HUNDA TI AMASEKA
Nyen la mbi peut ti sara ti perdre poids?
Eskê mbi bezoin tâ ti perdre poids?
Ambeni maseka atene so ala ye ti perdre poids. Ye oko, . . .
Amaseka mingi ayeke gi bê ti ala mingi na ndö ti pendere ti terê ti ala ahon seni ti ala. Ti perdre poids, ambeni agi ti sara aye so ala pensé ayeke sara si ala perdre poids ni hio, na tapande na mbeni temps ala te ye na mbeni temps ala te ye ape wala ala yeke nyon ayorö so ayeke sara si zo aperdre poids. Mingi ni, akode so asara ye oko ape nga parfois aga même na ala kpale.
“Ambeni maseka-wali ayeke ke ti te ye si ala perdre poids hio. Mingi ni, na sarango tongaso ala sara sioni na terê ti ala, na ti tene kpale ni ahon ayeke mû temps mingi.”—Hailey.
Amaseka mingi so agi bê ti ala na ndö ti konongo ti ala adoit fade ti gi bê ti ala ape. Konongo ti ala ayeke na lege ni me peut-être ala bâ so ala kono mingi tongana ala haka terê ti ala na amba ti ala wala na dutingo sepele so a yeke sara ka tënë ni mingi na radio wala na télé.
“Na temps so mbi yeke lani na ngu 13, mbi haka terê ti mbi na akamarade ti mbi. Mbi pensé lani so ala yeke ye mbi mingi tongana mbi yeke tongana ala, so ti tene mbi doit lani ti duti sepele mingi tongana ala.”—Paola.
Me ambeni maseka adoit vraiment ti perdre poids. Mbeni rapport ti Bungbi ti Bendo ti Gigi so abâ tënë ti seni atene . . .
Na yâ ti dunia kue, amaseka kutu 340 tongaso, so ngu ti ala alondo na ngu 5 ti si na ngu 19 akono ahon ndö ni.
Na ngu 1975, tongana mo mû amaseka 100 so ngu ti ala alondo na ngu 5 ti si na ngu 19, gï 4 na popo ti ala la akono ahon ndö ni. Me a londo na ngu 2016 ti ga na ni, wungo ni so asi 18.
Na yâ ti akodro mingi ti dunia, azo so akono ahon ndö ni ayeke mingi ahon azo so ayeke sepele.
Mo yeke wara nga azo so akono ahon ndö ni na yâ ti akodro so ayeke na moyen mingi ape, même na yâ ti asewa so ambeni membre ni ayeke te anzoni kobe ape.
Nzoni fason ti perdre poids ayeke so wa?
Kode wa la mo yeke soro?
Ambeni temps mo te ye ambeni temps mo te ye ape.
Sara sport nga sara nzoni regime.
Nyon ayorö so asara si zo aperdre poids.
Nzoni réponse: Use kode ni: Sara sport nga sara nzoni régime.
Tongana mo te ye na ambeni temps nga na ambeni ni mo te ye ape wala mo ke ti te ambeni groupe ti kobe, mo peut ti perdre poids hio. Me akode ni so apeut ti sara nzoni na seni ti mo ape, nga mo peut ti kiri ti kono ahon ndö ni tongana mo komanse ti te ye tongana ti kozo.
Na mbage, tongana mo zia objectif ti duti na nzoni seni, mo peut ti duti bien. Docteur Michael Bradley atene: “Tongana mo changé aye na yâ ti fini ti mo ti duti na nzoni seni na yâ ti tanga ti fini ti mo kue, mo yeke duti nzoni mingi nga seni ti mo ayeke duti nzoni mingi na aye ti peko ni ayeke ninga mingi.”a Ye so afa na e nyen? Tongana mo ye ti perdre poids, pensé gï ti sara régime ape me changé ambeni ye na yâ ti fason so mo yeke vivre na ni.
Ye so mbi peut ti sara
Bible awa e ti duti azo so “sarango ye ti terê ti ala ayeke lakue nzoni”, ye so andu nga fason ti tengo ye ti e (1 Timothée 3:11). Bible awa e mbilimbili ti te ye ahon ndö ni ape (aProverbe 23:20; Luc 21:34). Bata amama-ndia so na li ti mo, gi ti sara ye alingbi na aye so ayeke na gbe ni ge so si mo duti na nzoni seni:
Hinga ye so aye ti tene ti te ye nzoni.
Mo doit ti luti gï na ndö ti aye so mo yeke te ape, me ti hinga ye kete na ndö ti anzoni kobe apeut ti aidé mo ti sara nzoni régime. Nga sarango nzoni régime ayeke mbeni nzoni lege ti bata nzoni konongo ti mo.
Sara sport lakue.
Pensé na aye so mo peut ti sara lâ oko oko si mo duti gï senge senge ape. Na tapande, ahon ti mû ascenseur, monté escalier. Ahon ti mû 30 minute, ti sara ajeu vidéo sigi mo tambela.
Changé akobe so ayeke riche ape na anzoni ni.
Mbeni maseka-wali so iri ti lo Sophia atene: “Mbi yeke mû na terê ti mbi akobe so ayeke riche, na tapande afruit nga na akugbe ti kasa. Ye so asara si bê ti mbi apusu mbi pëpe ti te akobe so ayeke riche ape.”
Te ye yeke yeke.
Ambeni zo ayeke te ye hio hio mingi sân ti hinga so yâ ti ala asi awe. Tongaso, te ye na loro ape. Te ye mo wu terê ti mo kozo si mo kiri mo te mbeni. Peut-être mo yeke bâ so nzara asara mo tongana ti so mo pensé fade so ape.
Sara hange na wungo ti acalorie so ayeke na yâ ti kobe so mo yeke te.
Diko ambeti so ayeke na terê ti akobe so mo ye ti te ti hinga acalorie oke la ayeke na yâ ni. Ye so apeut ti aidé mo: Mo peut ti wara acalorie mingi na yâ ti aye tongana jus, biscuit, chocolat nga na adessert so apeut ti sara si mo kiri mo kono.
Te ye ahon ndö ni ape.
Sara, so ayeke na ngu 16, atene: “A si na mbeni temps ti hinga wungo ti calorie oke la ayeke na yâ ti mbeni kobe agbu lani bê ti mbi mingi ni la tongana mbi bâ kobe na yâ ti sembe, ye so mbi yeke gbu li dä ayeke gï ti hinga calorie oke la ayeke na yâ ni. “Ga pëpe zo ti dikongo wungo ti acalorie.” Na ambeni temps mo peut ti te aye so anzere mingi atâa gbâ ti calorie ayeke dä.
Wango: Causé na docteur ti mo na ndö ti konongo ti mo. Ye so lo hinga na ndö ti konongo ti mo nga na aye so asi apeut ti aidé lo ti fa na mo aye so mo peut ti sara ti duti na nzoni seni.
a Tënë so ayeke na yâ ti buku Quand les choses deviennent folles avec votre adolescent.