Tongana nyen la mo peut ti gonda Jéhovah na lege ti atënë ti yanga ti mo?

Na ngoi so Jéhovah acréé e, lo mû na e mbeni pendere cadeau: ngangu ti sara tënë. Eskê fason so e yeke sara kua na cadeau so agbu bê ti lo? En, a gbu bê ti lo! (Diko Jacques 1:26.) Tongaso, tongana nyen la e peut ti sara kua na tënë ti yanga ti e na mbeni lege so anzere na Jéhovah?

1. A yeke nzoni e sara kua na cadeau ti e ti sarango tënë tongana nyen?

Bible atene na e ti “ngbâ ti dë bê ti mba nga ti kpengba mba”. (1 aThessalonicien 5:11). Eskê mo peut ti pensé na ambeni zo so abezoin ti tene a kpengba ala? Nyen la mo peut ti sara ti tene ala bâ so ala yeke nzoni? Fa na ala so mo yeke pensé na ala. Peut-être mo peut ti fa na ala aye so anzere na mo na mbage ti ala. Eskê mo peut ti pensé na mbeni versê so ayeke kpengba mbeni zo so mo hinga lo? Gbâ ti aversê ayeke dä so mo peut ti soro ambeni na popo ni. Girisa nga ape so fason so mo yeke sara na tënë apeut ti kpengba azo mingi. Tongaso, gi lakue ti sara tënë na nzoni bê nga na ngangu ape.​—aProverbe 15:1.

2. Mara ti atënë wa la e doit ti tënë ape?

Bible atene: “Ala zia fungo tënë asigi na yanga ti ala pëpe.” (Diko aÉphésien 4:29.) Ye so aye ti tene e yeke tene afungo tënë ape wala e yeke tene atënë ti mbana nga na asioni tënë ti son bê ti mbeni zo ape. E doit nga ti kpe kpere-​kpere nga na asioni tënë so abuba iri ti zo.​—Diko aProverbe 16:28.

3. Nyen la ayeke aidé e ti sara tënë na mbeni fason so akpengba zo?

Mingi ni, atënë so e tene afa ye so ayeke biani na bê ti e wala ye so e pensé (Luc 6:45). Tongaso, a lingbi e manda ti zia li ti e na ndö ti anzoni ye, so ti tene, na ndö ti aye so ayeke mbilimbili, aye so ayeke nzoni, aye so zo alingbi ti ye ni nga na aye so alingbi na gonda (aPhilippien 4:8). Ti zia li ti e na ndö ti aye so, a lingbi e soro angia nga akamarade ti e na lege ti ndara (aProverbe 13:20). Tongana e gbu li kozo ti sara tënë, e yeke bâ nga nzoni dä. Gbu li na ndö ti aye so atënë ti yanga ti mo ayeke sara na ndö ti azo. Bible atene: “Tënë so zo atene sân ti gbu li ayeke kpo zo tongana épée, me tënë ti yanga ti azo ti ndara asara si ye so ason zo adë.”​—aProverbe 12:18.

GI TI HINGA AYE MINGI

4. Sara hange na tënë ti yanga ti mo

E kue, na ambeni ngoi e tene mbeni tënë so e regretté na pekoni (Jacques 3:2). Diko aGalate 5:22, 23, na pekoni kiri tënë na ahunda so:

• Na popo ti asarango ye so, ati so wa la mo peut ti sambela ti duti na ni si mo sara hange na tënë ti yanga ti mo? Asarango ye so apeut ti aidé mo tongana nyen?

Diko 1 aCorinthien 15:33, na pekoni kiri tënë na hunda so:

• Akamarade nga na angia so mo soro apeut ti sara nyen na ndö ti atënë ti yanga ti mo?

Diko Zo-ti-fa-tene 3:1, 7, na pekoni kiri tënë na hunda so:

• Na ngoi wa la a peut ti duti na lege ti ndara ti duti kpô wala ti ku mbeni nzoni ngoi ti tene mbeni tënë?

5. Tene nzoni tënë ti amba ti mo

VIDÉO: Tene “atënë so ayeke nzoni ti kpengba” azo (4:07)

• Na yâ ti vidéo so, ngbanga ti nyen la ita-koli so aye ti changé fason so lo yeke sara na tënë ti amba ti lo?

• Aye wa la lo sara ti changé?

Diko Zo-ti-fa-tene 7:16, na pekoni kiri tënë na hunda so:

• Nyen la a yeke nzoni e girisa ape na ngoi so bê ti e apusu e ti tene sioni tënë ti mbeni zo?

Diko Zo-ti-fa-tene 7:21, 22, na pekoni kiri tënë na hunda so:

• Tongana nyen la aversê so apeut ti aidé mo ti tene bê ti mo ason ape tongana mbeni zo atene sioni tënë ti mo?

6. Sara ye na nzoni bê na ngoi so mo yeke sara tënë na azo ti sewa ti mo

VIDÉO: Ndoye na nengo mba asara si asewa aduti beoko (3:08)

• Nyen la ayeke aidé mo ti sara tënë na nzoni bê na azo ti sewa ti mo?

Diko aÉphésien 4:31, 32, na pekoni kiri tënë na hunda so:

• Tongana nyen la e peut ti sara tënë na azo ti sewa ti e si ala bâ so e ye ala?

Jéhovah afa lani tënë ti bê ti lo na ndö ti Molenge ti lo, Jésus. Diko Matthieu 17:5, na pekoni kiri tënë na hunda so:

• Tongana nyen la mo peut ti sara ye tongana Jéhovah na ngoi so mo yeke sara tënë na azo ti sewa ti mo?

NA NDURU TËNË

Tënë so e tene apeut ti aidé azo wala apeut ti son bê ti ala. A lingbi e gbu li nzoni na ndö ti tënë so e yeke tene, ngoi so e yeke tene ni nga tongana nyen la e yeke tene ni.

Dango bê

• Tongana nyen la mo peut ti tene atënë so ayeke aidé amba ti mo?

• Mara ti atënë wa la mo ye ti tene ni ape?

• Nyen la apeut ti aidé e ti tene lakue e tene tënë na nzoni bê nga e tene atënë so akpengba zo?

GI NDA TI YE

Nyen la apeut ti aidé e ti tene atënë so akpengba amba ti e?

Gi ti tene tënë tongana azo ti ndara (8:04)

Gi ti hinga aye so apeut ti aidé mo ti tene sioni tënë ape.

“Eskê a yeke biani sioni ti zonga zo?” (Article na ndö ti site)

Bâ tongana nyen la mo peut ti kpe ti tene kpere-kpere.

Tongana nyen la mbi peut ti kpe kpere-kpere? (2:36)

Gi ti hinga tongana nyen la Jéhovah a-aidé mbeni koli ti zia lege ti tenengo asioni tënë.

“Mbi komanse ti gbu li nzoni na ndo ti gigi ti mbi” (Tour ti Ba Ndo ti lango 1 ti août 2013)