YE TI MANDA 46
Ngbanga ti nyen la a yeke nzoni mo mû terê ti mo na Nzapa nga mo wara batême?
Mo yeke mû terê ti mo na Jéhovah na lege so mo mû zendo na lo na yâ ti sambela so mo yeke voro gï lo oko nga so mo yeke zia ye so bê ti lo aye kozo na yâ ti fini ti mo (Psaume 40:8). Na pekoni, mo yeke wara batême. Tongana mo sara tongaso, mo fa na azo so mo mû terê ti mo na Nzapa awe. Desizion so e mû ti mû terê ti e na Jéhovah ayeke kota mingi ahon tanga ti adesizion kue. Nyen la apeut ti pusu mo ti mû mara ti kota desizion tongaso, so ayeke changé fini ti mo?
1. Nyen la ayeke pusu mbeni zo ti mû terê ti lo na Nzapa?
Ndoye la apusu e ti mû terê ti e na Jéhovah (1 Jean 4:10, 19). Bible awa e, atene: “Ndoye Jéhovah Nzapa ti mo na bê ti mo kue, na âme ti mo kue, na bibe ti mo kue nga na ngangu ti mo kue.” (Marc 12:30). E yeke fa so e ndoye Nzapa na lege ti atënë so e tene nga na aye so e sara. Legeoko tongana ti so ndoye ayeke pusu mbeni koli na wali ti sara mariage, ndoye ti e na mbage ti Jéhovah ayeke pusu e ti mû terê ti e na lo nga ti wara batême.
2. Aye ti nzoni wa la Jéhovah ayeke mû na aTémoin ti lo so awara batême?
Tongana mo wara batême, mo yeke ga membre ti sewa ti Jéhovah so ayeke na ngia. Na pekoni, mo yeke bâ so lo ye mo na alege mingi nga mo yeke ga même nduru mingi na lo ahon ti laso. (Diko Malachie 3:16-18.) Na ndö ti so Jéhovah ayeke ga Babâ ti mo, mo yeke nga na mbeni sewa ti aita na yâ ti dunia so aye lo nga so aye mo. (Diko Marc 10:29, 30.) Me, mo doit ti sara ambeni ye kozo si mo wara batême. Mo doit ti manda ye na ndö ti Jéhovah, ti ye lo nga ti mä na bê na Molenge ti lo. Na nda ni, mo doit ti mû fini ti mo na Jéhovah. Tongana mo sara aye so nga na pekoni mo wara batême, mo yeke komanse ti tambela na ndö ti lege so ague na fini ti lakue lakue. Bible atene: “Batême . . . ayeke sö ala fadeso nga.”—1 Pierre 3:21.
GI TI HINGA AYE MINGI
Gi ti hinga ndani so a yeke kota ye ti tene mo mû terê ti mo na Jéhovah nga mo wara batême.
3. E kue e doit ti soro Nzapa so e yeke sara na lo
Na Israël ti ândö, ambeni zo apensé so ala peut ti voro Jéhovah nga na Baal, nzapa ti wataka. Me Jéhovah atokua prophète ti lo Élie ti leke bango ndo ti ala so ayeke na lege ni ape. Diko 1 aGbia 18:21, na pekoni kiri tënë na hunda so:
Nyen la azo ti Israël adoit lani ti soro?
Legeoko tongana azo ti Israël, e nga kue e doit ti soro Nzapa so e yeke sara na lo. Diko Luc 16:13, na pekoni kiri tënë na ahunda so:
Ngbanga ti nyen la e lingbi pëpe ti voro Jéhovah nga na mbeni zo wala mbeni ye nde?
Tongana nyen la e yeke fa na Jéhovah so e soro ti voro lo?
4. Gbu li na ndö ti yengo so Jéhovah aye na mo
Jéhovah amû na e anzoni cadeau mingi. Nyen la e peut ti mû na lo? Zia VIDÉO ni.
Na ambeni lege wa la Jéhovah afa so lo ye mo? Diko Psaume 104:14, 15 nga na 1 Jean 4:9, 10, na pekoni kiri tënë na ahunda so:
Acadeau wa la Jéhovah amû na mo so mo ye mbilimbili ti kiri singila ndali ni?
Acadeau so asara si mo pensé nyen na ndö ti lo?
Tongana e wara mbeni cadeau so e ye ni mingi, e ye ti kiri singila na zo so amû ni na e. Diko Deutéronome 16:17, na pekoni kiri tënë na hunda so:
Tongana mo gbu li na ndö ti aye kue so Jéhovah asara ndali ti mo, a pusu mo ti mû na lo nyen?
5. Mungo terê na Nzapa aga na atufa mingi
Azo mingi apensé so yango-iri, mbeni nzoni kua wala nginza ayeke sara si ala duti na ngia. Eskê a yeke tâ tënë? Zia VIDÉO ni, na pekoni kiri tënë na ahunda so:
Atâa so koli ti yâ ti vidéo so aye lani ballon mingi, ngbanga ti nyen la lo zia ni?
Lo soro ti mû terê ti lo na Jéhovah, me na ballon ape. Mo pensé so nzoni desizion la lo mû so? Ngbanga ti nyen?
Kozo ti tene bazengele Paul aga Chrétien, lo yeke gi lani ti sara mbeni kota kua. Mbeni wafango ye so iri ti lo awu mingi ayeke fa lani na lo ndia ti aJuif. Me lo zia lani lege ni ti ga Chrétien. Eskê Paul aregretté lani? Diko aPhilippien 3:8, na pekoni kiri tënë na ahunda so:
Ngbanga ti nyen la Paul atene so aye so lo sara kozo ti ga Chrétien ayeke “gbâ ti azende”?
Nyen la lo wara na place ni?
Mo pensé nyen la ayeke sara si gigi ti mo aduti nzoni mingi: Sarango na Jéhovah wala mbeni ye nde?
Na ngoi so Paul aga Chrétien, lo wara ye mingi ahon ti so lo zia lani
AMBENI ZO ATENE: “A yeke na lege ni ape ti mû fini ti mo kue ti sara gï kua ti Nzapa.”
Ngbanga ti nyen la mo pensé so a yeke na lege ni ti mû terê ti mo na Jéhovah?
NA NDURU TËNË
Ndoye apusu e ti mû terê ti e na Jéhovah nga ti wara batême.
Dango bê
Ngbanga ti nyen la Jéhovah alingbi ti tene e ndoye lo nga e voro lo na bê ti e kue?
Jéhovah ayeke futa aTémoin ti lo so awara batême tongana nyen?
Eskê mo ye ti mû terê ti mo na Jéhovah?
GI NDA TI YE
Bâ ndani so mbeni zo ti hengo bia nga na mbeni wanguru asoro ti mû terê ti ala na Jéhovah.
Hunda ti Amaseka: Nyen la mbi yeke sara ande na gigi ti mbi?—Souvenir (6:54)
Bâ ambeni raison so ayeke pusu zo ti mû terê ti lo na Nzapa.
“Ngbanga ti nyen ti mû tere ti mo na Jéhovah?” (Tour ti Ba Ndo ti lango 1 ti janvier 2010)
Na yâ ti vidéo ti bia so, bâ ngia so azo so amû terê ti ala na Jéhovah ayeke na ni.
Na yâ ti article “Na yâ ti angu mingi, mbi hunda terê ti mbi: ‘E yeke na fini ngbanga ti nyen?’”, bâ ye so apusu mbeni wali ti bâ yâ ti aye so ayeke kota na lê ti lo.
“Bible achangé fini ti azo” (Tour ti Ba Ndo ti lango 1 ti novembre 2012)