Aita-koli so ade maseka: Ala mû tapande ti Marc na Timothée

1-2. Akpale wa la apeut lani ti kanga lege na Marc na Timothée ti sara kua mingi ndali ti aita ti congrégation?

AITA-KOLI so ade maseka, eskê ala ye ti sara kua mingi ndali ti Jéhovah nga ti sara aye mingi ti aidé aita na yâ ti acongrégation ti ala? Kite ayeke dä ape so ala ye tongaso. A nzere na e mingi ti bâ gbâ ti aita-koli so ade maseka so ayeda na bê ti ala ti sara kua ndali ti aita (Ps. 110:3). Me ala peut ti wara akpale. Eskê mo ye ti sara kua ti Jéhovah mingi me mo yeke gi bê ti mo ndali ti so mo sara mbeto ti ye so ayeke si ande na mo? Peut-être mo ke mbeni kua so lege azi na mo ti sara na yâ ti kua ti Jéhovah ndali ti so mo pensé so mo peut ti sara ni nzoni ape. Tongana a yeke tongaso, mo la mo yeke kozo zo so apensé tongaso ape.

² Marc na Timothée apensé nga lani tongaso. Me atâa so ala sara mbeto ti ye so apeut ti si na ala wala peut-être ala bâ so ala lingbi ape, ala soro ti sara aye mingi ndali ti Jéhovah. Peut-être Marc na mama ti lo ayeke lango lani na yâ ti mbeni pendere da na ngoi so bazengele Paul na Barnabas atisa lo ti tene ala gue na kozo voyage ti ala ti missionnaire (Kus. 12:​12, 13, 25). Marc azia lani pendere da ti lo so tongaso si lo peut ti sara kua mingi ndali ti Jéhovah. Kozoni, lo gue lani na Antioche. Na pekoni, lo na Paul na Barnabas ague na ando so ayo (Kus. 13:​1-5). Tongana ti lo, peut-être Timothée ayeke lango lani na da ti babâ na mama ti lo na ngoi so Paul atisa lo ti tene lo na lo afa tënë. Timothée ayeke lani maseka, tongaso lo peut lani ti pensé so lo lingbi ape ti tene lo na Paul ague. (Bâ 1 aCorinthien 16:​10, 11 nga na 1 Timothée 4:12.) Me, lo yeda na tisango ndo ti Paul na lo wara gbâ ti anzoni ye na pekoni.—Kus. 16:​3-5.

3. (a) E hinga tongana nyen so Paul abâ lani Marc na Timothée na nene ni? (2 Timothée 4:​6, 9, 11). (Bâ nga afoto.) (b) Ahunda wa la e yeke kiri tënë na ni na yâ ti article so?

³ Marc na Timothée amanda lani ti bâ lege ti gbâ ti akua na yâ ti congrégation na ngoi so ala de maseka. Paul abâ lani amaseka-koli so na nene ni mingi, ni la na ngoi so lo hinga so lo ga nduru ti kui lo hunda na ala ti ga na terê ti lo. (Diko 2 Timothée 4:​6, 9, 11.) Asarango ye wa la Paul aye ni mingi na mbage ti Marc na Timothée? Tongana nyen la aita-koli so ade maseka apeut ti mû tapande ti ala? Apendere wango so Paul amû apeut ti aidé aita-koli so ade maseka laso tongana nyen?

SARA YE TONGANA MARC: SARA KUA NGANGU NDALI TI JÉHOVAH NGA NA AMBA TI MO

4-5. Tongana nyen la Marc afa so lo yeke lani nduru ti sara kua ndali ti amba ti lo?

⁴ Ti sara kua ndali ti amba ti mo aye ti tene ti sara ngangu ti aidé ala nga ti ngbâ ti sara ni même tongana a yeke ngangu. Ye so Marc asara lani la. Na ngoi so Paul ake ti mû Marc na terê ti lo na ngoi ti use voyage ti lo ti missionnaire, peut-être bê ti lo ason nga vundu asara lo (Kus. 15:​37, 38). Me ye so adécouragé Marc ape ti sara kua ndali ti aita ti lo.

⁵ Marc ayeda lani ti tene lo na fami ti lo Barnabas ague asara kua ti Jéhovah na mbeni ndo nde. Ngu 11 tongaso na pekoni, Marc ayeke lani na popo ti aita so amû maboko na Paul na ngoi ti kozo kanga ti lo na Rome (Phm. 23, 24). Ti vrai ni, so Marc amû maboko na Paul anzere lani na lo mingi, ni la lo tene Marc ayeke zo so ‘adë bê ti lo mingi.’—aCol. 4:​10, 11.

6. So Marc asara kua na terê ti aChrétien so akpengba, a aidé lo tongana nyen? (Bâ kete tënë na gbe ni.)

⁶ So Marc asara kua na terê ti aChrétien so akpengba, a aidé lo mingi. Na peko ti so lo sara ambeni ngoi na terê ti Paul na Rome, lo gue na terê ti bazengele Pierre na Babylone. Ala ga akota kamarade na Pierre airi lo “molenge ti mbi Marc.” (1 Pi. 5:13). Na ngoi so ala yeke sara kua na terê ti mba, peut-être Pierre afa na kamarade ti lo so ade maseka gbâ ti aye na ndö ti fini ti Jésus nga na kua ti fango tënë ti lo, ni la ambeni ngoi na pekoni lo sû ni na yâ ti Évangile ti lo.a

7. Tongana nyen la mbeni ita-koli so ade maseka, so iri ti lo Seung-Woo, asara ye tongana Marc? (Bâ nga foto.)

⁷ Marc ayeke sara lani kua ti Jéhovah mingi nga lo ngbâ na terê ti aita-koli so akpengba. Mo peut ti mû tapande ti Marc tongana nyen? Peut-être mo ye ti sara aye mingi na yâ ti kua ti Jéhovah, mo ye ti ga wakua ti mungo maboko wala ancien, me ade mo lingbi na ni ape. Tongana a yeke tongaso, découragé ape. Me ngbâ ti gi ti sara aye so mo peut ti sara ndali ti Jéhovah nga na aita. Mû tapande ti Seung-Woo so ayeke laso ancien. Na ngoi so lo yeke lani maseka, lo yeke haka terê ti lo na amba ti lo. A mû na ambeni akua na yâ ti bungbi kozo ti lo. Bê ti lo ason nga vundu asara lo, na nda ni lo fa tënë ti bê ti lo na a-ancien. Mbeni ancien awa lo ti sara aye so lo peut ti sara ndali ti aita même tongana azo abâ ape anzoni ye so lo sara. Seung-Woo asara ye alingbi na wango so na lo komanse ti aidé aita so aga mbakoro nga na ambeni so abezoin ti tene a aidé ala ti ga na abungbi. Tongana lo pensé na ngoi ni so, lo tene: “Mbi comprendre nzoni mingi nda ti tënë ti mû maboko na azo. Mbi wara ngia so zo ayeke wara tongana lo sara mbeni ye ti aidé azo.”

SARA YE TONGANA TIMOTHÉE: PENSÉ MINGI NA AZO

8. Ngbanga ti nyen la Paul asoro lani Timothée ti tene lo na lo asara lani avoyage? (aPhilippien 2:​19-22).

⁸ Paul abezoin aita so asara ye na mbeto ape ti duti na terê ti lo na ngoi so lo yeke kiri na yâ ti agbata so a sara lani ye ti ngangu na lo dä. Lo soro kozoni Silas, mbeni Chrétien so akpengba ti tene lo na lo ague (Kus. 15:​22, 40). Ambeni ngoi na pekoni, lo soro nga Timothée ti ga na terê ti lo. Nyen la lo bâ lani na mbage ti Timothée? Mbeni ye ni ayeke so aita asara nzoni tënë ti lo (Kus. 16:​1, 2). Lo yeke pensé nga na azo mingi.—Diko aPhilippien 2:​19-22.

9. Tongana nyen la Timothée afa biani so lo pensé na aita?

⁹ Na ngoi so Timothée na Paul akomanse ti sara kua, lo fa so lo pensé mingi na azo ahon lo wani. Tongaso, na ngoi so Paul aquitté Bérée, lo hinga so Timothée ayeke bâ lege ti afini ita ti kâ so nzoni (Kus. 17:​13, 14). Na ngoi ni so, kite ayeke dä ape so Timothée amanda ye mingi na terê ti Silas so angbâ nga lani na Bérée. Me na pekoni, Paul atokua Timothée lo oko na Thessalonique ti kpengba aita ti gbata so (1 aThes. 3:2). Na yâ ti angu 15 so aga na pekoni, Timothée amanda ti “toto legeoko na azo so atoto,” lo zia terê ti lo na place ti azo kue so ayeke bâ pasi (aRom. 12:15; 2 Tim. 1:4). Tongana nyen la aita-koli so ade maseka apeut ti sara ye tongana Timothée?

10. Tongana nyen la mbeni ita-koli so iri ti lo Woo Jae amanda ti pensé mingi na aita?

¹⁰ Mbeni ita-koli so iri ti lo Woo Jae amanda ti pensé mingi na aita. Na ngoi so lo yeke maseka, a yeke lani ngangu na lo ti sara lisoro na aita so ayeke ambakoro. Tongana lo bâ ala na ngoi ti abungbi, lo yeke bara gï ala lo hon. Mbeni ancien awa lo ti komanse ti sara lisoro na aita na ndö ti aye so anzere na lo na mbage ti ala. Ancien ni awa nga lo ti pensé na ye so apeut ti nzere na aita. Lo sara ye so ancien ni afa na lo. Woo Jae so ayeke fadeso ancien, atene: “Fadeso a yeke ngangu na mbi ape ti sara pendere lisoro na aita so ngu ti ala yeke nde nde. A nzere na mbi so mbi hinga nzoni mingi dutingo ti aita. Ye so a-aidé mbi ti hinga bezoin ti aita nga tongana nyen la mbi peut ti aidé ala.”

11. Tongana nyen la aita-koli so ade maseka apeut ti manda ti pensé mingi na aita ti congrégation ti ala? (Bâ nga foto.)

¹¹ Ala aita-koli so ade maseka ala peut nga ti manda ti pensé na azo. Na ngoi ti abungbi, ala peut ti sara lisoro na azo so ngu ti ala nga na dutingo ti ala ayeke nde nde. Hunda ala, ala yeke tongana nyen nga mä ala. Ye so apeut ti aidé mo ti hinga tongana nyen la mo peut ti aidé ala. Peut-être mo peut ti mä so mbeni couple so aga mbakoro abezoin mungo maboko ti sara kua na JW Library^®. Wala mo peut ti bâ so ala mä terê na mbeni zo ti fa tënë ape. Eskê mo peut ti aidé azo tongaso ti sara kua na téléphone, tablette wala ordinateur ti ala wala ti leke ti fa tënë legeoko na ala? Tongana mo mû li ni ti aidé azo, mo yeke zia nzoni tapande na azo kue.

APENDERE WANGO SO PAUL AMÛ APEUT TI AIDÉ MO

12. Wango so Paul amû na Timothée apeut ti aidé aita-koli so ade maseka tongana nyen?

¹² Paul amû lani wango na Timothée ti aidé lo ti duti na ngia mingi nga ti sara kua ti Nzapa mingi (1 Tim. 1:18; 2 Tim. 4:5). Ala aita-koli so ade maseka, apendere wango so Paul amû na Timothée apeut nga ti aidé ala. Na lege wa? Diko alettre use so Paul atokua na Timothée mo bâ mo tene lo tokua ni na mo nga gi ti bâ wango wa la mo peut ti sara ye alingbi na ni. Bâ ambeni tapande ni.

13. Nyen la apeut ti aidé mo ti duti be-ta-zo encore mingi na Jéhovah?

¹³ “Tara terê ti mo tongana ti mbeni wanguru na ziango na gbele mo ti voro Nzapa na bê ti mo kue.” (1 Tim. 4:7b). Ti voro Nzapa na bê kue aye ti tene nyen? Aye ti tene ti duti na kpengba songo na Jéhovah nga na nzara ti sara ye so anzere na lo. So a dü e dungo na sarango ye so ape, e bezoin ti gi ti duti na ni. Na lege wa? Tënë ti Grec so a kiri peko ni lani na “tara terê ti mo” aye fani mingi ti sara tënë ti awanguru so ayeke leke terê ti ala nzoni ti sara mbeni mandako. Ala bezoin ti gbanzi ambeni ye na terê ti ala nga ti zia li ti ala gï na ndö ti ye so ala ye ti si dä. E nga kue e bezoin ti gbanzi ambeni ye na terê ti e si e maï ambeni sarango ye so ayeke sara si e ga nduru mingi na Jéhovah.

14. Nyen la a yeke nzoni e zia na gbele e ti si dä na ngoi so e yeke diko Bible? Fa mbeni tapande ni.

¹⁴ A yeke kota ye ti diko Bible lâ oko oko. A yeke nga kota ye ti girisa ape so ndani so mo yeke diko Bible lâ oko oko ayeke ti ga nduru mingi na Jéhovah. Na tapande, nyen la mo peut ti manda na lege ti warango terê ti Jésus na mbeni mokonzi so ade maseka so ayeke zo ti mosoro? (Marc 10:​17-22). Maseka-koli ni amä na bê so Jésus ayeke Messie, me mabe so lo yeke na ni alingbi ape ti pusu lo ti mû peko ti lo. Atâa so kue, Jésus ‘aye lo na bê ti lo’. Jésus asara lani tënë na nzoni bê na mokonzi so ade maseka so. A yeke polele so Jésus aye lani ti tene lo mû nzoni desizion. Jésus aye maseka-koli so tongana ti so Jéhovah aye lo (Jean 14:9). Na ngoi so mo yeke gbu li ti mo na ndö ti mbaï so nga na dutingo ti mo, hunda terê ti mo: ‘Nyen la mbi bezoin ti sara ti ga nduru mingi na Jéhovah nga ti sara kua mingi ndali ti amba ti mbi?’

15. Ngbanga ti nyen la a yeke kota ye ti tene mbeni ita-koli so ade maseka azia nzoni tapande? Fa mbeni tapande ni. (1 Timothée 4:​12, 13).

¹⁵ “Ga mbeni tapande ndali ti azo so ayeke be-ta-zo.” (Diko 1 Timothée 4:​12, 13.) Paul awa Timothée ti maï kode ti lo ti dikongo ye nga na ti fango ye, me nga ti duti na asarango ye tongana ndoye, mabe nga na dutingo so ayeke na sioni oko pëpe. Ngbanga ti nyen? Ngbanga ti so ye so mbeni zo asara ayeke kota mingi ahon tënë so lo tene. Bâ so a mû na mo mbeni diskur na ndö ti fango tënë. A yeke duti ande ngangu na mo ape ti mû diskur ni tongana mo yeke fa ka tënë mingi. Azo so ayeke mä mo ayeke duti nduru mingi ti sara ye alingbi na tënë so mo tene tongana ala bâ so mo sara ye alingbi na ni.—1 Tim. 3:13.

16. (a) Na yâ ti aye oku wa la aChrétien so ade maseka apeut ti zia nzoni tapande? (b) Tongana nyen la mbeni ita-koli so ade maseka apeut ti ga mbeni tapande “na lege ti tënë ti yanga” ti lo?

¹⁶ Na 1 Timothée 4:​12, Paul afa aye oku so na yâ ni mbeni ita-koli so ade maseka apeut ti zia nzoni tapande. Na ngoi ti mandango ye ti mo, mo peut ti gbu li na ndö ti aye so oko na oko. Na tapande, imaginé so mo ye ti ga mbeni nzoni tapande “na lege ti tënë ti yanga” ti mo. Gbu li na ndö ti lege so mo peut ti sara kua na tënë ti yanga ti mo ti kpengba azo. Tongana mo ngbâ ti lango na gbe ti babâ na mama ti mo, eskê mo peut ti kiri singila na ala fani mingi ndali ti aye so ala sara ndali ti mo? Na peko ti abungbi, mo peut ti fa na mbeni zo so asara mbeni mbage ti bungbi ye so anzere na mo na yâ ti mbage so lo sara. Mo peut nga ti sara ngangu ti mû commentaire na atënë ti mo wani na ngoi ti abungbi. A-effort so mo yeke sara ti ga mbeni nzoni tapande “na lege ti tënë ti yanga” ti mo afa so mo yeke gue na li ni na lege ti yingo.—1 Tim. 4:15.

17. Nyen la ayeke aidé mbeni ita-koli so ade maseka ti si na aye so lo leke ti sara na lege ti yingo? (2 Timothée 2:22).

¹⁷ “Kpe yongoro na anzara ti bê so ayeke gbu ka amaseka, me mo tomba peko ti mbilimbili”. (Diko 2 Timothée 2:22.) Paul awa lani Timothée ti ngbâ ayo na aye kue so apeut ti kanga lege na lo ti sara kua ti Jéhovah mingi wala aye so apeut ti buba songo ti lo na Jéhovah. Me mo peut nga ti bâ so ambeni ye ayeke dä so ayeke nga sioni ape so asara si mo yeke na ngoi mingi ape ti sara gbâ ti aye na yâ ti kua ti Jéhovah. Na tapande, gbu li na ndö ti ngoi so mo yeke mû ti sara na sport, ti gue na ndö ti Internet wala ti sara na ajeu vidéo. Eskê mo peut ti mû mbage ti ngoi so ti sara na kua mingi ndali ti Jéhovah nga na amba ti mo? Peut-être mo peut ti aidé ti bâ lege ti Da ti Royaume ti ndo so mo yeke dä wala ti fa tënë na présentoir. Tongana mo yeke sara akua tongaso peut-être mo yeke wara afini kamarade so ayeke aidé mo ti si na ye so mo ye ti si dä na lege ti yingo.

TI SARA KUA NDALI TI AMBA TI MO AYEKE GA NA ATUFA

18. Ngbanga ti nyen la e peut ti tene so Marc na Timothée ayeke lani na mbeni fini so anzere na ala?

¹⁸ Marc na Timothée achangé lani aye mingi na yâ ti fini ti ala ti sara kua ndali ti amba ti ala na asara si ala yeke na ngia mingi (Kus. 20:35). Marc avoyagé na ando so ayo ti aidé aita. Lo sû nga mbeni pendere mbaï na ndö ti fini ti Jésus nga na kua ti lo ti fango tënë. Timothée a-aidé Paul ti zia na sese afini congrégation nga ti kpengba aita. A yeke polele so bibe ti sacrifice so Marc na Timothée afa azia ngia na bê ti Jéhovah.

19. Ngbanga ti nyen la a yeke nzoni aita-koli so ade maseka asara ye alingbi na wango so Paul amû na Timothée? Tongana ala sara ni, ye ti peko ni ayeke duti nyen?

¹⁹ Ndoye so Paul ayeke na ni na mbage ti Timothée asigi polele na yâ ti alettre so lo tokua na lo. Alettre so a sû na gbe ti yingo so afa nga so Jéhovah aye ala amaseka-koli mingi. Lo ye ti tene gigi ti ala aga nzoni. Tongaso, ala sara kue ti sara ye alingbi na apendere wango so Paul amû nga ala gi ti duti na nzara mingi ti sara akua ndali ti amba ti ala. Tongana ala sara ni, ala yeke duti na ngia laso nga ala yeke “gbu fini so ayeke tâ fini ni biani” so ayeke ga ande.—1 Tim. 6:​18, 19.