Chapitre 25

Lo sala be-nzoni na zo ti buruma

TONGANA Jésus na adisciple ti lo osio ague na ambeni kodoro ti Galilée, tene ti aye ti kpene so lo sala akangbi na ya sese ni kue. Tene ti ye so lo sala asi na mbeni kodoro na ndo so mbeni koli ayeke da so ayeke na kobela ti buruma. Zo ti kaïngo kobela Luc atene “buruma ate lo kue”. Tongana sioni kobela aninga na tele ti zo, yeeke yeeke abuba mbage nde nde ti tele ti lo. Tongaso zo ti buruma so aduti nzoni oko pepee.

Tongana Jésus asi na kodoro ni, zo ti buruma aga ndulu na lo. Na lege ti Ndia ti Nzapa, a lingbi zo ti buruma adekongo “Sioni, sioni!” ti bata ambeni zo yongoro na lo si kobela ni amu ala pepee. Fadeso zo ti buruma ati na sese na le ti lo na lo hunda mingi na Jésus: “Seigneur, tongana mo ye mo lingbi sala si tele ti mbi aga nzoni.”

Koli so ayeke na mabe mingi na Jésus! Ye oko, sioni kobela so asala si tele ti lo kue abuba! Fade Jésus asala nyen? Fade mo sala nyen? Mawa ti koli so asala lo, tongaso Jésus ayoro maboko ti lo, lo ndu lo, lo tene: “Mbi yeda. Tele ti mo aga nzoni.” Na fade fade buruma ti lo awe.

Tongana mbeni zo ti be-nzoni tongaso aga gbia ti mo fade a nzere na be ti mo? Lege so Jésus asala ye na zo ti buruma so afa na e so na ngoi ti komandema ti Royaume ti lo, fade prophétie so ti Mbeti ti Nzapa ayeke ga taa tene: “Fade lo sala be-nzoni na wanzinga na zo so ye atia lo mingi, na lo so âme ti ala so ye atia ala mingi.” Biani, na la ni ka Jésus ayeke sala si ye so be ti lo aye aga taa tene, lo yeke mu maboko na azo kue so abaa pasi.

Même kozoni si lo sava tele ti zo ti buruma, kusala ti Jésus asala si wuluwulu alondo. Ti sala si prophétie ti Esaïe aga taa tene, fadeso Jésus atene na zo so tele ti lo aga nzoni awe: “Mo sala tene na zo oko pepee.” Na lo tene na lo nga: “Mo gue, mo fa tele ti mo na aprêtre, na mo mu teti sukulango ti mo offrande so Moïse akomande, teti tene ti témoin ti ala.”

Ye oko, be ti koli so ayeke na ngia mingi, lo lingbi pepee ti bata tene ti ye so asi gi na be ti lo. Lo gue lo fa tene ni na ndo kue, na azo mingi mingi abungbi, tongaso Jésus awara lege ti li na ambeni kodoro na le ti azo pepee. Ni laa, Jésus ague, lo duti na ndo so azo ayeke pepee, na azo alondo na kodoro nde nde si ala gue ka ti ma tene ti lo na ti wara sava ti tele. Luc 5:12-16; Marc 1:40-45; Matthieu 8:2-4; Lévitique 13:45; 14:10-13; Psaume 72:13; Esaïe 42:1, 2.

▪ Kobela ti buruma alingbi ti sala nyen na tele ti zo, na azo ti buruma asala nyen ti fa na azo so ala ga ndulu?

▪ Na lege wa mbeni zo ti buruma ahunda ye na Jésus, na e lingbi ti manda nyen na lege ti ye so Jésus asala teti lo?

▪ Na lege wa zo so buruma ti lo ahunzi ama yanga ti Jésus pepee, na ye nyen asi na ndani?