Vorongo Nzapa na lege ti a-image: Bible atene nyen na ndö ni?

Ti gue oko na tënë so mbeni mbeti (Catholic News Service) atene, na ngoi ti mbeni matanga so a sara na lango 25 ti mars 2022 na da ti nzapa ti Saint-Pierre, Pape François aluti na devant ti statue ti Marie, lo “kanga lê ti lo na lo ba li ti lo na sese, lo sambela na gbe ti go.” Lo “voro yanga na Marie” ndali ti siriri. Mbeni article (Vatican News) akiri atene so “Pape ni asara mbeni sambela so a iri ni Coeur Immaculé de Marie ndali ti azo kue, mbilimbili ndali ti kodro ti Russie nga na Ukraine.”

Mo pensé ti mo nyen? Eskê ayeke na lege ni ti luti na devant ti a-image ti sambela wala ti sara kua na ni ti voro na Nzapa? Bâ aversê ti Bible so:

• “A lingbi mo leke ndali ti mo wani pëpe mbeni statue so a leke ni na kode, wala mbeni ye so akpa mbeni ye so ayeke na yayu wala na ndö ti sese wala na yâ ti angu na gbe ti sese. Mo kuku na gbe ti ala pëpe wala zia mbeni ye ahanda mo ti voro ala pëpe, ndali ti so mbi Jéhovah Nzapa ti mo, mbi yeke Nzapa so mbi hunda ti tene zo avoro gï mbi oko awe.”—Exode 20:4, 5.a

• “A sara ayanda ti ala na lor nga na argent; a yeke kusala ti maboko ti zo. Ala yeke na yanga, me ala peut ti sara tënë pëpe; ala yeke na lê, me ala peut ti bâ ndo pëpe; ala yeke na mê, me ala peut ti mä ndo pëpe; ala yeke na hôn, me ala peut ti mä fion ti ye pëpe; ala yeke na maboko, me ala peut ti ndu ye pëpe; ala yeke na gere, me ala peut ti tambela pëpe; mbeni tënë oko ayeke sigi na lege ti go ti ala pëpe. Azo so asara ayanda ayeke ga gï tongana ala, nga azo kue so azia bê ti ala na ndö ti ayanda ayeke ga gï tongana ala.”—Psaume 115:4-8.

• “Mbi yeke Jéhovah. So ayeke iri ti mbi la; mbi yeke kangbi gloire ti mbi na mbeni zo pëpe. Nga gonda so a yeke gonda na mbi, mbi yeke mû ni pëpe na ayanda so a leke ni na kode.”—Ésaïe 42:8, kete tënë na gbe ni.

• “Ala kpe vorongo ayanda.”—1 aCorinthien 10:14.

• “Ala kpe ayanda.”—1 Jean 5:21.

Ti hinga ye mingi na ndö ti ye so Bible atene na ndö ti vorongo Nzapa na lege ti a-image, diko article “D’après la Bible : Les images religieuses” wala bâ vidéo Eskê Nzapa ayeda ti tene a voro lo na lege ti ayanda?

Ye so Bible atene na ndö ti atënë so apeut nga ti intéressé mo:

• “Bible atene nyen na ndö ti Vierge Marie?”

• “Devrait-on prier la Vierge Marie ?”

• “Miracles et apparitions — Des manifestations divines ?”

• “Siriri ayeke ga ande na ndö ti sese tongana nyen?”

Photo credit: Vincenzo Pinto/AFP via Getty Images