Kongo lê ti blé na lâ ti Sabbat

Fadeso, Jésus na adisciple ti lo ague na Galilée na mbage ti nord. A yeke na nze ti mars wala avril la. Alê ti blé asigi na yâ ti ayaka awe. Teti so nzara asara ala, adisciple ti Jésus ako alê ti blé ni na ala te ni. Me lango ni so ayeke lango ti Sabbat la, na aFarizien ayeke bâ ala na ye so ala yeke sara so.

Girisa ape so, ade ti ninga ape, na Jérusalem, aJuif aye lani ti fâ Jésus na bingo tënë na li ti lo atene lo la lo doro ndia ti Sabbat. Me ti so ni so, aFarizien abi tënë ni na li ti adisciple ti Jésus ndali ti ye so ala londo ti sara so. Ala tene: “Bâ! Adisciple ti mo ayeke sara ye so ndia amû lege pëpe na zo ti sara na lâ ti Sabbat.”—Matthieu 12:2.

A-Farizien atene so, ti ko lê ti blé na ti foro ni na yâ ti maboko, a yeke tongana sarango kua ti kongo lê kobe na pikango yâ ni la (Exode 34:21). Fason so aFarizien afa na nda ti ye so a iri a tene sarango kua na lâ ti Sabbat, a sara si Sabbat aga mbeni nengo kungba na ndo ti azo. Me Nzapa aye lani si lango ti Sabbat aduti mbeni ngoi ti ngia nga mbeni ngoi so ayeke kpengba zo na lege ti yingo. Jésus afa na gigi sioni bango ndo ti ala, na mungo ambeni tapande so afa so Jéhovah Nzapa aye lâ oko ape si Ndia ti Sabbat so lo mû lani aduti tongaso.

Kozo tapande so Jésus amû ayeke ti David na azo ti lo. Na ngoi so nzara asara lani ala, David na azo ti lo ague lani na tabernacle na ala te amapa ti ziango ni na gbele Nzapa. A yeke gi aprêtre la ayeke na droit ti te amapa so, so tongana a zi ni na gbele Jéhovah awe, a yeke zia ka ambeni fini ni na place ni. Me ti so ni so lani, a fâ lani ngbanga pëpe na ndo ti David na azo ti lo, ndali ti so ala te amapa ni.—Lévitique 24:5-9; 1 Samuel 21:1-6.

Na use tapande ni, Jésus atene: “Ala diko tënë so na yâ ti Ndia ape? Na alâ ti Sabbat, aprêtre so ayeke na temple abata lâ ti Sabbat pëpe. Me atâa so kue, tënë ayeke na li ti ala ape.” Jésus aye ti tene lani so même na ngoi ti Sabbat, aprêtre ayeke fâ anyama ti mû ni na sacrifice na ala yeke sara nga ambeni kua na tere ni na temple. Jésus akiri atene: “Me, mbi tene na ala, mbeni zo so ayeke kota ahon temple ayeke na ndo so.”—Matthieu 12:5, 6; Nombre 28:9.

Jésus akiri agboto lê ti ala na ndo ti Mbeti ti Nzapa na fango na ala tënë so: “Tongana fade ala mä yâ ti tënë so a tene: ‘Mbi ye sarango nzoni bê na zo, me mbi ye sandaga pëpe,’ ka ala fâ ngbanga pëpe na ndo ti azo so tënë ayeke na li ti ala ape.” Na nda ni, lo kiri lo tene: “Ndali ti so Molenge ti zo ayeke Seigneur ti Sabbat.” Jésus angbâ lani ti sara tënë ti komandema ti lo ti ngu saki oko so siriri ayeke duti ande na yâ ni.—Matthieu 12:7, 8; Osée 6:6.

Depuis la azo ayeke bâ pasi mingi tongana ngbâa na gbe ti Satan na lege ti sarango ye ti ngangu nga na abira so amû ndo kue. Me ye ni ayeke duti ande nde mingi na gbe ti kota lâ ti Sabbat ti Christ, so a yeke mû ande na e mbeni ngoi ti wungo tere so e yeke ku ni depuis so nga so e yeke tâ na bezoin ni!