“Si i tï na handa pëpe”

‘I lango pëpe, i sambela, si i tï na handa pëpe.’​—MATTHIEU 26:41.

JÉSUS CHRIST, Molenge ti Nzapa, ayeke pusu ndulu na lango so fini ti lo na sese ayeke hunzi. Lo yeke na gbele mbeni gingo bê so ayeke kota mingi, mbeni mara ti gingo bê so lo wara kozoni lâ oko pëpe. Lo bâ so na yâ ngoi kete, fade a yeke gbu lo, a yeke fâ ngbanga ti kuâ na ndo lo na a yeke fâ lo na keke ti pasi. Lo hinga so adesizion nga na aye oko oko kue so lo yeke sala alingbi ti yä iri ti Babâ ti lo na nduzu wala ti bi zonga na ndo ni. Jésus ahinga nga so abeku ti azo ti wara fini kekereke ayeke na yâ maboko ti lo. Na gbele agingo bê so kue, ye nyen lo sala lani?

² Jésus ague na yaka ti Gethsémané, lo na adisciple ti lo. A yeke lani mbeni ndo so lo ye tënë ni mingi. Kâ, lo gboto tele ti lo kete na adisciple ti lo ti gue na mbeni ndo. Tongana lo yeke gi lo oko, lo gue na mbage ti Babâ ti lo ti yayu ti wara ngangu, lo zi bê ti lo na Lo na yâ kpengba sambela. Lo sala tongaso gi fani oko pëpe me fani ota. Atâa so lo yeke lani mbilimbili-kue, Jésus atene na bê ti lo pëpe so lo lingbi ti hon ndo ti gingo bê so gi na ngangu ti lo mveni.​—Matthieu 26:36-44.

³ Laso, e nga kue e yeke na gbele agingo bê. Na yâ mbeni mbage so ahon kozo awe ti brochure so, e bâ aye so afa so e yeke na lâ ti nda ni ti sese ti sioni so. Atara na angangu so sese ti Satan ayeke ga na ni na ndo e ayeke ga gi ngangu ahon ti kozo. Adesizion nga na asalango ye ti azo kue so atene ala yeke voro tâ Nzapa ayeke yä iri ti lo wala ayeke bi zongo na ndo ni; nga a yeke sala ngangu mingi na ndo abeku so e oko oko e yeke na ni ti lï na yâ fini sese ti lo. E ndoye Jéhovah. E ye ti ‘gbu ngangu juska na nda ni’ atâa nda ti fini ti e wala ti aye ti sese so (Matthieu 24:13). Me tongana nyen e lingbi ti bata bibe ti e ti salango ye hio nga ti sala kue ti lango pëpe?

⁴ Teti lo hinga so adisciple ti lo ti kozo siècle nga na ti laso ayeke duti na gbele agingo bê, Jésus amû wango so: “I bata [‘I lango pëpe’, Fini Mbuki, 2001], i sambela, si i tï na handa pëpe.” (Matthieu 26:41). Atënë so aye ti tene nyen teti e laso? Handa wala tara wa mo yeke wara? Nga na lege wa mo lingbi ti ‘lango pëpe’?

Handa ti sala nyen?

⁵ E oko oko kue e yeke tingbi lâ na lâ na handa ti tï na yâ “son ti zabolo”. (2 Timothée 2:26). Bible agboto mê ti e so a yeke mbilimbili awavorongo Jéhovah si Satan ayeke gi ti gbu (1 Pierre 5:8; Apocalypse 12:12, 17). Lo gi ti gbu ala ngbanga ti nyen? Lo yeke gi pëpe ti fâ gi e na awe, teti tongana e kui be-ta-zo na Nzapa, songo benda ni ayeke duti ande teti lo Satan ni pëpe. Lo hinga nzoni mingi so Jéhovah ayeke lungula ande kui na lege ti zingongo azo na kuâ tongana ngoi ni so Lo soro ndali ni asi.—Luc 20:37, 38.

⁶ Satan aye ti lungula na tïtî e mbeni ye so ngele ni ahon même ti fini ti e: A yeke be-biani ti e na Nzapa. Satan ayeke gi lege kue ti fa na gigi so lo lingbi ti ga na e ti zia ti voro Jéhovah. Ni la, tongana lo wara lege ti handa e si e ngbâ be-biani pëpe, so ti tene e zia ti fa nzo tënë wala ti bata andia ti Chrétien, fade a yeke duti songo benda teti Satan! (aEphésien 6:11-13). Ni la, “Wahanda” azia ahanda na gbele e.​—Matthieu 4:3.

⁷ Yâ ti ‘aye so Zabolo ayeke sala ti handa na azo’ ayeke nde nde (aEphésien 6:11, FM 01). Lo lingbi ti handa e wala ti tara e na lege ti mbito, kite, tombango peko ti mosoro wala ti angia. Ye oko, mbeni oko ti akode ti lo so lo yeke wara azo dä mingi ahon atanga ni kue ayeke ti sala si bê ti e awoko. Teti lo yeke mbeni zo ti mayele so ayeke gi lege kue ti wara azo, lo hinga so tongana bê ti e awoko, a yeke duti ngangu pëpe na lo ti wara e (aProverbe 24:10). Ni la, tongana lo bâ so ‘ngangu ti e awe’ na yâ bê ti e, lo yeke tara ti handa e ti kiri na peko biaku.​—Psaume 38:9.

⁸ Na ngoi so e yeke pusu ndulu mingi na hunzingo ti lâ ti nda ni, ye ni akpa mo bâ mo tene aye so asala si bê ti zo awoko ayeke gue gi na li ni, na ye so alingbi ti sala ngangu na ndo ti e. (Bâ li ti tënë “Ambeni ye so asala si bê ti zo awoko”.) Atâa ye wa ayeke na gunda ni, tongana bê ti e awoko, a lingbi ti sala si ngangu ti e akiri na peko. Ti “vo ngoi” ti sala akusala so a hunda na e na lege ti yingo, na tapande mandango Bible, guengo na abungbi nga fango tënë, ayeke mbeni ye so alingbi ti duti ngangu na e tongana e woko mingi na lege ti mitele, na yâ li ti e nga na yâ bê ti e (aEphésien 5:15, 16, NW ). Dabe mo so Wahanda ni aye si mo zia ti sala kusala. Me a yeke ngoi ti kiri na peko la pëpe wala ti tene so ngoi so e yeke dä ahunda pëpe ti sala ye hio (Luc 21:34-36). Tongana nyen mo lingbi ti luti na gbele handa na ti lango pëpe? Bâ awango osio so alingbi ti mû maboko na mo.

“Ngbâ ti sambela”

⁹ Zia bê ti mo kue na Jéhovah na lege ti sambela. Dabe mo na tapande ti Jésus na yaka ti Gethsémané. Tongana gingo bê amû lo ngangu, ye nyen lo sala? Lo gue na mbage ti Jéhovah ti wara mungo maboko, na lo sambela tâ ngangu na Lo si “[gbiki] ti tele ti Lo asigigi tongana mênë, a yuru na sese.” (Luc 22:44). Gbu li na ndo ye so: Jésus ahinga lani Satan nzoni mingi. Na ngoi so lo de lani na yayu, lo bâ akode ti handango zo kue so Satan asala na kusala ti gi ti gbu awakua ti Nzapa. Ye oko, Jésus atene na bê ti lo pëpe so a yeke duti ande ngangu pëpe na lo ti hon ndo ti tara kue so Wahanda ni ayeke zia na gbele lo. Tongana Molenge ti Nzapa so ayeke mbilimbili-kue abâ so a lingbi lo sambela ti wara mungo maboko nga na ngangu ti Nzapa, ti e a hunda mingi ahon so!​—1 Pierre 2:21.

¹⁰ Dabe mo nga so tongana Jésus awa adisciple ti lo ti “sambela” wala ti “ngbâ ti sambela” (NW ), lo tene na pekoni: “Yingo aye biani, me mitele ayeke na ngangu pëpe.” (Matthieu 26:41). Jésus aye ti sala tënë ti mitele ti zo wa? Biani, a yeke pëpe ti mitele ti lo si lo ye ti sala tënë ni ge, teti mbeni wokongo oko tongaso ayeke dä pëpe na yâ mitele ti lo so ayeke mbilimbili-kue (1 Pierre 2:22). Me ti adisciple ti lo, a yeke nde. Teti so a dü ala mbilimbili-kue pëpe nga na abibe ti sala siokpari, a yeke hunda ande mbilimbili na mbage ti ala ti wara mungo maboko ti luti na gbele handa (aRomain 7:21-24). A yeke ngbanga ni si lo wa ala, nga atâ Chrétien kue so ayeke ga na peko ti ala, ti sambela ti wara mungo maboko ti luti na gbele handa (Matthieu 6:13). Jéhovah ayeke kiri tënë na mara ti asambela tongaso (Psaume 65:3). Na lege wa? Zia e bâ gi alege use.

¹¹ Kozoni kue, Nzapa ayeke mû maboko na e ti hinga ahanda ni. Ahanda ti Satan ayeke tongana agbanda so a zia ni na yâ vukongo ndo. Tongana mo bâ ni pëpe, a lingbi ti gbu mo. Na lege ti Bible nga na ti ambeti so aluti na ndo ni, Jéhovah ayeke za lumière na ndo agbanda ni si e bâ ni na tongaso e wara lege ti hon nde na ni si e tï dä pëpe. Tongana angu ayeke hon, ambeti so a sigigi na ni nga na akapa ti akota bungbi ti e ayeke gboto lê ti e na peko ti tele na ndo akpale tongana salango mbito ti zo, pitan, tombango peko ti mosoro nga na ambeni handa nde ti Satan (aProverbe 29:25; 1 aCorinthien 10:8-11; 1 Timothée 6:9, 10). Mo kiri singila pëpe na Jéhovah so agboto mê ti e na ndo amayele ti Satan? (2 aCorinthien 2:11). Agbotongo mê tongaso kue so a mû ni ayeke kiringo tënë na asambela ti mo ti wara mungo maboko ti luti na gbele handa.

¹² Use ni, Jéhovah ayeke kiri tënë na asambela ti e na mungo na e ngangu ti luti na gbele handa. Mbeti ti lo atene: “Fade Lo [Nzapa] zia handa ahon ngangu ti i pëpe; me legeoko na handa so, fade Lo leke lege ti sigigi nga.” (1 aCorinthien 10:13). Tongana e ngbâ ti zia bê ti e na Nzapa, fade lo yeke zia lâ oko pëpe lege na mbeni handa wala tara ti hon ngangu ti e, si e lingbi wara ngangu pëpe na lege ti yingo ti luti na gbele ni. Na lege wa lo yeke “leke lege [teti e] ti sigigi” na gbele handa ni? Lo yeke “mû Yingo Vulu na ala so ahunda Lo”. (Luc 11:13). Yingo so alingbi ti mû maboko na e ti dabe na akpengba-ndia ti Bible so alingbi ti kpengba desizion so e mû ti ngbâ ti sala ye so ayeke mbilimbili na ti mû maboko na e ti mû adesizion na lege ti ndara (Jean 14:26; Jacques 1:5, 6). A lingbi ti mû maboko na e ti fa atâ lengo so e ye ti wara ni ti hon ndo ti asioni bibe ti e (aGalate 5:22, 23). Yingo ti Nzapa alingbi même ti pusu aita ti e na yâ vorongo ti ‘lungula vundu na bê ti e.’ (aColossien 4:11). Mo kiri singila pëpe so Jéhovah ayeke kiri tënë na lege ti ndoye tongaso na asambela ti e ti wara mungo maboko?

Gi ti bâ na lege ni aye so mo ku tele ti mo na ni

¹³ Ti lango pëpe, a lingbi e gi ti bâ na lege ni aye so e ku tele ti e na ni. Ndali ti agingo bê ti fini, a yeke si na e kue ti woko ngoi na ngoi. Me a lingbi e dabe e so Nzapa atene lâ oko pëpe so na yâ sese so, fade e yeke wara kpale oko pëpe na yâ fini ti e. Même na angoi so a sû na Bible, awakua ti Nzapa atingbi na aye ti ngangu, na tapande aye ti sioni so a sala na ala, nzinga, vundu ti bê nga na kobela.​—Kusala 8:1; 2 aCorinthien 8:1, 2; 1 aThessalonicien 5:14; 1 Timothée 5:23.

¹⁴ Laso, e nga kue e yeke na akpale ti e. A lingbi ti sala ngangu na e; agingo bê na ndo nginza alingbi ti si na e; e lingbi ti tiri na bê ti e so awoko; e lingbi ti tï kobela nga ti wara pono na ambeni lege nde. Tongana Jéhovah asala ye ti kpene ti bata e na gbele aye ti sioni kue, Satan ayeke luti ande gi na ndo ni ti zonga Jéhovah (aProverbe 27:11). Jéhovah ayeke zia lege biani si handa na tara asi na awakua ti lo; na ye so alingbi ti gue même juska ti tene ala wara kuâ na tïtî awato ti ala.—Jean 16:2.

¹⁵ Tongaso, zendo wa Jéhovah amû? Tongana ti so e tene ni kozo awe, Jéhovah amû zendo so fade lo yeke mû lege na e ti luti na gbele handa kue so e lingbi ti wara gi tongana e zia bê ti e kue na lo (aProverbe 3:5, 6). Na lege ti Tënë ti lo, yingo ti lo nga na bungbi ti lo, lo yeke bata e na lege ti yingo, na mungo maboko na e ti bata songo ti e na lo. Tongana e bata songo ti e na lo so nzoni, même tongana e kui, a yeke duti songo benda teti e. Mbeni ye ti kanga lege na Nzapa ti futa ye na awakua be-ta-zo ti lo ayeke pëpe, atâa kuâ (aHébreu 11:6). Nga, na yâ fini sese so ayeke ndulu ti si, fade Jéhovah ayeke sala biani si tanga ti apendere zendo ti lo kue, so andu aye ti nzoni teti ala so andoye lo, ayeke ga tâ tënë.​—Psaume 145:16.

Girisa pëpe akota tënë so abâ gigi

¹⁶ Ti gbu ngangu juska na nda ni, a lingbi e girisa pëpe akpengba tënë so apusu Nzapa ti zia lege na aye ti sioni. Tongana ngoi na ngoi akpale ti e mveni ayeke gi ti hon ndo ti e, na mbeni ye ayeke handa e ti kiri na peko, e yeke sala nzoni tongana e dabe ti e so Satan abi tënë ti kite na ndo mbilimbili ti kota yanga-ti-komande ti Jéhovah. Wahanda ni abi nga tënë ti kite na ndo be-biani ti awavorongo Nzapa na nga lege so ala yeke mû bê ti ala kue na Lo (Job 1:8-11; 2:3, 4). Atënë so, nga na lege so Jéhovah asoro ti leke ni, ayeke kota mingi ahon fini ti e oko oko kue. Na lege wa?

¹⁷ Na ziango lege na sioni ti duti teti kete ngoi, Nzapa amû lege na ambeni zo ti lï na yâ tâ tënë. Gbu li na ndo ye so: Jésus abâ pasi ti tene e wara lege ti si na fini (Jean 3:16). E kiri singila pëpe teti ye so? Ye oko, e yeke duti ndulu ti luti na gbele ye ti ngangu teti mbeni ngoi kete na ndo ni, si ambeni zo nga nde alingbi ti wara fini? Ti gbu ngangu juska na nda ni, a lingbi e hinga so ndara ti Jéhovah ayeke kota mingi ahon ti e (Esaïe 55:9). Fade lo yeke lungula sioye na ngoi so alingbi biani na ni teti lekengo akota tënë so biaku nga teti nzoni ti e ti lakue lakue. Biani, mbeni nzoni lege ni nde ti leke atënë so ayeke dä pëpe. Ye ti kirikiri ayeke pëpe na yâ asalango ye ti Nzapa!—aRomain 9:14-24.

“Ga ndulu na Nzapa”

¹⁸ Ti girisa pëpe so ngoi so e yeke dä ahunda ti sala ye hio, a lingbi e ngbâ ndulu na Jéhovah. Girisa lâ oko pëpe so Satan ayeke sala ye kue so ayeke na ngangu ti lo ti buba nzoni songo ti e na Jéhovah. Satan aye si e mä na bê so nda ni ayeke si lâ oko pëpe, na so mbeni nzoni ye ti peko ti fango nzo tënë wala batango andia ti Bible ayeke pëpe. Me lo “yeke wamvene na babâ ti mvene.” (Jean 8:44). A lingbi e leke na bê ti e ti “ke zabolo”. Songo ti e na Jéhovah ayeke mbeni ye so a lingbi e bâ ni lâ oko pëpe tongana ye senge. A yeke na lege ti ndoye si Bible amû wango so na e: “I ga ndulu na Nzapa, na fade Lo ga ndulu na i.” (Jacques 4:7, 8). Ye nyen mo lingbi ti sala ti kiri ti ga ndulu mingi na Jéhovah?

¹⁹ A yeke kota ye mingi ti gbu li na yâ sambela. Tongana mo bâ so agingo bê ti gigi atara ti hon ndo ti mo, zi bê ti mo na Jéhovah. Gi mingi ti fa polele atënë ni so agbu bê ti mo, na fade a yeke duti ngangu pëpe na mo ti bâ kiringo tënë ti Jéhovah na aye so mo hunda na lo. Kiringo tënë ni ayeke duti lakue pëpe tongana ti so mo yeke na ni na yâ li ti mo kozo; me tongana mo ye ti mû gonda na lo na ti bata be-biani ti mo, fade lo yeke mû maboko na mo tongana ti so a lingbi mo wara ni ti gbu ngangu na gbele akpale ni (1 Jean 5:14). Na ngoi so mo yeke bâ tongana nyen lo yeke fa lege na mo na yâ fini, mo yeke kiri ti ga ndulu mingi na lo. Ti diko ye na ndo alengo ti Jéhovah na alege ti lo so a fa ni na yâ Bible, nga ti gbu li dä ayeke nga kota ye mingi. Mara ti gbungo li tongaso ayeke mû maboko na mo ti hinga lo nzoni mingi. A yeke pusu mo na kusala, na a yeke kpengba ndoye ti mo teti lo (Psaume 19:15). Nga ahon ye kue, fade ndoye so ayeke mû maboko na mo ti luti na gbele handa nga ti lango pëpe.​—1 Jean 5:3.

²⁰ Ti ngbâ lakue ndulu na Jéhovah, a yeke nga kota ye mingi ti tene e ngbâ ndulu na aita ti e na yâ vorongo. Fade e yeke bâ tënë so na yâ ndangba mbage ti brochure so.

AHUNDANGO TËNË TI MANDA NA YE

• Ye nyen Jésus asala lani tongana lo wara tâ kota gingo bê ndulu na nda ti fini ti lo? Na lo wa lani adisciple ti lo ti sala nyen? (apar. 1-4).

• Ngbanga ti nyen Satan aye mbilimbili ti gbu gi awavorongo Jéhovah? Nga na lege wa lo yeke gi ti handa e? (apar. 5-8).

• Ti luti na gbele handa, ngbanga ti nyen a lingbi 1) e ngbâ ti sambela? (apar. 9-12), 2) e bâ na lege ni aye so e ku tele ti e na ni? (apar. 13-15), 3) e girisa pëpe akota tënë so abâ gigi? (apar. 16-17) na 4) e “ga ndulu na Nzapa”? (apar. 18-20).

[Encadré na lembeti 25]

Ambeni ye so asala si bê ti zo awoko

Kpale ti seni wala gango mbakoro: Tongana e yeke hu pono ti mbeni kobela wala tongana e yeke ga mbakoro si ye so ayeke kanga lege na e ti sala ye kue so e ye, bê ti e alingbi ti woko ngangu teti so e lingbi pëpe ti sala ye mingi na yâ kusala ti e teti Nzapa.​—aHébreu 6:10.

Vundu ti bâ pëpe ye so e ku ni fade: Bê ti e alingbi ti woko tongana e yeke sala ngangu ti fa Tënë ti Nzapa, me si e bâ lengo ti peko ti kusala ti e ni nzoni pëpe.​—aProverbe 13:12.

Bibe ti bâ tele ti mo so mo yeke ye oko pëpe: Ngbanga ti so a sala pasi na lo teti angu mingi, mbeni zo alingbi ti tene na bê ti lo so zo oko alingbi ti ndoye lo pëpe, atâa Jéhovah.​—1 Jean 3:19, 20.

Vundu tongana a sala mbeni ye ti songo bê na e: Tongana mbeni ita ti e na yâ bungbi asala mbeni ye so aso bê ti e, ye so alingbi ti sala kua mingi na ndo e si e wara bibe ti zia ti ga na abungbi ti kongregation wala ti zia lege ti fango tënë.​—Luc 17:1.

Salango ngangu na e: Ambeni zo so ake atënë ti mabe ti e alingbi ti ke e, ti sala ngangu na e wala même ti he e na ngia.​—2 Timothée 3:12; 2 Pierre 3:3, 4.

[Foto na lembeti 26]

Jésus awa e ti “ngbâ ti sambela” ti wara mungo maboko ti tiri na handa