Royaume ti Nzapa: Ngorogbia so ahon atanga ni na yâ ti aye kue

JÉSUS CHRIST atene lani na adisciple ti lo: “A lingbi i sambela na lege so: Babâ ti e so ayeke na yayu, e ye iri ti Mo aga nzoni-kue. E ye royaume ti Mo aga. E ye ala sara na sese ye so bê ti Mo aye legeoko tongana ala sara na yayu.” (Matthieu 6:9, 10). Sambela so, so azo mingi airi ni ‘Babâ ti e so mo yeke na yayu’, afa ye so Royaume ti Nzapa ayeke sara.

Royaume ni ayeke sara si iri ti Nzapa aga ande nzoni-kue. A yeke zi nga zonga kue so aga na ndo ti iri ni ndali ti kengo yanga so Satan na azo ake. A hunda biani ti sara tongaso teti azo kue na yayu nga na sese ayeke wara tâ ngia gi tongana ala bâ iri ti Nzapa tongana mbeni ye so ayeke nzoni-kue nga ala yeda na bê ti ala kue so lo yeke na droit ti komande.​—Apocalypse 4:11.

Nga, a sigigi na Royaume ni ti tene ‘a sara na sese ye so bê ti Nzapa aye legeoko tongana ti so a sara na yayu.’ Ye so bê ti Nzapa aye ayeke nyen? A yeke ti kiri na nzoni songo na popo ti Lo na azo, songo so Adam agirisa ni ândö. Fade Jéhovah, Kota Gbia ti Dunia Kue, ayeke sara nga kusala na Royaume ni ti leke Paradis na ndo sese si azo ti nzoni awara fini ti lakue lakue na yâ ni. Biani, Royaume ti Nzapa ayeke leke ande akpale kue so siokpari ti Adam na Eve aga na ni na a yeke sara si ye so Nzapa aleke ti sara na sese aga tâ ye (1 Jean 3:8). Ti tâ tënë ni, Royaume so nga na ye so lo yeke sara ande la ayeke mama-tene ti yâ ti Bible.

Na lege wa Royaume ni ahon atanga ti ngorogbia kue?

Royaume ti Nzapa ayeke mbeni tâ ngorogbia so ayeke ngangu mingi. Prophète Daniel afa na e mbeni kete yanga ti ngangu ni. A sara ngu mingi awe, lo tene: “Fade Nzapa ti yayu ayä royaume . . . fade royaume so afâ mbeni royaume so kue [so ayeke ti azo] nduru nduru, na a sara si royaume nde nde so kue awe.” Na ndo ni, nde na angorogbia ti azo, so na yâ ti mbaï ambeni ahon, ambeni aga, fade Royaume ti Nzapa “afuti lâ oko pëpe”. (Daniel 2:44). Me gi ye ni kue la pëpe. Royaume so ahon ngorogbia ti azo na yâ ti aye kue.

Mbeni zo ti lingbi na Gbia ti Royaume ti Nzapa ayeke dä pëpe. Zia e bâ zo so ayeke Gbia ni. Na yâ ti ‘suma nga na ye so lo bâ na li ti lo tongana suma,’ Daniel abâ lani Gbia ti Royaume ti Nzapa ni. Lo bâ “Zo oko tongana Molenge Ti Zo” so a ga na lo na gbele Nzapa ti Ngangu Ahon Kue na a mû na lo “ngangu ti komande, na gloire, na royaume” teti lakue lakue (Daniel 7:1, 13, 14). Molenge ti zo so ayeke gi Jésus Christ, Messie ni (Matthieu 16:13-17). Jéhovah Nzapa asoro Molenge ti lo wani, Jésus, ti duti Gbia ti Royaume ti Lo. Tongana lo yeke lani na sese, Jésus atene na aFarizien so ayeke asioni zo, lo tene: “Royaume ti Nzapa ayeke na popo ti i”, so ti tene, ni Jésus, so ni yeke ga ande Gbia ti Royaume so, ni yeke na popo ti ala.​—Luc 17:21.

Na popo ti azo, zo wa la akpa ti lingbi na aye so afa Jésus biani tongana mbeni Gbia? Na yâ ti sarango ye ti lo, Jésus afa awe so lo yeke biani mbeni Mokonzi so ayeke mbilimbili, zo so a lingbi ti zia bê kue na ndo lo nga lo yeke bâ mawa ti zo. Na yâ ti aÉvangile, a fa lo tongana mbeni koli so ayeke nduru ti sara ye, so ayeke na nzobe mingi, vundu so asi na zo agbu bê ti lo nga lo hinga ti zia tere ti lo na place ti zo (Matthieu 4:23; Marc 1:40, 41; 6:31-34; Luc 7:11-17). Na ndo ni, so Jésus azingo na kuâ awe, kuâ alingbi ti sara ye oko na lo pëpe wala ye alingbi ti kara lo pëpe tongana ti so a yeke kara azo.​—Esaïe 9:5, 6.

Ndo so Jésus na amba ti lo gbia ni ayeke duti dä ti komande ayeke na nduzu mingi. Na yâ ti suma ni, Daniel abâ nga so “a mû na azo ni so ayeke ti azo ti be-vulu . . . royaume ni, [nga na] ngangu ti komande.” (Daniel 7:27). Jésus akomande gi lo oko pëpe. Lo yeke na ambeni zo na tere ti lo so ayeke komande tongana agbia nga ala yeke sara kua tongana aprêtre (Apocalypse 5:9, 10; 20:6). Bazengele Jean asara tënë so na ndo ti ala, lo tene: “Mbi bâ ndo, na mbi bâ Molenge Ti Ngasangbaga aluti na Hoto ti Sion, na azo [saki] ngbangbo oko na bale-osio na ndo ni [saki] osio ayeke na Lo . . . A vo ala na popo ti azo ti sese.”​—Apocalypse 14:1-3.

Molenge Ti Ngasangbaga ni ayeke Jésus Christ na peko ti so a zia lo Gbia ti Royaume ni (Jean 1:29; Apocalypse 22:3). Hoto ti Sion so a sara tënë ni ayeke yayua (aHébreu 12:22). Tongaso, Jésus na azo 144 000 so ayeke na tere ti lo ayeke duti na yayu ti komande. So kota ndo ti komande kue! So ala duti na yayu asara si ala yeke bâ ndo nzoni mingi. Teti so ndo so “royaume ti Nzapa” ni aduti dä ayeke yayu, a iri ni nga “royaume ti yayu”. (Luc 8:10; Matthieu 13:11). Agbakuru ti bira wala même angangu ngombe alingbi pëpe ti si na tere ti ngorogbia ni so ayeke na yayu na ti futi ni. Mbeni zo alingbi ti mû ni pëpe nga Royaume ni ayeke sara ande si ye so Jéhovah aleke ti sara aga tâ tënë.​—aHébreu 12:28.

A wara na sese azo so asara kua na iri ti Royaume ti Nzapa na so a lingbi ti zia bê kue na ala. E hinga ni tongana nyen? Psaume 45:17 atene: ‘Fade mo sara si amolenge ti mo aga amokonzi ti sese kue.’ Zo so a iri lo “mo” na yâ ti prophétie so ayeke Molenge ti Nzapa (Psaume 45:7, 8; aHébreu 1:7, 8). Tongaso, Jésus Christ mveni ayeke zia ande amokonzi so ayeke sara kua na iri ti Royaume ni. E lingbi ti mä na bê so ala yeke sara ande ye alingbi tâ na ti so Jésus afa. Même laso, a yeke fa ye na akoli so alingbi, so ayeke sara kua tongana a-ancien na yâ ti kongregation, ti ‘sara’ wala ti lë “mokonzi na ndo” amba ti ala Chrétien pëpe, me ti bata ala, ti kpengba ala na ti dë bê ti ala.​—Matthieu 20:25-28; Esaïe 32:2.

Azo so Royaume ni akomande na ndo ti ala ayeke azo ti mbilimbili. Na lê ti Nzapa, ala lingbi kue nga ala yeke mbilimbili (aProverbe 2:21, 22). Bible atene: “Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.” (Psaume 37:11). Azo ti gbe ti Royaume ni ayeke na tâ be-ti-molenge, ala yeke nduru ti yeda si a fa ye na ala nga ala yeke na nzobe mingi. Kozo ye so agbu bê ti ala ayeke aye ti yingo (Matthieu 5:3). Ala ye ti sara ye so ayeke mbilimbili na ala yeke yeda na fango lege ti Nzapa.

Royaume ti Nzapa ayeke na andia so mara ni ayeke use pëpe. Andia na akpengba-ndia so ayeke fa lege na Royaume ni alondo na Jéhovah Nzapa lo mveni. Ahon ti tene a kanga lege na e gi senge senge, andia ni ayeke sara nzoni na e (Psaume 19:8-12). Laso, azo mingi awara nzoni awe na lege ti kpengo andia ti Jéhovah so ayeke mbilimbili. Na tapande, sarango ye alingbi na wango so Bible amû na akoli, awali nga na amolenge ayeke sara si sewa atambela nzoni ahon ti kozo (aEphésien 5:33–6:3). Tongana e kpe ndia so ahunda na e ti “yü ndoye,” songo ti e na amba ti e ayeke ga nzoni (aColossien 3:13, 14). Na ngoi so e yeke sara ye alingbi na akpengba-ndia ti Mbeti ti Nzapa, e yeke ga azo so ahinga ti sara kua nga e yeke na nzoni bango ndo na ndo ti nginza (aProverbe 13:4; 1 Timothée 6:9, 10). Na nda ni, tongana e yeke kpe nyongo sämba ahon ndo ni, ye ti pitan, nyongo manga nga na mbangi, a yeke mû maboko na e ti bata seni ti e.​—aProverbe 7:21-23; 23:29, 30; 2 aCorinthien 7:1.

Royaume ti Nzapa ayeke mbeni ngorogbia so lo Nzapa mveni si asigigi na ni. Gbia ni, Jésus Christ, nga na ala kue so akomande na tere ti lo, ala yeke na kungba na gbele Nzapa ti sara ye alingbi na andia ti lo so ayeke mbilimbili nga na akpengba-ndia so lo mû na lege ti ndoye. Azo so Royaume ni akomande na ndo ti ala, so na popo ni a yeke wara ala so ayeke sara kua na iri ti Royaume ni na sese ge, ayeke na ngia ti sara ye alingbi na andia ti Nzapa. Tongaso, ye so aga na kozo ndo na yâ ti fini ti agbia ti Royaume ni nga na azo ti gbe ti ala ayeke songo ti ala na Nzapa. Ni la si Royaume ni ayeke biani ngorogbia so Nzapa la akomande na ndo ni. A yeke sara biani ye so Nzapa asigigi na ni ndali ni. Me, Royaume ti Nzapa, so a iri ni nga Royaume ti Messie, ato nda ti komande lawa?

Royaume ni ato nda ti komande

Mbeni ye so amû lege na e ti hinga ngoi so Royaume ni ato nda ti komande ayeke na yâ ti atënë ti Jésus so: “Fade aGentil adoro Jérusalem na gere ti ala, juska ngoi ti aGentil awe.” (Luc 21:24). Na ndo sese mobimba, gi oko gbata so lani iri ti Nzapa ayeke na ndo ni ayeke Jérusalem (1 aGbia 11:36; Matthieu 5:35). A yeke lani li-kodoro ti mbeni royaume na sese ge so Nzapa ayeda na ni nga lo mû maboko na ni. A-Gentil wala amara ayeke doro gbata ni na gere ti ala na lege so angorogbia na sese ge ayeke kaï lani komandema ti Nzapa na ndo azo ti lo. Ye so ato nda ni lawa?

A tene tënë so na ndangba gbia so aduti lani na ndo trône ti Jéhovah na Jérusalem: “Mo lungula tiare, mo lungula couronne; . . . Fade ye so ayeke mbeni pëpe juska Lo ga, Lo so ye so ayeke ti Lo; na fade Mbi mû ye so na Lo.” (Ezéchiel 21:30-32). A lingbi a zi lani couronne ni na li ti gbia so, nga komandema ti Nzapa na ndo azo ti lo ayeke hunzi teti mbeni ngoi. Ye so asi lani na ngu 607 kozo ti Christ tongana azo ti Babylone afuti Jérusalem. Na yâ ti “ngoi ti aGentil” so ato nda ni na ngu ni so ti gue na ni, Nzapa ayeke na mbeni ngorogbia na sese ge pëpe so aduti fä ti yanga-ti-komande ti lo. A yeke gi na hunzingo ti ngoi so si Jéhovah ayeke mû ngangu ti komande ni na “Lo so ye so ayeke ti Lo”, so ayeke Jésus Christ. Ngoi ni so ayeke ninga ngu oke?

Mbeni prophétie na yâ ti mbeti ti Daniel atene: “I fâ keke so na sese, na i futi keke ni, me i zia ngbonda ti keke na gere ni angbâ na yâ sese, . . . i kanga keke so na wen na gengere . . . juska ngoi mbasambala ahon na ndo lo.” (Daniel 4:23). Tongana ti so e yeke bâ ande, “ngoi mbasambala” so a sara tënë ni ge alingbi na wungo ti ngu so “ngoi ti aGentil” ayeke sara.

Na yâ ti Bible, ngoi na ngoi a yeke haka azo, amokonzi nga na aroyaume na akeke (Psaume 1:3; Jérémie 17:7, 8; Ezéchiel, chapitre 31). “Azo ti nda ti sese kue alingbi ti bâ” keke so a sara tënë ni yâ ti mbeti ti Daniel me so ayeke tâ keke pëpe (Daniel 4:11). Ni la, keke ni so a yeke dë ni ande nga a yeke kanga ni aduti fä ti mbeni royaume so akomande “juska na nda ti sese”, so ti tene komandema ti royaume ni andu azo ti sese kue (Daniel 4:17, 20, 22). Tongaso, keke ni aduti fä ti kota yanga-ti-komande ti Nzapa na yâ ti dunia kue, mbilimbili na yâ ti aye so andu komandema ti lo na ndo sese. Teti mbeni ngoi, Nzapa akomande lani na ndo azo ti sese na lege ti Royaume ti lo so lo zia na ndo mara ti Israël. A yeke dë keke ni nga a yeke kanga nduru ni so angbâ na wen nga na gengere si a maï pëpe. Dengo keke ni nga na kangango nduru ni so afa so royaume so Nzapa asara kua na ni ti komande na ndo sese ayeke kaï kua ti lo, tongana ti so a si lani na ngu 607 kozo ti Christ. Me a yeke ngbâ gi tongaso biani biani pëpe. Keke ni ayeke ngbâ na kangango ni tongaso juska “ngoi mbasambala” ahon. Na hunzingo ti ngoi ni so, Jéhovah ayeke mû ande yanga-ti-komande ni na Jésus Christ, lo so ayeke tâ héritier ni. Tongaso, a yeke polele so “ngoi mbasambala” nga na “ngoi ti aGentil” ayeke gi oko ye.

Bible amû maboko na e ti hinga wungo ti ngu so ayeke na yâ ti “ngoi mbasambala” ni. A fa so “ngoi oko, na ngoi nde nde [wala ngoi use], na moitié ti ngoi,” so ti tene ngoi ota na ndambo ayeke lango 1 260 (Apocalypse 12:6, 14). So aye ti tene tongana a mû ngoi so fani use, a ga ngoi mbasambala, wala lango 2 520.

Tongana e to nda ti diko lango 2 520 na ngu 607 kozo ti Christ, e yeke si na ngu 600 kozo ti Christ. Ye oko, ngoi mbasambala aninga ngu mingi ahon so. Na ndembe so Jésus asara lani tënë ti “ngoi ti aGentil”, ngoi mbasambala so angbâ ti gue. Tongaso, ngoi mbasambala ni ayeke lani mbeni prophétie so afa mbeni ye so ayeke si ande. Ni la, a lingbi e diko ngoi ni so na lege ti ndia ti Bible so atene: “Lâ oko teti ngu oko.” (Nombre 14:34; Ezéchiel 4:6). Tongana e diko ni tongaso, ngoi mbasambala so Nzapa azia amara ti komande aga ngu 2 520. Tongana e to nda ti diko ngu 2 520 na ngu 607 kozo ti Christ, e yeke si na ngu 1914. A yeke na ngu ni so si “ngoi ti aGentil” wala ngoi mbasambala ni ahunzi. So ti tene Jésus Christ ato nda ti komande na yâ Royaume ti Nzapa na ngu 1914.

“E ye royaume ti Mo aga”

Teti so Royaume ti Messie ni ato nda ti komande na yayu awe, a lingbi e ngbâ lakue ti sambela ti tene Royaume ni aga tongana ti so Jésus atene na yâ sambela so lo fa ni tongana tapande? (Matthieu 6:9, 10). En. A yeke na lege ni ti ngbâ ti sambela ndali ti Royaume ni teti aye so e hunda ni ade ti ga pëpe. Ade Royaume ti Nzapa akomande na ndo sese ni kue pëpe.

So tâ ye ti nzoni si awakua be-ta-zo ti Nzapa ayeke wara ande tongana Royaume ni akomande sese kue! Mbeti ti Nzapa atene: “Nzapa mveni ayeke na popo ti ala, . . . fade lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.” (Apocalypse 21:3, 4). Na ngoi ni so, “fade wakodoro atene pëpe, Mbi yeke na kobela.” (Esaïe 33:24). Azo so azia ngia na bê ti Nzapa ayeke wara fini ti lakue lakue (Jean 17:3). Na ngoi so e yeke ku ti tene aye so nga na ambeni pendere prophétie ti Bible aga tâ tënë, zia e ngbâ ti “gi royaume ti Nzapa na mbilimbili ti Lo kozoni”.​—Matthieu 6:33.

[Kete tënë na gbe ni]

[Kete tënë na lembeti  4]

Jéhovah Nzapa asoro Jésus Christ ti duti Gbia ti Royaume ti lo

[Diagram/Kete tënë na lembeti 6]

Ngu 2 520

Octobre 607 ◀ Kozo na Christ Na peko ti Christ ▸ Octobre 1914

Ngu 606 na nze ota Ngu 1 913 na nze gumbaya

“Ngoi ti aGentil” ato nda ni na ngu 607 kozo ti Christ na ahunzi na 1914

[Foto na lembeti 7]

Azo so Royaume ti Nzapa ayeke komande ala ayeke wara gbâ ti aye ti nzoni