Bebungbi ti aTémoin ti Jéhovah ayeke nyen?

Bebungbi ayeke kete groupe ti aita-koli so akpengba na lege ti yingo so ayeke mû afango lege na aTémoin ti Jéhovah na yâ ti dunia kue. Kua ti ala andu aye use:

• Ala la ayeke leke afango ye ti Bible so e yeke wara na yâ ti ambeti ti e, abungbi nga na a-ekole ti aTémoin ti Jéhovah.​—Luc 12:42.

• Ala yeke bâ ndo na ndö ti akua ti aTémoin ti Jéhovah na yâ ti dunia kue so andu kua ti fango tënë nga na sarango kua nzoni na a-offrande.

Bebungbi amû peko ti tapande ti “abazengele nga na a-ancien so ayeke na Jérusalem” na ngoi ti akozo Chrétien, so amû lani akpengba desizion so abâ congrégation ti aChrétien kue (Kusala 15:2). Tongana ti akoli be-ta-zo so, amembre ti Bebungbi ayeke pëpe amokonzi ti bungbi ti e. Ala yeke gi ti hinga bango ndo ti Bible na ndö ti mbeni fango ye, nga ala hinga so Jéhovah Nzapa asoro lani Jésus Christ ti duti mokonzi ti congrégation.​—1 aCorinthien 11:3; aÉphésien 5:​23.

Azo wa la ayeke amembre ti Bebungbi?

Amembre ti Bebungbi ayeke Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane nga na Jeffrey Winder. Ala yeke sara kua na kota ndokua ti e na Warwick, na New York.

Tongana nyen la a yeke leke yâ ti akua ti Bebungbi?

Bebungbi azia na sese akomite omene ti bâ ndo na ndö ti akua ti e nde nde, nga membre oko oko ayeke sara kua na yâ ti mbeni komite oko wala mingi ahon so.

• Komite ti acoordinateur: A yeke bâ lege ti atënë so andu ndia ti kodro nga na ti akota kpale so asi, akpale tongana kota ngu so asuku amû ndo, yengingo ti sese, sarango ye ti ngangu na aTémoin ti Jéhovah ndali ti aye so ala mä na bê na ni nga na ambeni ye so a doit ti sara ye hio ndali ni so andu aTémoin ti Jéhovah.

• Komite so abâ tënë ti awakua: A yeke bâ ndo na ndö ti aye so a leke ndali ti amembre ti sewa ti Béthel.

• Komite ti sigingo na ambeti: A yeke bâ lege ti kua ti sigingo na ambeti ti e, tokuango ni, lekengo ada so e yeke voro Jéhovah dä, abureau ti traduction nga na ada ti Béthel.

• Komite ti kusala: A yeke bâ ndo na ndö ti kua ti fango “nzoni tënë ti Royaume.”​—Matthieu 24:14.

• Komite ti fango ye: A yeke bâ lege ti fango ye so alondo na Jéhovah na lege ti abungbi, a-ekole, aprogramme ti a-audio nga na avidéo.

• Komite ti sungo ambeti: A yeke bâ lege ti sungo ambeti so a yeke imprimé ni, aye so ayeke na ndö ti site ti e nga na kua ti traduction.

Na ndö ti akua so akomite so ayeke sara, yengo oko oko, amembre ti Bebungbi ayeke sara mbeni réunion ti bâ aye so bungbi ti Jéhovah ayeke na bezoin ni. Na temps ti aréunion ni so, amembre ni ayeke sara lisoro na ndö ti ye so Bible atene, nga ala yeke zia si yingo vulu afa lege na ala na ye so asara si adesizion so ala mû ayeke gue oko.​—Kusala 15:25.

Azo wa la ayeke mû maboko na Bebungbi?

Akoli so ayeke azo ti confiance la ayeke mû maboko na akomite ti Bebungbi (1 aCorinthien 4:2). Ala yeke na expérience na yâ ti akua so komite ni ayeke bâ ndo na ndö ni nga na akua so a mû na ala ti sara. Ala yeke mû nga mbage na abungbi so amembre ti komite ni ayeke sara yenga oko oko. Atâa so awamungo maboko na Bebungbi ayeke mû mbage na adesizion ni ape, ala peut ti mû anzoni wango nga ti gi nda ti asango. Ala peut nga ti sara ye alingbi na desizion so komite ni amû, nga ala yeke gi ti bâ aye so ayeke ga na peko ti adesizion ni so. Bebungbi ayeke tokua nga ala ti sara vizite na aTémoin ti Jéhovah na ando nde nde na yâ ti dunia kue, ti mû mbage na aréunion annuelle wala na mungo diplôme ti Ekole ti Galaad.