Chapitre Ota
“Lo so Mbi Soro Lo, Lo so Âme ti Mbi Ayeda na Lo!”
1, 2. Ngbanga ti nyen chapitre 42 ti Esaïe agbu bê ti aChrétien laso?
“L’ETERNEL [“Jéhovah,” NW] atene, I yeke atémoin ti Mbi, boi ti Mbi so Mbi hiri lo.” (Esaïe 43:10) Tene ti Jéhovah so prophète Isaïe asû na siècle miombe K.N.E., afa so azo ti mbele ti Jéhovah ti giriri ayeke mbeni mara ti atémoin. Ala yeke wakua so Nzapa asoro. Ndulu na angu 2 600 na pekoni, na ngu 1931, aChrétien so a sa yingo na ndo ti ala afa na gbele azo kue so atene so alingbi na ala. Ala mu iri ti aTémoin ti Jéhovah na ala yeda na bê kue na akungba so andu dutingo wakua ti Nzapa na ndo sese.
2 A-Témoin ti Jéhovah aye na bê ti ala kue ti nzere na Nzapa. Ndali ni, chapitre 42 ti buku ti Esaïe ayeke kota ye mingi na lê ti ala oko oko kue, teti a fa tapande ti mbeni wakua, so Jéhovah ayeda na lo nga ti mbeni wakua so Lo ke lo. Bango prophétie so mbilimbili nga lege so a ga tâ tene ayeke mu lege ti gbu nda ti ye so asala si Nzapa ayeda na zo nga so asala si lo ke zo.
“Mbi Zia Yingo ti Mbi na yâ Lo”
3. Jéhovah asala tene ti prophétie wa na lege ti Isaïe na ndo “wakua ti mbi”?
3 Na lege ti Isaïe, Jéhovah asala tene ti prophétie ti gango ti mbeni wakua so fade lo mveni asoro lo: “Ba! Wakua ti mbi, so mbi gbu lo ngangu! Lo so mbi soro lo, lo so âme ti mbi ayeda na lo! Mbi zia yingo ti mbi na yâ lo. Mbilimbili teti amara, a yeke ye so fade lo sigigi na ni. Fade Lo dekongo pepe, Lo yä yanga ti Lo pepe, na Lo sala si a mä yanga ti Lo na lege ti kodoro pepe. Pepe so a suru awe, Lo fâ yâ ni pepe, na mèche so kete wâ ayeke dä, Lo mingo pepe. Na lege ti tene-biani, Lo sala si fango ngbanga ti mbilimbili asi. Fade ngangu ti Lo awe pepe, na bê ti Lo awoko pepe, juska Lo sala si fango ngbanga ti mbilimbili amu sese; na fade azoa aku ndia ti Lo.”—Esaïe 42:1-4, NW.
4. ‘Lo so a soro lo,’ so a sala tene ti lo giriri, ayeke zo wa, na e hinga ni tongana nyen?
4 Wakua so asala tene ti lo ge ayeke zo wa? A zia e gi tongaso pepe. E wara atene so a fa pekoni na yâ Évangile ti Matthieu na a fa so a lingbi na Jésus Christ. (Matthieu 12:15-21) Jésus ayeke Wakua so a ndoye lo mingi, ‘lo so a soro lo.’ Lawa Jéhovah azia yingo ti lo na ndo Jésus? Na ngu 29 N.E., na ngoi ti batême ti lo. Tondo so a sû na gbe ti yingo ti nzoni-kue afa peko ti batême so na a tene na pekoni so Jésus asigigi na yâ ngu, “yayu a lungula, na Yingo Vulu azu na ndo Lo na yâ mbeni tele tongana tele ti bungu, na mbeni yanga asala tene na yayu, a tene, Mo yeke Molenge ti Mbi so Mbi ndoye Mo, Mo mu ngia na Mbi mingi.” Na lege so, Jéhovah lo mveni afa na gigi zo so ayeke Wakua ti Lo so Lo ndoye lo mingi. Kusala na aye ti kpene ti Jésus so aga na pekoni afa na gigi so yingo ti Jéhovah ayeke la ni biani na ndo lo.—Luc 3:21, 22; 4:14-21; Matthieu 3:16, 17.
‘Fade Lo Sala si Fango Ngbanga ti Mbilimbili Asi na Amara’
5. Ngbanga ti nyen a hunda la ni ti fa polele ye so ayeke mbilimbili na kozo siècle N.E.?
5 A lingbi Lo so Jéhovah Asoro lo ‘asigigi,’ wala afa na gigi, tâ mbilimbili. “Fade lo fa polele na amara ye so mbilimbili ayeke.” (Matthieu 12:18, NW) A hunda ye so biani na kozo siècle N.E.! Amokonzi ti lege ti vorongo ti aJuif ayeke fa la ni mbeni bango ndo so yâ ni aba kirikiri na mbage ti fango ngbanga na mbilimbili. Ala gi ti si na mbilimbili na mungo peko ti bungbi ti andia so akpengba mingi, so mingi ni ala mveni si alu ni. Be-nzoni na bango mawa ti zo ayeke oko pepe na yâ mbilimbili ti ala so abata anzere nzere mbage ti ndia ahon ndo ni.
6. Na yâ alege wa Jésus asala si a hinga tâ mbilimbili?
6 Nde na so, Jésus afa na gigi bango ndo ti Nzapa na mbage ti mbilimbili. Na lege ti ye so lo fa nga na dutingo ti lo na fini, Jésus afa so tâ mbilimbili aba mawa ti zo na ayeke na be-nzoni. Ba gi kpengba Fango ye ti lo na ndo ti Hoto. (Matthieu, achapitre 5-7) So mbeni pendere lege ti fa tongana nyen a lingbi asala ye na fango ngbanga ti mbilimbili nga na mbilimbili! Tongana e diko aye so aÉvangile afa pekoni, mawa so Jésus ayeke na ni na mbage ti awanzinga nga na ala so ayeke na yâ vundu andu bê ti e pepe? (Matthieu 20:34; Marc 1:41; 6:34; Luc 7:13) Lo gue na tokua ti lo so alungula vundu na azo mingi so ayeke tongana pepe so yâ ni asuru, a ba, na a pika ni awe. Ala yeke la ni tongana mèche so kete wâ angbâ dä, a ga ndulu ti mingo ndangba wâ ti fini ti ala. Jésus afâ “pepe so yâ ni asuru awe” pepe wala lo mingo pepe “mèche so kete wâ ayeke dä.” Nde na so, atene na akusala ti lo ti ndoye na ti nzobe ayä na nduzu bê ti azo so ayeke na be-ti-molenge.—Matthieu 11:28-30.
7. Ngbanga ti nyen prophétie ni alingbi ti tene so Jésus ‘ayeke dekongo pepe wala lo yä go ti lo pepe na lege ti kodoro’?
7 Ye oko, ngbanga ti nyen prophétie ni atene Jésus ayeke “dekongo pepe, Lo yä yanga ti Lo pepe, na Lo sala si a mä yanga ti Lo na lege ti kodoro pepe”? Ngbanga ti so lo yä tele ti lo mveni pepe, tongana ti so azo mingi na ngoi ti lo asala. (Matthieu 6:5) Tongana lo kaï kobela ti mbeni zo ti ngiba, lo tene na koli ni so awara sava awe: “Bata nzoni, mo sala tene na zo oko pepe.” (Marc 1:40-44) A hon ti gi ti tene azo mingi ahinga lo na ti sala si ala mu desizion na lege ti atondo ti ambeni zo nde, Jésus aye si ala mveni aba nda ti ye na lege ti kpengba fä so lo yeke Christ, Wakua ti Jéhovah so Lo sa yingo na ndo lo.
8. (a) Tongana nyen Jésus asigigi na “mbilimbili teti amara”? (b) Ye wa tapande ti Jésus na ndo Zo ti Samarie so andoye zo so ayeke ndulu na lo afa na e na ndo mbilimbili?
8 A lingbi Wakua so a Soro lo asigigi na “mbilimbili teti amara.” Jésus asala la ni ye so. Nde na lutingo mingi gi na ndo be-nzoni so ayeke na gunda ti mbilimbili ti Nzapa, Jésus afa nga so a lingbi a ndu azo kue. Na mbeni ngoi Jésus adabe mbeni koli so abi tele ti lo mingi na yâ Ndia so a lingbi lo ndoye Nzapa na zo so ayeke ndulu na lo. Koli ni ahunda na Jésus: “Zo so ayeke ndulu na mbi ayeke zo nyen?” Peut-être lo ku la ni Jésus ti kiri tene: “Fon mo Juif.” Me Jésus atene na lo toli ti Zo ti Samarie so andoye zo so ayeke ndulu na lo. Na yâ toli ni, mbeni Zo ti Samarie aga amu maboko na mbeni koli so awanzi asala sioni na lo, na ngoi so mbeni zo ti mara ti Lévi na mbeni prêtre ake ti mu maboko na lo. A lingbi zo so ahunda tene ni ayeda so na yâ ye so asi, Zo ti Samarie so azo ake lo ayeke lo so ayeke ndulu na mba ti lo, pepe zo ti mara ti Lévi wala prêtre ni. Jésus ahunzi tapande ti lo na wango so: “Mo gue mo sala legeoko.”—Luc 10:25-37; Lévitique 19:18.
“Fade Ngangu ti Lo Awe Pepe, na Bê ti Lo Awoko Pepe”
9. Tongana nyen gbungo nda ti tâ mbilimbili ayeke sala ye ande na ndo e?
9 Teti so Jésus afa polele nda ti tâ mbilimbili, adisciple ti lo amanda ti fa na gigi lengo so. A lingbi e nga e sala tongaso. Kozoni kue, a lingbi e yeda na alege ti Nzapa ti hinga nzoni na sioni, teti a yeke na lo ti fa ye so ayeke nzoni na mbilimbili. Na ngoi so e yeke sala ngangu ti sala aye alingbi na lege ti Jéhovah, tambela ti e so ayeke mbilimbili ayeke fa ande na gigi polele ye so ayeke tâ mbilimbili.—1 Pierre 2:12.
10. Ngbanga ti nyen fango mbilimbili na gigi andu nga kusala ti fango tene na ti fango ye?
10 E fa nga na gigi tâ mbilimbili tongana e bi tele na bê kue na yâ kusala ti fango tene na ti fango ye. Jéhovah amu na nzobe hingango ye so amu fini na ndo lo mveni, Molenge ti lo, na aye so lo leke ti sala. (Jean 17:3) A yeke duti na lege ni pepe wala mbilimbili pepe ti bata hingango ye so teti e mveni. Salomon atene: “Mo gbanzi nzoye pepe na lo so alingbi na ni, tongana ye ni ayeke na tïtî mo ti sala na ni.” (aProverbe 3:27) Zia e kangbi na azo kue nga na bê kue ye so e hinga na ndo Nzapa, atä mara, kete mara, na kodoro ti ala ayeke tongana nyen.—Kusala 10:34, 35.
11. Na mungo tapande ti Jésus, a lingbi e sala ye tongana nyen na ambeni zo?
11 Na ndo ni, mbeni tâ Chrétien asala ye na amba ti lo tongana ti so Jésus asala la ni. Azo mingi laso ayeke na gbe ti akpale so asala si bê anze na ala hunda be-nzoni na tene ti kpengba zo. Aye alingbi ti sala sioni mingi même na ambeni Chrétien so amu tele ti ala na Nzapa si na nda ni ala kpa apepe so yâ ni asuru wala mèche so gi kete wâ ayeke dä. Ala hunda ti wara maboko ti e pepe? (Luc 22:32; Kusala 11:23) So mbeni ye ti dengo bê ti duti mbage ti mbeni bungbi ti atâ Chrétien, so asala ngangu ti mu tapande ti Jésus na yâ fango na gigi mbilimbili!
12. Ngbanga ti nyen e lingbi ti zia bê kue so na yâ ngoi kete fade mbilimbili ayeke ga tâ ye teti azo kue ?
12 Fade mbilimbili ayeke duti mbeni lâ teti azo kue? Biani. Zo so Jéhovah Asoro lo ‘fade lo woko pepe, na bê ti lo anze pepe, juska lo sala si fango ngbanga ti mbilimbili amu sese.’ Na yâ ngoi kete, fade Gbia so ayeke na ndo mbata, Christ Jésus so alondo na popo ti akinda, ‘ayeke ga ti futa kula na azo so ahinga Nzapa pepe.’ (2 aThessalonicien 1:6-9; Apocalypse 16:14-16) Fade Royaume ti Nzapa ayeke duti na place ti komandema ti azo. Fango ngbanga ti mbilimbili na mbilimbili ayeke wu ande mingi. (aProverbe 2:21, 22; Esaïe 11:3-5; Daniel 2:44; 2 Pierre 3:13) Na kota beku, awakua ti Jéhovah na ndo kue, atä ala yeke na ando so ayo mingi, “azoa,” ayeke ku lango so.
‘Fade Mbi Mu Lo ti Ga Lumière ti Amara’
13. Prophétie wa Jéhovah asala na ndo Wakua so Lo Soro lo?
13 Isaïe angbâ ti tene: “Nzapa L’Eternel atene tongaso, Lo so acréé ayayu, na Lo gbala ala; Lo so agbala sese na ye so asigigi dä; Lo so amu mbö na azo so ayeke na ndo sese, na Lo mu yingo na ala so atambela dä.” (Esaïe 42:5) So tâ mbeni ngangu fango ye na ndo ye so Jéhovah, Wasalango ye, ayeke! Dango bê so na ndo ngangu ti Jéhovah asala si tene ti lo ane mingi. Jéhovah atene: “Mbi L’Eternel, Mbi hiri Mo na lege ti mbilimbili, fade Mbi gbu tïtî Mo, Mbi bata Mo, Mbi mu Mo ti ga ye ti mbele teti azo, ti ga lumière ti aGentil, ti lungula lê ti awaziba, ti sigigi na awakanga na dû ti kanga, na ti sigigi na ala so aduti na bingo na da ti kanga.”—Esaïe 42:6, 7.
14. (a) So Jéhovah agbu tïtî Wakua so Lo yeda na lo a ye ti tene nyen? (b) Kusala ti Wakua so Asoro lo ayeke nyen?
14 Kota Wasalango ndagigi, Zo so amu fini na so Abata ye na fini, agbu tïtî Wakua so Lo Soro na Lo mu zendo so Lo yeke mu maboko kue nga lakue na lo. Ye so adë bê biani! Nga, Jéhovah abata lo nzoni ti tene amu lo tongana “ye ti mbele teti azo.” Mbeni mbele ayeke mbeni mango tele, yengo dä na ye, mbeni kpengba zendo. A yeke mbeni mbela so ayeke tâ ye. Biani, Jéhovah asala si Wakua ti lo aga “mbeni zendo teti amara.”—An American Translation.
15, 16. Na lege wa Jésus asala kusala tongana “lumière ti aGentil”?
15 Tongana “lumière ti aGentil,” fade Wakua so a mu zendo ti lo ayeke lungula “lê ti awaziba” na lo yeke zi “ala so aduti na bingo.” Jésus asala ye so la ni. Na salango tene ti témoin ti tâ tene, Jésus amu gloire na iri ti Babâ ti lo ti yayu. (Jean 17:4, 6) Lo fa na gigi polele atene ti wataka ti lege ti vorongo, lo fa nzo tene ti Royaume, lo zi yanga-da na liberté na lege ti yingo teti azo so ayeke awakanga ti lege ti vorongo. (Matthieu 15:3-9; Luc 4:43; Jean 18:37) Lo gboto mê na ndo salango akusala so ayeke ti bingo na lo fa Satan tongana “babâ ti mvene” na “mokonzi ti sese so.”—Jean 3:19-21; 8:44; 16:11.
16 Jésus atene: “Mbi yeke lumière ti sese.” (Jean 8:12, NW) Lo fa so lo yeke tongaso na mbeni lege so apika bê na ngoi so lo mu fini ti lo ti zo ti mbilimbili-kue tongana kota ngele. Na salango tongaso, lo zi lege teti azo so afa mabe na gigi ti wara pardon ti asiokpari ti ala, mbeni songo na Nzapa so lo yeda na ni, na beku ti fini ti lakue lakue. (Matthieu 20:28; Jean 3:16) Na batango dutingo ndulu na Nzapa na yâ fini ti lo kue, Jésus amu mbage ti kota yanga-ti-komande ti Jéhovah na lo fa so Diable ayeke wamvene. Jésus ayeke la ni biani zo so alungula lê ti awaziba na lo so azi awakanga na yâ bingo ti yingo.
17. Na yâ alege wa e sala kusala tongana awayongo lumière?
17 Na yâ Fango ye na ndo ti Hoto, Jésus atene na adisciple ti lo: “I yeke lumière ti sese so.” (Matthieu 5:14) E nga e yeke pepe awayongo lumière? Na lege ti dutingo ti e na fini nga kusala ti e ti fango tene, e yeke na matabisi ti ga na ambeni zo na Jéhovah, Lingu ti tâ lumière. Na mungo tapande ti Jésus, e sala si a hinga iri ti Jéhovah, e mu mbage ti kota yanga-ti-komande ti Lo, e fa Royaume ti Lo tongana oko beku ti azo kue. Na mbage, tongana awayongo lumière, e fa na gigi atene ti wataka ti lege ti vorongo, e gboto mê na ndo akusala ti sioni so ayeke ti bingo, na e fa na gigi Satan, zo ti sioni.—Kusala 1:8; 1 Jean 5:19, NW.
‘I Sala Fini Bia na Jéhovah’
18. Jéhovah asala si azo ti lo ahinga nyen?
18 Fadeso Jéhovah abi lê ti lo na ndo azo ti lo, na tenengo: “Mbi yeke Jéhovah. So ayeke iri ti mbi; na fade mbi mu pepe gloire ti mbi mveni na mbeni zo nde, wala gonda ti mbi na ayanda so a leke na kode. Ba, tene ti giriri aga tâ tene, na Mbi fa tene ti fini fadeso; Mbi fa tene na i kozoni si ye ni asi.” (Isaïe 42:8, 9, NW) A yeke pepe mbeni oko ti anzapa so ayeke senge ye si asala tene ti prophétie na ndo “wakua ti Mbi,” me gi oko tâ Nzapa so ayeke na fini. A lingbi la ni gi ti ga tâ tene, na a ga biani tâ tene. Jéhovah Nzapa ayeke biani Lingu ti afini ye, na lo sala si azo ti lo ahinga ni kozoni si a si. A lingbi e kiri tene tongana nyen?
19, 20. (a) Bia wa a lingbi ahe ni? (b) Azo wa laso ayeke he bia ti sepela na Jéhovah?
19 Isaïe asû na mbeti: “I sala fini bia na L’Eternel, i sepela Lo na nda ti sese kue; i so i tambela na lê ti kota ngu ti ingo, ye kue so ayeke na yâ ni, azoa na awakodoro ni, i sepela Nzapa. Zia yando na akodoro ni ayä yanga ti ala, na zia akete kodoro so Kédar aduti dä ayä yanga ti ala nga; zia awakodoro ti Séla asala bia, zia ala dekongo na li ti ahoto. Zia ala mu gloire na L’Eternel, na zia ala sepela Lo kâ na yâ azoa.”—Esaïe 42:10-12.
20 A wa awakodoro ti agbata, ti akete kodoro na yando, ti azoa, atä “Kédar,” wala kando na ayando, azo na ndo kue, ti he mbeni bia ti sepela na Jéhovah. So ye ti mu kota ngia so na ngoi ti e azo kutu mingi ayeda na hiringo ndo ti prophétie so! Ala yeda na tâ tene ti Tene ti Nzapa na ala ba Jéhovah tongana Nzapa ti ala. Azo ti Jéhovah ayeke he fini bia, so amu gloire na Jéhovah, na yâ akodoro 230 na ndo ni. So ye ti mungo kota ngia ti he bia na yâ bungbi ti azo ti hengo bia ni ti akodoro, ti ayanga ti kodoro, na ti amara nde nde kue!
21. Ngbanga ti nyen awato ti azo ti Nzapa alingbi ti wara lege pepe ti kaï bia ti sepela na Jéhovah?
21 Awato alingbi ti londo ti ke Nzapa na ti kaï bia ti sepela so? Oko pepe! “Fade L’Eternel asigigi tongana walombe; fade Lo sala si nzala ti tiri alondo na bê ti Lo mveni tongana zo ti bira; fade Lo dekongo, Lo dekongo ngangu, Lo sala bira ngangu na awato ti Lo.” (Esaïe 42:13) Ngangu wa alingbi ti luti na gbele Jéhovah? A sala ndulu na angu 3 500 awe, prophète Moïse na amolenge ti Israël ahe bia: “Jéhovah ayeke mbeni kpengba zo ti bira. Jéhovah ayeke iri ti lo. Lo bi na yâ ngu-ingo apuse ti mbarata ti Pharaon na aturugu ti lo, angangu turugu ti lo alinda na yâ Kota Ngu Bengba.” (Exode 15:3, 4, NW) Jéhovah ahon na ngangu kpengba bungbi ti aturugu ahon kue ti ngoi ni kâ. Wato oko pepe ti azo ti Nzapa alingbi ti hon na ngangu tongana Jéhovah asigigi tongana mbeni kpengba walombe.
“Mbi Bata Yanga ti Mbi Lâ Mingi”
22, 23. Ngbanga ti nyen Jéhovah ‘abata yanga ti lo lâ mingi’?
22 Jéhovah asala ye mbilimbili nga na lege ni, atä na ngoi so lo yeke fâ ngbanga na ndo awato ti lo. Lo tene: “Mbi bata yanga ti Mbi lâ mingi; Mbi duti kpö, Mbi sala tene pepe; me fadeso, fade Mbi toto tongana wali so gua ate lo, Mbi hu ngangu, Mbi hu ngangu mingi. Fade Mbi futi ahoto na akete hoto, na Mbi sala si kugbe kasa kue ahule; fade Mbi sala si angu so asua aga azoa, na Mbi sala si alende ahule.”—Esaïe 42:14, 15.
23 Kozoni si lo fâ ngbanga, Jéhovah azia ngoi ahon ti mu lege na azo ti sioni ti ke asioni lege ti ala. (Jérémie 18:7-10; 2 Pierre 3:9) Ba tapande ti azo ti Babylone, so, tongana ngangu ti komande sese kue, asala si Jérusalem aga yangbato na ngu 607 K.N.E. Jéhovah azia lege na ye so ti se azo ti Israël teti ala duti be-ta-zo pepe. Ye oko, azo ti Babylone ake ti hinga kusala so ala yeke sala la ni. Ala sala ye na azo ti Nzapa ngangu mingi ahon ye so fango ngbanga ti Nzapa ahunda. (Esaïe 47:6, 7; Zacharie 1:15) A yeke so la ni biani bê ti tâ Nzapa ti ba azo ti lo ahu pono! Me lo gbanzi tele ti sala ye juska na ngoi so lo diko. Na ngoi ni kâ, lo sala kusala, legeoko tongana mbeni wali so ayeke dü, ti zi azo ti mbele ti lo na ti sigigi na ala tongana mbeni mara so ayeke na lipanda. Ti sala ye so, na ngu 539 K.N.E., lo hule na lo futi Babylone nga na aye ti batango lo.
24. Lege wa Jéhovah azi teti azo ti lo ti Israël?
24 So ngia si asi bê ti azo ti Nzapa tongana, na peko ti angu mingi ti dutingo na ngba, na nda ni lege ti kiri na kodoro azi na ala! (2 Chronique 36:22, 23) Ala yeke na ngia biani ti ba gango tâ tene ti zendo ti Jéhovah: “Fade Mbi ga na awaziba na lege so ala hinga pepe; na Mbi fa kete lege na ala, lege so ala hinga kozoni pepe; fade Mbi gbian bingo si a ga lumière na gbele ala, na Mbi sala si sese ti hoto aga kpangbala. Fade Mbi sala ye so kue, fade Mbi zia pepe.”—Esaïe 42:16.
25. (a) Azo ti Jéhovah alingbi ti hinga nyen biani laso? (b) A lingbi e leke na bê ti sala nyen?
25 Tongana nyen atene so alingbi na ngoi ti laso? Teti ngoi mingi awe, asiècle mingi, Jéhovah azia amara ti mu lege ti ala mveni. Ye oko, ngoi ti lo so adiko awe ti leke atene aga ndulu. Laso, lo sigigi na ambeni zo ti sala tene ti témoin ti iri ti lo. Na nekango kengo ndo kue so ayeke na gbele ala, lo leke lege teti ala ti voro lo “na yingo na tâ tene.” (Jean 4:24, NW) Lo mu zendo so: ‘Fade Mbi zia ala pepe,’ na lo sala ye alingbi na tene ti lo. Ti azo so angbâ lakue ti voro anzapa ti wataka a yeke tongana nyen? Jéhovah atene: “Azo so azia bê ti ala na ayanda so a leke na kode, na ala tene na ayanda ti wen, I yeke anzapa ti e; fade a sala si ala kiri na pekoni, na fade kamela agbu ala mingi.” (Esaïe 42:17) So kota ye ti tene e ngbâ be-ta-zo na Jéhovah, tongana ti so Lo so Lo Soro lo asala la ni!
‘Mbeni Wakua so Ayeke Wambongi na Waziba’
26, 27. Tongana nyen Israël afa so lo yeke ‘wakua so ayeke wambongi na waziba,’ na aye wa aga na pekoni?
26 Wakua ti Nzapa so Lo Soro lo, Jésus Christ, angbâ la ni be-ta-zo juska na kui. Ye oko, azo ti Jéhovah, Israël, aduti mbeni wakua so ayeke be-ta-zo pepe, so ayeke wambongi na waziba na lege ti yingo. Na salango tene na ala, Jéhovah atene: “I awambongi, i mä ndo; i awaziba, i ba si i lingbi ba ndo. Zo nyen ayeke waziba, a yeke boi ti Mbi pepe? wala zo nyen ayeke wambongi tongana wakua ti Mbi so Mbi to lo? Zo nyen ayeke waziba tongana lo so Mbi zia bê ti Mbi na lo? na zo nyen ayeke waziba tongana boi ti L’Eternel? Mo ba ye mingi, me mo bi bê ti mo dä pepe; mê ti lo alungula awe, me lo mä ndo pepe. Ngbanga ti mbilimbili ti Lo, L’Eternel ayeke na ngia ti sala si Ndia aga kota, na a wara gloire mingi.”—Esaïe 42:18-21.
27 Israël atï na ngu biani! Fani mingi, azo ti lo ague na peko ti vorongo anzapa ti ayingo sioni ti amara. Fani mingi, Jéhovah angbâ ti to awatokua ti lo, me azo ti lo akanga mê. (2 Chronique 36:14-16) Isaïe afa kozoni ye so ayeke si na pekoni: “Azo ti Israël ayeke azo so ambeni zo anzi ala, agbu ye ti ala, a kanga ala kue na yâ gamba, na a honde ala na yâ da ti kanga. Ala ga ye so azo akamata na ngangu, na zo oko azi ala pepe. Ala ga ye so azo agbu, na zo oko atene pepe, I kiri ala. Fade zo nyen na popo ti i azi mê ti lo ti mä tene so? fade zo nyen agingi na amä tene ti ye so ayeke ga? Zo nyen azia Jacob na tïtî azo si ala gbu lo, na a zia Israël na tïtî awanzi? A yeke L’Eternel pepe? Lo so e sala siokpari ti ke Lo, na ala ke ti tambela na lege ti Lo, na ala mä Ndia ti Lo pepe. Teti tene so, Lo sa na ndo ala ngonzo ti Lo ti wâ, na ye ti ngangu ti bira nga; ye so angoro ala tongana wâ, me ala hinga nda ni pepe; ye so azö ala, me ala bi bê ti ala dä pepe.”—Esaïe 42:22-25.
28. (a) E lingbi ti manda nyen na lege ti tapande ti awakodoro ti Juda? (b) Tongana nyen e lingbi ti gi ti nzere na Jéhovah?
28 Ndali ti so awakodoro ti lo aduti be-ta-zo pepe, Jéhovah asala si anzi na agbu aye ti Juda na ngangu na ngu 607 K.N.E. Azo ti Babylone agbi temple ti Jéhovah, asala si Jérusalem aga yangbato, na ague na aJuif na ngba. (2 Chronique 36:17-21) Zia e bata na bê tapande ti gbotongo mê so na lâ oko pepe e dengi mê ti wambongi na afango lege ti Jéhovah wala e kanga lê tongana waziba na ndo Tene ti lo so a sû na mbeti. Nde na so, zia e gi ti tene Jéhovah ayeda na e na mungo tapande ti Christ Jésus, Wakua so Jéhovah mveni ayeda na lo. Legeoko tongana Jésus, zia e sala si a hinga tâ mbilimbili na lege ti ye so e tene na e sala. Na lege so, fade e yeke ngbâ na popo ti azo ti Jéhovah, na salango kusala tongana awayongo lumière so asepela tâ Nzapa na amu gloire na lo.
[Afoto na lembeti 33]
Tâ mbilimbili ayeke ba mawa ti zo na a yeke na be-nzoni
[Foto na lembeti 34]
Na yâ toli ti nzoni zo ti Samarie, Jésus afa so tâ mbilimbili andu azo kue
[Afoto na lembeti 36]
Na dutingo na nzobe nga na tene ti kpengba zo, e fa na gigi mbilimbili ti Nzapa
[Afoto na lembeti 39]
Na lege ti kusala ti fango tene ti e, e fa na gigi mbilimbili ti Nzapa
[Foto na lembeti 40]
A mu Wakua so a yeda na lo tongana “lumière ti aGentil”