Manda nzoni salango ye ti Chrétien na fa ni na ambeni zo

“Tongaso, mo so mo fa ye na mbeni zo, mo fa ye na mo mveni pëpe?”​—AROMAIN 2:21.

MO YEKE na anda ti tënë mingi ti manda Tënë ti Nzapa. Peut-être mo ye ti hinga tënë kete na ndo azo ni, aye so asi, ando, nga na ambeni ye nde so ayeke na yâ Tënë ti Nzapa. Wala, mo ye ti hinga ye na ndo tâ tënë so mo mä na bê dä, so ayeke nde mingi na afango ye ti wataka ti alege ti vorongo, na tapande afango ye na ndo Nzapa ti Li Ota wala enfer ti wâ (Jean 8:32). Peut-être mo ye nga ti hinga Jéhovah nzoni ahon, si mo sala ye tongana lo, nga mo tambela na gbele lo na mbeni lege so ayeke mbilimbili.​—1 aGbia 15:4, 5.

² Mbeni kpengba nda ti tënë nde so alingbi ti pusu mo ti manda Tënë ti Nzapa ayeke ti wara aye kue so alingbi, ti fa ye na ambeni zo: ala so mo ndoye ala, ala so mo hinga ala, nga même ala so mo de ti hinga ala pëpe. A tene pëpe so atâ Chrétien alingbi ti sala tongaso gi tongana ala ye, na tongana ala ye pëpe ala lingbi ti zia ni. Nde na so, Jésus atene: “Tongaso i gue, i fa tënë na amara kue si ala ga adisciple . . . ; i fa na ala ti bata ye kue so Mbi komande i.”​—Matthieu 28:19, 20.

³ Tongana mo manda Bible na nzara ti fa ye na ambeni zo, a yeke duti mbeni ye so ayekia zo, na a lingbi ti ga na zo ngia so aninga. Teti angu mingi awe, a bâ kusala ti fango mbeti tongana mbeni kusala so alingbi ti yekia ni. Mbeni kota bakari (Encarta Encyclopedia) atene: “Na popo ti aJuif, akangba mingi abâ awafango mbeti tongana azo ti fango lege ti salut, na ala wa amolenge ti yekia awafango mbeti ti ala, même ahon ababâ na mama ti ala.” A yeke duti ye ti yekiango zo mingi teti aChrétien ti fa ye na ala mveni, mbilimbili na mandango Bible nga na pekoni ti fa ye na ambeni zo.

⁴ Mbeni kota bakari (The World Book Encyclopedia) atene: “Mingi ti azo abi tele ti ala na yâ kusala ti fango mbeti ahon tanga ti akusala kue. Na ndo sese kue, a yeke wungo ti akoli na ti awali ndulu na kutu bale-osio na miombe si ayeke sala kusala ti wafango mbeti.” Na yâ da-mbeti, wafango mbeti ayeke na kungba ti fa ye na apendere, na lo lingbi ti sala ngangu na ndo ala angu mingi na pekoni. Tongana mo bata komandema ti Jésus ti fa ye na ambeni zo, ye ti pekoni ayeke même kota mingi ahon; fango ye ti mo alingbi ti sala ngangu teti lakue lakue na ndo fini ti ala ti kekereke. Bazengele Paul agboto lê mingi na ndo ye so tongana lo wa Timothée tongaso: “Mo bata lege ti mo, na mo bata tënë so mo yeke fa. Mo sala ye so lakue; teti na yâ kusala so, fade mo sö mo mveni na ala so amä mo.” (1 Timothée 4:16). Biani, fango ye ti mo ague oko na warango salut.

⁵ Zo so amû yanga na ayeke fa lege na kusala ti mo ti fa ye na mo mveni nga na pekoni na ambeni zo ayeke Ngangu ti komande ti kota ahon kue, Kota Gbia ti ndagigi kue. Tongana a bâ gi nda ti tënë so oko, a lingbi awe ti fa so kusala ti fango ye so ahon mingi tanga ti akusala kue ti fango ye ti sese, atâa a yeke fango ye na ndo lege ti sû na ti diko mbeti, kode ti salango mbeni kua, wala même ti kaïngo kobela. Fango ye so Chrétien ayeke sala ahunda ti tene wamandango ye ni amanda lo mveni ti mû tapande ti Molenge ti Nzapa, Jésus Christ, na ti fa na ambeni zo ti sala legeoko tongaso nga.​—Jean 15:10.

Ngbanga ti nyen ti fa ye na mo mveni?

⁶ Ngbanga ti nyen a hunda ti tene e fa ye kozoni kue na e mveni? Ti tâ tënë ni, e lingbi pëpe ti fa ye nzoni na ambeni zo tongana e fa ye na tele ti e mveni kozoni kue pëpe. A yeke ye so Paul agboto lê dä, na lege ti mbeni kpengba tënë ti gbungo li so lo mû lani. Tënë ti lo so ayeke lani kota ye mingi teti aJuif ti giriri, me tënë ni ayeke nga kpengba tokua teti aChrétien ti laso. Paul ahunda: “Tongaso, mo so mo fa ye na mbeni zo, mo fa ye na mo mveni pëpe? Mo so mo fa tënë, mo tene, A lingbi zo asala nzi pëpe, mo sala nzi? Mo so mo tene, A lingbi zo asala lango-sioni pëpe, mo sala lango-sioni? Mo so mo ke ayanda, mo nzi ye ti temple ti ala? Mo so mo yä iri ti mo na yâ Ndia, mo sala si iri ti Nzapa awara kamene na lege ti kengo-ndia ti mo?”​—aRomain 2:21-23.

⁷ Na hundango molongo ti atënë so, Paul afa na gigi aye ti sioni use so aKomandema Bale-oko ake ni polele: nzi, na lango sioni (Exode 20:14, 15). Ambeni Juif ti ngoi ti Paul ayeke pika kate ti ala so ala yeke na Ndia ti Moïse. A fa na ala ‘tënë ti Ndia, na ala tene na bê ti ala, ala yeke azo ti fa lege na awaziba na lumière ti ala so ayeke na yâ bingo, azo so afa ye na akete molenge’. (aRomain 2:17-20) Ye oko, ambeni ayeke sala ye na ndendia ngbanga ti so na gbe-mingo ala yeke nzi, na ala yeke sala lango sioni. Na salango tongaso, ala yeke bi zonga na ndo Ndia nga na ndo Lo so, na yayu, ayeke na lingu ni. Atënë ti Paul afa so ambeni Juif ti ngoi ti lo ayeke na tënë na li ti ala teti bingo zonga na ndo Ndia nga na ndo Jéhovah Nzapa. Mo lingbi ti bâ so ala de ti lingbi kue pëpe ti fa ye na ambeni zo; na biani, ala yeke fa ye même pëpe na ala mveni.

⁸ Paul asala tënë ti nzingo aye ti temple. Ambeni Juif ayeke sala tâ ye ti nzi tongaso lani? Paul aye lani ti tene nyen biani? Ti tâ tënë ni, teti versê so afa na e ye mingi pëpe na ndo ye so Paul aye fade ti tene, e lingbi pëpe ti fa biani tongana nyen ambeni Juif ayeke ‘nzi ye ti atemple’ lani. Ngoi kete kozoni na tënë ti Paul so, secrétaire ti gbata ti Éphèse atene so afon Paul ayeke “awanzi ti temple” pëpe; tënë so aye ti fa so kamême ambeni zo ayeke pensé lani so aJuif ayeke sala tongaso (Kusala 19:29-37). Lani, ambeni turugu so ahon na ngangu awato ti ala, wala ambeni zo so amû tele ti ala ahon ndo ni na vorongo ti ala ayeke nzi aye ti ngele ngangu na yâ atemple ti apaïen, me aJuif ayeke sala lani kusala na aye ti ngele ngangu so? Wala ala yeke de buze na ni? Ndia ti Nzapa ahunda lani ti tene a futi lor na argent ti ayanda, na ti mû ni ti sala na kusala teti ala mveni pëpe (Deutéronome 7:25)a. Tongaso, peut-être Paul ayeke sala tënë ti aJuif so ayeke bi bê oko pëpe na komandema ti Nzapa so, na so ayeke sala kusala wala ayeke wara faïda na lege ti akungba so alondo na yâ atemple ti apaïen.

⁹ Na mbeni mbage nde, Josèphe afa peko ti mbeni kota ye ti kamene so ambeni Juif osio asala na Rome, na lo so amû li ni lani ayeke mbeni wafango tënë ti Ndia. A-Juif osio so apusu mbeni wali ti Rome, mbeni Gentil so ayeda na vorongo ti aJuif, ti mû na ala lor nga na ambeni ye nde ti ngele ngangu si ala mû ni na matabisi teti temple ti Jérusalem. Tongana wali ni amû aye so na ala awe, ala bata amosoro ni teti ala mveni; a yeke mbeni lege ti nzingo ye ti temple.b Ambeni zo ni ayeke nzi ye na yâ ti temple na mbeni lege nde: ala yeke mû na Nzapa asandaga so abuba, na ala yeke sala kusala ti dengo buze na yâ ni na sioni bibe ti warango ye ahon ndo ni; na lege so, ala sala si temple ni aga “gamba ti awanzi.”​—Matthieu 21:12, 13; Malachie 1:12-14; 3:8, 9.

Fa na ambeni zo nzoni salango ye ti Chrétien

¹⁰ Atâa salango ye ti azo ti kozo siècle ayeke tongana nyen na mbage ti nzi, lango sioni, na nzingo ye ti atemple tongana ti so Paul afa, zia e girisa pëpe kpengba tënë so lo ye ti gboto lê dä. Lo hunda: “Mo so mo fa ye na mbeni zo, mo fa ye na mo mveni pëpe?” Zia e bâ mbilimbili so ahundango tënë ti Paul andu salango ye ti zo. Na ndo so, bazengele ni agboto lê mingi pëpe na ndo atënë ti mabe wala ti mbaï so ayeke na yâ ti Bible. Tënë ti Paul na ndo lege ti fa ye na mo mveni nga na ambeni zo andu mingi nzoni salango ye ti Chrétien.

¹¹ Tongana e ye ti bata tënë so a wara na aRomain 2:21-23, a lingbi e manda akpengba-ndia ti Tënë ti Nzapa na ndo nzoni salango ye ti Chrétien, e sala ye alingbi na ye so e manda, nga na pekoni e fa na ambeni zo ti sala legeoko tongaso nga. Ni la, na ngoi so mo yeke manda Bible, gi ti bâ akpengba-ndia ti Jéhovah so nzoni salango ye ti Chrétien aluti na ndo ni. Gbu li na ndo awango na aye ti manda so mo wara na yâ Bible. Na pekoni, gi na mbito pëpe ti sala ye alingbi na aye so mo manda. Salango tongaso ahunda ti duti na bê so akpengba nga ti leke na bê ti ngbâ ti sala tongaso. Teti so ala yeke mbilimbili-kue pëpe, azo ayeke ndulu ti gi a-raison teti aye so ala yeke sala, nga ti fa ngbanga ti nyen mbeni ye tongaso amû lege na ala, wala asala si ala gue nde na mbeni kpengba-ndia ti Nzapa na yâ mbeni ye so asi. Peut-être aJuif so Paul asala tënë ti ala ayeke lakue ndulu ti sala ye na mayele tongaso ti fa ngbanga ti nyen salango ye ti ala ayeke na lege ni, wala ti handa ambeni zo. Ye oko, atënë ti Paul afa so a lingbi a bâ tongana senge ye pëpe akpengba-ndia ti Nzapa, wala a lingbi zo adoro ni pëpe tongana ti so bê ti lo aye.

¹² Bazengele ni agboto lê mingi na ndo kozo nda ti tënë ti manda nga ti bata nzoni lege ti salango ye so mo yeke wara na yâ Bible. Sioni salango ye ti aJuif aga lani na zonga na ndo iri ti Jéhovah: “Mo so mo yä iri ti mo na yâ Ndia, mo sala si iri ti Nzapa awara kamene na lege ti kengo-ndia ti mo? Legeoko tongana Mbeti ti Nzapa atene, Ala zonga iri ti Nzapa na popo ti aGentil ngbanga ti i.” (aRomain 2:23, 24). Ye so ayeke nga tâ tënë laso: Tongana e bata pëpe nzoni salango ye ti Chrétien, e yeke bi zonga na ndo Lo so ayeke na lingu ni. Na mbeni mbage nga, tongana e bata ngangu akpengba-ndia ti Nzapa, a yeke sala nzoni na iri ti lo, na a yeke mû gonda na lo (Esaïe 52:5; Ezéchiel 36:20). Tongana mo hinga ye so nzoni, a lingbi ti kpengba mo ti luti ngangu tongana mo tingbi na atara wala na aye ti ngangu so, tongana a si, mbeni zo alingbi ti pensé so ti sigigi na yâ ni hio, a lingbi lo doro kpengba-ndia ti Nzapa. Na ndo ni, atënë ti Paul afa na e mbeni ye nde ti manda. Tongana mo hinga awe so salango ye ti mo mveni alingbi ti sala nzoni wala sioni na ndo iri ti Nzapa, na ngoi so mo yeke fa ye na ambeni zo, mû maboko na ala ti bâ so lege so ala yeke bata na akpengba-ndia ti tambela ayeke sala nzoni wala sioni na ndo iri ti Jéhovah. A ye gi pëpe ti tene so nzoni salango ye ti Chrétien ayeke maï ngia na ayeke bata seni ti zo. A yeke gboto nga lê na ndo Lo so azia na sese na amaï nzoni salango ye so.​—Psaume 74:10; Jacques 3:17.

¹³ Salango ye ti zo ayeke sala ngangu nga na ndo ambeni zo nde. Mo lingbi ti bâ ni na yâ atapande ti Mbeti ti Nzapa so afa nene ti batango akpengba-ndia ti Nzapa, nga akpale so aga na peko ti kengo andia so (Genèse 39:1-9, 21; Josué 7:1-25). Mo lingbi nga ti wara ambeni kpengba wango na ndo salango ye ti zo, tongana ti so: “Teti so ayeke ye so Nzapa aye, ti bata i nde teti Lo mveni, si i ke ye ti pitan; si azo oko oko kue na popo ti i ahinga lege ti hon nzara ti tele ti lo mveni, na lege ti bata ta ti lo nde teti Nzapa tongana ye ti voro, me na lege ti nzara ti sala sioni pëpe, tongana ye so aGentil so ahinga Nzapa pëpe ayeke sala, si zo oko ake ndia pëpe [wala “zo oko asala ye ti songo bê . . . pëpe”, Fini Mbuki] ti sala nzi na ita ti lo [“ye ti kirikiri na ita ti lo pëpe”, Fini Mbuki; “ti doro adroit ti ita lo pëpe”, NW] na yâ ye so, . . . Teti Nzapa ahiri e teti sioye pëpe, me ti bata tele ti e nde teti Lo mveni.”​—1 aThessalonicien 4:3-7.

¹⁴ Ndulu na azo kue alingbi ti bâ na lege ti aversê so, so salango pitan ayeke doro ndia ti nzoni salango ye ti zo tongana Chrétien. Me mo lingbi ti gbu nda ti versê so mingi ahon. Ambeni versê ni amû lege na zo ti manda ye na ti gbu li mingi ahon, na lo lingbi ti wara tâ hingango ye mingi na ndo aversê so. Na tapande, mo lingbi ti hunda tele ti mo: ‘Tongana Paul atene so salango pitan alingbi ti gue na zo ‘ti sala mbeni ye ti songo bê’ na “ti doro adroit ti ita ti lo”, lo ye ti tene nyen biani?’ Adroit ti lo andu aye wa? Nga, tongana nyen si gbungo nda ti ye so nzoni alingbi ti mû ngangu na mo mingi ahon ti kozo, ti bata nzoni salango ye ti Chrétien? Tongana nyen alengo ti peko ti gingo nda ti ye so alingbi ti mû na mo aye kue so alingbi ti fa ye na ambeni zo na ti mû maboko na ala ti yekia Nzapa?

Manda ye teti fango ye

¹⁵ A-Témoin ti Jéhovah ayeke na agbakuru so ala yeke sala na kusala ti gi nda ti ahundango tënë wala akpengba tënë so ayeke bâ gigi tongana ala manda ye ti fa ye na ala mveni nga na ambeni zo nde. Mbeni oko gbakuru ni so a lingbi ti wara ni na ayanga ti kodoro mingi ayeke Index des publications de la Société Watch Tower. Tongana mo yeke na gbakuru so, mo lingbi ti sala kusala na ni ti gi atënë na yâ ti ambeti so aTémoin ti Jéhovah asigigi na ni na ndo Bible. Mo lingbi ti gi ni na bango ali ti tënë oko oko, wala na bango molongo ti aversê ti Bible. Mbeni gbakuru so aTémoin ti Jéhovah ayeke sala kusala na ni na ayanga ti kodoro mingi ayeke Watchtower Library. A lingbi ti sala kusala na gbakuru so gi na lege ti ordinateur; na yâ ni, a bungbi gbâ ti atënë so a lingbi ti wara na yâ abuku na ambeti mingi. A leke ni na mbeni lege so zo alingbi ti gi na yâ ni aye so andu ambeni tënë nga alisoro so andu aversê ti Bible. Tongana mo yeke na oko ti agbakuru so, wala mo yeke na ala use kue, sala kusala na ala lakue tongana mo yeke manda Tënë ti Nzapa ti wara lege ti fa ye na ambeni zo.

¹⁶ Fadeso, zia e kiri e bâ tapande so e mû fade kozoni, so e wara na 1 aThessalonicien 4:3-7. Tënë ni andu adroit. Adroit ti azo wa? Nga tongana nyen a lingbi ti doro adroit so? Na lege ti agbakuru ti mandango ye so a fa ni na yâ ti paragraphe so ahon, mo lingbi peut-être ti wara atënë mingi na ndo aversê so, nga même na ndo adroit so Paul aye ti sala tënë ni. Mo lingbi ti diko atënë so na yâ buku Étude perspicace des Écritures, mbage 1 ni, lembeti 921; La paix et la sécurité véritable: comment est-ce possible?, lembeti 145; La Tour de Garde ti lango 15 ti nze ti novembre 1989, lembeti 31.

¹⁷ Tongana mo yeke gue na li ni na yâ mandango ye ti mo, mo yeke bâ ande so ambeti so afa tongana nyen aye so Paul atene ayeke tâ tënë. Mbeni zo so asala pitan ayeke sala siokpari na mbage ti Nzapa, na lo yeke zia tele ti lo na gbele akobela (1 aCorinthien 6:18, 19; aHébreu 13:4). Mbeni koli so asala pitan ayeke doro adroit nde nde ti wali so lo sala siokpari na lo. Lo yeke buba nzoni duti ti wali ni na lege ti tambela, nga nzoni yingo-ti-hinga ti lo. Tongana wali ni ayeke kumbamba, koli so ayeke buba droit ti lo ti sala mariage tongana mbeni masia, na lo buba nga droit ti koli ti wali so ti sala mariage na mbeni wali so ade masia. Lo bi vundu na bê ti ababâ na mama ti wali ni, nga na mbage ti koli ti lo tongana wali ni asala mariage awe. Koli so asala pitan ayeke buba droit ti sewa ti lo mveni ti tene a bâ ala tongana azo so ayeke na nzoni tambela. Tongana lo yeke mbeni ita na yâ kongregation, lo ga na zonga na ndo kongregation ni.​—1 aCorinthien 5:1.

¹⁸ Biani, atënë so a fa na ndo tene ti adroit amû maboko na mo ti gbu nda ti versê so nzoni mingi ahon. A yeke tongaso pëpe? Mara ti mandango ye tongaso ayeke biani ye ti kota ngele mingi teti zo. Tongana mo ngbâ ti sala tongaso, mo yeke fa ye na mo mveni. Mo yeke gbu nda ti tâ tënë ti tokua ti Nzapa nzoni mingi, na tënë ni ayeke sala nga ngangu na ndo mo mingi ahon ti kozo. A yeke kpengba mo ti ngbâ lakue ti bata nzoni salango ye ti mo ti Chrétien atâa tara wa so alingbi ti si na mo. Nga, mo yeke bâ tongana nyen kode ti mo ti wafango ye ayeke ga na ye ti nzoni mingi ahon! Na tapande, tongana mo yeke fa tâ tënë ti Mbeti ti Nzapa na ambeni zo, mo lingbi ti mû lege na ala ti gbu nda ti 1 aThessalonicien 4:3-7 nzoni; na lege so, mo yeke kono gbungo nda ti ye ti ala nga yekiango ndo so ala yeke na ni teti nzoni salango ye ti Chrétien. Tongaso, mandango ye ti mo alingbi ti mû maboko na mo mveni nga na ambeni zo ti mû gonda na Nzapa. Me na ndo so e fa gi tapande oko so andu mbeti ti Paul na aThessalonicien. A lingbi ti wara ambeni ye mingi so andu nzoni salango ye ti Chrétien; legeoko nga, a lingbi ti wara atapande na awango ti Bible mingi so mo lingbi ti manda, ti bata, na ti fa na ambeni zo.

¹⁹ Kite ayeke dä oko pëpe so a yeke lege ti ndara ti sala tongaso. Jacques 3:17 atene so “ndara so alondo na nduzu”, na Jéhovah Nzapa lo mveni, “ayeke na sioni oko pëpe”. Ye so andu polele biani batango akpengba-ndia ti Nzapa na ndo tambela. Biani, Jéhovah ahunda ti tene ala so ayô iri ti lo na yâ kusala ti fango Bible na azo aduti ala mveni anzoni tapande na dutingo “na sioni oko pëpe.” (1 Timothée 4:12). Tapande so adisciple tongana Paul na Timothée azia na yâ fini ti ala afa polele na gigi so ala bata tele ti ala; ala ke ti sala pitan, na Paul atene même: “A lingbi i sala tënë ti ye ti pitan pëpe, wala tënë ti sioye, wala tënë ti bê, na i di iri ti ye so na popo ti i pëpe, teti ye so ayeke nzoni pëpe na popo ti azo ti be-vulu; na i sala sio tënë, wala tënë ti buba, wala tënë ti hengo zo nga pëpe”.​—aEphésien 5:3, 4.

²⁰ Akpengba-ndia so andu tambela, na so a fa ni na yâ Tënë ti Nzapa, ayeke polele na afa peko ti aye mbilimbili; ye oko, a yeke nengo kungba pëpe teti zo. Ye so ayeke lani polele mingi na lê ti Jean, bazengele so angbâ na fini aninga mingi ahon tanga ti abazengele kue. Na peko ti aye mingi so lo bâ na yâ fini ti lo so aninga angu mingi, lo hinga so ti sala ye nzoni tongana Chrétien ayeke sala sioni na zo pëpe. Nde na so, a yeke nzoni, a ga na nzoni ye, nga na deba nzoni. Jean agboto lê mingi na ndo ye so tongana lo sû na mbeti: “Teti so ayeke ndoye ti Nzapa: e bata komandema ti Lo. Na komandema ti Lo ayeke tongana nengo ye pëpe”.​—1 Jean 5:3.

²¹ Ye oko, bâ nzoni so Jean atene pëpe so ti mä yanga ti Nzapa na dutingo na nzoni salango ye ti Chrétien, ayeke tâ nzoni lege gi teti so a yeke bata zo yongoro na akpale, nga yongoro na aye ti sioni so aga na lege ti salango ye so ague nde. Lo fa nzoni bango ndo ni na lege so lo yeda kozoni kue so a yeke fä ti ndoye ti e teti Jéhovah Nzapa, mbeni pendere lege ti fa na gigi ndoye ti e teti lo. Biani, ti fa ye na e mveni nga na ambeni zo ti ndoye Nzapa, ahunda ti tene e yeda na e bata akpengba-ndia ti lo so ayeke nzoni kue. So a ye ti tene ti fa na e mveni nga na ambeni zo nzoni salango ye ti Chrétien.

[Akete Tene na gbe Ni]

Mo dabe mo na ni?

• Ngbanga ti nyen a lingbi e manda ti fa ye na e mveni kozoni si e fa ye na ambeni zo?

• Tongana nyen salango ye ti e alingbi ti sala nzoni wala sioni na ndo iri ti Jéhovah?

• Mbeni zo so asala pitan alingbi ti doro adroit ti azo wa?

• Ye nyen mo leke na bê ti mo ti sala ti bata nzoni salango ye ti mo ti Chrétien?

[Ahundango Tene ti Manda na Ye]

1, 2. Anda ti tënë wa mo yeke na ni ti manda Bible?

3, 4. Ngbanga ti nyen a yeke duti ye ti yekiango zo mingi tongana mo fa ye legeoko tongana ti so Jésus akomande?

5. Ngbanga ti nyen kusala ti fango ye so Chrétien ayeke sala ahon mingi tanga ti akusala kue ti fango ye?

6, 7. (a) Ngbanga ti nyen a hunda ti tene e fa ye kozoni kue na e mveni? (b) Na lege wa aJuif ti kozo siècle asala ye pëpe tongana awafango ye?

8. Tongana nyen ambeni Juif ti ngoi ti Paul ayeke nzi ye peut-être na yâ atemple?

9. Asioni ye wa so peut-être a sala na yâ temple ti Jérusalem akpa mingi nzingo ye?

10. Kpengba tënë wa ti Paul, so a wara ni na aRomain 2:21-23, a lingbi e girisa ni pëpe?

11. Tongana mo yeke manda Tënë ti Nzapa, ngbanga ti nyen a lingbi mo bi bê mingi na akpengba-ndia ti lo so andu nzoni salango ye ti Chrétien?

12. Nzoni wala sioni salango ye ayeke sala ngangu tongana nyen na ndo iri ti Jéhovah Nzapa? Ngbanga ti nyen a yeke kota ye mingi ti bata tënë so na li?

13. (a) Tongana nyen Bible amû maboko na e na ndo tënë ti nzoni salango ye? (b) Fa kpengba tënë ti wango so a wara na 1 aThessalonicien 4:3-7.

14. Na ndo wango so a wara na 1 aThessalonicien 4:3-7, ahundango tënë wa mo lingbi ti hunda na mo mveni?

15. Agbakuru wa mo lingbi ti sala na kusala ti fa ye na mo mveni tongana mo yeke manda ye?

16, 17. (a) Na ndo wa mo lingbi ti wara atënë so afa nda ti adroit so a sala tënë ni na 1 aThessalonicien 4:6? (b) Na yâ alege wa pitan alingbi ti doro adroit ti ambeni zo?

18. Tongana nyen mo lingbi ti wara ye ti nzoni na lege ti mandango ye so andu nzoni salango ye ti Chrétien?

19. Ngbanga ti nyen a yeke kota ye mingi ti tene mo bata nzoni salango ye ti mo ti Chrétien?

20, 21. Ngbanga ti nyen mo yeda na tënë so bazengele Jean asû na 1 Jean 5:3?

[Foto na lembeti 22]

“Komandema ti Lo ayeke tongana nengo ye pëpe”