Royaume ti Nzapa aga nduru ti zi azo awe!

“E ye royaume ti Mo aga. E ye ala sara na sese ye so bê ti Mo aye legeoko tongana ala sara na yayu.”​—MAT. 6:10.

1. Kota tënë so Jésus afa ni ayeke so wa?

NA NGOI so Jésus ayeke fa ye na ndo ti Hoto ti Oliviers, lo zia na yâ ni mbeni tapande ti sambela so afa na nduru tënë kota tënë ti yâ ti fango ye ti lo. Lo fa na adisciple ti lo ti sambela Nzapa, lo tene: “E ye royaume ti Mo aga. E ye ala sara na sese ye so bê ti Mo aye legeoko tongana ala sara na yayu.” (Mat. 6:9-13). Jésus “atambela na akota kodoro na akete kodoro, Lo fa tënë, na Lo mû na ala Tene-nzoni ti royaume ti Nzapa.” (Luc 8:1). Christ awa adisciple ti lo, lo tene: “I gi royaume ti Nzapa na mbilimbili ti Lo kozoni.” (Mat. 6:33). Na ngoi so mo yeke manda article so, gi ti bâ alege so mo lingbi ti sara kua na ni na fango tënë. Na tapande, gbu li na ndo ti lege so mo lingbi ti kiri tënë na ahundango tënë so: Tënë ti Royaume ayeke kota tënë mingi? A hunda ti zi azo na yâ ti aye wa? Nga, Royaume ti Nzapa ayeke zi ande azo tongana nyen?

2. Tënë na ndo ti Royaume ayeke kota tënë mingi?

² Jésus afa kozoni awe, lo tene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Mat. 24:14). Nzoni tënë na ndo ti Royaume ti Nzapa ayeke kota tënë mingi. A yeke kota tënë so ahon tanga ni kue na yâ ti dunia so. Na yâ ti akongregation ti aTémoin ti Jéhovah a hon saki 100, awakua ti Jéhovah nduru na kutu 7 ayeke mû mbage na yâ ti mbeni kapa ti fango tënë so ade ti si lâ oko pëpe; ala yeke fa na azo tënë ti Royaume ti Nzapa so abâ gigi awe. Ti hinga so Royaume ti Nzapa abâ gigi awe ayeke mbeni nzoni tënë ndali ti so ye so aye ti fa so Nzapa asigigi awe na mbeni ngorogbia ti yayu so ayeke komande ande sese. Na gbe ti komandema ti Royaume so, a yeke sara ande na sese ye so bê ti Jéhovah aye legeoko tongana ti so a sara na yayu.

3, 4. Ye wa ayeke si na ngoi so a yeke sara ande ye so bê ti Nzapa aye na ndo ti sese?

³ Nyen la ayeke si na azo na ngoi so a yeke sara ande ye so bê ti Nzapa aye na ndo ti sese? Fade Jéhovah ayeke “mbô ngule kue na lê ti [azo], na kui ayeke mbeni pëpe. Vundu, wala toto, wala sana, ayeke mbeni pëpe.” (Apoc. 21:4). Ndali ti so a dü azo na siokpari nga ala yeke mbilimbili-kue pëpe, ala yeke tï kobela na ala yeke kui. Me na gbe ti Royaume ti Nzapa, azo ayeke tï kobela pëpe na ala yeke kui pëpe. Azo kue so akui na so Nzapa angbâ ti dabe ti lo na ala, lege ayeke zi na ala ti wara fini ti lakue lakue, ndali ti so Bible amû zendo so “londongo ti awakinda kue, azo ti mbilimbili, na azo ti kirikiri” ayeke duti ande dä (Kus. 24:15). Bira, kobela wala nzara ayeke duti ande dä mbeni pëpe. Na ndo ni, sese ayeke ga ande paradis. Même anyama so laso ayeke sioni ayeke sara ande sioni pëpe na azo nga na amba ti ala anyama.​—Ps. 46:10; 72:16; Es. 11:6-9; 33:24; Luc 23:43.

⁴ Na bango apendere ye so azo ayeke wara ande na peko ti komandema ti Royaume, a yeke ye ti dongo bê pëpe so Bible afa kozoni awe tënë ti dengo bê na ndo ti dutingo ti azo na ngoi so, atene: “Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.” Ka ti azo so ayeke bi kpale na sese, a yeke tongana nyen? Bible afa kozoni awe, atene: “A ngbâ kete, na fade azo ti sioni ayeke mbeni pëpe.” Me, “ala so azia beku ti ala na L’Eternel, fade sese ni aga ye ti héritier ti ala.”​—Ps. 37:9-11.

5. Nyen la ayeke si ande na aye ti ngoi ti laso?

⁵ Kozoni ti tene ye so kue asi, a hunda ti zi aye ti ngoi so. A yeke aye tongana angorogbia ti azo, so ayeke mä tere pëpe na popo ti ala, abungbi ti nzapa so azo asigigi na ni nga na akota ndokua ti dengo buze. So ayeke mbilimbili aye so ngorogbia ti yayu ayeke sara ande la. Yingo ti Nzapa apusu prophète Daniel ti fa kozoni awe ye so ayeke si ande, lo tene: “Na lâ ti agbia so [so ayeke laso], fade Nzapa ti yayu ayä royaume [ti yayu] so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume [so ayeke komande laso] so kue nduru nduru, na a sara si royaume nde nde so kue awe; na fade royaume so angbâ lakue lakue.” (Dan. 2:44). Na pekoni, Royaume ti Nzapa, so ayeke fini ngorogbia ti yayu, ayeke komande na ndo ti fini bungbi ti azo. “Ayayu ti fini na sese ti fini so mbilimbili aduti na yâ ni” ayeke bâ ande gigi.​—2 Pi. 3:13.

Azo ayeke tâ na bezoin ti tene a zi ala laso

6. Na lege wa Bible asara tënë na ndo ti sioni so azo ayeke sara?

⁶ Azo ato nda ti mû sioni lege ngbene ye na ngoi so Satan, Adam nga na Eve asara kpengba-li lani na Nzapa, na ala ye ti mû desizion ala wani na ndo ti ye so ayeke nzoni wala ayeke sioni. Kozoni na Kota Moa ti ngoi ti Noé, so ti tene angu 1 600 tongaso na pekoni so azo ake yanga, “sioye ti zo ayeke kota na sese; lakue, suma kue ti bibe ti bê ti zo ayeke gi sioni.” (Gen. 6:5). Ngu 1 300 tongaso na peko ti Kota Moa, Salomon abâ so azo akiri asara sioni mingi, ni la lo tene: “Mbi gonda awakinda so akui giriri ahon azo so angbâ na fini. Zo so ade adü lo pëpe, na lo de lo bâ kusala ti sioni pëpe so zo asara na gbe ti lâ, lo yeke nzoni ahon ala use kue.” (Zo-ti. 4:2, 3). Laso, ngu 3 000 tongaso na pekoni, sioni angbâ lakue ti gue na li ni.

7. Ngbanga ti nyen a hunda mingi laso ti tene Nzapa azi azo?

⁷ Atâa so sarango sioni ato nda ni giriri, laso azo ayeke na bezoin mingi ahon ti kozo ti tene Royaume ti Nzapa azi ala. Na yâ ti ngu 100 so ahon, azo asara sioni mingi ahon ti ândö, na sarango sioni angbâ lakue ti gue na li ni. Na tapande, mbeni tondo so alondo na mbeni ndokua (Worldwatch Institute) atene: “Ti hinga wungo ti azo so akui na yâ ti abira [na popo ti ngu 1900 na ngu 2000] ahunda ti mû wungo ti azo kue so akui na yâ ti abira oko oko kue so a sara ni ti londo na ngoi ti Jésus ti si na ngu 1899, na a mû wungo ni so fani ota si a lingbi na ni.” Ngbene ye na ngu 1914, wungo ti azo a hon kutu 100 akui na yâ ti abira. Mbeni kota bakari atene so wungo ti azo kutu 60 tongaso akui na yâ ti Use Bira so Amû Sese Kue. Ndali ti so ambeni kodoro ayeke même fadeso na angangu lê ti ngombe, azo ayeke na ngangu ti fâ mingi ti azo ti sese. Atâa so senda-ye nga na mandango ye na ndo ti seni ague na li ni mingi, ngu oko oko, wungo ti amolenge kutu 5 tongaso ayeke kui na nzara nga na kobela.​—Bâ chapitre 9 ti buku Bible afa nyen biani?

8. Angu saki mingi so azo akomande na ndo ti amba ti ala afa nyen biani?

⁸ Atâa ngangu kue so azo ayeke sara, ala lingbi pëpe ti kanga lege na aye ti sioni ti gue na li ni. Abungbi ti poroso, akota ndokua ti dengo buze nga na abungbi ti nzapa so azo asigigi na ni asara lâ oko pëpe si azo awara aye so ala yeke tâ na bezoin ni tongana siriri, nzoni maïngo ti aye nga na nzoni seni. Ahon ti leke akota kpale so azo ayeke wara fadeso, abungbi so akiri azia ambeni kpale ni na ndo ni. Ti tâ tënë ni, angu saki mingi so azo akomande na ndo ti amba ti ala afa so tënë so ge ayeke tâ tënë: “Lege ti zo ayeke na tïtî lo mveni pëpe; na a yeke na bê ti zo so atambela ti fa lege na gere ti lo nga pëpe.” (Jér. 10:23). Biani, “zo akomande mbeni zo, na a sara sioni na lo.” (Zo-ti. 8:9). Na ndo ni, “ye kue ti création abima na gua ate ala juska fadeso.”​—aRom. 8:22.

9. Aye ti sioni wa atâ Chrétien aku ti bâ ni na “lâ ti nda ni” so?

⁹ Bible afa kozoni awe ye so ayeke si na ngoi ti e, atene: “Na lâ ti nda ni, fade lâ ti ye ti ngangu aga.” Na pekoni so Bible asara tënë na ndo ti aye so ayeke si na lâ ti nda ni na gbe ti komandema ti azo, prophétie ni atene: “Azo ti sioni na azo ti handa azo aga sioni ahon.” (Diko 2 Timothée 3:1-5, 13.) A-Chrétien ahinga kozoni awe so amara ti ye tongaso ayeke si ande, ndali ti so “sese so kue ayeke na tïtî wato-sioni”, Satan (1 Jean 5:19). Ye oko, nzoni tënë ni ayeke so na yâ ti kete ngoi, Nzapa ayeke zi ande azo so andoye lo. Lo yeke zi ande ala na yâ ti aye ti sioni so ayeke gue na li ni mingi na ndo ti sese laso.

Oko zo so alingbi biani ti zi azo

10. Ngbanga ti nyen la Jéhovah ayeke oko zo so alingbi biani ti zi azo?

¹⁰ Na ngoi so mo yeke fa nzoni tënë na azo, fa na ala so gi Jéhovah oko la alingbi biani ti zi azo. Gi lo oko la ayeke na ngangu ti zi awakua ti lo na yâ ti aye ti sioni nga lo ye biani ti sara ni (Kus. 4:24, 31; Apoc. 4:11). E hinga na bê ti e kue so Jéhovah ayeke zi lakue awakua ti lo nga lo yeke sara si aye so lo leke na bê ti lo ti sara aga tâ tënë, ndali ti so lo mû zendo lo tene: “Biani, ye so Mbi bi bê ti Mbi dä, fade ye ni aga tâ ye.” Fade tënë ti yanga ti lo “akiri na [lo] senge pëpe”.​—Diko Esaïe 14:24, 25; 55:10, 11.

11, 12. Zendo wa Jéhovah amû na awakua ti lo?

¹¹ Jéhovah amû zendo so lo yeke zi ande awakua ti lo na ngoi so lo yeke sara ye alingbi na ngbanga so lo dë na ndo ti azo ti sioni. Na ngoi so Nzapa atokua prophète Jérémie ti sara tënë dandara na azo so asara akota siokpari, Nzapa atene: “Zia mbeto ti ala asara mo pëpe.” Ngbanga ti nyen? Ngbanga ti so Jéhovah atene na lo, lo tene: “Mbi yeke na mo ti sö mo.” (Jér. 1:8). Legeoko nga, na ngoi so Jéhovah aga lani nduru ti futi kodoro ti Sodome na Gomorrhe so azo ti yâ ni asara sioni mingi, lo tokua a-ange use ti sigigi na Lot nga na sewa ti lo na yâ ti akodoro ni. “Tongaso L’Eternel apika Sodome na Gomorrhe na soufre na wâ”.​—Gen. 19:15, 24, 25.

¹² Jéhovah alingbi biani ti zi azo so ayeke sara ye so bê ti lo aye, atâa ndo so ala yeke dä. Na ngoi so Jéhovah afuti azo ti sioni giriri na lege ti Kota Moa, lo “bata Noé, zo ti fa tënë ti mbilimbili, legeoko na ambeni zo mbasambala”. (2 Pi. 2:5). Na ngoi so Jéhovah ayeke futi ande azo ti sioni ti laso, lo yeke kiri ti bata ande azo ti mbilimbili. Ni la Bible atene: “I gi L’Eternel, i azo ti tâ be-ti-molenge so ayeke na ndo sese . . . I gi mbilimbili na i gi tâ be-ti-molenge; peut-être fade a honde i na lâ ti ngonzo ti L’Eternel.” (Soph. 2:3). Na pekoni so a futi azo ti sioni na ndo ti sese kue awe, ‘azo ti mbilimbili, fade ala duti na sese so. Me azo ti sioni, fade a lungula ala na sese so’.​—aProv. 2:21, 22.

13. Tongana nyen a yeke zi ande awakua ti Jéhovah so akui awe?

¹³ Ye oko, awakua ti Jéhovah mingi akui ndali ti so ala tï kobela, a sara ye ti ngangu na ala, nga ndali ti ambeni ye nde (Mat. 24:9). Tongaso, a yeke zi ande ala tongana nyen? Tongana ti so e bâ ni fade awe, ‘londongo ti azo ti mbilimbili’ ayeke duti ande dä (Kus. 24:15). So tâ ye ti dengo bê ti hinga so mbeni ye alingbi pëpe ti kanga lege na Jéhovah ti zi awakua ti lo!

Mbeni ngorogbia ti mbilimbili

14. E hinga tongana nyen so Royaume ti Nzapa ayeke biani mbeni ngorogbia ti mbilimbili?

¹⁴ Na ngoi so mo yeke fa tënë, mo lingbi ti fa na azo so Royaume ti Jéhovah so ayeke na yayu ayeke mbeni ngorogbia ti mbilimbili. A yeke tongaso ndali ti so ngorogbia so afa na gigi apendere sarango ye ti Nzapa tongana mbilimbili nga na ndoye (Deut. 32:4; 1 Jean 4:8). Nzapa azia Royaume so na tïtî Jésus Christ, so alingbi biani ti komande na ndo ti sese. Jéhovah aleke lani nga ti tene aChrétien 144 000 so a sa yingo na ndo ti ala ague na yayu ti komande na ndo ti sese legeoko na Christ.​—Apoc. 14:1-5.

15. Kangbi wa ayeke na popo ti komandema ti Nzapa na komandema ti azo?

¹⁵ Komandema ti Jésus na ti aChrétien 144 000 ayeke duti ande tâ nde mingi na komandema ti azo so ayeke mbilimbili-kue pëpe. Fani mingi, agbia ti laso ayeke sara ye na ngangu mingi nga ala yeke pusu azo ti ala ti sara bira, ye so asara si azo kutu mingi ayeke wara kuâ. A yeke ye ti dongo bê pëpe tongana Bible awa e ti zia bê ti e pëpe na ndo ti zo, ‘so alingbi sö zo pëpe.’ (Ps. 146:3). Me ti Christ, lo yeke komande na nzoni bê. Jésus atene: “I ga na Mbi, i kue so i sara kusala na i yeke na kungba so ane, na fade Mbi mû na i lege ti wu tere. I yô joug ti Mbi, i manda tënë ti Mbi; teti Mbi yeke na tâ be-ti-molenge na bê ti Mbi ayeke kota pëpe; na fade i wara lege ti wu âme ti i. Teti joug ti Mbi ayeke nzoni, na kungba ti Mbi ane pëpe.”​—Mat. 11:28-30.

Lâ ti nda ni aga nduru ti hunzi awe!

16. Lâ ti nda ni so ayeke hunzi ande tongana nyen?

¹⁶ A yeke ngbene ye na ngu 1914 la e yeke na lâ ti nda ni, wala na “nda ti ngoi so”, so ti tene ngoi ti hunzingo ti aye ti laso (Mat. 24:3). Na yâ ti kete ngoi, ye so Jésus airi ni “kota ye ti vundu” ayeke si. (Diko Matthieu 24:21.) “Kota ye ti vundu” so, so mara ni ade ti si lâ oko pëpe, ayeke sara ande si aye kue so Satan ayeke komande na ndo ni ahunzi. Me kota ye ti vundu ni ayeke to nda ni tongana nyen? Nga, a yeke hunzi ande tongana nyen?

17. Bible afa nyen na ndo ti lege so kota ye ti vundu ayeke to nda ni na ni?

¹⁷ Kota ye ti vundu ni ayeke to nda ni ande gi hio tongaso. Biani, “lâ ti Jéhovah”, (MN) ayeke si ande na mbeni ngoi so azo aku tere ti ala na ni pëpe “tongana ala yeke tene, Ndo adë siriri”. (Diko 1 aThessalonicien 5:2, 3.) Kota ye ti vundu so a fa tënë ni kozoni awe ayeke to nda ni na ngoi so amara abâ ti ala so ala ga nduru awe ti leke ambeni kota kpale so azo ayeke wara. Na ngoi so a yeke futi ande gi gbagburu tongaso “Kota Babylone,” so ayeke abungbi ti nzapa ti wataka ti sese kue, bê ti mingi ti azo ayeke dö. Bê ti agbia ti sese nga na ti ambeni zo ayeke pika na ngoi so a yeke sara ande ye alingbi na ngbanga so a dë na ndo ti Kota Babylone.​—Apoc. 17:1-6, 18; 18:9, 10, 15, 16, 19.

18. Jéhovah ayeke sara ande ye tongana nyen na ngoi so Satan ayeke ga ti tiri na awakua ti lo?

¹⁸ A si na mbeni ngoi so ye ni aga ngangu mingi, fade “fä ayeke na lâ na nze na atongoro,” nga “fade fä ti Molenge Ti Zo asi na yayu”. Na pekoni, e lingbi ti ‘yä lê ti e na nduzu, teti lâ ti ton e aga nduru.’ (Luc 21:25-28; Mat. 24:29, 30). Satan, wala Gog, ayeke ga ande na azo ti lo ti tiri na awakua ti Jéhovah. Me Jéhovah atene na ndo ti azo so ayeke ga ti tiri na awakua ti lo so ayeke be-ta-zo, lo tene: “Zo so andu mo, lo ndu lê ti L’Eternel mveni.” (Zach. 2:8). Tongaso, Satan ayeke sö ande benda pëpe na ngoi so lo yeke gi ti futi awakua ti Jéhovah. Ndali ti nyen? Ndali ti so Jéhovah so ayeke Kota Gbia ti Dunia Kue ayeke londo ande hio ti zi awakua ti lo.​—Ezéch. 38:9, 18.

19. Ngbanga ti nyen e hinga biani so a-ange ti Nzapa ayeke futi ande aye so Satan ayeke komande na ndo ni?

¹⁹ Na ngoi so Nzapa ayeke londo ande na tere ti amara, fade ala yeke ‘hinga so lo yeke L’Eternel’. (Ezéch. 36:23). Jéhovah ayeke tokua ande gbâ ti a-ange so Jésus Christ ayeke mokonzi ti ala ti futi atanga ti aye so Satan ayeke komande na ndo ni na ndo ti sese (Apoc. 19:11-19). Mbeni lâ, gi mbeni ange oko alondo na mbeni bï oko na lo “fâ aturugu [saki] ngbangbo oko na bale-miombe na ndo ni [saki] oku” so aga ti tiri na awakua ti Nzapa. Ti dabe ti e na ye so ayeke sara si e hinga biani so a yeke duti ande ngangu pëpe na a-ange ti futi atanga ti aye so Satan ayeke komande na ndo ni na ndo ti sese na ngoi so kota ye ti vundu ayeke gue ti hunzi na Harmaguédon (2 aGbia 19:35; Apoc. 16:14, 16). A yeke kanga ande Satan na adémon ti lo teti ngu 1 000. Na nda ni a yeke futi ala.​—Apoc. 20:1-3.

20. Nyen la Jéhovah ayeke sara ande na lege ti Royaume ti lo?

²⁰ A yeke na lege so la a yeke zi ande aye ti sioni na yayu nga na sese, na azo ti mbilimbili ayeke duti ande na fini teti lakue lakue na ndo ti sese. Ye so ayeke fa ande so Jéhovah ayeke Kota Zo ti Zingo azo (Ps. 145:20). Na lege ti Royaume ti Nzapa, lo yeke fa so lo la lo yeke na droit ti komande dunia kue, lo yeke sara si iri ti lo aga nzoni-kue nga lo yeke sara si kota ye so lo leke ti sara ndali ti sese aga tâ tënë. Zia mo wara kota ngia na yâ ti kusala ti mo na ngoi so mo yeke fa nzoni tënë na azo nga mo yeke mû maboko na azo so ayeke na “nzara ti hinga Nzapa si ala wara fini ti lakue lakue” ti hinga so Royaume ti Nzapa aga nduru awe ti zi azo!​—Kus. 13:48, MN.

Mo dabe ti mo na ni?

• Na lege wa Jésus agboto lê na ndo ti nene ti Royaume?

• Ngbanga ti nyen a hunda mingi laso ti zi azo?

• E lingbi ti ku ti tene aye wa asi na ngoi ti kota ye ti vundu?

• Na lege wa Jéhovah afa so lo yeke Kota Zo ti Zingo azo?

[Afoto na lembeti 15, 16]

Bible afa kozoni awe tënë ti mbeni fango tënë so ayeke nde, so a yeke sara ni na ndo ti sese kue laso

[Foto na lembeti 18]

Tongana ti so Jéhovah azi lani Noé na sewa ti lo, lo lingbi ti zi e

[Foto na lembeti 20]

Fade Jéhovah ayeke “mbô ngule kue . . . , na kui ayeke mbeni pëpe.”​—Apoc. 21:4