Mbeni ye so Nzapa aleke ti sara na ye so bê ti lo aye

‘Nzapa asara ye kue tongana bê ti Lo aye.’​—AEPHÉSIEN 1:11.

1. Ngbanga ti nyen akongregation kue ti aTémoin ti Jéhovah ayeke sara ande bungbi na lango 12 ti avril ngu 2006?

NA MERCREDI, lango 12 ti avril, na lakui, azo kutu 16 tongaso ayeke bungbi ande ti sara Matanga ti Kobe ti Seigneur. Na ndo oko oko kue so a yeke sara bungbi ni dä, mo yeke bâ ande mbeni table so a zia na ndo ni mapa so a sara na mama ni pëpe, so aduti fä ti tere ti Christ, nga na bengba vin, so aduti fä ti mênë ti lo so atuku lani. Nduru na hunzingo ti mbeni diskur so na yâ ni a yeke fa nda ti Matanga ti Dango Bê na kuâ ti Jésus, a yeke hon ande na mapa ni na popo ti azo kue so aga, na pekoni a yeke hon na vin ni. Na yâ ti ambeni kongregation ni, gi zo oko wala mingi pëpe si ayeke te ande mapa ni na anyon vin ni. Ye oko, na yâ ti mingi ti akongregation ni, zo oko ti te mapa ni wala ti nyon vin ni ayeke duti ande dä pëpe. Ngbanga ti nyen si gi mbeni kete wungo ti aChrétien, ala so ayeke na beku ti gue na yayu, si ate mapa na anyon vin ni, me mingi ti aChrétien ni, ala so ayeke na beku ti wara fini ti lakue lakue na ndo sese ate ti ala ni pëpe?

2, 3. (a) Tongana nyen Jéhovah akomanse lani ti sara ye alingbi na ye so lo leke na bê ti lo ti sara? (b) Ngbanga ti nyen Jéhovah asara sese nga na azo?

² Jéhovah ayeke Nzapa so ayeke na mbeni ye ti sara. “Lo sara ye kue tongana bê ti Lo aye” ti sara si ye so lo ye ti sara aga tâ tënë (aEphésien 1:11). Kozoni, lo sara lani Molenge ti lo ngengele oko (Jean 1:1, 14; Apocalypse 3:14). Na pekoni, na lege ti Molenge so, Jéhovah asara amolenge ti lo ti yingo nga na nda ni aye so e yeke bâ, so mo yeke wara na popo ni sese nga azo so ayeke ndo ni.​—Job 38:4, 7; Psaume 103:19-21; Jean 1:2, 3; aColossien 1:15, 16.

³ Jéhovah asara sese ni ti duti pëpe mbeni ndo so a yeke tara zo dä awe si lo wara lege ti gue na popo ti amolenge ti Nzapa so ayeke a-ange na yayu tongana ti so aEglize so ala tene ala yeke ti Christ ayeke fa. Lo sara sese ni ngbanga ti mbeni mbilimbili ye so lo leke ti sara; lo leke ni ti tene “azo alingbi duti dä”. (Esaïe 45:18). Nzapa asara sese ndali ti zo nga lo sara zo ndali ti sese (Psaume 115:16). Sese ni kue alingbi fade ti ga mbeni paradis, so gbâ ti azo ti mbilimbili si ayeke duti na ndo ni; na ala lingbi fade ti fâ yaka na ndo ni nga ti bata ni nzoni. Nzapa azia beku ti guengo na yayu na gbele kozo koli na kozo wali lâ oko pëpe.​—Genèse 1:26-28; 2:7, 8, 15.

A dë kite na ye so Jéhovah aye ti sara

4. Na tongo nda ti mbaï ti azo, tongana nyen a dë kite na kode so Jéhovah ayeke komande na ni?

⁴ Mbeni molenge ti Nzapa na yayu asara kpengba-li na lo londo ti kanga lege na ye so Jéhovah aye ti sara, so ti tene lo sara kusala na lege ni pëpe na liberté so Nzapa azia na lo ti sara na ye ti bê ti lo. Lo buba yâ ti siriri so ala kue so, na ndoye, ayeda na komandema ti Jéhovah ayeke na ni. Satan asara si Adam na Eve ato nda ti gi ti duti yamba na Nzapa (Genèse 3:1-6). Lo ke pëpe tënë ti ngangu ti Jéhovah, me lo tene so kode so Jéhovah akomande na ni ayeke na lege ni pëpe; tongaso, lo dë kite na droit ti Jéhovah ti komande dunia kue. Ni la, tâ gi na tongo nda ti mbaï ti azo, tënë ti droit ti Jéhovah ti komande na ndo dunia kue aga lani mbeni kota tënë na sese ge.

5. Mbeni tënë wa la alondo lani, na a bâ azo wa?

⁵ Mbeni tënë so ague tâ gere oko na tënë ti droit ti Jéhovah ti komande na ndo dunia kue ayeke ti so Satan asigigi na ni na ngoi ti Job. Satan adë kite lani na ndo ye so ayeke pusu azo ti mä yanga ti Jéhovah na ti sara na lo. Satan aye ti fa so azo ayeke mä yanga ti Jéhovah na ala yeke sara na lo gi ti wara mbeni ye na pekoni; me tongana a tara ala, ala yeke ke Jéhovah (Job 1:7-11; 2:4, 5). Atâa so tënë ni alondo lani gi na ndo ti mbeni wakua ti Jéhovah na sese ge, tënë so abâ nga a-ange na même Molenge ti Jéhovah ngengele oko.

6. Tongana nyen Jéhovah afa so lo yeke be-ta-zo na ye so lo leke ti sara nga na iri ti lo?

⁶ Teti so lo yeke be-ta-zo na ye so lo leke ti sara nga na nda ti iri ti lo, Jéhovah asara lani tere ti lo ti ga Prophète nga ti ga Sauveur.a Lo tene na Satan: “Fade Mbi zia tënë ti ke na popo ti mo na wali so, na popo ti hale ti mo na hale ti lo; fade lo mboko li ti mo, na fade mo mboko ndagere ti lo.” (Genèse 3:15). Na lege ti Hale ti “wali” ti lo, wala mbage ti bungbi ti lo ti yayu, Jéhovah ayeke kiri tënë na Satan so agi yanga ti lo nga lo yeke mû na ahale ti Adam beku ti zingo ala na gbe ti siokpari nga na beku ti fini.​—aRomain 5:21; aGalate 4:26, 31.

“Tënë ti ndagigi ti ye so Lo ye”

7. Ye nyen so Jéhovah aleke ti sara, lo fa ni na lege ti bazengele Paul?

⁷ Na yâ ti mbeti so lo sara na aChrétien ti Ephèse, bazengele Paul afa pendere mingi tongana nyen Jéhovah aleke aye ti tene ye so lo leke ti sara aga tâ tënë. Paul atene: “Lo fa na e tënë ti ndagigi ti ye so Lo ye, na lege ti ye so Lo leke na bê ti Lo ti sara na yâ Lo mveni, na lege ti kusala ti Lo na ngoi so alingbi, ti bungbi ye kue na yâ Christ, ye ti ayayu, na ye ti sese.” (aEphésien 1:9, 10). Pendere ye so Jéhovah aleke ti sara ayeke ti bungbi oko aye ti yayu na ti sese so na yâ ni mo yeke wara a-ange nga na azo so, na ndoye, ayeda na kota yanga-ti-komande ti lo (Apocalypse 4:11). Na sarango tongaso, fade iri ti lo ayeke ga nzoni-kue, fade a yeke hinga Satan tongana zo ti mvene nga fade a yeke “sara na sese ye so bê ti [Nzapa] aye legeoko tongana ala sara na yayu.”​—Matthieu 6:10.

8. Na aEphésien 1:10, tënë so a kiri pekoni na “kusala” aye ti tene nyen?

⁸ ‘Ye so Jéhovah aleke na bê ti Lo ti sara’ ayeke ga tâ tënë na lege ti mbeni “kusala” wala ti mbeni ye so lo leke ni. Tënë ti Paul so ayeke na aEphésien 1:10 na so a kiri pekoni na “kusala” aye ti tene “bango lege ti aye nde nde na yâ ti da.” A ye ti sara tënë ti mbeni kode ti bango lege ti aye.b Tâ nzoni kode so Jéhovah ayeke leke na aye ti tene ye so lo leke ti sara aga tâ tënë andu nga mbeni “tënë ti ndagigi so a honde” na so nda ni ayeke sigigi yeke yeke tongana ngoi ayeke hon.​—aEphésien 1:10; 3:9.

9. Tongana nyen Jéhovah afa yeke yeke tënë ti ndagigi wala tënë so a honde ti ye so lo leke ti sara?

⁹ Na lege ti mara ti ambele nde nde, Jéhovah afa yeke yeke tongana nyen ye so lo leke ti sara so andu Hale ni so a mû zendo ti lo na Eden ayeke ga tâ tënë. Mbele so lani Jéhovah ate ni na Abraham afa so Hale ni so a mû zendo ti lo ayeke ga na sese na yâ molongo ti ahale ti Abraham. Nga, na lege ti Hale ni, fade “amara kue ti sese” airi deba nzoni na ndo ti ala mveni. Mbele so afa nga atene ambeni zo ayeke ga na tere ti kozo mbage ti hale ni (Genèse 22:17, 18). Mbele ti Ndia so Jéhovah ate lani na Israël ti mitele afa so ye so Jéhovah aleke ti sara ayeke ti wara mbeni “royaume ti asacrificateur”. (Exode 19:5, 6). Mbele so lo te na David afa so Hale ni ayeke duti ande Mokonzi ti mbeni Royaume teti lakue lakue (2 Samuel 7:12, 13; Psaume 89:4, 5). Tongana Mbele ti Ndia afa lege na aJuif si ala si na Messie awe, Jéhovah akiri afa lani ambeni ye mingi na ndo gango tâ tënë ti aye so lo leke ti sara (aGalate 3:19, 24). Azo so ayeke bungbi ala ti ga na tere ti kozo mbage ti hale ni ayeke ga ande “royaume ti asacrificateur” so a sara tënë ni giriri, nga a yeke ga na ala na yâ ti mbeni “fini mbele” tongana mbeni fini “Israël” ti yingo.​—Jérémie 31:31-34; aHébreu 8:7-9.c

10, 11. (a) Tongana nyen Jéhovah afa na gigi Hale ni so a sara tënë ti lo giriri? (b) Ngbanga ti nyen Molenge ti Nzapa ngengele oko aga lani na sese?

¹⁰ Ti sara si ye so Nzapa aleke ni aga tâ tënë, na mbeni ngoi lani, Hale ni so a sara tënë ti lo giriri aga na ndo sese. Jéhovah atokua ange Gabriel ti tene na Marie so lo yeke dü mbeni molenge ti koli na iri ti lo ayeke duti Jésus. Ange ni atene na Marie: “Fade Lo ga kota, na fade ala di iri ti Lo Molenge Ti Lo Ti Nduzu Ahon Kue; na fade Seigneur Nzapa amû na Lo trône ti babâ ti Lo David. Na fade Lo komande azo ti da ti Jacob lakue, na fade royaume ti Lo awe lâ oko pëpe.” (Luc 1:32, 33). A hinga fadeso Hale ni so a mû zendo ti lo so awe.​—aGalate 3:16; 4:4.

¹¹ A lingbi Molenge ti Jéhovah ngengele oko aga na sese nga lo wara akota tara mingi juska lo kui. Sarango ye ti Jésus la ayeke mû lege ti kiri tënë nzoni mingi na gingo tënë ti Satan. Fade lo yeke duti be-ta-zo na Babâ ti lo la? So kue ayeke mbeni mbage ti tënë ti ndagigi so a honde so la. Ngu mingi na pekoni, bazengele Paul afa kusala ti Jésus, lo tene: “Tënë ti ndagigi ti lege ti bata tënë ti Nzapa ayeke kota: Lo si na yâ mitele na lê ti azo, Yingo afa na gigi, Lo yeke mbilimbili, a-ange abâ Lo, a fa tënë ti Lo na popo ti aGentil, a mä na bê na Lo na sese so, a kamata Lo na nduzu na yâ gloire.” (1 Timothée 3:16). Biani, so lo duti tâ be-ta-zo juska na kuâ, Jésus akiri tënë biani biani na gingo tënë ti Satan. Me ambeni nzene nzene ye so andu tënë ti ndagigi so a honde angbâ na a hunda ti fa ni na gigi.

“Tënë ti ndagigi ti royaume ti Nzapa”

12, 13. (a) Mbeni mbage ti “tënë ti ndagigi ti royaume ti Nzapa” ayeke nyen? (b) A hunda lani na Jéhovah ti sara nyen ti tene lo soro mbeni kete wungo ti azo ti gue na yayu?

¹² Na ngoi ti mbeni oko ti atambela ti lo ti fango tënë na Galilée, Jésus afa so tënë ti ndagigi so a honde ague tâ oko na Royaume ti lo ti Messie. Lo tene na adisciple ti lo: “A mû na i ndara ti hinga tënë ti ndagigi ti royaume ti yayu [“royaume ti Nzapa”, Marc 4:11] me A mû na ala pëpe.” (Matthieu 13:11). Mbeni ye so ayeke na yâ tënë ti ndagigi so a honde ayeke ti so Jéhovah ayeke soro mbeni “kete kundu” ti azo 144 000 ti bungbi na Molenge ti lo tongana mbage ti hale ni, na ala na lo ayeke komande na yayu.​—Luc 12:32; Apocalypse 14:1, 4.

¹³ Teti so a sara azo ti duti na fini na ndo ti sese, a hunda lani na Jéhovah ti sara si ambeni zo aga mbeni ‘fini création’ si ala gue na yayu (2 aCorinthien 5:17). Teti so lo yeke mbeni oko ti ala so ayeke na mbeni beku so ayeke nde, beku ti gue na yayu, bazengele Pierre atene: “Sara tënë nzoni na Nzapa, Babâ ti Seigneur ti e Jésus Christ; na lege ti kota be-nzoni ti Lo, Lo dü e mbeni si e yeke na beku so ayeke na fini na lege ti londongo ti Jésus Christ na popo ti awakinda, si e wara ye ti héritier so afuti pëpe, na a yeke na sioni pëpe, na a miro pëpe, ye ti héritier so A bata na yayu teti i.”​—1 Pierre 1:3, 4.

14. (a) Tongana nyen tënë ti azo so ayeke aJuif pëpe ayeke nga na yâ “tënë ti ndagigi ti royaume ti Nzapa”? (b) Ngbanga ti nyen e wara lege ti hinga “tâ nda ti ye ti Nzapa” so?

¹⁴ Mbeni mbage ti tënë ti ndagigi so a honde so andu Royaume so ayeke ga ande ayeke ti so Nzapa aye ti yôro ambeni zo so ayeke aJuif pëpe na popo ti kete wungo ti azo so a yeke iri ala ti komande na tere ti Christ na yayu. Paul afa mbage ti “kusala” ti Jéhovah so, wala lege so lo leke na ye ti sara si ye so lo leke ti sara aga tâ tënë, na yâ ti atënë so: “A fa tënë so na amolenge ti azo ti awagame ti giriri pëpe, tongana so A fa fadeso na abazengele na aprophète ti Lo ti nzoni-kue na lege ti Yingo; so atene, aGentil ayeke afon héritier, afon membre ti Tere, na afon e na zendo na yâ Christ Jésus, na lege ti Tene-nzoni.” (aEphésien 3:5, 6). A fa lani nda ti mbage ti tënë ti ndagigi so a honde na ‘abazengele ti nzoni-kue’. Legeoko nga laso, tongana a yeke fade ngbanga ti mungo maboko ti yingo vulu pëpe, ka e lingbi pëpe ti hinga “tâ nda ti ye ti Nzapa” so.​—1 aCorinthien 2:10; 4:1; aColossien 1:26, 27.

15, 16. Ngbanga ti nyen Jéhovah asoro azo so ayeke komande na tere ti Christ na popo ti azo ti sese?

¹⁵ “Azo [saki] ngbangbo oko na bale-osio na ndo ni [saki] osio” so a bâ ala na tere ti “Molenge Ti Ngasangbaga” na Hoto ti Sion ti yayu, a tene so “a vo ala na popo ti azo ti sese”, “a vo ala na popo ti azo, si ala ga kozo hale teti Nzapa na teti Molenge Ti Ngasangbaga”, so ayeke Christ Jésus (Apocalypse 14:1-4). Jéhovah asoro lani kozo molenge ti lo ti yayu ti ga kozo mbage ti hale ni so a mû zendo ti lo na Eden, me ngbanga ti nyen lo soro azo so yeke duti na tere ti Christ na popo ti azo ti sese? Bazengele Paul afa atene ala so a diko li ti ala dikongo so, a “iri ala na lege ti tënë ti bê ti [Jéhovah]” nga “na lege so bê ti lo aye”.​—aRomain 8:17, 28-30; aEphésien 1:5, 11; 2 Timothée 1:9.

¹⁶ Ye so bê ti Jéhovah aye ayeke ti sara si kota iri ti lo aga nzoni-kue na ti fa mbilimbili ti kota yanga-ti-komande ti lo na yayu nga na ndo sese kue. Na lege ti “kusala” ti lo ti ndara so mara ni ayeke dä pëpe, wala lege so lo leke na aye, Jéhovah atokua lani kozo Molenge ti lo na ndo sese, ndo so lo wara lani akota tara dä mingi juska lo kui. Na ndo ni, Jéhovah aleke biani na bê ti lo ti tene ambeni zo ti sese ge so amû mbage ti kota yanga-ti-komande ti Jéhovah juska na kuâ, a yôro ala na yâ ngorogbia ti Molenge ti lo, Royaume ti Messie.​—aEphésien 1:8-12; Apocalypse 2:10, 11.

17. Ngbanga ti nyen e lingbi ti duti na ngia so Christ na azo so akomande na tere ti lo aduti na fini lani na ndo sese?

¹⁷ Jéhovah afa kota ndoye ti lo na mbage ti ahale ti Adam na tokuango Molenge ti lo na ndo sese nga na sorongo na popo ti azo ti sese ala so ayeke wara ande ye ti héritier legeoko na Molenge ti lo na yâ ngorogbia ti Royaume ni. Tongana nyen si ambeni zo so aduti be-ta-zo na Jéhovah, a londo na Abel ti ga na ni, ayeke wara nzoni na lege ti ye so? Teti so a dü ala angbâa ti siokpari nga na ti kuâ, azo ayeke mbilimbili-kue pëpe na ala yeke na bezoin ti wara seni na lege ti yingo nga na lege ti mitele, nga ti ga mbilimbili-kue a lingbi na ye so Jéhovah aleke na bê ti lo giriri ndali ti azo (aRomain 5:12). So tâ ye ti dengo bê tënë ti azo kue so ayeke ku kungo ti wara fini ti lakue lakue na ndo sese ti hinga so Gbia ti ala ayeke ndoye ala nga lo yeke mä ala nzoni tongana ti so lo sara lani na mbage ti adisciple ti lo na ngoi ti kusala ti lo! (Matthieu 11:28, 29; aHébreu 2:17, 18; 4:15; 7:25, 26). Nga, so tâ dengo bê tënë ti ala ti hinga so azo so ayeke duti agbia na aprêtre na tere ti Christ na yayu ayeke akoli na awali so ala yeke azo ti mabe so ayeke lani na awokongo nga awara akpale ti gigi tongana ti e!​—aRomain 7:21-25.

Ye so Jéhovah aleke ti sara ayeke gbian pëpe

18, 19. Ngbanga ti nyen nda ti atënë ti Paul so ayeke na aEphésien 1:8-11 a sigigi polele na lê ti e awe? Na e yeke bâ tënë wa na yâ article ti peko?

¹⁸ Fadeso, e lingbi ti tene so tënë so Paul atene na aChrétien so a sa yingo na ndo ti ala, so ayeke na aEphésien 1:8-11, e mä yâ ni polele awe. Lo tene so Jéhovah afa na ala “tënë ti ndagigi ti ye so lo ye,” so a yeke ti so a iri ala ti ga “ye ti héritier” legeoko na Christ, nga “a diko [ala] giriri kozoni na lege ti tënë ti bê ti Lo, na Lo sara ye kue tongana bê ti Lo aye”. E bâ so ye ni alingbi tâ na pendere “kusala” wala lege so Jéhovah aleke na aye ti sara si ye so lo leke na bê ti lo aga tâ tënë. Ye ni so amû nga maboko na e ti hinga ngbanga ti nyen gi mbeni kete wungo ti aChrétien so aga na Matanga ti Kobe ti Seigneur si ayeke te mapa na anyon vin.

¹⁹ Na yâ article ti peko, e yeke bâ ande ye so Matanga ti Dango Bê na kuâ ti Christ aye ti tene teti aChrétien so ayeke na beku ti gue na yayu. E yeke bâ ande nga ngbanga ti nyen tënë ti ye so Mémorial aduti fä ni agbu bê ti azo kutu mingi mingi so ayeke na beku ti duti lakue lakue na ndo sese.

[Akete tënë na gbe ni]

Dango bê

• Ngbanga ti nyen Jéhovah asara sese na lo zia zo na ndo ni?

• Ngbanga ti nyen a yeke kota ye ti tene a tara lani Molenge ti Jéhovah ngengele oko na ndo sese?

• Ngbanga ti nyen Jéhovah asoro azo so ayeke komande na tere ti Christ na popo ti azo ti sese?