Nda ni so a lingbi e sala kua

NYEN la mo ye ni mingi, ti sala kua wala ti sala ngia?— Ti tâ tënë ni, a yeke sioni pëpe ti sala ngia. Bible atene so “kota place ti [Jérusalem] asi singo na amolenge-koli na amolenge-wali so asala ngia dä.”​—Zacharie 8:5.

Kota Wafango ye aye lani ti bâ amolenge na salango ngia. Kozoni si lo ga na sese, lo tene: ‘Mbi yeke na tele ti Nzapa tongana wakode. Mbi duti na ngia na gbele Lo lakue.’ Bâ, Jésus ayeke lani mbeni ngangu zo ti kua na tele ti Jéhovah na yayu. Nga na ngoi so lo de kâ, lo tene: “Mbi wara ngia na popo ti amolenge ti azo.” Biani, tongana ti so e manda awe, Kota Wafango ye ayeke bi bê ti lo biani na ndo azo kue, même akete molenge.​—aProverbe 8:30, 31.

Tongana lo yeke lani kete, Jésus asala ngia?— Peut-être. Me teti so lo duti ândö mbeni “wakode” na yayu kâ, lo sala nga kua na sese ge?— Bâ, a hiri lani Jésus ‘molenge ti zo ti kpakango keke.’ Me a hiri nga lo ‘zo ti kpakango keke’. A fa nyen la?— A fa so Joseph, so abata Jésus tongana molenge ti lo, afa kua ti kpakango keke na Jésus. Ni la Jésus nga kue aga zo ti kpakango keke.​—Matthieu 13:55; Marc 6:3.

Jésus ayeke lani mara ti zo ti kpakango keke wa?— Teti so lo yeke lani mbeni zo so ahinga ti sala kua na yayu kâ, ti mo, lo ga nga mbeni zo ti kpakango keke so ahinga kua ti lo, ni la ape?— Bâ ngangu kua so mbeni zo ti kpakango keke ayeke sala lani. A hunda peut-être na Jésus ti gue na ngonda ti dë keke kâ, ti fâ yâ ni kete kete, ti mû ni na ti ga na ni na kodoro, na ti mû ni ti leke na atable, ambata na ambeni ye nde tongaso.

Ti mo, kua so anzere lani na Jésus?— A yeke nzere na mo ti leke apendere table, angende nga na ambeni ye si azo alingbi ti sala ye na ni?— Bible atene so a yeke nzoni ti tene zo ‘awara ngia na lege ti kua ti lo’. Kua ayeke ga na mbeni nzerengo tele so salango ngia alingbi ti ga na ni pëpe.​—Zo-ti-fa-tene 3:22.

Tâ tënë, kua ayeke sala nzoni na li nga na tele ti e. Amolenge mingi ayeke duti gi ti sala tënë wala ti sala ngia na akamarade ti ala. Ala ga azo so aye kua pëpe na li ti ala akpengba. Ala yeke biani na ngia pëpe. Ala yeke sala nga si azo aduti na ngia pëpe. A lingbi e sala nyen ti duti na ngia?—

Na chapitre 17 ti buku so, e manda so mungo ye na zo nga mungo maboko na zo ayeke ga na ngia (Kusala 20:35). Bible ahiri Jéhovah, Nzapa so ayeke na ngia. Na tongana ti so e diko fade na aProverbe, Jésus aduti “na ngia na gbele Lo lakue.” Ngbanga ti nyen Jésus ayeke lani na ngia?— Lo fa nda ni tongana lo tene: ‘Babâ ti Mbi asala kua juska fadeso, na Mbi ngbâ ti sala kua nga.’​—Jean 5:17.

Tongana Jésus ayeke lani na sese ge, lo sala kua ti zo ti kpakango keke na yâ fini ti lo kue pëpe. Jéhovah Nzapa amû mbeni kota kua na lo ti sala na ndo ti sese. Mo hinga kua ni?— Jésus atene: ‘A yeke ngbanga ti mbi ti fa nzo tënë ti royaume ti Nzapa na ambeni kodoro nga; teti A tokua mbi ndali ni.’ (Luc 4:43). Na ambeni ngoi, tongana Jésus afa tënë na azo, ala mä na bê na lo na ala fa ye so na ambeni zo nde, tongana ti so wali Samaritaine so mo bâ lo ge asala lani.​—Jean 4:7-15, 27-30.

Jésus abâ lani kua ti lo ni tongana nyen? Lo ye lani ti sala ni?— Jésus atene: ‘Kobe ti Mbi ayeke ti sala ye so Lo so atokua Mbi aye, na ti sala kua ti Lo kue.’ (Jean 4:34). Kobe so mo ye tënë ni mingi, mo ye ti te ni lege oke?— Ye so afa na mo tongana nyen Jésus aye lani kua so Nzapa amû na lo ti sala.

Mandango ti sala kua ayeke mû maboko na e ti duti na ngia. A yeke tongaso si Nzapa aleke e. Lo tene so matabisi so lo mû na zo ayeke ti tene lo ‘wara ngia na yâ kua ti lo’. Tongaso, tongana mo manda ti sala kua na ngoi so mo de kete, mo yeke duti ande na ngia na yâ fini ti mo kue.​—Zo-ti-fa-tene 5:18.

A ye ti tene pëpe so molenge alingbi ti sala kua ti kota zo, me e kue e lingbi kamême ti sala mbeni kua. Babâ na mama ti mo ayeke sala peut-être kua ti nginza, si fami ti mo awara kobe ti te nga na da ti lango na yâ ni. Na, tongana ti so mo hinga, kua ti da ayeke mingi ti salango ni, si da ni aduti na saleté pëpe.

Kua wa mo lingbi ti sala si a ga na nzoni na fami ni kue?— Mo lingbi ti ga na ngu ti maboko, ti sukula asembe, ti tuku asaleté, ti sukula yâ ti chambre so mo yeke lango dä na ti kiri na aye ti ngia ti mo na place ti ala. Mo yeke sala peut-être ambeni ye ni so awe. Kua so ayeke ga biani na ye ti nzoni na fami ti mo.

Zia e bâ tongana nyen mara ti kua tongaso ayeke ga na ye ti nzoni na zo. A hunda ti kiri na aye ti ngia ti mo na place ti ala na peko ti so mo hunzi ti sala ngia na ni. Ngbanga ti nyen a yeke kota ye ti sala tongaso?— A sala si yâ ti da angbâ nzoni, nga si azo awara sioni pëpe. Tongana mo kiri na aye ti ngia ti mo na place ti ala pëpe, mama ti mo alingbi ti lï na yâ ti da ni na gbâ ti aye na maboko ti lo na lo tambela na ndo ni. Lo lingbi ti tï na ti wara sioni. A lingbi même ti gue na lo na hôpital. A yeke duti ande nzoni la?— Tongaso, tongana mo kiri na aye ti ngia ti mo na place ti ala na peko ti so mo hunzi ti sala ngia na ni awe, a yeke ga na ye ti nzoni na azo kue.

Mandango mbeti ayeke nga mbeni kua so amolenge alingbi ti sala. Na ekole, mo yeke manda ti diko mbeti. Ti ambeni molenge, dikongo ye anzere na ala, me ti ambeni, a kara ala. Atâa a kara mo na tongo nda ni, mo yeke duti na ngia tongana mo manda ti diko mbeti nzoni. Tongana mo hinga ti diko mbeti nzoni, mo lingbi ti manda apendere ye mingi. Mo lingbi même ti diko Bible mo oko. Tongaso, tongana mo manda mbeti ti mo nzoni, a yeke ga biani na ye ti nzoni ape?—

Ambeni zo aye ka ti sala kua pëpe. Peut-être mo hinga mbeni mara ti zo tongaso. Me teti so Nzapa aleke e ti sala kua, a lingbi e manda ti ye ni. Kota Wafango ye aye lani kua ti lo ni tongana nyen?— A yeke tongana tengo mbeni kobe so lo ye ni mingi. Na kua ni so ayeke so wa?— A yeke fango ye na azo na ndo Jéhovah Nzapa nga tongana nyen ala lingbi ti wara fini ti lakue lakue.

Bâ ye so alingbi ti mû maboko na e ti ye kua ti e. Hunda tele ti mo, ‘A lingbi a sala kua so ngbanga ti nyen?’ Tongana mo hinga ngbanga ti nyen mbeni ye ayeke kota mingi, a yeke ngangu pëpe ti sala ni. Na atâa kua ni ayeke kete wala kota, sala ni nzoni. Tongana mo sala ni, mo lingbi ti wara ngia na yâ kua ti maboko ti mo, tongana ti so Kota Wafango ye ti e awara lani ngia dä.