Kete tënë na gbe ni

a Kozo si Lénine na azo ti lo amû kodoro na ngangu na nze ti octobre 1917, kodoro ti Russie asala kua na ngbele mbeti-kapa ti Togbia Jules César, andâ mingi ti akodoro achangé na ala yeke sala kua na mbeti-kapa ti Tobua Grégoire. Na ngu 1917, mbeti-kapa ti Grégoire ahon mbeti-kapa ti Jules César na lango 13. Na peko ti mungo kodoro ni, aSoviétique asala kua fadeso na mbeti-kapa ti Grégoire, ti tene kodoro ti Russie alingbi na tanga ti akodoro ti sese kue. Ye oko, Église Orthodoxe abata ti lo mbeti-kapa ti Jules César ti sala na amatanga ti lo na ala hiri ni “Ngbele” mbeti-kapa. Ni la mo lingbi ti mä so na Russie Noël ayeke na lango 7 ti janvier. Ye oko, hinga so lango 7 ti janvier na yâ mbeti-kapa ti Grégoire ayeke lango 25 ti décembre na yâ mbeti-kapa ti Jules César. Ni la, azo mingi ti Russie ayeke leke Noël na Fini Ngu ti ala tongaso: lango 25 ti décembre na lango 1 ti janvier ayeke Noël na Fini Ngu, tongana ti mingi ti akodoro; lango 7 ti janvier ayeke Noël ti Église Orthodoxe; lango 14 ti janvier ayeke Fini Ngu na yâ Ngbele mbeti-kapa ti Jules César.