HUNDA TI AMASEKA
Ngbanga ti nyen la mbi doit ti sambela?
Na peko ti so a hunda tënë na amaseka na Amérique, a bâ so tongana a mû ala 100, 80 ayeke sambela, me gï moitié ti ala la ayeke sambela lâ oko oko. Kite ayeke dä ape so, ambeni ahunda terê ti ala, atene: ‘Eskê sambela ayeke gï mbeni senge ye so asara si mbi yeke bien, wala mbeni ye nde ayeke dä?’
Sambela ayeke nyen?
Sambela ayeke sarango tënë na Lo so acréé aye kue. Gbu li ti mo kete na nda ti tënë so! Jéhovah ayeke kota ahon azo na yâ ti aye kue, me “lo yeke yongoro pëpe na e oko oko kue.” (Kusala 17:27) Na ndö ni, na yâ ti Bible e yeke wara pendere tisango ndo so: “Ala ga nduru na Nzapa, na lo yeke ga ande nduru na ala.”—Jacques 4:8.
Tongana nyen la mo peut ti ga nduru na Nzapa?
Mbeni oko ye ni a yeke na lege ti sambela, a yeke tongaso la mo yeke sara tënë na Nzapa.
Mbeni nde a yeke ti manda Bible, a yeke tongaso la Nzapa ayeke “sara tënë” na mo.
So mo yeke sara tënë na Nzapa nga lo yeke sara tënë na mo, so ti tene ti sambela nga ti manda Bible, ayeke aidé mo ti kpengba songo ti mo ti kamarade na lo.
“Ti sara tënë na Jéhovah, Lo so ayeke na nduzu na ndö ti aye kue, a yeke mbeni kota pasa la e azo e yeke na ni.”—Jeremy.
“Tongana mbi fa na Jéhovah atënë ti gbe ti bê ti mbi na yâ ti sambela mbi bâ so mbi yeke nduru na lo.”—Miranda.
Nzapa ayeke mä sambela?
Atâa so mo mä na bê na Nzapa nga mo yeke sambela lo, a lingbi ti duti ngangu na mo ti yeda so lo yeke mä biani sambela. Me, Bible atene Jéhovah ayeke ‘lo so lo yeke mä sambela.’ (Psaume 65:2) Lo tisa mo ti ‘mû agingo bê ti mo kue ti bi ni na ndö ti lo.’ Ngbanga ti nyen? ‘Ngbanga ti so lo yeke bi bê ti lo na ndö ti mo.’—1 Pierre 5:7.
Gbu li na ndö ti ye so: Mo yeke mû ka temps ti causé na avrai kamarade ti mo lakue? Mo peut ti sara nga tongaso na Nzapa. Sara tënë na lo lakue na yâ ti sambela, na di iri ti lo Jéhovah dä (Psaume 86:5-7; 88:9). Na ndö ni, Bible atene na mo ti “ngbâ ti sambela lakue.”—1 aThessalonicien 5:17.
“Sambela ayeke lisoro so mbi yeke sara na Baba ti mbi ti yayu, na lege ni mbi yeke fa na lo atënë ti bê ti mbi kue.”—Moises.
“Mbi yeke fa na Jéhovah aye so ayeke gbe ti bê ti mbi, tongana ti so mbi yeke sara na mama wala na mbeni tâ kamarade ti mbi.”—Karen.
Mbi peut ti sambela ndali ti aye wa?
Bible atene: “Na yâ ti aye kue, na lege ti sambela, na lege ti vorongo terê na Nzapa nga na sambela ti kiringo singila, ala hunda na Nzapa aye so agbu bê ti ala.”—aPhilippien 4:6.
So ti tene so mo peut ti fa aproblème ti mo na Nzapa? En. Nga, Bible atene: “Aye so ane mo, mo bi ni na ndö ti Jéhovah, na lo yeke mû ngangu na mo.”—Psaume 55:22.
Ni la, na yâ ti sambela ti mo, mo peut ti fa na Nzapa akpale ti mo nga na ambeni ye nde. Mbeni maseka wali so iri ti lo ayeke Chantelle atene: “Tongana mbi hunda na Nzapa gï ti aidé mbi, songo ti e ti kamarade ni ayeke nzere ape. Mbi bâ so a yeke bien ti mû merci na lo kozo, na aye so mbi yeke mû merci ndali ni adoit ti duti gbani.”
Gbu li na ndö ti ye so: Aye wa la na yâ ti gigi ti mo, mo mû merci ndali ni? Mo peut ti pensé na ambeni ye ota ti mû merci na Nzapa ndali ni laso?
“Même gï mbeni senge ye, na tapande mbeni pendere fleur so e bâ ni, apeut ti pusu e hio ti sambela Jéhovah ti mû merci na lo.”—Anita.
“Gbu li na ndö ti mbeni ye so Jéhovah acréé so apika bê ti mo wala mbeni versê ti Bible so andu bê ti mo, na mû merci na lo ndali ni.”—Brian.