Chapitre 114

Kobe ti Seigneur

TONGANA Jésus asukula gere ti abazengele ti lo awe, lo diko tene ti Psaume 41:9 (41:10 sango), lo tene: “Lo so ate kobe ti mbi, taa zo so ayaa ndagere ti lo ti do mbi.” Tongana Jésus asala tene so awe, yingo ti lo agi lo na lo tene: “Fade mbeni oko ti i aka mbi.”

Tongana abazengele ama tene so, vundu asala ala. Na zo oko oko ahunda Jésus: “A yeke mbi?” Judas Iscariote ahunda tene so nga. Jean, lo so aduti na table na tele ti Jésus, ahunda tene so tongana lo lango na libe ti Jésus: “Seigneur, a yeke zo nyen?”

Jésus atene na ala: “A yeke mbeni oko na popo ti i bale oko na ndoni use, lo so azia maboko ti lo na ya sembe na mbi. Teti Molenge ti zo ayeke gue, lege-oko tongana Mbeti ti Nzapa asala tene ti lo, me vundu aga na zo so aka Molenge ti zo! A yeke nzoni ahon teti zo so tongana adu lo pepee.” Na pekoni, Satan ali na ya Judas mbeni. Satan awara lege ti sala kusala na ya be ti Judas so aga sioni awe. Na pekoni, na bi so, Jésus ahiri Judas taa na lege ni “molenge ti futingo ni”.

Jésus atene fadeso na Judas: “Ye so mo sala, sala ni fade fade.” Mbeni oko ti abazengele ahinga nda ti tene so pepee. Ambeni atene na be ti ala, teti Judas abata sanduku ti nginza, Jésus atene na lo: “Mo vo ye so alingbi na e teti matanga ni”, wala a lingbi lo gue lo mu mbeni ye na awanzinga.

Tongana Judas ague awe, Jésus afa na abazengele ti lo so angba be-taa-zo, mbeni fini matanga wala matanga ti da be zo na ye. Lo kamata mapa, tongana lo kiri singila na lege ti sambela awe, lo fa ya ni, na lo mu ni na ala, na lo tene: “I kamata so, na i te.” Na lo tene: “So aye ti tene tele ti mbi, so fade mbi mu teti i. I ngba ti sala ye so ti dabe i na mbi.”

Tongana ala kue ate mapa ni awe, Jésus amu kopo ti vin, kopo osio ni na matanga ti Pâque. Lo sambela mbeni ti kiri singila, lo mu ni na ala, na lo hunda ala ti nyon ni na lo tene na ala: “Kopo so ayeke fini mbele na ya mene ti mbi, mene so fade asa teti i.”

Tongaso Jésus azia na azo lege ti dabe ala na kui ti lo. Na ngu oko oko kue, na lango 14 ti nze ti Nisan, a lingbi sala matanga so lege-oko tongana Jésus atene, ti dabe e na lo. Fade matanga so ayeke dabe azo so ayeke sala ni na ye so Jésus na Baba ti lo so ayeke na yayu asala ti so azo na ya ngbanga ti kui. Teti aJuif so aga adisciple ti Christ, matanga so ayeke mu place ti matanga ti Pâque.

Fini mbele so aga taa ye na lege ti mene so Jésus asa ni na sese, amu ndo ti ngbele mbele ti Ndia. Jésus Christ ayeke wasalasongo ti mbele so ayeke na popo ti ambage use—na mbage oko, Jéhovah Nzapa, na mbeni mbage, achrétien 144 000 so awara yingo ti nzoni-kue. Nde na ngangu ti mbele so ti mu pardon ti siokpari, mbele so amu lege nga ti leke mbeni mara so asala kusala tongana agbia na aprêtre na yayu. Matthieu 26:21-29; Marc 14:18-25; Luc 22:19-23; Jean 13:18-30; 17:12; 1 aCorinthien 5:7.

▪ Jésus asala tene ti prophétie wa ti Mbeti ti Nzapa so abaa mbeni kamarade? Na lege wa lo fa nda ti tene ni?

▪ Ngbanga ti nyen vundu asala adisciple mingi? Na azo oko oko kue ahunda tene wa?

▪ Jésus amu yanga na Judas ti sala nyen? Ambeni disciple afa nda ti tene so tongana nyen?

▪ Na peko ti guengo ti Judas, Jésus aleke fini matanga wa? Ndani ayeke nyen?

▪ Azo wa ate fini mbele? Fini mbele so amu lege ti sala nyen?