Chapitre 53

Nzoni gbia ti kota ahon zo

TONGANA Jésus amu kobe na lege ti ye ti kpene na azo saki mingi mingi, be ti azo ni ado. Ala tene: “Biani, zo so ayeke prophète so ayeke ga na sese so.” Ala tene so Jésus ayeke prophète so ayeke kota ahon Moïse, na nga ala tene so lo yeke duti nzoni gbia teti ala. Tongaso ala wa tele ti ala na popo ti ala ti gbu lo na ti sala si lo ga gbia.

Ye oko, Jésus ahinga ye so azo aye ti sala na lo. Tongaso lo sala ye fade fade ti tene ala kamata lo na ngangu pepee ti ga gbia ti ala. Lo to azo mingi so na kodoro ti ala na lo wa adisciple ti lo ti zu na ya ti ngo ti ala na ti kiri na Capernaüm. Na pekoni lo gue na hoto ni ti sambela. Na bi so Jésus ayeke ka gi lo oko.

Ngoi kete kozoni si la atonda ti londo, Jésus ka na ndo hoto ni abaa ndo yongoro na lo baa so mapo ayeke londo na le ti kota ngu teti pupu aïa mingi. Teti so Pâque aga ndulu, nze aza mingi, na tongaso Jésus alingbi baa adisciple ti lo so asala kaï ngangu teti mapo ni aye ti kanga lege na ala ti si na ndo so ala ye ti gue da. Akoli ni asala kaï na ngangu ti ala kue.

Tongana lo baa ye so, Jésus azu na hoto ni na lo tonda ti tambela na le ti kota ngu ti si na ala. Ngo asala kilomètre osio wala oku tongana Jésus asi na ala. Me, lo sala tongana lo yeke hon na tele ti ala. Tongana adisciple abaa lo, ala dekongo: “So ayeke mbeni yingo!”

Jésus asala tene na ala si mbito azia ala: “A yeke mbi; i zia mbito.”

Me Pierre atene: “Seigneur, tongana a yeke mo, mo komande mbi ti ga na mo na le ti ngu.”

Jésus akiri tene na lo: “Mo ga!”

Na Pierre alondo na ya ti ngo, lo zu na le ti ngu, na lo tambela na le ti ngu ni ti gue na Jésus. Me tongana lo baa pupu ayeke ngangu, mbito agbu Pierre, na lo tonda ti linda, lo dekongo: “Seigneur, so mbi!”

Fade fade Jésus aye maboko ti lo, lo kamata lo, lo tene na lo: “Mo zo ti kete mabe, teti nyen mo dekite?”

Tongana Pierre na Jésus ali na ya ti ngo, pupu ni akaï, na be ti adisciple ado mingi. Me ngbanga ti nyen be ti ala ado? Tongana ala gbu “nda ti tene ti mapa ni” na lege ti mu na nenee ni kota ye ti kpene so Jésus asala ngoi kete kozoni tongana lo mu kobe na azo saki mingi na lege ti amapa oku na akete susu use, ka fade be ti ala ado pepee ti baa so lo lingbi ti tambela na le ti ngu na ti sala si pupu akaï. Fadeso adisciple asambela Jésus na ala tene: “Biani, mo yeke Molenge ti Nzapa.”

Ngoi kete na pekoni, ala si na Gennésareth, mbeni pendere sese so kobe ale da mingi so ayeke ndulu na Capernaüm. Ka ala kanga ngo ni na tele ti ngu. Tongana ala sigigi na ya ngo ni, azo ahinga Jésus, na ala gue na sese ka ti gi azo ti kobela. Ala yo azo so na ndo ti gbogbo na ala ga na ala na ndo so Jésus ayeke da. Tongana ala ndu gi ye ti pendere ti yanga ti kota bongo ti Jésus, tele ti ala aga nzoni biani.

Na ngoi oko so, azo so abaa ye ti kpene so Jésus asala ti mu kobe na azo saki mingi abaa so Jésus ahon awe. Tongana ambeni ngo ti Tibériade asi, ala zu na ya ango so na ala gue na Capernaüm ti gi Jésus. Tongana ala wara lo, ala hunda na lo: “Rabbi, mo i na ndo so a nyen?” Tongana e yeke baa ande Jésus azingo na ala. Jean 6:14-25; Matthieu 14:22-36; Marc 6:45-56.

▪ Na peko ti so Jésus amu kobe na azo saki mingi na lege ti ye ti kpene, azo ni aye ti sala nyen na lo?

▪ Na ndo hoto so lo gue da Jésus abaa nyen? Tongaso lo sala nyen?

▪ Ngbanga ti nyen aye so alingbi ti sala pepee si be ti adisciple ado?

▪ Ye nyen asi tongana ala si gigi na ngo ni?