Chapitre 84

Kungba ti mbeni disciple

TONGANA lo londo na ya da ti mbeni kota Farizien so ayeke peut-être membre ti Sanhédrin awe, Jésus amu lege ti gue na Jérusalem. Azo mingi mingi atambela na peko ti lo. Me ye nyen apusu ala ti sala tongaso? Biani, ti duti taa disciple ti Jésus aye ti tene nyen?

Tongana ala yeke tambela, Jésus abaa azo mingi so na lo sala na ala tene so asala peut-être si be ti ala ado: “Tongana mbeni zo aga na mbi, na lo ke baba ti lo pepee, na mama ti lo, na wali ti lo, na amolenge ti lo, na aita ti lo ti koli, na aita ti lo ti wali, na taa fini ti lo mveni nga pepee, lo lingbi ga disciple ti mbi pepee.”

Na ndo so Jésus aye ti tene pepee so a lingbi adisciple ti lo ake amembre ti sewa ti ala biani biani, me ti ke ala na lege so ala ndoyee Jésus mingi ahon amembre ti sewa ti ala. Tapande, Mbeti ti Nzapa atene teti Jacob, kotara ti Jésus, so lo “ke” Léa na lo ndoyee Rachel. Ye so aye ti tene so Jacob andoyee Rachel mingi ahon ita ti lo ti wali Léa.

Zia e baa nga so Jésus atene a lingbi mbeni disciple ake “taa fini ti lo mveni”. Na ndo so nga, lo ye ti tene so mbeni taa disciple alingbi ti ndoyee Lo mingi ahon taa fini ti lo mveni. Tongaso, Jésus afa na gigi mbilimbili so a yeke mbeni nenee kungba ti ga disciple ti lo. Zo alingbi ti londo ti sala ni gi senge tongaso pepee.

Ti ga disciple ti Jésus ayeke ti gue na gbele aye ti tara na aye ti ngangu: “Zo so ayo keke-ti-pasi ti lo mveni pepee ti ga na peko ti mbi, lo lingbi ga disciple ti mbi pepee.” Tongaso, mbeni taa disciple alingbi ti duti ndulu ti yo kungba ti ye ti zonga so Jésus ayo, ye ti zonga so alingbi ti gue na zo juska ti wara kua na maboko ti awato ti Nzapa, na a yeke ye so aku Jésus.

Tongaso, azo mingi mingi so amu peko ti Christ alingbi ti gbu li ti ala nzoni na ndo ye so atene ti ga disciple ti Jésus. Jésus asala tene na ndo tene so na lege ti mbeni toli, na lo tene: “Teti zo nyen na popo ti i, tongana lo ye ti sala tour, aduti ti diko ngere ni kozoni pepee? ti baa tongana nginza ti lo alingbi ti sala tour ni kue. Wala peut-être, tongana lo leke gere ni awe, na lo lingbi sala tanga ni pepee, azo kue so abaa ye so alondo ti he lo, ala tene: ‘Zo so alondo ti sala tour, me lo lingbi ti sala tanga ni pepee.’”

Jésus afa na azo mingi mingi so ama lo na so atambela na peko ti lo so kozoni ti ga disciple ti lo, ala lingbi ti leke na be ti ala kue so ala lingbi ti sala kusala so ahunda na adisciple, lege-oko tongana mbeni zo so aye ti sala da abaa kozoni si lo londo ti sala da ni wala lo yeke na nginza so alingbi ti hunzi kusala so. Na pekoni, Jésus amu mbeni fini toli:

“Wala gbia nyen, tongana lo gue ti sala bira na mbeni gbia, lo duti kozoni ti gi be ti lo pepee? Ti baa si lo na azo saki bale oko alingbi gue ti tiri na lo so ayeke ga na azo saki bale use. Wala tongana mbeni gbia so ade yongoro, lo tokua ti leke tene ti mbele.”

Na peko ti atoli ti lo so, Jésus afa ye so e lingbi ti manda na lege so: “Tongaso zo so na popo ti i, so azia ye ti lo kue pepee, lo lingbi ga disciple ti mbi pepee.” So ayeke ye so azo so amu peko ti Jésus alingbi yeda ti sala, na tene so alingbi na azo kue so ahinga Christ. A lingbi ala duti ndulu ti ke ye kue so ala yeke na ni​—mosoro kue ti ala na même fini ti ala​—tongana ala ye ti ga adisciple ti Jésus. Mo yeke ndulu ti sala ye so?

Jésus akiri atene: “Ingo ayeke nzoni.” Kozoni, na ya Tene so lo sala na ndo hoto, lo tene so adisciple ti lo ayeke “ingo ti sese”, na lege so, lege-oko tongana ingo ayeke bata ye, tene ti adisciple ti lo alingbi ti bata na fini azo so ama ni. Lo konda ti tene ni tongaso: “Me, tongana ingo ade, fade a leke ingo ni na nyen? A lingbi sala mbeni ye na ni na yaka na likoga pepee. Azo asa ingo so na gigi. Zo so ayeke na me ti ma, a lingbi lo ma!”

Jésus afa ge so kamême so ambeni zo ayeke disciple ti lo teti ngu mingi, ala lingbi pepee ti woko na ya kusala ti disciple. Tongana ala woko, fade ala ga ye senge, na ala ga ye ti he teti azo ti sese na ala ga ye ti senge na le ti Nzapa nga, so aye ti tene ala ga ye ti kamela teti Nzapa. Lege-oko tongana ingo so ade na a ga sioni, fade a bi ala na gigi, na afuti ala. Luc 14:25-35; Genèse 29:30-33; Matthieu 5:13.

▪ Ti “ke” baba na mama na ti “ke” taa fini ti e mveni aye ti tene nyen?

▪ Atoli use wa Jésus amu ni? Na atoli so aye ti tene nyen?

▪ Ye nyen e lingbi ti manda na ya ndangba tene ti Jésus na ndo ingo?