Chapitre 118

Aka lo na agbu lo

BE TI BI ahon awe tongana Judas amu li ni na azo mingi mingi, aturugu, akota prêtre, aFarizien, na ambeni zo, ti ga na ala na yaka ti Gethsémané. Aprêtre ayeda kozoni ti futa nginza ti argent bale ota na Judas tongana lo ka Jésus na ti ti ala.

Kozoni, tongana atene na Judas ti sigigi na ngoi ti matanga ti Pâque, lo gue biani na akota prêtre. Fade fade azo abungbi akapita ti ala, nga na mbeni bungbi ti aturugu. Judas afa lege na ala kozoni peut-être ti gue na ndo so Jésus na abazengele ti lo asala matanga ti Pâque. Tongana lo baa so ala hon awe, azo mingi mingi so ayeke na aye ti bira na alampe amu peko ti Judas ti sigigi na Jérusalem ti hon Popo-hoto ti Cédron.

Tongana Judas amu li ni na gba ti azo so ti ma hoto ti Oliviers, lo hinga ndo so lo yeke wara Jésus da. Na yenga so ahon awe, tongana Jésus na abazengele atambela lege mingi na popo ti Béthanie na Jérusalem, fani mingi ala gue na yaka ti Gethsémané ti wo tele ti ala na ti sala lisoro. Me, fadeso, peut-être Jésus aduti na ya bingo na gbe ti akeke ti olive, tongaso fade aturugu ayeke hinga lo tongana nyen? Ala baa lo peut-être kozoni pepee. Tongaso Judas amu fa na ala, lo tene: “Zo so ande mbi su ngbangba ti lo, so ayeke lo; i gbu lo, na i bata lo nzoni.”

Judas na azo mingi mingi na tele ti lo ali na yaka ni, lo baa Jésus na abazengele ti lo, na fade fade lo gue ndulu na lo. “Balao, Rabbi!” lo tene na lo su ngbangba ti lo yeeke.

“Ndeko, mo ga ngbanga ti nyen?” Jésus atene na lo. Ti kiri na hundango tene ti lo mveni, lo tene: “Judas, mo ka Molenge ti zo na lege ti su ngbangba ti lo?” Ti wakango lo alingbi awe! Jésus ague na gbele azo ni lo luti na ya lumière ti alampe na akeke ti ala so ayeke gbi na lo hunda: “I gi zo nyen?”

Ala kiri tene: “Jésus ti Nazareth.”

“Mbi yeke lo”, Jésus atene na ala, tongana lo luti na mbito pepee na gbele ala kue. Be ti azo ado ti baa so lo sala mbito oko pepee na ala hinga ye so ayeke si na pekoni pepee, tongaso azo akiri na pekoni na ala ti na sese.

“Mbi tene na i, mbi yeke lo,” Jésus angba ti sala tene na mbito pepee. “Tongaso, tongana i gi mbi, i zia azo so ague ti ala.” Ngoi kete kozoni na da-nduzu, Jésus atene na Baba ti lo na lege ti sambela so lo bata abazengele ti lo so ayeke be-taa-zo na mbeni oko ti ala aglisa pepee, “gi molenge ti futingo”. Ti tene tene ti lo aga taa tene, lo hunda azo ti zia adisciple ti lo ti gue.

Tongana mbito azia aturugu, ala luti, na ala tonda ti kanga Jésus. Abazengele, tongana ala baa ye so ayeke si, ala hunda: “Seigneur, fade e pika ala na épée?” Kozoni si Jésus akiri tene, Pierre agboto oko ti a-épée use so ayeke na abazengele na lo pika Malchus, mbeni ngbaa ti kota prêtre ni. Pierre apika li ti ngbaa ni pepee me lo fa me ti lo na mbage ti koli.

“Zia ni, so alingbi awe”, Jésus atene tongana lo kangbi popo ti ala. Lo ndu me ti Malchus, lo sala si ka ni amu. Na pekoni lo fa nda ti mbeni kota tene, lo tene na Pierre: “Kiri épée ti mo na ya bozo ni, teti azo kue so akamata épée fade ala kui na lege ti épée. Wala be ti mo atene mbi lingbi ti hunda Baba ti mbi pepee, si lo to na mbi a-ange legion bale oko na ndoni use même fadeso?”

Jésus ayeda si ala gbu lo, teti tongana lo fa ndani: “Me tongaso, tene ti Mbeti ti Nzapa so atene fade ye so asi, a lingbi ga taa tene na lege nyen?” Lo tene nga: “Kopo so Baba amu na mbi, fade mbi nyon kopo ni pepee?” Na taa be ti lo kue lo yeda na ye so Nzapa atokua lo ti sala!

Na pekoni Jésus asala tene na azo mingi mingi so ayeke na tele ti lo. “I ga na épée na keke ti gbu mbi, lege-oko tongana i ga ti gbu wanzi?” lo hunda. “Lakue lakue mbi yeke na popo ti ala ti fa ye na ya temple, me i gbu mbi la ni pepee. Me ye so kue asi, si tene ti mbeti ti aprophète alingbi ga taa tene.”

Tongaso bungbi ti aturugu na kota kapitani na akapita ti aJuif agbu Jésus na ala kanga lo. Tongana ala baa ye so, abazengele azia Jésus na ala kpe ahon. Ye oko, mbeni molenge koli​—peut-être ayeke disciple Marc​—angba ti luti na popo ti azo mingi mingi so. Lo yeke peut-être kozoni na da ni na ndo so Jésus asala matanga ti Pâque si na pekoni lo mu peko ti gba ti azo so. Fadeso azo ahinga le ti lo na ala ye ti gbu lo. Me lo zia bongo ti lin na peko ti lo na lo kpe. Matthieu 26:47-56; Marc 14:43-52; Luc 22:47-53; Jean 17:12; 18:3-12.

▪ Ngbanga ti nyen Judas ahinga lo yeke wara Jésus na ya yaka ti Gethsémané?

▪ Jésus asala nyen ti fa so lo gi be ti lo teti abazengele ti lo?

▪ Pierre asala nyen ti bata Jésus, me Jésus atene nyen na Pierre na ndo ti ye so?

▪ Jésus asala nyen ti fa so lo yeda na taa be ti lo kue na ye so Nzapa atokua lo ti sala?

▪ Tongana abazengele azia Jésus akpe, zo wa angba, na ye nyen asi na lo?