Mo zia bê ti mo na Nzapa biani?

‘I gi royaume ti Nzapa kozoni.’​—MATTHIEU 6:33.

1, 2. Na ndo tënë ti kua, ye wa mbeni maseka-koli asara? na ngbanga ti nyen?

MBENI maseka-koli aye lani ti mû maboko mingi na kongregation ti lo. Me kpale ni ayeke so kua ti lo akanga lege na lo ti gue lakue na abungbi. Ye nyen lo sara ti leke kpale so? Lo sara si fini ti lo aduti na aye mingi pëpe, lo ke kua ti lo; na pekoni lo wara mbeni kua nde so azi lege na lo ti sara akua ti kongregation. Laso, a yeke futa lo kete ahon ti kozo, me lo lingbi ti bâ lege ti aye so atia sewa ti lo nga ti mû maboko mingi na kongregation.

² Mo hinga ngbanga ti nyen maseka-koli so asara ye tongaso? Mo bâ so mo lingbi ti mû mara ti desizion tongaso? A yeke ye ti gonda ti tene so mingi ti aChrétien amû mara ti desizion tongaso awe. Ye so ala sara afa na gigi so ala zia bê ti ala na zendo ti Jésus so lo tene: “I gi royaume ti Nzapa na mbilimbili ti Lo kozoni, na fade A mû ye so kue na i nga.” (Matthieu 6:33). Ala zia bê ti ala na Jéhovah ti bata ala ahon ti zia bê ti ala na sese so.​—aProverbe 3:23, 26.

3. Ngbanga ti nyen ambeni zo alingbi ti hunda tere ti ala wala wango so ayeke ti gi Royaume ti Nzapa kozoni andu biani ngoi ti e?

³ Teti so gigi ni akpengba laso, ambeni alingbi ti hunda tere ti ala wala maseka-koli so amû nzoni desizion. Laso, mbeni mbage ti azo ayeke na yâ ti kota nzinga na mbeni mbage ni ayeke na mosoro mingi so ade ti bâ ni lâ oko na yâ ti mbaï pëpe. Mingi ti azo na yâ ti akodoro so ayeke na pasi ti mosoro ayeke na nzara ti gi alege kue ti sara si fini ti ala aga nzoni kete. Na mbeni mbage, gingo bê ti azo mingi na yâ ti akodoro ti mosoro ayeke ti bata gi nzoni duti so ala yeke na yâ ni. A yeke tongaso ngbanga ti so gere ti konomi ti ala aluti nzoni pëpe, ala lingbi ti girisa kua ti ala hio, na ala yeke na apatron so ayeke hunda ye mingi na mbage ti azo ti kua ti ala. Teti so gingo kobe ti lâ oko oko ayeke mbeni kpale, ambeni zo alingbi ti hunda tere ti ala: ‘Wango so ayeke ti gi Royaume kozoni alingbi biani na ngoi so e yeke dä so?’ Ti kiri tënë na hundango tënë so, zia e bâ azo so lani Jésus ayeke sara tënë na ala.

I zia ti “gi bê ti i”

4, 5. Jésus amû tapande wa ti fa so a yeke na lege ni ti tene azo ti Nzapa agi bê ti ala ahon ndo ni pëpe ndali ti aye ti lâ oko oko?

⁴ Jésus ayeke lani na sese ti Galilée. Lo yeke sara tënë na gbâ ti azo so alondo na ando nde nde (Matthieu 4:25). Peut-être mingi ti ala ayeke azo ti mawa, na gi wungo ti ala kete si ayeke azo ti mosoro. Ye oko, Jésus awa ala ti gi kozoni ti wara mosoro pëpe, me ti bata kozoni mbeni ye so ayeke na ngere ngangu mingi, so ayeke mosoro ti yingo (Matthieu 6:19-21, 24). Lo tene: “I gi bê ti i tënë ti fini ti i pëpe, fade i te nyen, wala i nyon nyen, wala i yü bongo ti nyen. Fini ahon kobe pëpe? na tere ahon bongo pëpe?”​—Matthieu 6:25.

⁵ Ti mingi ti azo so ayeke mä, atënë ti Jésus alingbi na dutingo ti ala oko pëpe. Ala hinga so tongana ala sara kua ngangu pëpe, sewa ti ala ayeke bâ pasi na pekoni. Ye oko, Jésus atene na ala ti bâ andeke. Andeke ayeke gi kobe ti yanga ti ala lâ na lâ, me Jéhovah ayeke bata ala. Jésus adabe ti ala nga na ndo lege so Jéhovah ayeke bata na akongo ti ngonda, so pendere ti ala ahon ti Salomon na yâ gloire ti lo kue. Tongana Jéhovah ayeke bata andeke na akongo, lo lingbi ande nga ti bata e pëpe? (Matthieu 6:26-30). Tongana ti so Jésus atene, fini (âme) ti e na tere ti e ayeke kota ye mingi ahon kobe so e yeke vo ti bata na fini ti e, na ahon bongo so e wara ti yü na tere ti e. Tongana e mû ngangu ti e kue ti gi ti wara na kobe ti tengo ni na bongo ti yungo ni na e zia nga mbeni ye so akono teti kusala ti Jéhovah pëpe, e yeke hon na tere ti ye so e yeke na fini ndali ni.​—Zo-ti-fa-tene 12:15.

Bâ aye na lege ni

6. (a) Kungba wa aChrétien ayeke na ni? (b) A-Chrétien ayeke zia bê ti ala kue na zo wa?

⁶ Biani, Jésus ayeke wa lani pëpe azo so ayeke mä lo ti zia ti sara kua na ti duti ti ku gi tongaso ti tene Nzapa amû ye na sewa ti ala. Même andeke ayeke gi kobe ndali ti ala mveni nga ndali ti amolenge ti ala. Ni la, ti tene ala te ye, a lingbi akozo Chrétien asara kua. A yeke na ala ti yô akungba ti ala ti sewa. A lingbi aChrétien so asara kua na gbe ti zo na ala so ayeke angbâa asara kua nzoni (2 aThessalonicien 3:10-12; 1 Timothée 5:8; 1 Pierre 2:18). Fani mingi, bazengele Paul asara kua tongana wasarango tente ti bata na tere ti lo (Kusala 18:1-4; 1 aThessalonicien 2:9). Ye oko, aChrétien so azia bê ti ala gi pëpe na kua ti mitele ti bata na tere ti ala. Ala zia bê ti ala na Jéhovah. Nda ni la si ala yeke na siriri ti bê so azo ayeke na ni pëpe. Wasungo psaume atene: “Azo so azia bê ti ala na L’Eternel, ala yeke tongana Hoto ti Sion so alingbi yengi pëpe, me a ngbâ lakue.”​—Psaume 125:1.

7. Zo so azia bê ti lo biani na Jéhovah pëpe, bango ndo ti lo alingbi ti duti so wa?

⁷ Zo kue so azia bê ti lo biani na Jéhovah pëpe alingbi ti bâ aye ni na mbeni lê nde. Ti mingi ti azo, mosoro ti mitele la ayeke kota ye so ayeke bata zo. Ni la, ambeni babâ na mama ayeke wa amolenge ti ala ti mû kota mbage ti lâ ti pendere ti ala ti manda mbeti ayo. Ababâ na mama ni ayeke na beku so ye so ayeke leke ande amolenge ni ti wara mbeni nzoni kua ti nginza. Mawa ni ayeke so, ambeni sewa Chrétien abâ so ala girisa aye mingi teti ala mû ngoi nga na ngangu ti ala kue ti mû lege na amolenge ni ti manda mbeti ayo. Ye ti pekoni ayeke so amolenge ni azia lê ti ala na ndo aye ti yingo mbeni pëpe na ala tomba gi peko ti aye ti mitele.

8. Tongana nyen aChrétien ayeke gi ti bâ ye na lege ni?

⁸ Ni la, aChrétien ti ndara ahinga so wango ti Jésus alingbi na ngoi ti laso legeoko tongana ti so alingbi na ngoi ti lo, na ala yeke gi ti bâ ye na lege ni. Même tongana a yeke ti ala ti mû ngoi mingi teti kua ti mitele ti yô na akungba so Mbeti ti Nzapa amû na ala, ala yeke zia lâ oko pëpe si bezoin ti wara nginza avuko lê ti ala na ndo aye ti yingo so ayeke kota ye mingi.​—Zo-ti-fa-tene 7:12.

“I gi bê ti i pëpe”

9. Tongana nyen Jésus adë bê ti azo so azia bê ti ala biani na Jéhovah?

⁹ Na yâ tënë ti lo so lo fa na li ti hoto, Jésus awa azo so ayeke mä lo, lo tene: “I gi bê ti i pëpe, na i tene pëpe, Fade e te nyen? wala, Fade e nyon nyen? wala, Fade e yü bongo ti nyen? Teti aGentil agi ye so kue; Babâ ti i na yayu ahinga i ye ye so kue.” (Matthieu 6:31, 32). Tënë so amû ngangu na zo biani! Tongana e zia bê ti e biani na Jéhovah, fade lo yeke duti ande dä ti mû maboko na e lakue. Me, atënë ti Jésus so apusu nga zo ti gbu li ti lo. Atënë ni adabe ti e so tongana e mû bê ti e kue ti ‘gi’ akungba ti sese so, bibe ti e ayeke tongana ti “aGentil”, azo so ayeke atâ Chrétien pëpe.

10. Lâ ni so mbeni maseka-koli aga ti hunda wango na Jésus, tongana nyen Jésus afa so koli so aye amosoro ti lo mingi ahon ye kue?

¹⁰ Mbeni lâ, mbeni maseka-koli so ayeke na mosoro mingi ahunda Jésus na ndo ye so ayeke nzoni lo sara ti wara fini ti lakue lakue. Jésus adabe lo na aye so Ndia (so ngangu ni angbâ na ngoi ni so) ahunda ti sara. Maseka-koli ni atene na Jésus ti dë bê ti lo: “Mbi bata tënë so kue lakue, ye nyen amanke mbi?” Kiringo tënë ti Jésus na koli so alingbi ti kpa ye so ayeke ngangu na lê ti azo mingi. Jésus atene na lo: “Tongana mo ye ti ga zo so alingbi kue, mo gue mo kä ye ti mo kue, mo mû nginza ni na awanzinga, na fade mo yeke na mosoro na yayu. Na mo ga mo tambela na peko ti Mbi.” (Matthieu 19:16-21). Maseka-koli so ague na vundu, teti a yeke ngangu na lo ti zia mosoro ti lo. Atâa so lo ye Jéhovah mingi, amosoro ti lo agbu bê ti lo mingi ahon Jéhovah.

11, 12. (a) Atënë ti gbungo li wa Jésus atene lani na ndo mosoro? (b) Tongana nyen aye ti mosoro alingbi ti kanga lege na zo ti sara na Jéhovah?

¹¹ Ye so amû lege na Jésus ti tene mbeni tënë so adö bê, lo tene: “A yeke ngangu na zo ti mosoro ti lï na yâ royaume ti yayu. . . . Lingo ti zo ti mosoro na yâ royaume ti Nzapa ayeke ngangu ahon hongo ti chameau na dû ti suä.” (Matthieu 19:23, 24). Jésus aye ti tene so fade mbeni wamosoro alingbi ti lï na yâ Royaume pëpe? Ên-ën, teti lo tene: “Azo alingbi sara ye so pëpe, me Nzapa alingbi sara ye kue.” (Matthieu 19:25, 26). Biani, na lege ti mungo maboko ti Jéhovah ambeni zo ti mosoro achangé bê ti ala ti ga aChrétien na ala wara yingo vulu (1 Timothée 6:17). Me, tongana Jésus atene atënë ti dongo bê so, nda ni ayeke dä. Lo yeke mû lani gbotongo mê.

¹² Tongana mbeni zo azia bê ti lo mingi na aye ti mosoro ti lo tongana ti maseka-koli so, a lingbi ti kanga lege na lo ti sara na Jéhovah na bê ti lo kue. Tënë so ayeke tâ tënë teti lo so ayeke wamosoro awe nga teti lo so “aye ti wara mosoro”. (1 Timothée 6:9, 10). Ti zia bê kue na amosoro ti sese so alingbi ti gue na mbeni zo ti pensé so ‘ye ti yingo amanke lo’ pëpe (Matthieu 5:3). Ye ti pekoni ayeke so, lo lingbi ti tene nga so lo yeke na bezoin ti tene Jéhovah amû maboko na lo pëpe (Deutéronome 6:10-12). Lo lingbi ti ku ti tene a sara ye na lo nde na yâ ti kongregation (Jacques 2:1-4). Na lo lingbi ti mû mingi ti ngoi ti lo ti wara nzoni na peko ti amosoro ti lo ahon ti sara kua ti Jéhovah.

Gi lakue ti bâ aye na lege ni

13. Sioni bango ndo wa aChrétien ti Laodicée ayeke ândö na ni?

¹³ Ambeni zo so lani ayeke na sioni bango ndo na ndo mosoro ayeke na yâ kongregation ti Laodicée na ngoi ti akozo Chrétien. Jésus atene na ala: “Mo tene, Mbi yeke na mosoro, mosoro ti mbi awu mingi, na ye amanke mbi pëpe; na mo hinga pëpe mo yeke zo ti vundu, mo yeke zo ti pono, mo yeke wanzinga, mo yeke waziba, mo yeke zo so tere ti mo ayeke senge.” A yeke lani mosoro ti ala si asara si azo ti Laodicée ayeke na vundu na lege ti yingo pëpe. Kpale ni ayeke so ala zia bê ti ala mingi na mosoro ti ala ahon Jéhovah. Ye so asara si na lege ti yingo ala “yeke wâ gi kete kete,” na Jésus ayeke lani nduru ti ‘dë ala na gigi.’​—Apocalypse 3:14-17.

14. Ngbanga ti nyen aChrétien Hébreu alingbi na gonda ti Paul?

¹⁴ Me bazengele Paul agonda lani aChrétien Hébreu teti bango ndo ti ala na ngoi ti ye ti ngangu so asi na ala kozo. Lo tene: “I sara be-nzoni na ala so ayeke na kanga, na tongana azo afuti ye ti i, i duti na ngia, teti i hinga i yeke na ye ti nzoni ahon so angbâ lakue.” (aHébreu 10:34). Bê ti aChrétien so aso lani pëpe ndali ti aye ti mosoro ti ala so azo afuti ni. Ala bata ngia ti ala ngbanga ti so ala gbu ngangu ye ti ala ti ngere ngangu: “ye ti nzoni . . . so angbâ lakue.” Legeoko tongana zo ti kango ye ti toli ti Jésus so akä aye ti lo kue ti vo na perle oko ti ngere ngangu, ala leke na bê ti ala ti gbu beku ti ala na ndo Royaume ngangu, atâa ye wa ahunda na ala ti sara (Matthieu 13:45, 46). So nzoni bango ndo biani!

15. Tongana nyen mbeni ita-wali na Libéria azia aye ti Royaume na kozo ndo?

¹⁵ A-Chrétien mingi laso alë nga nzoni bango ndo tongaso. Na tapande, na sese ti Libéria, mbeni ita-wali awara pasa ti gue ti manda mbeti na senda-gi. Na kodoro so, azo ni abâ mara ti ye so tongana lege ti tene kekereke mo bata tere ti mo nzoni. Ye oko, lo yeke pionnier, wafango tënë ti ngoi kue, na a tisa lo ti gue ti fa tënë teti kete ngoi tongana pionnier spécial. Lo soro ti gi Royaume kozoni na lo ngbâ na yâ kua ti pionnier. Lo gue lani na ndo so a tokua lo dä na lo to nda ti manda Bible na azo 21 na yâ ti nze ota. Maseka ita-wali so na ambeni saki mingi tongana lo agi Royaume kozoni, atâa so sarango tongaso alingbi ti sara si ala duti na akungba mingi pëpe. Tongana nyen ala bata mara ti bango ndo tongaso na yâ ti mbeni sese so aye tënë ti akungba mingi? Ala lë ambeni nzoni sarango ye. Zia e bâ ambeni.

16, 17. (a) Ngbanga ti nyen tâ be-ti-molenge ayeke kota ye mingi tongana e ye ti zia bê ti e na Jéhovah? (b) Ngbanga ti nyen a yeke nzoni ti ngbâ ti zia bê na azendo ti Nzapa?

¹⁶ Tâ be-ti-molenge: Mbeti ti Nzapa atene: “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili. Mo bâ mo mveni tongana wandara pëpe.” (aProverbe 3:5-7). Ngoi na ngoi, mbeni ye so e soro ti sara alingbi ti duti nzoni na lê ti zo (Jérémie 17:9). Me, nzoni Chrétien ayeke bâ ndo na mbage ti Jéhovah ti fa lege na lo (Psaume 48:15). ‘Na lege ti lo kue’, so ti tene tongana a yeke atënë so andu kongregation, mandango mbeti wala kua ti nginza, sarango ngia wala mbeni ye nde, na tâ be-ti-molenge lo yeke gi wango ti Jéhovah.​—Psaume 73:24.

¹⁷ Ziango bê na azendo ti Jéhovah: Paul atene lani: “Zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo.” (aHébreu 11:6). Tongana e dë kite so Jéhovah alingbi ti sara si azendo ti lo aga tâ tënë, e lingbi ti tene so a yeke na lege ni ti ‘sara ye na sese so’. (1 aCorinthien 7:31). Na mbage, tongana mabe ti e akpengba, fade e yeke zia pëpe ti gi Royaume kozoni. Tongana nyen zo alingbi ti sara si mabe ti lo akpengba lakue? A yeke na lege ti gango nduru na Jéhovah lakue, ti sambela lo na bê kue na ti manda ye lo mveni lakue (Psaume 1:1-3; aPhilippien 4:6, 7; Jacques 4:8). Tongana Gbia David, e lingbi ti sambela, e tene: “Mbi zia bê ti mbi na Mo, O L’Eternel, mbi tene, Mo yeke Nzapa ti mbi. O! nzobe ti Mo ayeke kota mingi!”​—Psaume 31:15, 20.

18, 19. (a) Tongana nyen nzara ti sara kusala ngangu ayeke kpengba mabe ti e na Jéhovah? (b) Ngbanga ti nyen ayeke nzoni ti tene Chrétien aduti nduru ti gbanzi ye na tere ti lo?

¹⁸ Sarango kusala ti Jéhovah na bê kue: Paul azia lani kamba na popo ti ziango bê na azendo ti Jéhovah na nzara ti sara kusala ngangu; lo tene: “E ye azo oko oko kue na popo ti i ti fa na gigi nzara ti sara kusala so si i hinga tënë kue ti beku ti i juska na nda ni.” (aHébreu 6:11). Tongana e yeke na ye mingi ti sara na yâ kusala ti Jéhovah, fade lo yeke mû maboko na e. Lakue tongana e bâ maboko ti lo na ndo ti e, mabe ti e na lo akpengba, e yeke ‘duti kpô, ye ayengi e pëpe’. (1 aCorinthien 15:58). Mabe ti e akiri awara ngangu, na beku ti e akpengba biani.​—aEphésien 3:16-19.

¹⁹ Dutingo nduru ti gbanzi ye na tere: Paul adö lege ti nzoni kusala so lo yeke sara ândö ti mû peko ti Jésus. Lo soro lani polele mbilimbili ye so lo ye ti sara, atâa so ngoi na ngoi ye akpengba na lo na lege ti mitele (1 aCorinthien 4:11-13). Jéhovah atene pëpe so fade awakua ti lo ayeke ga azo ti mosoro; nga ngoi na ngoi gigi alingbi ti kpengba na ala. Tongana e yeke nduru ti zi ambeni ye na yâ fini ti e na ti gbanzi ye na tere ti e, e yeke fa so e leke na bê ti e biani ti sara gi na Jéhovah.​—1 Timothée 6:6-8.

20. Ngbanga ti nyen be-nze-pepe ayeke kota ye teti lo so azia aye ti Royaume na kozo ndo?

²⁰ Be-nze-pepe: Disciple Jacques awa lani amba ti lo awamabe, lo tene: “Tongaso, aita, i duti na be-nze-pepe juska singo ti Seigneur.” (Jacques 5:7). Na yâ ti sese so ye kue ayeke tambela gi na loro, a yeke ngangu ti duti na be-nze-pepe. E ye si aye ague hio hio. Me Paul awa e ti mû tapande ti ala so ‘aga ahéritier ti zendo na lege ti mabe na be-nze-pepe.’ (aHébreu 6:12). Zia mo duti nduru ti ku Jéhovah. Fini ti lakue lakue na yâ paradis na ndo sese, a yeke biani ye so a lingbi mo ku ni!

21. (a) Nyen la e yeke fa tongana e zia aye ti Royaume na kozo ndo? (b) Ye wa e yeke sara tënë ande na ndo ni na yâ article ti peko?

²¹ Biani, wango ti Jésus ti gi Royaume kozoni alingbi biani na ngoi ti e. Tongana e sara ni, e yeke fa na gigi so e zia bê ti e biani na Jéhovah na e soro gi oko nzoni lege so alingbi Chrétien atambela dä. Me, Jésus awa nga e ti ngbâ ti ‘gi mbilimbili ti Nzapa kozoni’. Na yâ article ti peko, e yeke bâ ande ngbanga ti nyen e yeke na mbilimbili bezoin ti wango so laso.

Mo lingbi ti fa nda ni?

• Na ndo tënë ti aye ti mitele, nzoni bango ndo wa Jésus awa e ti duti na ni?

• Ye nyen e manda na yâ toli ti Jésus na ndo chameau na dû ti suä?

• Anzoni sarango ye wa ayeke mû maboko na e ti gi Royaume ti Nzapa kozoni?

[Foto na lembeti 21]

Mingi ti azo so amä lani Jésus ayeke awanzinga

[Foto na lembeti 23]

Maseka-koli wamosoro so aye amosoro ti lo mingi ahon Nzapa

[Foto na lembeti 23]

Zo ti kango ye ti toli ti Jésus akä aye ti lo kue ti vo perle oko ti ngere ngangu

[Foto na lembeti 24]

Tongana e yeke na ye mingi ti sara na yâ kusala ti Jéhovah, fade lo yeke mû maboko na e