13). Tongana e découragé mingi na e bâ so a yeke ngangu na e ti ngbâ ti sara ye na lege ni, Jéhovah apeut ti sara si mbeni mba ti e Chrétien abâ ni na lo mû maboko na e (Ps. 73:​2, 17, 23). Mara ti mungo maboko tongaso ayeke sara biani nzoni na e.

7. Kamba wa la ayeke na popo ti ndoye na beoko? (aColossien 3:​13, 14).

⁷ E yeke na yâ ti groupe ti azo so ayeke sara ngangu ti ndoye terê na popo ti ala, ndani la e yeke wara gbâ ti atufa (1 Jean 4:11). Na tapande, ndoye apusu e ti “ngbâ ti kanga bê na amba” na popo ti e na a-aidé e ti duti beoko. (Diko aColossien 3:​13, 14; aÉph. 4:​2-6.) Tongaso, na ngoi ti abungbi ti e, e yeke na ngia nga na siriri so a yeke wara mara ni na mbeni ndo nde na ndö ti sese so ape.

E NE TERÊ NA POPO TI E

8. Na lege wa la Jéhovah a-aidé e ti duti beoko na aita ti e?

⁸ Beoko so ayeke na popo ti aita na ndö ti sese kue ayeke mbeni miracle. Jéhovah asara si e yeke beoko atâa so e yeke mbilimbili-kue ape (1 aCor. 12:25). Bible atene so ‘Nzapa afa na e ti ye terê na popo ti e.’ (1 aThes. 4:9). Ye so aye ti fa so, Jéhovah asara kua na Bible ti fa na e tâ ye so e bezoin ti sara ti ga nduru mingi na mba. E peut ti zia si ‘Nzapa afa ye na e’ na lege so e manda nzoni aye so lo fa na e nga e sara ye alingbi na ni (aHéb. 4:12; Jacq. 1:25). A yeke tâ gï ye so aTémoin ti Jéhovah ayeke sara ngangu ti sara la.

9. A-Romain 12:​9-13 afa na e nyen na ndö ti‘tënë ti nengo mba na popo ti e’?

⁹ Nyen la Bible afa na e ti sara ti ga nduru mingi na mba? Zia e mä tënë so Paul atene na ndö ni na aRomain 12:​9-13. (Diko ni.) Bâ so lo tene: “Na ndö ti tënë ti nengo mba na popo ti ala, zia ala duti azo so amû li ni kozo ti sara ni.” Tënë so aye ti tene nyen? E doit ti mû li ni ti fa “tâ yengo terê” na amba ti e na pardonengo ala, yambango ala, sarango nzoni bê na ala nga na ambeni ye nde (aÉph. 4:32). Mo bezoin ape ti ku ti tene aita la aga nduru na mo. Mo peut ti ‘mû li ni kozo ti sara ni.’ Jésus atene lani atene: “Mungo ye na zo aga na ngia mingi ahon warango ye na tïtî zo.”—Kus. 20:35.

10. Tongana nyen la e peut ti sara ngangu ti ‘ne mba na popo ti e’? (Bâ nga foto.)

¹⁰ A yeke tâ pendere mingi so kete na peko ti so Paul awa e ti mû li ni ti ne mba na popo ti e, lo wa e ti “sara kua ngangu, [ti] sara goigoi pëpe.” Tongana a mû mbeni kua na zo so ayeke sara kua ngangu, lo yeke sara ni nzoni. A-Proverbe 3:​27, 28 awa e atene: “Gbanzi terê ti mo pëpe ti mû ye ti nzoni na azo so a yeke nzoni mo mû ye na ala, tongana mo yeke na ngangu ti mû maboko na ala.” Tongaso, tongana e bâ so mbeni zo abezoin mungo maboko, hio e yeke sara kue ti aidé lo. E yeke ku kungo ape, wala e yeke tene ape so mbeni zo nde ayeke aidé lo ande senge.—1 Jean 3:​17, 18.

11. Nyen la apeut ti aidé e ti ga nduru mingi na mba?

¹¹ Mbeni ye nde so e peut ti sara ti fa so e ne amba ti e ayeke ti pardonné ala hio tongana ala son bê ti e. A-Éphésien 4:26 atene: “Ala zia lâ akui na ndö ti ala na ngonzo na bê pëpe”. Ngbanga ti nyen? Versê 27 atene tongana e sara tongaso e yeke “zia lege na Zabolo”. Tënë so aye ti tene Jéhovah atene na e fani mingi ti pardonné amba ti e. A-Colossien 3:13 awa e ti “ngbâ ti kanga bê na amba . . . ti pardonné mba na bê ti [e] kue”. Ti pardonné afaute ti amba ti e ayeke mbeni oko ti apendere lege ti ga nduru mingi na ala. Tongana e sara ni, e yeke mû maboko “ti bata beoko ti yingo na yâ ti kamba ti siriri so abungbi [e] oko.” (aÉph. 4:3). A yeke polele so tongana e pardonné mba, e yeke mû maboko na bungbi ti Jéhovah ti duti beoko nga na siriri ahon ti kozo.

12. Jéhovah a-aidé e tongana nyen ti pardonné azo?

¹² Tâ tënë, a peut ti duti ngangu ti pardonné azo so ason bê ti e. Me yingo ti Nzapa apeut ti aidé e ti sara ni. Bible awa e ti “duti na tâ yengo terê na popo” ti e nga ti sara kua ngangu. A kiri atene: “Zia yingo aduti tongana wâ na yâ ti terê ti ala.” Ye so aye ti tene yingo vulu ti Nzapa apeut ti sara si e yapu mingi. Tongaso, yingo ti Nzapa apeut ti aidé e ti ye terê ngangu nga ti pardonné mba na bê kue. Ndani la e yeke voro yanga na Jéhovah na bê ti e kue ti aidé e.—Luc 11:13.

ZIA “KANGBI ADUTI NA POPO TI ALA PËPE”

13. Nyen la apeut ti sara si kangbi aduti na popo ti e?

¹³ Na yâ ti congrégation, mo yeke wara “mara ti azo nde nde kue” so alondo na ando nde nde (1 Tim. 2:​3, 4). Tongana e sara hange ape, so e yeke nde nde apeut ti ga na kangbi na popo ti e ndali ti aye so e soro ti sara, na tapande yungo bongo ti e, coiffe ti e, bango lege ti seni ti e wala angia so e soro ti sara (aRom. 14:4; 1 aCor. 1:10). So ‘Nzapa afa na e ti ye terê na popo ti e’, e doit ti sara hange si e tene ape so gï aye so e soro ti sara la ayeke nzoni ahon ti amba ti e.—aPhil. 2:3.

14. A yeke nzoni e gi lakue ti duti tongana nyen? Ngbanga ti nyen?

¹⁴ E peut nga ti sara si beoko aduti na yâ ti congrégation tongana e gi lakue ti dë bê ti mba nga ti kpengba mba (1 aThes. 5:11). Ade ti ninga ape, gbâ ti aita so afa tënë encore ape wala aga na bungbi encore ape wala so a zi ala na yâ ti congrégation akiri. E yamba ala na ngia (2 aCor. 2:8). Bâ ye so asi na mbeni ita-wali so akiri akomanse ti ga na Da ti Royaume na peko ti ngu bale-oko. Lo tene: “Azo kue ahe ngia na mbi nga ala bara mbi na maboko.” (Kus. 3:19). Asenge ye so, so a sara ni na nzoni bê so asara lo tongana nyen? Lo tene: “A sara si mbi bâ so Jéhovah ayeke aidé lani mbi ti kiri ti duti na ngia.” Tongana e gi ti kpengba azo, Christ apeut ti sara kua na e ti dë bê ti azo so “asara ngangu kua na kungba ane ala”.—Mat. 11:​28, 29.

15. Mbeni ye nde wa la e peut ti sara ti tene beoko aduti na yâ ti congrégation? (Bâ nga foto.)

¹⁵ Mbeni ye nde so e peut ti sara ti maï beoko ayeke na lege ti tënë ti yanga ti e. Job 12:11 atene: “Mê ayeke tara tënë tongana ti so langue ayeke tara kobe ape?” Gï tongana ti so mbeni nzoni zo ti tongo ye ayeke tara kobe so lo tö kozo si lo mû na azo, a yeke nzoni e gbu li nzoni na ndö ti tënë so e yeke tene kozo si e tene ni (Ps. 141:3). E ye lakue ti tene atënë ti e akpengba “azo so ayeke mä ni” nga adë bê ti ala.—aÉph. 4:29.

16. Azo wa mbilimbili la adoit ti kpengba azo na tënë ti yanga ti ala?

¹⁶ A yeke nzoni akoli ti wali nga na ababâ na amama asara kue ti kpengba azo na tënë ti yanga ti ala (aCol. 3:​19, 21; Tite 2:4). So a-ancien ayeke aberger ti ataba ti Jéhovah, a yeke nzoni ala dë bê ti ala nga ala kpengba ala (És. 32:​1, 2; aGal. 6:1). Mbeni proverbe ti Bible adabe ti e, atene: “Tënë so a tene na tâ ngoi ni anzere mingi.”—aProv. 15:23.

ZIA E NDOYE TERÊ “NA LEGE TI KUSALA NGA NA TÂ TËNË”

17. Tongana nyen la e peut ti fa so e ndoye aita na bê ti e kue?

¹⁷ Bazengele Jean awa e ti “ndoye terê na tënë pëpe wala na yanga pëpe, me na lege ti kusala nga na tâ tënë.” (1 Jean 3:18). E ye ti tene yengo so e ye na aita ti e alondo na bê ti e. E peut ti fa ni tongana nyen? Tongana e mû ngoi mingi ti duti na terê ti aita, e yeke ga nduru mingi na ala nga e yeke ye ala mingi. Tongaso, gi alege ti wara ngoi ti duti na terê ti aita na ngoi ti abungbi nga na fango tënë. Mû ngoi ti gue ti bâ ala. Tongana e sara ni, e yeke fa so e yeke azo so “Nzapa afa na ala ti ye terê na popo ti ala.” (1 aThes. 4:9). E yeke bâ nga “tongana nyen a yeke nzoni mingi nga a nzere mingi ti tene aita aduti ndo oko na yâ ti beoko!”—Ps. 133:1.