Mbi ye lani ti mû fini ti mbi kue ti sara na Jéhovah

Na temps so mbi ngbâ lani kete, mbi ye tâ tënë mingi. Mbi ye lani ti mû terê ti mbi na Jéhovah nga ti wara batême. Tongana mbi yeke na ngu 13, mbi atteindre objectif ni. Na pekoni, na ngu 14, Ita Helge Lincka ahunda mbi wala mbi peut ti mû kua ti pionnier. Mbi rappelé na ngoi ni so pendere mingi. Atâa so babâ na mama ti mbi ayeke lani apionnier temporaire (so laso a iri ni pionnier auxiliaire), mbi hinga tënë oko ape na ndö ti kua ti pionnier permanent. Tënë ti Ita Linck ni azia nzara ti sarango kua ti Jéhovah mingi na yâ ti bê ti mbi.

Babâ na mama ti mbi afa na mbi kozo awe so a yeke sara ye ti ngangu na e

Na ngu 1974, tënë ti poroso so asi lani na Éthiopie asara si a arrété azo, a fâ ambeni, na a ga na wusuwusu. Na temps ni so e peut lani ti fa tënë da na da ape, me e peut ti sara bungbi na yâ ti akete groupe. Babâ na mama ti e aleke e amolenge ni ndali ti kangango lege. Amama-ndia ti Bible a-aidé e lani ti hinga ndani so aChrétien adoit ti mû mbage ape na aye ti poroso. E hinga lani so Jéhovah ayeke aidé e ti hinga tënë so e yeke tene, si a hunda atënë na e, parfois, a yeke nzoni ti duti kpô.—Matthieu 10:19; 27:12, 14.

AFP PHOTO

Na peko ti so mbi hunzi ekole ti mbi, mbi komanse ti sara kua na Ethiopian Airlines. Na mbeni ndapre na temps so mbi si na place ti kua, amba ti mbi ti place ti kua ni afélicité mbi ndali ti so a soro mbi ti tene mbi mû li ni na défilé ti anniversaire ti gouvernement. Hio mbi tene na superviseur ni so ndali ti so mbi yeke Témoin ti Jéhovah, mbi yeke sara matanga ni ape.

Na ndade ni, na temps so mbi yeke sara kua na aéroport, mbi bâ ambeni koli kâ so ngombe ayeke na ndö ti épaule ti ala na ala yeke ga na mbage ti guichet ni. Mbi pensé so ala ga ti gi mbeni zo so aye ti kpe kodro ni. Me, ala yôro maboko na ala fa mbi. Nyen la ala ye na mbage ti mbi nyen? Journée so akomanse nzoni so, hio achangé.

Mbi wara mungo maboko na da ti kanga

Aturugu ni ague na mbi na mbeni bureau, na ala hunda na mbi gbâ ti aquestion teti al’heure mingi. Ala ye ti hinga: “Zo wa la ayeke payé aTémoin ti Jéhovah? Eskê mo yeke sara kua ndali ti Front de libération ti Érythrée? Eskê mo yeke sara kua ndali ti babâ ti mo wala ndali ti gouvernement ti États-Unis?” Atâa so ye ni so apeut lani ti sara si mbi gi bê ti mbi mingi, me grâce na aide ti Jéhovah, mbi duti kpô.—aPhilippien 4:6, 7.

Na peko ti aquestion ni so, aturugu ni ague na mbi na yâ ti mbeni da so a transformé ni na da ti kanga, na ala zia mbi na yâ ti mbeni kete chambre so asara 28 mètre carré, so a zia nga amaseka-wali 15 kâ ndali ti tënë ti poroso.

Na bï ni so, mbi lango na sese na uniforme ti kua ni angbâ na terê ti mbi, na mbi gi bê ti mbi ndali ti so aparent ti mbi nga na aita ti mbi ayeke gi bê ti ala. Ala hinga so a arrêté mbi, me ala hinga ndo so mbi yeke dä ape. Mbi hunda na Jéhovah ti aidé asewa ti mbi ti hinga ndo so a kanga mbi dä.

Na ndade ni na ndapre na temps so mbi zingo, mbi hinga lê ti mbeni turugu ni. Lo bâ mbi, lo croire ape na lo hunda mbi, lo tene: “Aster, nyen la mo yeke sara ge?” Mbi voro yanga na lo ti gue na yanga-da ti aparent ti mbi nga ti fa na ala ndo so mbi yeke dä. Na pekoni, na yâ ti lango ni, mbi wara kobe nga abongo so aparent ti mbi atokua na mbi. Turugu ni afa na ala ndo so mbi yeke dä. Jéhovah akiri tënë na sambela ti mbi. Ye so afa na mbi so mbi yeke gï mbi oko ape.

A mû lege lani na mbi ape ti wara Bible wala ambeni mbeti, nga a ke ti tene afami ti mbi nga na akamarade ti mbi aga abâ mbi. Me, Jéhovah asara si mbi wara encouragement na mbage ti amba ti mbi so mbi na ala e yeke na da ti kanga ni. Lango oko oko, mbi yeke fa tënë na ala, nga a-étonné ala ti mä tâ tënë na ndö ti Royaume ti Nzapa. Fani mingi ala yeke tene na mbi: “E yeke tiri ndali ti gouvernement ti azo, me ti mo, mo yeke défendre gouvernement ti Nzapa. Zia lege ni ape, même si ala ye ti fâ mo.”

Parfois aturugu ni ayeke hunda gbâ ti aquestion na azo ti kanga ni nga ala yeke pika ala. Na mbeni bï, na 22h, ala ga ndali ti mbi. Na temps so e si na salle so ala yeke hunda ka tënë na azo dä so, ala accusé mbi ndali ti gbâ ti aye. Ala tene so mbi yeke soutenir gouvernement ape. Nga na temps so mbi ke ti tene peko ti tënë ti slogan ti mbeni partie politique, aturugu use apika mbi. Aturugu ni ahunda gbâ ti aquestion na mbi na peko ti terê. Lakue tongana mbi yeke sambela Jéhovah, mbi bâ so lo yeke aidé mbi.

Nze ota na pekoni, mbeni turugu ni aga atene na mbi so mo yeke libre, mo peut ti gue. Atâa so a-étonné mbi nga anzere na mbi mingi, a sara lani mbi nzoni ape so mbi peut encore ape ti fa tënë ti beku ti Royaume na amaseka-wali so angbâ na da ti kanga ni.

Anze kete na peko ti so a zi mbi, na temps so mbi yeke na yanga-da ape, aturugu aga a-arrêté amaseka kue so ayeke na yâ ti sewa ti e. Ala arrêté aita ti mbi ti wali use nga na mbeni ita ti mbi ti koli oko. Na ngoi ni so, mbi bâ so ayeke nzoni mbi quitté kodro ni. Atâa so anzere lani na mbi ape ti zia asewa ti mbi, mama ti mbi a-encouragé mbi ti kpengba terê ti mbi nga ti sara confiance na Jéhovah. Kete na pekoni, mbi mû avion mbi gue na États-Unis. Na même lakui ni, aturugu ni akiri aga encore na yanga-da ti e ti arrêté mbi ti fani use ni. So ala wara mbi na yanga-da ape, ala kpe hio, ala gue na aéroport. Me na temps so ala asi, avion so mbi mû ni adécollé awe.

Na temps so mbi si na Maryland, Haywood nga na Joan Ward so ayeke amissionnaire so amanda lani Bible na babâ na mama ti mbi ayamba mbi nzoni. Nze oku na pekoni, mbi atteindre objectif ti mbi, mbi mû kua ti pionnier. Mbi na molenge ti ala ti wali, Cyndy, la e yeke sara kua ti pionnier ni oko, na e passé lani apendere ngoi mingi na fango tënë.

Mbi mû ngoi ti mbi kue ti sara kua ti Nzapa na Béthel

Na milieu ti ngu 1979, mbi sara vizite na Béthel ti New York na mbi tingbi na Wesley Parker. Asarango ye ti lo anzere na mbi mingi nga lo ye ti sara aye mingi na yâ ti kua ti Jéhovah. Na ngu 1981, e sara mariage, na a tokua mbi na Wallkill, na New York, ti tene mbi na Wesley, e sara kua na Béthel. Mbi sara lani kua na ménage nga na place ti sukulango abongo, na pekoni mbi sara kua na équipe ti MEPS na département ti informatique. Sarango kua na Béthel azi lege na mbi ti sara aye mingi na yâ ti kua ti Jéhovah nga ti hinga aita so aga akamarade ti e juska laso.

Me kâ na Éthiopie, a ngbâ ti sara ye ti ngangu mingi na azo ti sewa ti mbi, na ye so asara mbi vundu mingi. Aita ti mbi ti koli nga na ti wali so a arrêté ala lani angbâ na kanga.b Lango oko oko, mama ayeke tö kobe ti gue na ni na ala ndali ti so a yeke mû na ala kobe na da ti kanga ni ape.

Na ngoi ti ngangu kpale so, Jéhovah ayeke lani ndo ti bata terê ti mbi nga sewa ti Béthel adë bê ti mbi nga amû maboko na mbi (Marc 10:29, 30). Mbeni lâ, Ita John Booth atene na mbi: “Anzere na e so mo yeke sara kua ge na Béthel. Tongana mo yeke fade ge ape, mo yeke wara tufa ti Jéhovah so ape.”c Atënë so lo tene na nzoni bê so adë bê ti mbi na afa na mbi so Jéhovah abénir desizion so mbi mû ti quitté Éthiopie nga lo bâ lege ti asewa ti mbi.

E sara na Jéhovah tongana mbeni sewa

Na janvier 1989, e ga ti hinga so mbi yeke na ngo. Na début ni, ye ni asara lani e nzoni ape. Me, alango kete na pekoni, gingo bê ti e ni aga ngia. Nga, e yeke hunda terê ti e mara ti babâ na mama wa la e yeke duti ni ande, e yeke lango na ndo wa, nga tongana nyen la e yeke wara aye so e yeke na bezoin ni tongana e quitté Béthel.

Na lango 15 ti avril 1989, e zia aye kue so e yeke na ni na yâ ti oto na e gue na Oregon, na kâ e leke ti tene e ngbâ ti sara kua ti ngoi kue. Me, kete na peko ti so e si, ambeni kamarade ti e so ayeke na sioni bibe ape atene na e so ayeke na lege ni ape ti tene e sara kua ti pionnier. A yeke vrai so e yeke na ye mingi ape nga fafadeso e yeke wara mbeni bébé. Nyen la e yeke sara ande? Kete na pekoni, e yeke na vizite ti Guy Pierced so ayeke surveillant ti circonscription nga na wali ti lo, Penny. Ala encouragé e ti sara ye so e leke lani ti sara. Tongaso, e komanse ti sara kua ti pionnier na e yeke na confiance so Jéhovah ayeke aidé e (Malachie 3:10). E ngbâ ti sara kua ti pionnier na peko ti so e dü kozo molenge ti e ti koli, Lemuel, nga na pekoni e dü use molenge ti e ti koli, Jadon.

So e sara lani kua ti pionnier na temps so amolenge ti e angbâ kete ayeke mbeni pendere expérience mingi. Ye so azi lege na e ti fa atâ tënë ti Bible gï na azo ti yâ ti territoire ti e ape, me nga na amolenge ti e ti koli (Deutéronome 11:19). Me, na peko ti so e dü ota molenge ti e ti koli, Japheth, e zia kua ti pionnier ni teti ambeni ngoi.—Michée 6:8.

E fa na amolenge ti e ti sara na Jéhovah

E ga ti bâ so kota kua so e aparent e yeke na ni ayeke ti sara si Jéhovah aduti tâ zo na lê ti amolenge ti e nga ti aidé ala ti tene ala wani aduti na kpengba songo na lo. Ti sara ni, e sara si vorongo Nzapa na yâ ti sewa aduti mbeni ye so ala yeke ku ni kungo. Na temps so ala ngbâ lani kete, e na ala e yeke diko buku Écoutez le grand Enseignant nga na buku Mbeti ti ambaï ti yâ ti Bible. E yeke haka même peko ti ambeni mbaï ni. Ndali ti so mbi oko la mbi yeke wali na yanga-da ni, na temps so e yeke haka peko ti mbaï ti Jézabel, mbi la mbi yeke joué rôle ti lo. Anzere na amolenge ti e ti koli ti pusu mbi na yâ ti canapé nga ala sara ye mo bâ mo tene ala la ayeke ambo ni ti te mbi. Nde na vorongo Nzapa na yâ ti sewa, Wesley ayeke manda Bible na amolenge ti e ti koli ni oko na oko.

E ye amolenge ti e nga e yeke bâ lege ti ala, na e yeke sambela ti tene songo ti e na yâ ti sewa ni akpengba. Na temps so ala yeke kono, e fa na ala ti sara ambeni kua. Ala sukula sembe, ala leke yâ ti chambre ti ala nga ala sukula abongo ti ala. Ala manda nga ti tö kobe.

Gï amolenge ti e la amanda lani aye ni ape, me e aparent ni nga kue. Parfois, e yeke réagir nzoni ape nga e yeke tene atënë so ayeke na lege ni ape na amolenge ti e wala amolenge ni na popo ti ala. Na angoi tongaso, e yeke sara kue ti sara terê ti e kete nga ti hunda pardon.

Lakue e yeke tisa aita ti congrégation na yanga-da ti e, abéthelite, amissionnaire, asurveillant so ayeke gue na ando nde nde nga na ala so ayeke gue na ando so bezoin ti awafango tënë ayeke dä mingi (aRomain 12:13). Tongana agene ni aga, e yeke tene na amolenge ni ape ti gue ti sara ngia na yâ ti chambre. Ala yeke ngbâ na terê ti e ti mä alisoro nga na aye so asi na aita ni. Mingi ni, amolenge ni la ayeke bata ka na li adétail ti atënë ni ahon mbi na Wesley.

Mbi na Wesley, e sara ye kue so e peut ti sara ti sara na Jéhovah na ngia na yâ ti fini ti e. Na tapande, e leke kozo awe ti bata nginza nga na alango ti vacance tongaso si e peut ti voyagé na akodro nde nde. Na temps ti voyage ni, e yeke sara vizite ti Béthel, e yeke gue na abungbi nga e yeke fa tënë. Ye so apusu e ti ye bungbi ti Jéhovah mingi nga e ga nduru mingi na aita tongana mbeni sewa.

E ngbâ ti sara kua ti Jéhovah

E bâ so mingi ti azo na yâ ti territoire ti e ayeke tene Espagnol, me a yeke fa tënë na ala lakue ape. Na temps so amolenge ti e angbâ lani kete, e ye ti gue na congrégation ti Espagnol na e hunda Ita Pierce na ye so lo pensé na ndö ni. Lo he kota ngia lo tene: “Tongana mo yeke mbeni zo ti gingo ti susu, mo yeke gue na ndo so susu ayeke dä.” Grâce na encouragement ni so, e gue na congrégation ti Espagnol, na Woodburn, na Oregon. Anzere na e so e komanse ti manda Bible na gbâ ti azo na ala ga nduru na Jéhovah, ambeni awara batême, nga e bâ tongana nyen la kete groupe ti Espagnol ni aga mbeni congrégation.

Mbeni lâ, Wesley aperdre kua ti lo na lo wara mbeni fini kua ni na Californie na e gue kâ. Ngu use na pekoni, mbi, Lemuel na Jadon, e décidé ti sara kua ti pionnier. Na ngu 2007, anzere na mbi so mbi na ala e sara Ekole ti apionnier oko. Kete na peko ti Ekole ti apionnier ni, e bâ so mingi ti azo so ayeke na yâ ti territoire ti e ayeke tene yanga ti Arabe. Na peko ti so e sara ngu 13 na yâ ti territoire so ayeke tene Espagnol, sewa ti e adécidé ti gue na congrégation so ayeke tene yanga ti Arabe. Anzere na e ti fa tâ tënë na azo so alondo na mbeni kodro-wande si aga so ayeke tene yanga ti Arabe nga ti mû mbage na acampagne spéciale na kodro-wande. E ngbâ ti sara kua ti pionnier, na e yeke na congrégation ti Arabe na San Diego, na Californie.

Wesley ayeke mbeni nzoni koli ti wali nga mbeni nzoni mokonzi ti sewa. Wesley aye bungbi ti Jéhovah mingi. Lo tene mbeni sioni tënë lâ oko ape na ndö ti Béthel wala na ndö ti aye so a leke ti sara na yâ ti congrégation. Me, lakue lo yeke na mbeni nzoni tënë ti tene ni. Mbi na lo e yeke sambela nga lo yeke sambela ndali ti mbi, na tongana e wara akpale so asara si e gi bê ti e, asambela ti lo ayeke dë bê ti mbi nga asara si mbi duti kpô.

Tongana mbi pensé na gigi ti e, mbi bâ tongana nyen la e yeke na ngia mingi na yâ ti kua ti ngoi kue, ti bâ lege ti amolenge ti e nga ti gue na yâ ti acongrégation so bezoin ayeke dä mingi. E bâ tongana nyen la Jéhovah asara tufa na ndö ti azo so azia lo na kozo ndo na yâ ti gigi ti ala, nga ye oko amanke e ape (Psaume 37:25). Mbi yeke sûr so, so mbi mû fini ti mbi kue ti sara na Jéhovah ayeke pendere desizion la mbi mû so.—Psaume 84:10.