Na nzoni bê lo sava mbeni zo ti buruma

Tongana Jésus na adisciple ti lo osio ayeke fa lani tënë na yâ ti “asynagogue . . . na sese ti Galilée kue,” sango ti ambeni ye so lo yeke sara lani amû ndo (Marc 1:39). Tënë ni atï nga na mê ti mbeni zo ti buruma so ayeke na yâ ti mbeni gbata ni nde. Luc, so ayeke docteur, afa so zo ni so, “buruma amû tere ti lo kue”. (Luc 5:12). Tongana kobela ni so aninga na tere ti mbeni zo, a yeke te tere ti zo ni so yeke na yeke kue.

Tongaso, kobela ti koli ni so ayeke lani ngangu mingi, na a hunda na lo ti duti yongoro na azo. Na ndo ni, tongana lo bâ so azo ayeke ga nduru na lo, a lingbi lo dekongo lo tene: ‘Mbi ga sioni awe! mbi ga sioni awe!’, tongaso si azo ni awara kobela ti lo ni ape (Lévitique 13:45, 46). Me nyen la zo ti buruma ni asara? Lo ga nduru na Jésus, lo tï na devant ti lo na lo voro yanga na lo, lo tene: “Seigneur, mo lingbi ti sara si tere ti mbi aga nzoni tongana mo ye.”—Matthieu 8:2.

Koli so ayeke na mabe na Jésus! Na kobela so adoit ti te tere ti lo sioni! Me Jésus ayeke sara ande tongana nyen? Tongana mo yeke lani na place ni, nyen la mo yeke sara? Mawa ahon ndo ti Jésus na lo yôro maboko ti lo, lo ndu koli ni. Jésus angbâ atene na lo: “Mbi ye. Zia tere ti mo aga nzoni.” (Matthieu 8:3). Tâ gi tongana mbeni ye ti bango li, buruma ni ahon na tere ti koli ni.

Mo kue mo ye ti wara mara ti mbeni gbia so ayeke bâ mawa ti azo nga so ayeke na ngangu tongana Jésus? Fason so lo sara na ye na mbage ti zo ti buruma so afa na e so, na ngoi so Jésus ayeke komande ande na ndo ti sese kue, prophétie ti Bible so ayeke ga ande tâ tënë, so a tene: ‛Lo yeke bâ mawa ti azo ti mawa nga na ti awayere; lo yeke sö fini ti awayere.ʼ (Psaume 72:13). Biani, Jésus ayeke aidé ande azo kue so ayeke bâ pasi, na a yeke tâ ye so lo ye la.

Girisa ape so, même kozoni si Jésus asava zo ti buruma so, kua ti lo ti fango tënë anzere lani na azo mingi. Fadeso, azo ni ayeke mä ande tënë ti miracle so lo londo ti sara so. Me Jésus aye pëpe si azo amä na bê na lo gi ngbanga ti so ala mä tënë ti aye so lo sara na yanga ti azo. Lo kue lo hinga prophétie ti Bible so atene, ‛a yeke mä ande go ti lo na ndo ti lege pëpe,ʼ so ti tene lo yeke pika kate ti lo ape (Ésaïe 42:1, 2). Ni la, Jésus agboto mê ti koli so na lo tene na lo, lo tene: “Mo sara tënë ni na zo oko ape. Me mo gue, mo fa tere ti mo na aprêtre, na mo mû matabisi so Moïse afa ni.”—Matthieu 8:4.

Tongana ti so mo peut ti pensé, tere ti koli ni so anzere mingi juska a sara si lo kanga tënë ni gbä na yâ ti lo. Lo gue na lo komanse ti sara tënë ti ye ni na azo kue. Ye so asara si azo kue aye ti gi ti hinga encore aye mingi na ndo ni. A gue a sara ngbii Jésus apeut fadeso ti lï dandara tongaso na yâ ti mbeni gbata ape. Ni la teti mbeni ngoi, lo gue lo ngbâ na yâ ti ambeni ndo so zo oko ayeke lango dä ape. Me so kue gbä, gbâ ti azo aga encore na lo ti tene lo fa ye na lo sava ala.