“I futa kula ti i mveni pëpe”

15. Raison wa aRomain 12:19 afa na e ti kiri sioni teti sioni pëpe?

¹⁵ Paul afa mbeni raison so alingbi ti pusu e ti kiri sioni teti sioni pëpe; kiringo sioni teti sioni pëpe afa so e yeke na tâ be-ti-molenge. Lo tene: “Aita so mbi ndoye i mingi, i futa kula ti i mveni pëpe, me i zia lege na ngonzo ti Nzapa; teti Mbeti ti Nzapa atene, Kula ayeke ti Mbi; fade Mbi futa kula ni, Seigneur atene.” (aRomain 12:19). Mbeni Chrétien so agi ti kiri peko ti sioni so a sara na lo ayeke sara ye na fandara. Lo gi ti sara ye so gi Nzapa la alingbi fade ti sara ni (Matthieu 7:1). Na ndo ni, na gingo lo wani ti kiri peko ti sioni so a sara na lo, lo yeke fa so lo yeke na mabe pëpe na yâ tënë ti dengo bê so Jéhovah atene: “Kula ayeke ti Mbi.” Nde na so, atâ Chrétien azia bê ti ala kue na Jéhovah so ‘fade afâ ngbanga ti ala so Lo iri ala na gigi’. (Luc 18:7, 8; 2 aThessalonicien 1:6-8). Na tâ be-ti-molenge, ala zia si Nzapa afâ ngbanga ndali ti ala.—Jérémie 30:23, 24; aRomain 1:18.

18. Ngbanga ti nyen ti ke ti kiri sioni teti sioni ayeke na lege ni na afa so e yeke na ndoye nga na tâ be-ti-molenge?

¹⁸ Na yâ ti anduru tënë so e bâ na ndo aRomain chapitre 12, e bâ gbâ ti araison so apusu e ti “kiri sioni pëpe na zo so asara sioni na i”. Kozoni kue, ti ke ti kiri sioni teti sioni ayeke na lege ni. Na bango nzoni bê so Nzapa asara na e, a yeke na lege ni ti tene e mû tere ti e na Jéhovah nga e yeda na bê ti e kue na akomandema ti lo, so mbeni oko ni ayeke ti ndoye awato ti e. Use ni, ti ke ti kiri sioni teti sioni afa so e yeke sara ye na ndoye. Tongana e ke ti kiri sioni teti sioni nga e gi ti duti na siriri na azo, e fa so e ye ti mû maboko même na ambeni zo so ayeke gi ti kanga lege ngangu na e ti tene ala ga azo so avoro Jéhovah. Ota ni, ti ke ti kiri sioni teti sioni afa so e yeke na tâ be-ti-molenge. Ti tene e wani e kiri sioni teti sioni afa so e yeke sara ye na fandara, ndali ti so Jéhovah atene: “Kula ayeke ti Mbi.” Mbeti ti Nzapa amû wango na e atene: “Tongana fandara aga, kamene aga nga, me ndara ayeke na azo so ayeke na tâ be-ti-molenge.” (aProverbe 11:2). Tongana na ndara, e zia si Nzapa akiri peko ti sioni so a sara na e, e yeke fa so e yeke na tâ be-ti-molenge.