HUNDA TI AMASEKA
Bible apeut ti aidé mbi tongana nyen?—Kozo mbage ni: Diko Bible
“Mbi tara ti diko Bible lani, me mbi découragé ngbanga ti so ambeti ni ayeke gbani!”—Briana, so ayeke na ngu 15.
Mo kue mo pensé tongaso? Awango so na gbe ni ge so apeut ti aidé mo!
Ngbanga ti nyen a lingbi e diko Bible?
Tongana a sara tënë ti dikongo Bible, fainéant asara mo? Tongana a yeke tongaso, e peut ti comprendre so peut-être a yeke ngbanga ti so mo bâ Bible tongana mbeni mbeti so apage ni ayeke mingi, a sara ambeti ni kete kete na foto ayeke nga na yâ ni ape. Peut-être na lê ti mo, ti bâ télé nga na avidéo ayeke pendere ahon dikongo Bible!
Gbu li ti mo na ndö ti tënë so: Imaginé so mo wara mbeni kota ngbene coffre so gbâ ti anzoni ye ayeke na yâ ni, eskê mo yeke gi ande ti zi ti bâ aye so ayeke na yâ ni ape?
Bible ayeke tongana mbeni coffre so gbâ ti aye ti valeur ayeke na yâ ni. Mo yeke wara atënë ti ndara mingi so apeut ti aidé mo:
Ti mû anzoni desizion
Ti mä terê nzoni na babâ na mama ti mo
Ti sara kamarade na anzoni zo
Ti gi bê ti mo ahon ndö ni ape
Tongana nyen la mara ti mbeti so, so a sû ni aninga mingi awe so, apeut ti aidé e laso? A yeke ndali ti so “atënë kue ti yâ ti Mbeti ti Nzapa, a sû ni na gbe ti yingo ti Nzapa”. (2 Timothée 3:16). Ye so aye ti fa so awango so ayeke na yâ ti Bible alondo na Zo so alingbi biani ti mû na e awango.
Bible ayeke tongana mbeni coffre so akota tënë ti ndara ayeke na yâ ni
Mbi doit ti diko Bible tongana nyen?
Kozo lege ni ayeke ti diko Bible ni alondo na début ni ti si na fin ni. Sarango tongaso ayeke sara si mo hinga akota ye so Bible asara tënë na ndö ni. Alege ti dikongo Bible ayeke mingi. Zia e bâ atapande ni use:
Mo peut ti diko ambeti oko na oko so ayeke na yâ ti Bible, so wungo ni kue ayeke 66, ti londo na Genèse ti si na Apocalypse.
Mo peut ti diko ambaï ti Bible na lege ti molongo so aye ni asi na ni.
Kete wango: Na yâ ti Bible so a iri ni Mbeti ti Nzapa ti fini dunia, na mbage so a sara dä A7, afa akpengba ye so asi na yâ ti gigi ti Jésus na sese na lege ti molongo so aye ni asi na ni.
Use ni ayeke ti tene mo soro ambeni mbaï so ague oko na mbeni kpale so mo yeke na yâ ni. Na tapande:
Eskê mo ye ti wara anzoni kamarade so mo peut ti sara confiance na ala? Diko mbaï ti Jonathan na David (1 Samuel, chapitre 18-20). Na pekoni, tongana mo ye ti hinga akota ye so mo doit ti bata na yâ ti mbaï ni so, sara kua na fiche so atene “Tongana nyen ti wara kamarade ti confiance”.
Eskê mo ye ti luti na lê ti tara ahon ti kozo? Diko mbaï ti Joseph ti bâ tongana nyen la lo luti lani na lê ti tara (Genèse, chapitre 39). Na pekoni, tongana mo ye ti hinga akota ye so mo doit ti bata na yâ ti mbaï ni so, sara kua na fiche so atene “Tongana nyen ti ke ti sara ye ti sioni . . . Joseph—Kozo mbage ni” nga “A bi tënë na li ti lo senge senge! Joseph—Use mbage ni”.
Eskê mo ye ti hinga tongana nyen la sambela apeut ti aidé mo? Diko tapande ti Néhémie (Néhémie, chapitre 2). Na pekoni, tongana mo ye ti hinga akota ye so mo doit ti bata na yâ ti mbaï ni so, sara kua na fiche so atene “Nzapa akiri tënë na sambela ti lo”.
Kete wango: Tongana mo yeke diko Bible, gi ti duti na mbeni ndo so ayeke kpô tongaso si pensé ti mo ahon kirikiri ape.
Ota ye ni ayeke ti tene mo soro mbeni mbaï ti Bible wala mbeni Psaume, mo diko ni, nga na pekoni mo tara ti bâ tongana nyen la tënë ni so abâ mo. Tongana mo diko ni awe, hunda terê ti mo na atënë so:
Ngbanga ti nyen la Jéhovah azia tënë ni so na yâ ti Bible?
Ye ni so afa nyen na ndö ti Jéhovah wala na ndö ti asarango ye ti lo?
Mbi yeke sara ye ague oko na tënë ni so tongana nyen?
Kete wango: Sû date so mo ye ti komanse ti diko Bible.