Mo “yeda ti” mû maboko na ambeni zo?
1 Kite ayeke dä pëpe so Jésus apensé lani na azo. Tongana mbeni zo ti buruma adema na Jésus ti mû maboko na lo, Jésus aye tïtî lo, lo ndu koli ni, na lo tene: “Mbi yeda. Tele ti mo aga nzoni.” (Marc 1:40-42). Na lege wa e lingbi ti mû tapande ti bibe ti Jésus na ndo mungo maboko na ambeni zo?
2 Azo so asala nzara ti tâ tënë: Zo oko oko kue na yâ kongregation ayeke sala kua biani ti mû maboko na azo so asala nzara ti tâ tënë ti ga awavorongo Jéhovah. Tongana ambeni fini zo aga na abungbi, yamba ala na gi ti hinga ala. Gi alege kue ti wa ala. Gonda ala teti akiringo tënë ti ala na bungbi. Gonda ala teti angangu so ala yeke sala ti bata akpengba-ndia ti Bible na yâ fini ti ala. Mû maboko na ala ti bâ so lege ayeke dä ti wara atâ kamarade na yâ kongregation.
3 Aita ti e awamabe: Na alege nde nde, a lingbi e mû maboko mbilimbili na “aita ti e awamabe.” (aGal. 6:10). Aita mingi ayeke tiri na akpale ti kobela. Tongana mo sala mbeni vizite ti kpengba ala, mo lingbi ti duti ndulu mingi na tele ti ala. Mo lingbi nga peut-être ti mû maboko na ala na lege ti ambeni kode. Peut-être na popo ti ala, ambeni ayeke wara akpale nde na yâ fini ti ala. Fa so mo pensé na ala na mungo ngoi ti mä ala na ti kpengba ala (1 aThes. 5:14). A-ancien nga ayeke na bezoin ti mungo maboko ti e tongana ala yeke yô akungba ti ala (aHéb. 13:17). Na fango na gigi so e yeke ndulu ti sala ye na ti mû maboko, e lingbi ti ga “azo so alungula vundu na bê” ti aita ti e awamabe.—aCol. 4:11.
4 Azo ti da ti e: A lingbi e tara nga ti mû tapande ti bibe ti Jésus na mbage ti azo ti sewa ti e mveni. Tongana ababâ na mama abi bê mingi na amolenge ti ala, a yeke pusu ala ti ‘bata amolenge ti ala, ti fa lege na ala na yâ wango ti Seigneur.’ (aEph. 6:4). Amolenge nga alingbi ti mû maboko na dutingo lakue ndulu tongana ngoi ti mandango ye na sewa, ti guengo na abungbi ti kongregation, wala ti guengo na fango tënë alingbi. Amolenge so akono awe alingbi ti fa bê ti ndoye so Jésus afa na mungo maboko na ababâ na mama ti ala so ayeke na akpale so aga na lâ ti mbakoro. Na lege so wala na ambeni nde, e kue e lingbi ti ‘manda ti fa lege ti bata tënë ti Nzapa na afamille ti e mveni’.—1 Tim. 5:4.
5 Tongana e mû tapande ti Jésus na mungo maboko na ambeni zo, e lingbi peut-être ti yapu akpale ti ala. E yeke kono nga songo ti sewa ti e na ti kongregation ti e. Ye so ayeke kota ahon kue, e yeke yekia Jéhovah, “Babâ ti be-nzoni”.—2 aCor. 1:3.