Atënë so azo ahunda
Lawa la ngangu komandema ti Grande-Bretagne na Amerika aga mbasambala ngangu ngorogbia so prophétie ti Bible asara tënë ni?
▪ Kota image so Gbia Neboukadnetsar abâ ayeke pëpe fä ti angangu ngorogbia kue (Dan. 2:31-45). A sara gi tënë ti angangu ngorogbia oku so akomande na ngoi ti Daniel ti ga na ni nga so asara bira na azo ti Nzapa.
Ye so Daniel afa na ndo ti kota image ni afa na e so ngangu komandema ti Grande-Bretagne na Amerika ayeke londo na yâ ti Rome, me pëpe lo yeke hon Rome na ngangu. Na yâ ti kota image ni, Daniel atene so wen alondo na yâ ti angböngô ni ague na yâ ti agere ni nga na ali ti gere ni. (Na yâ ti gere ni nga na ali ti gere ni, wen ni amélangé na popoto ti ndô.)a Ye so aye ti fa so ngangu komandema ti Grande-Bretagne na Amerika ayeke londo na yâ ti Rome, so ayeke angböngô ni so ayeke na wen. A yeke tâ ye so asi. Grande-Bretagne so ayeke ândö mbage ti kodoro-togbia ti Rome akomanse ti ga ngangu nduru na ngu 1800. Na pekoni, Amerika aga mbeni ngangu kodoro na yâ ti dunia. Me, mbasambala ngangu ngorogbia so prophétie ti Bible asara tënë ni ade ti bâ gigi pëpe. Ngbanga ti nyen? Ngbanga ti so Grande-Bretagne na Amerika ade ti sara kua maboko na maboko ti sara mbeni kpengba ye pëpe. A yeke gi na ngoi ti Kozo Bira so Amû Sese Kue la ala to nda ti sara ni.
Na ngoi ni so, “amolenge ti royaume” ayeke sara kua mingi ni na kodoro ti Amerika. Kota ndokua ti ala so ayeke bâ ndo na ndo ti kua ti fango tënë na yâ ti dunia kue ayeke na Brooklyn, New York (Mat. 13:36-43). A-Chrétien so a soro ala ti gue na yayu ayeke fa nga tënë na yâ ti akodoro so ayeke na gbe ti komandema ti Grande-Bretagne. Na ngoi ti Kozo Bira so Amû Sese Kue, kodoro ti Grande-Bretagne na ti Amerika alë kpengba songo na popo ti ala. Ala bungbi oko ti tiri na awato ti ala. Bira asara si azo ti Grande-Bretagne na ti Amerika aga azo so aye kodoro ti ala ngangu. Ala tiri nga na azo so ayeke mbage ti ngongoa ti “wali” ti Nzapa. Angorogbia so akanga lege na ambeni mbeti so ngongoa ti wali ni asigigi na ni, nga ala bi na kanga azo so amû li ni na yâ ti kua ti fango tënë.—Apoc. 12:17.
Tongaso, ye so e diko na yâ ti prophétie ti Bible afa so mbasambala ngangu ngorogbia ni abâ gigi pëpe nduru na ngu 1800 na ngoi so Grande-Bretagne ato nda ti ga mbeni ngangu royaume. Me lo bâ gigi na tongo nda ti lâ ti Seigneur.b
[Akete tënë na gbe ni]
a Popoto ti ndô so a mélangé na wen ni ayeke fä ti azo so ayeke na gbe ti ngangu komandema ti Grande-Bretagne na Amerika. Tongana ngoi ayeke hon, popoto ti ndô ni asara si a yeke ngangu na komandema so ti kpengba tongana wen.
b Ye so achangé zingo nda ti ye so ayeke na lembeti 57, paragraphe 24, ti buku Prophétie ti Daniel nga na image so ayeke na lembeti 56 na 139.
[Foto na lembeti 19]
Na juin ti ngu 1918, a bi na da ti kanga aita miombe so asara kua na kota ndokua ti Watchtower