Bible atene nyen na ndö ti matabisi ti sarango tënë na ayanga nde nde?

Kiringo tënë ti Bible

Matabisi ti “sarango tënë na ayanga nde nde” aye ti sara tënë ti ngangu so akozo Chrétien awara na lege ti miracle so amû lege na ala lani ti sara tënë na mbeni yanga ti kodro, sân ti manda yanga ti kodro ni (Kusala 10:46). Azo so ahinga yanga ti kodro ni ayeke mä yâ ti atënë so aChrétien ni ayeke tene bien (Kusala 2:4-8). Sarango tënë na ayanga nde nde ayeke mbeni oko ti amatabisi ti yingo so Nzapa amû lani na ambeni kozo Chrétien ândö.​—aHébreu 2:4; 1 aCorinthien 12:4, 30.

• Na ndo wa nga lawa la aChrétien akomanse ti sara tënë na ayanga nde nde?

• A mû lani na aChrétien matabisi ni ngbanga ti nyen?

• Eskê a mû lani matabisi ni so ti tene angbâ gï lakue lakue?

• Lawa la matabisi ni so ahunzi?

• Eskê laso matabisi ti sarango tënë na ayanga nde nde so angbâ?

• Tongana nyen la a yeke hinga atâ Chrétien?

Na ndo wa nga lawa la aChrétien akomanse ti sara tënë na ayanga nde nde?

Kozo miracle ni apassé lani na Jérusalem, na yanga ti ndapre na ngoi ti Matanga ti Pentecôte ti ngu 33 so aJuif ayeke sara lani. Adisciple ti Jésus 120 tongaso abungbi lani place oko, na mo ye ti bâ “ala kue asi na yingo vulu na ala to nda ti sara tënë na ayanga ti kodro nde nde”. (Kusala 1:​15; 2:​1-4). Gbâ ti azo “so alondo na amara nde nde kue so ayeke na gbe ti yayu” abungbi, na “zo oko oko ayeke mä adisciple ni na sarango tënë na yanga ti kodro ti lo wani.”​—Kusala 2:​5, 6.

A mû lani na aChrétien matabisi ni ngbanga ti nyen?

1. Ti fa so maboko ti Nzapa ayeke na ndö ti aChrétien ni. Ândö, Nzapa asara ambeni ye na lege ti miracle ti fa so maboko ti lo ayeke na ndö ti awakua be-ta-zo ti lo, na tapande Moïse (Exode 4:1-9, 29-31; Nombre 17:10). Legeoko nga, matabisi ti sarango tënë na ayanga nde nde amû lege na azo ti bâ so maboko ti Nzapa ayeke na ndö ti congrégation ti aChrétien so alondo ti bâ gigi. Bazengele Paul atene: “Ayanga ti kodro ayeke mbeni fä pëpe ndali ti azo so amä na bê, me a yeke fä ndali ti azo so amä na bê pëpe.”​—1 aCorinthien 14:22.

2. Ti mû lege na aChrétien ti fa nda ti tënë ti Nzapa kue na azo. Azo so amä lani adisciple ti Jésus na ngoi ti Pentecôte ni atene: “E yeke mä ala yeke sara tënë na ayanga ti kodro ti e na ndö ti apendere ye so Nzapa asara.” (Kusala 2:​11). Tongaso, mbeni raison so a mû lani na aChrétien matabisi ni so ayeke ti tene ala “fa nda ti tënë ni kue” nga ala “sara si azo na popo ti amara kue aga adisciple”, tongana ti so Jésus amû lani yanga na ala ti sara ni (Kusala 10:42; Matthieu 28:19). Azo 3000 tongaso, so abâ lani miracle ni nga amä fango tënë ti Nzapa ni so, aga adisciple tâ gï na lango ni so.​—Kusala 2:41.

Eskê a mû lani matabisi ni so ti tene angbâ gï lakue lakue?

Ên-ën. Matabisi ti sarango tënë na ayanga nde nde ayeke na popo ti amatabisi ti yingo vulu; na a mû lani amatabisi ti yingo vulu ni ti tene a ninga gï teti mbeni ngoi. Bible atene lani atene: “Tongana a yeke amatabisi ti tenengo prophétie, a yeke kaï ni ande biaku; tongana a yeke sarango tënë na ayanga nde nde, a yeke hunzi ande.”​—1 aCorinthien 13:8.

Lawa la matabisi ni so ahunzi?

Mingi ni, aChrétien ayeke wara lani amatabisi ti yingo vulu na ngoi so abazengele ayeke dä, na abazengele ni ayeke zia maboko ti ala na ndö ti amba ti ala aChrétien ni (Kusala 8:18; 10:44-46). Na bango ni, azo so si awara amatabisi ti yingo ni so na maboko ti abazengele alingbi pëpe ti mû matabisi ni so na mbeni zo nde (Kusala 8:5-7, 14-17). Zia e mû mbeni tapande ti fa nda ni: État apeut ti mû permis ti kpengo na oto na mbeni zo, me ye so amû lege pëpe na zo ni ti mû permis ti kpengo na oto na mbeni zo nde. Na bango ni, matabisi ti sarango tënë na ayanga nde nde ahunzi na ngoi so abazengele, nga na azo so awara matabisi ni na lege ti ala, akui lani.

Eskê laso matabisi ti sarango tënë na ayanga nde nde so angbâ?

Matabisi ti sarango tënë na ayanga nde nde ahunzi lani nduru na fin ti kozo siècle. Zo oko tongaso laso apeut pëpe ti tene so biani a yeke Nzapa la amû ngangu na lo ti sara tënë na ayanga nde nde.a

Tongana nyen la a yeke hinga atâ Chrétien?

Jésus atene lani so a yeke hinga adisciple ti lo na lege ti tâ ndoye (Jean 13:34, 35). Nga, bazengele Paul atene so ndoye ayeke duti ye so a yeke hinga lakue atâ Chrétien na ni (1 aCorinthien 13:1, 8). Lo fa so yingo ti Nzapa ayeke sara si aChrétien ayeke duti na ambeni sarango ye so a iri ni “lengo ti yingo”, so ndoye la ayeke kozoni na popo ni.​—aGalate 5:22, 23.