Kiri singila na Jéhovah na Jésus ndali ti ye so ala sara ndali ti mo

Tongana mbeni kamarade ti mo amû na mo mbeni pendere cadeau, a yeke sara mo tongana nyen? Peut-être terê ti mo ayeke nzere mingi, na mo yeke fa na kamarade ti mo ni so mo bâ cadeau ni na nene ni mingi. Jéhovah na Jésus amû na e cadeau so ayeke kota mingi. A yeke nyen? Tongana nyen la e peut ti kiri singila ndali ni?

1. Mbeni lege ti kiri singila ndali ti ye so Nzapa na Christ asara ndali ti e ayeke so wa?

Bible atene so “zo kue so amä na bê na [Jésus]” apeut ti ngbâ na fini lakue lakue (Jean 3:16). E yeke sara tongana nyen ti fa so e mä na bê? E yeke fa so e mä na bê na lege ti adesizion so e mû nga na aye so e sara (Jacques 2:17). Tongana aye so e sara nga na atënë so e tene afa so e mä na bê, e yeke duti na kpengba songo ti kamarade na Jésus nga na Babâ ti lo, Jéhovah.—Diko Jean 14:21.

2. Kpengba ye wa la na ngoi ni e yeke kiri singila ndali ti ye so Jéhovah na Jésus asara?

Na lakui so na ndade ni Jésus akui, lo fa na adisciple ti lo mbeni lege ti kiri singila ndali ti sandaga ti lo. Lo tene lani na ala ti bungbi legeoko na lo ti sara mbeni kpengba ye so Bible airi ni “Kobe ti Seigneur”, wala Dango bê na kuâ ti Christ (1 aCorinthien 11:20). Jésus aye lani ti tene abazengele ti lo, nga na atâ Chrétien kue so aga na peko ti ala, adabe ti ala so lo mû lani fini ti lo ndali ti ala. Tongaso lo mû yanga, lo tene: “Ala ngbâ ti sara ye so ti dabe ti ala na mbi.” (Luc 22:19). Tongana mo gue na Mémorial, mo yeke fa so mo kiri singila ndali ti kota ndoye so Jéhovah na Jésus afa na mbage ti e.

GI TI HINGA AYE MINGI

3. Nyen la e peut ti sara ti fa so e kiri singila?

Imaginé so mbeni zo asö fini ti mo. Eskê mo yeke girisa hio ye so zo so asara na mo so? Wala mo yeke gï alege ti kiri singila na lo ndali ti ye so lo sara na mo?

E yeke na fini grâce na Jéhovah. Diko 1 Jean 4:8-10, na pekoni kiri tënë na ahunda so:

• Ngbanga ti nyen la sandaga ti Jésus ayeke mbeni cadeau so ayeke nde?

• Ye so Jéhovah na Jésus asara ndali ti mo asara mo tongana nyen?

Tongana nyen la e peut ti kiri singila na Jéhovah na Jésus ndali ti ye so ala sara ndali ti e? Diko 2 aCorinthien 5:15 nga na 1 Jean 4:11; 5:3. Na peko ti dikongo versê oko oko, kiri tënë na hunda so:

• Ti gue oko na versê so, nyen la e peut ti sara ti fa so e kiri singila?

4. Sara ye tongana Jésus

Ti sara ye tongana Jésus ayeke mbeni lege ti fa so e kiri singila. Diko 1 Pierre 2:21, na pekoni kiri tënë na hunda so:

• Na alege wa la mo peut ti mû peko ti gere ti Jésus mbilimbili?

5. Gue na bungbi ti Dango bê na kuâ ti Christ

Ti hinga ye so apassé lani na ngoi ti kozo Kobe ti Seigneur, diko Luc 22:14, 19, 20. Na pekoni kiri tënë na ahunda so:

• Nyen la apassé lani na ngoi ti Kobe ti Seigneur?

• Mapa na vin ni ayeke tapande ti nyen?—Bâ versê 19 na 20.

Jésus aye lani ti tene adisciple ti lo adabe ti ala na kuâ ti lo na lango so lo kui na ni fani oko ngu oko oko. Ni la ngu oko oko, aTémoin ti Jéhovah ayeke bungbi ti dabe na kuâ ti Christ tongana ti so lo fa. Ti hinga ye na ndö ti kpengba bungbi so, zia VIDÉO ni. Na pekoni kiri tënë na hunda so:

VIDÉO: Dabe ti mo na kuâ ti Jésus (1:41)

• Nyen la ayeke passé na ngoi ti Mémorial?

Mapa ni na vin ni ayeke tapande ti aye. Mapa ni ayeke tapande ti terê ti Jésus so ayeke mbilimbili-kue so lo mû na sandaga ndali ti e. Vin ni ayeke tapande ti mênë ti lo

NA NDURU TËNË

E yeke fa so e kiri singila ndali ti aye so Jésus asara ndali ti e tongana e mä na bê na lo nga e gue na Dango bê na kuâ ti lo.

Dango bê

• Ti mä na bê na Jésus aye ti tene nyen?

• Nyen la mo ye ti sara ti kiri singila na Jéhovah na Jésus ndali ti ye so ala sara ndali ti mo?

• Ngbanga ti nyen la a yeke kota ye ti gue na bungbi ti Dango bê na kuâ ti Christ?
  Lango so ye ti manda so ahunzi na ni:

GI NDA TI YE

Nyen la kuâ ti Christ apusu e ti sara?

Lo mû terê ti lo ti mû gloire na Jéhovah (9:28)

Gi ti hinga ye mingi na ndö ti mabe nga gi ti hinga tongana nyen la mo peut ti fa so mo yeke na mabe.

“Fa so mo mä na bê na azendo ti Jéhovah” (Tour ti Ba Ndo ti octobre 2016)

Na yâ ti article “Mbi bâ so mbi yeke sioni encore ape nga gigi anzere na mbi,” bâ tongana nyen la gigi ti mbeni wali achangé ndali ti so lo comprendre ye so sandaga ti Christ apeut ti sara ndali ti lo.

“Bible achangé fini ti azo” (Tour ti Ba Ndo ti lango 1 ti août 2011)

Bâ ndani so gï kete wungo ti azo la ayeke te mapa nga ayeke nyon vin na ngoi ti Mémorial.

“Ngbanga ti nyen la aTémoin ti Jéhovah ayeke sara ti ala bungbi ti Kobe ti Seigneur nde mingi na tanga ti abungbi ti vorongo nzapa?” (Article na ndö ti site)