‘Molenge ni aye ti fa Babâ ni na azo’
“Mbeni zo ti hinga Babâ ni ayeke pëpe, gi Molenge ni nga na zo kue so Molenge ni aye ti fa Babâ ni na lo.”—LUC 10:22.
MO YEKE KIRI TËNË TONGANA NYEN?
Ngbanga ti nyen gi Jésus la alingbi biani ti fa Babâ ti lo na azo?
Jésus afa Babâ ti lo na azo tongana nyen?
Na alege wa mo lingbi ti mû tapande ti Jésus ti fa Babâ ni na azo?
1, 2. Hundango ndo wa akara azo mingi? Ngbanga ti nyen?
‘NZAPA ayeke zo wa?’ Tënë so akara azo mingi. Na tapande, mingi ti azo so atene ala yeke aChrétien amä na bê so Nzapa ayeke Nzapa Babâ, Nzapa Molenge, na Nzapa Yingo vulu; nga mingi ti ala atene so zo alingbi pëpe ti mä yâ ti tënë so. Mbeni zo ti sungo mbeti so ayeke nga kota zo ti eglize atene so tënë ti Nzapa Babâ, Nzapa Molenge, na Nzapa Yingo vulu ayeke mbeni ye so a lingbi ti fa ndani ape ndali ti so ambeni ye ayeke dä so ahon gbungo nda ti ye ti zo. Nga, mingi ti azo so ayeda na tënë ti évolution atene Nzapa ayeke dä ape. Ala tene apendere ye kue so ayeke na yâ ti création abâ gigi gi tongaso, atâa so Charles Darwin ake pëpe so Nzapa ayeke dä. Lo tene so azo ayeke na ngangu pëpe ti hinga ye kue na ndo ti Nzapa.
2 Mingi ti azo, atâa ye wa la ala mä na bê na ni, ayeke hunda atënë na ndo ti Nzapa. Me mingi ti ala azia ti gi ti hinga ye na ndo ti Nzapa ndali ti so ala wara pëpe anzoni kiringo tënë. Biani, Satan “asara si bibe ti azo so amä na bê pëpe avuko”. (2 aCor. 4:4). A yeke ye ti dongo bê pëpe so li ti mingi ti azo aga kirikiri nga ala hinga pëpe tâ tënë na ndo ti Babâ ni, Wasarango dunia kue.—És. 45:18.
3. (a) Zo wa la afa na e Wasarango e? (b) Ahundango ndo wa e yeke gue ti bâ?
3 Ye oko, a yeke kota ye ti tene azo ahinga tâ tënë na ndo ti Nzapa. Ndali ti nyen? Ndali ti so gi azo so airi ndo “na Jéhovah na iri ti lo” la a yeke sö ande ala (aRom. 10:13). Ti iri ndo na Nzapa na iri ti lo aye ti tene ti hinga Jéhovah nga na asarango ye ti lo nzoni. Jésus Christ afa kpengba ye so na adisciple ti lo. Lo fa na ala Babâ ni. (Diko Luc 10:22.) Ngbanga ti nyen gi Jésus la alingbi biani ti fa Babâ ni na azo? Lo sara ni tongana nyen? Tongana nyen la e lingbi ti mû tapande ti Jésus ti fa Babâ ni na azo? Zia e bâ ahundango ndo so.
GI JÉSUS CHRIST LA ALINGBI BIANI TI FA BABÂ NI NA E
4, 5. Ngbanga ti nyen gi Jésus la alingbi biani ti fa Babâ ti lo na azo?
4 Gi Jésus la alingbi lani biani ti fa Babâ ti lo na azo. Ngbanga ti so kozoni si Nzapa acréé tanga ti aye kue, zo ti yingo so na pekoni a iri lo Jésus ayeke lani dä awe na yayu. Lo yeke “oko Molenge so Nzapa adü.” (Jean 1:14; 3:18). So gi molenge ni la ayeke lani dä na tere ti Babâ ti lo kozoni si tanga ti aye kue ato nda ti bâ gigi, Babâ ni abi bê ti lo kue na ndo ti lo nga Molenge ni amanda ye na ndo ti Babâ ti lo nga na asarango ye ti lo. Babâ ni na Molenge ni asara lani lisoro mingi nga ala maï mbeni kpengba songo na popo ti ala teti angu saki mingi mingi (Jean 5:20; 14:31). Tara ti bâ gbâ ti aye so Molenge ni ahinga na ndo ti sarango ye ti tere ti Babâ ti lo!—Diko aColossien 1:15-17.
5 Babâ ni asoro Molenge ni, “Tënë ti Nzapa”, ti sara tënë na iri ti lo (Apoc. 19:13). Tongaso, gi Jésus oko la alingbi biani ti fa Babâ ni na azo. A yeke ndali ni la Jean so asû Évangile ti lo atene so Jésus, “Tënë ni”, ayeke “na nzoni ndo na tere ti Babâ ni”. (Jean 1:1, 18). Na tenengo tënë so, Jean ayeke sara tënë ti mbeni ye so azo ayeke sara ka lani na ngoi ti tengo kobe. Mbeni zo so ayeke gene ayeke duti nduru na tere ti mba ti lo na ndo ti oko gbogbo. Teti so ala duti nduru na tere ti mba, a yeke ngangu pëpe ti tene ala sara lisoro. Legeoko nga, Molenge ni so ayeke “na nzoni ndo” ayeke sara lani anzoni lisoro na Babâ ti lo.
6, 7. Na lege wa songo so ayeke na popo ti Babâ ni na Molenge ni angbâ lani ti kpengba?
6 Songo so ayeke na popo ti Babâ ni na Molenge ni angbâ lani ti kpengba. Molenge ni ayeke lo so ‘Nzapa awara ngia na yâ lo lakue’. (Diko aProverbe 8:22, 23, 30, 31.) Ni la, a yeke na lege ni so songo so ayeke na popo ti ala akiri akpengba na ngoi so ala yeke sara lani kua ndo oko nga na ngoi so Molenge ni ayeke manda asarango ye ti Babâ ti lo. Na ngoi so Jéhovah ayeke créé lani a-ange nga na azo, Molenge ni abâ tongana nyen lo sara ye na mbage ti ala oko na oko, nga kite ayeke pëpe so lo kiri lo ye Babâ ni nga lo ne lo mingi.
7 Même na ngoi so Satan alondo ti ke droit ti Jéhovah ti komande dunia kue, Molenge ni awara lege ti bâ tongana nyen Jéhovah asara ye lani na ndoye, mbilimbili, ndara nga na ngangu na yâ ti ngangu kpale so. Kite ayeke pëpe so aye so amû maboko na Jésus ti luti na lê ti akpale so lo wani lo yeke tingbi na ni ande na yâ ti kusala ti lo na ndo ti sese.—Jean 5:19.
8. Tongana nyen la atondo ti aÉvangile amû maboko na e ti hinga ye mingi na ndo ti asarango ye ti tere ti Babâ ni?
8 Teti so Molenge ni ayeke na nzoni songo na Jéhovah, lo la lo lingbi ti fa anzene nzene ye mingi na azo na ndo ti Babâ ti lo ahon tanga ti azo kue. Nzoni lege ti tene e manda ye na ndo ti Babâ ni ayeke ti manda ye so oko Molenge ti Nzapa afa nga asara. Na tapande, tongana e diko gi nda ti mbupa “ndoye” na yâ ti bakari, a yeke duti ngangu na e ti hinga tâ ndani kue. Me, ti gbu li na ndo ti atondo so a sû na yâ ti aÉvangile na ndo ti kusala ti Jésus nga tongana nyen lo bâ lege ti azo, e yeke hinga ye mingi na ndo ti tënë so atene “Nzapa ayeke Ndoye.” (1 Jean 4:8, 16). Ye so andu nga ambeni sarango ye ti tere ti Nzapa so Jésus afa ni lani na adisciple ti lo na ngoi so lo yeke lani na sese.
JÉSUS AFA BABÂ TI LO NA AZO TONGANA NYEN?
9. (a) Jésus afa Babâ ti lo na alege use. A yeke alege wa? (b) Mû mbeni tapande so afa tongana nyen Jésus afa Babâ ti lo na lege ti fango ye ti lo.
9 Tongana nyen la Jésus afa lani Babâ ti lo na adisciple ti lo nga na azo so ayeke ga ande adisciple ti lo? Lo fa ni na alege use: na lege ti afango ye ti lo nga na lege ti sarango ye ti tere ti lo. Zia e sara tënë kozoni na ndo ti afango ye ti Jésus. Aye so Jésus afa lani na adisciple ti lo afa kota hingango ye so lo yeke na ni na ndo ti apensé ti Babâ ti lo, atënë ti bê ti lo nga na alege so lo sara na aye. Na tapande, Jésus ahaka Babâ ti lo na mbeni zo so ayeke bâ lege ti kundu ti anyama ti lo wani so ague ti gi mbeni oko so agirisa. Jésus atene so na ngoi so zo ni so awara ngasangbaga so agirisa, “tere ti lo ayeke nzere mingi ndali ti oko so lo wara lo, ahon atanga ni bale-gumbaya na gumbaya so agirisa pëpe.” Nda ti tapande so ayeke so wa? Jésus afa ni lo tene “legeoko nga, a yeke nzoni pëpe na lê ti Babâ ti mbi so ayeke na yayu tongana mbeni oko ti akete zo so agirisa.” (Mat. 18:11-14). Nyen la mo lingbi ti manda na ndo ti Jéhovah na lege ti tapande so? Même tongana na ambeni ngoi mo bâ so mo kpa oko pëpe nga so a girisa na ndo ti mo awe, Babâ ti mo ti yayu ayeke bi bê ti lo na ndo ti mo nga lo yeke bâ lege ti mo. Na lê ti lo, mo yeke mbeni oko ti “akete zo so.”
10. Tongana nyen la Jésus afa Babâ ti lo na lege ti sarango ye ti tere ti lo wani?
10 Use lege so Jésus afa Babâ ti lo na adisciple ti lo ayeke na lege ti sarango ye ti tere ti lo. Tongana bazengele Philippe ahunda Jésus atene: “Fa na e Babâ ni,” Jésus atene na lo atene: “Zo so abâ mbi abâ nga Babâ awe.” (Jean 14:8, 9). Zia e bâ ambeni tapande ti lege so Jésus afa na gigi asarango ye ti tere ti Babâ ti lo. Na ngoi so mbeni zo ti buruma avoro yanga na Jésus ti kaï kobela ti lo, Jésus andu koli so “buruma amû tere ti lo kue” so na lo tene na lo: “Mbi ye. Zia tere ti mo aga nzoni.” Na pekoni so zo ti buruma so awara sava, lo hinga so Jéhovah la amû ngangu na Jésus si lo kaï na kobela ti lo (Luc 5:12, 13). Nga, na ngoi ti kuâ ti Lazare, adisciple abâ so Jéhovah ayeke bâ mawa ti zo na ngoi so Jésus ‘adema na yâ ti bê ti lo na vundu asara lo nga lo toto na ngu ti lê.’ Atâa so Jésus ahinga so lo yeke gue ti zingo Lazare, lo hinga songo ti vundu so afami nga na akamarade ti Lazare ayeke lani na ni (Jean 11:32-35, 40-43). Peut-être ambeni mbaï ti Bible na ndo ti Jésus ayeke dä so mo ye ni mingi so amû lege na mo ti bâ nzoni bê so Babâ ni afa ni.
11. (a) Na ngoi so Jésus azi aye ti sioni na yâ ti temple, lo fa nyen na ndo ti Babâ ti lo? (b) Ngbanga ti nyen ye so adë bê ti e?
11 Tongana mo diko mbaï so afa tongana nyen Jésus azi aye ti sioni na yâ ti temple, mo manda nyen dä? Tara ti bâ aye ni na li ti mo: Jésus amû akamba lo sara na zaza, lo tomba azo so ayeke kä abagara na angasangbaga na yâ ti temple. Lo tuku alê ti nginza ti azo ti changengo nginza nga lo kinda atable ti ala (Jean 2:13-17). Kpengba ye so lo sara so asara si adisciple ti lo adabe ti ala na atënë ti prophétie ti Gbia David so atene: “Nzara ti da ti Mo ate mbi awe.” (Ps. 69:10). Ye so Jésus asara so, a fa so lo yeke na kota nzara ti mû mbage ti tâ vorongo. Mo bâ sarango ye ti tere ti Jéhovah na yâ ti mbaï so? A dabe ti e so Nzapa ayeke gi pëpe na kota ngangu ti zi aye ti sioni na ndo ti sese me nga lo yeke na kota nzara ti sara ni. Sarango ye ti Jésus na gbele ye ti sioni so afa ye so ayeke na bê ti Babâ ni tongana lo bâ aye ti sioni so amû ndo na sese laso. Ye so adë bê ti e na ngoi so e yeke bâ pasi na yâ ti aye so ayeke na lege ni pëpe!
12, 13. Lege so Jésus asara ye na adisciple ti lo afa nyen na mo na ndo ti Jéhovah?
12 Zia e bâ mbeni tapande ni nde: lege so Jésus asara ye na adisciple ti lo. Ala ngbâ lani ti papa ti hinga zo wa la ayeke kota ahon atanga ni (Marc 9:33-35; 10:43; Luc 9:46). Teti so Jésus aninga mingi na tere ti Babâ ti lo, lo hinga bibe ti Jéhovah na ndo ti sarango ye na baba (2 Sam. 22:28; Ps. 138:6). Jésus abâ nga lani mara ti sioni bibe so na mbage ti Satan Zabolo. Zo ti kion so aye lani mingi ti wara gi kota ndo. Biani, Jésus ayeke lani na vundu ti bâ so bibe ti warango kota ndo angbâ na popo ti adisciple ti lo so lo fa ye na ala. A yeke même na popo ti ala so lo soro ala tongana abazengele ti lo! Ala ngbâ ti duti na bibe ti warango kota ndo so juska na ndangba lango ti fini ti Jésus na ndo ti sese (Luc 22:24-27). Me, na nzoni bê Jésus angbâ ti kiri na ala na nzoni lege. Lo yeke lakue na beku so mbeni lâ ala yeke manda ti sara tere ti ala kete tongana ti lo.—aPhil. 2:5-8.
13 Mo lingbi ti bâ sarango ye ti tere ti Jéhovah na yâ ti lege so Jésus amû tapande ti Babâ ti lo na lo kanga bê lo leke bango ndo ti adisciple ti lo so ayeke na lege ni pëpe. Mo bâ so aye so Jésus asara nga na atënë ti lo afa ti Babâ ni so agirisa azo ti lo pëpe atâa so ala yeke girisa lege fani mingi? Tongana e hinga asarango ye ti tere ti Nzapa so, a yeke pusu e ti changé bê ti e na ngoi so e sara afaute nga ti sambela lo ti tene lo pardone e.
MOLENGE NI AYE MINGI TI FA BABÂ TI LO NA AZO
14. Tongana nyen la Jésus afa so lo ye mingi ti fa Babâ ti lo na azo?
14 Mingi ti azo so akomande na ngangu ayeke gi ti sara si azo ti gbe ti ala ahinga ye pëpe tongaso si ala komande na ndo ti ala nzoni. Me Jésus ayeke ti lo nde, lo ye lani mingi ti fa ye na azo na ndo ti Babâ ni, ti fa na ala aye kue so a lingbi ala hinga na ndo ti lo. (Diko Matthieu 11:27.) Jésus amû nga na adisciple ti lo “hingango ndo si [ala] lingbi ti hinga tâ Nzapa”, Jéhovah (1 Jean 5:20). Ye so aye ti tene nyen? Jésus amû maboko na adisciple ti lo ti gbu nda ti aye so lo fa na ndo ti Babâ ni. Lo honde pëpe Babâ ni na yâ ti mbeni fango ye so zo alingbi ti gbu ndani pëpe, na tapande tënë ti Nzapa Babâ, Nzapa Molenge, na Nzapa Yingo vulu.
15. Ngbanga ti nyen Jésus ake ti fa ambeni ye na ndo ti Babâ ti lo?
15 Jésus afa aye kue so lo hinga na ndo ti Babâ ti lo? Ên-ën, na ndara lo ke ti fa gbâ ti aye so lo hinga. (Diko Jean 16:12.) Ngbanga ti nyen? Ngbanga ti so na ngoi ni so, adisciple ti lo ‘alingbi pëpe ti gbu nda’ ti aye so lo hinga so. Me, tongana ti so Jésus atene, aye mingi ayeke dä so ala yeke hinga ni na ngoi so “wamungo maboko ni” aga. Wamungo maboko ni ayeke yingo vulu so ayeke fa lege na ala “na yâ ti tâ tënë kue”. (Jean 16:7, 13). Legeoko tongana ti so ababâ na amama so asara ye na ndara ayeke fa pëpe na amolenge ti ala ambeni ye juska ala kono awe si ala fa ni na ala, Jésus aku juska adisciple ti lo aga biazo nga ala lingbi ti gbu nda ti ambeni ye na ndo ti Babâ ni. Jésus asara ye na nzoni bê nga lo hinga so adisciple ti lo ayeke na akatikati ti ala.
MÛ TAPANDE TI JÉSUS TI MÛ MABOKO NA AZO TI HINGA JÉHOVAH
16, 17. Ngbanga ti nyen mo lingbi biani ti fa Babâ ni na azo?
16 Tongana mo hinga mbeni zo nzoni nga asarango ye ti tere ti lo anzere na mo, bê ti mo ayeke pusu mo ti sara tënë ti lo na azo ape? Na ngoi so Jésus ayeke lani na ndo ti sese, lo sara tënë ti Babâ ti lo na azo (Jean 17:25, 26). Lege ayeke dä ti tene e mû tapande ti lo ti fa Jéhovah na azo?
17 Tongana ti so e londo ti bâ, Jésus la ahinga ye mingi na ndo ti Babâ ti lo ahon tanga ti azo kue. Ye oko, lo yeke lani nduru ti fa ambeni ye so lo hinga, lo mû même hingango ndo na adisciple ti lo ti tene ala gbu nda ti asarango ye ti tere ti Nzapa so ndani alï ngangu. Grâce na mungo maboko ti Jésus, e hinga Babâ ti e na mbeni lege so mingi ti azo laso ahinga na lo pëpe. E kiri singila mingi so na lege ti afango ye ti Jésus nga na sarango ye ti lo, lo fa so lo ye mingi ti fa Babâ ti lo na e. Tâ tënë, e lingbi biani ti pika kate ti e so e hinga Babâ ni (Jér. 9:24; 1 aCor. 1:31). Tongana e sara ngangu ti ga nduru na Jéhovah, lo yeke ga nduru na e (Jacq. 4:8). Tongaso, e lingbi fadeso ti fa na azo ye so e hinga na ndo ti Jéhovah. E yeke sara ni tongana nyen?
18, 19. Mo lingbi ti fa Babâ ni na azo na alege wa? Mo yeke sara ni tongana nyen?
18 A lingbi e mû tapande ti Jésus ti fa Babâ ni na azo na lege ti atënë ti e nga na asarango ye ti e. Dabe ti mo so gbâ ti azo so e tingbi na ala na fango tënë ahinga pëpe wala Nzapa ayeke zo wa. Peut-être afango ye ti wataka la asara si ala hinga Nzapa nzoni ape. E lingbi ti fa na ala na yâ ti Bible iri ti Nzapa, ye so lo leke ti sara ndali ti sese nga na asarango ye ti tere ti lo. E lingbi nga ti sara lisoro na amba ti e aChrétien na ndo ti ambeni mbaï ti Bible so afa asarango ye ti tere ti Jéhovah na mbeni lege so ade e hinga ni kozo ape. Na sarango tongaso, ala nga kue alingbi ti bâ nzoni dä.
19 Tongana nyen la mo lingbi ti fa Babâ ni na lege ti sarango ye ti mo na ngoi so mo yeke sara ngangu ti mû tapande ti Jésus? Tongana azo abâ ndoye ti Christ na yâ ti sarango ye ti e, ala yeke ga nduru na Babâ ni nga na Jésus (aÉph. 5:1, 2). Bazengele Paul awa e ti ‘ga azo so asara ye tongana lo, tongana ti so lo nga lo yeke lani zo so asara ye tongana Christ.’ (1 aCor. 11:1). So pendere pasa si e yeke na ni ti mû maboko na azo ti bâ Jéhovah na lege ti sarango ye ti e! Zia e kue e ngbâ ti mû tapande ti Jésus ti fa Babâ ni na azo.