Kiringo ti dü zo mbeni: A yeke lege ti salut?

TONGANA a hunda mo a tene, “A kiri a dü mo mbeni awe?”, mo yeke kiri tënë tongana nyen? Azo kutu mingi na ndo ti sese kue so ayeke awamabe ayeke kiri tënë “En” na bê ti ala kue. Ala bâ ti ala so ti kiri ti dü zo mbeni ayeke fä so a hinga na atâ Chrétien kue nga ayeke oko lege ti salut. Ala yeda na bango ndo ti akota zo ti eglize tongana Robert Sproul, so ayeke nga mbeni wafango ye ti kota ekole ti abungbi ti nzapa, so atene: “Tongana a kiri a dü zo mbeni pëpe, . . . lo yeke Chrétien pëpe.”

Mo yeke na popo ti azo so amä na bê so kiringo ti dü zo mbeni ayeke lege ti salut? Tongana a yeke tongaso, kite ayeke dä pëpe so mo ye ti mû maboko na afami ti mo na akamarade ti mo ti wara lege ti salut nga ti to nda ti tambela dä. Ye oko, ti tene ala sara ni, a yeke nzoni ala hinga kangbi so ayeke na popo ti zo so a kiri a dü lo mbeni na zo so a kiri a dü lo mbeni pëpe. Tongaso, mo yeke sara ande tongana nyen ti fa na ala ye so kiringo ti dü zo mbeni aye ti tene?

Azo mingi atene so tënë “a kiri a dü zo mbeni” aye ti sara tënë ti zo so amû zendo ti sara na Nzapa nga na Christ, na ye ti pekoni ayeke so atâa so ândö lo yeke na songo na Nzapa pëpe, lo duti fadeso na kpengba songo na lo. Biani, mbeni bakari atene so zo so a kiri a dü lo mbeni ayeke “mingi ni mbeni zo so atene ni yeke Chrétien awe, so lo kiri lo yeda so lo yeke wamabe, mbilimbili na peko ti mbeni kpengba ye so asi na lo na ngoi ti mbeni bungbi ti ala.”​—Merriam-Webster’s Collegiate Dictionary​—Eleventh Edition.

Peut-être bê ti mo ayeke dö ande ti bâ so Bible ayeda pëpe na ye so bakari so afa. Mo ye ti hinga ye so Bible afa biani na ndo ti kiringo ti dü zo mbeni? Mo yeke wara ande biani ye ti nzoni tongana mo gi ti hinga ye nzoni na ndo ti tënë so. Ndali ti nyen? Ndali ti so ti hinga ye nzoni na ndo ti kiringo ti dü zo mbeni ayeke sara ye na ndo ti gigi ti mo nga na aye so mo ku ti wara kekereke.

Bible afa ti lo nyen?

Oko ndo so na yâ ti Bible a yeke wara tënë “a kiri a dü zo mbeni” dä ayeke na Jean 3:1-12, so asara tënë ti mbeni pendere lisoro so akporo na popo ti Jésus na mbeni mokonzi ti aJuif na Jérusalem. Mo yeke wara ande atënë kue ti lisoro so na yâ ti encadré so a zia na tere ti article so. E tisa mo ti diko ni nzoni.

Na yâ ti lisoro ni, Jésus agboto lê na ndo ti aye nde nde so andu ‘kiringo ti dü zo fini’.a Biani, atënë so Jésus atene amû maboko na e ti kiri tënë na akota hundango tënë oku so:

◼ A yeke kota ye ti tene a kiri a dü zo fini?

◼ A yeke na e oko oko ti soro ti tene a kiri a dü e fini?

◼ Nda ti kiringo ti dü zo fini ayeke nyen?

◼ A yeke sara ni tongana nyen?

◼ A yeke sara si songo ti zo na Nzapa aga tongana nyen?

Zia e bâ ahundango tënë so oko na oko.

[Kete tënë na gbe ni]

[Encadré/Foto na lembeti 4]

“A lingbi a dü ala mbeni si”

“Mbeni koli ayeke na popo ti aFarizien. Iri ti lo ayeke Nicodème, lo yeke mbeni mokonzi ti aJuif. Koli so aga ti bâ Jésus na bï na lo tene na lo: ‘Rabbi, e hinga so mo yeke mbeni wafango ye so mo londo na Nzapa. Teti mbeni zo alingbi ti sara afä so mo yeke sara so pëpe, gi tongana Nzapa ayeke na lo si.’ Jésus akiri tënë na lo atene: ‘Biani, ti tâ tënë ni, mbi tene na mo: Tongana a kiri a dü zo mbeni pëpe, lo lingbi pëpe ti bâ royaume ti Nzapa.’ Nicodème atene na lo: ‘Tongana mbeni zo aga kangba awe, tongana nyen si a lingbi ti dü lo? Lo lingbi pëpe ti lï na yâ ti mama ti lo ti fani use ni ti tene a dü lo, ni la pëpe?’ Jésus akiri tënë: ‘Biani, ti tâ tënë ni, mbi tene na mo: Tongana a dü zo na ngu nga na yingo pëpe, lo lingbi pëpe ti lï na yâ ti royaume ti Nzapa. Ye so mitele adü ayeke mitele, na ye so yingo adü ayeke yingo. Zia bê ti mo adö pëpe ngbanga ti so mbi tene na mo: A lingbi a dü ala mbeni si. Pupu ayeke ya na ndo so bê ti lo aye, na mo yeke mä toto ni, me mo yeke hinga ndo so pupu ni alondo dä pëpe nga ndo so lo yeke gue dä pëpe. Zo kue so yingo adü lo ayeke tongaso.’ Nicodème akiri tënë na lo atene: ‘Aye so alingbi ti si tongana nyen?’ Jésus akiri tënë na lo atene: ‘Mo yeke mbeni wafango ye na Israël, me mo hinga aye so pëpe? Biani, ti tâ tënë ni, mbi tene na mo: Ye so e hinga, e sara tënë ni. Nga ye so e bâ, e sara tënë ni, me ala yeda pëpe na tënë so e fa. Tongana mbi yeke sara na ala tënë ti aye ti sese me ala mä na bê na ni pëpe, ka tongana mbi sara na ala tënë ti aye ti yayu, ala yeke mä na bê na ni ande tongana nyen?’ ”​—Jean 3:1-12.

Kiringo ti dü zo fini: A yeke kota ye?

NA YÂ ti lisoro ti Jésus na Nicodème, lo fa so kiringo ti dü zo fini, wala kiringo ti dü zo mbeni ayeke biani kota ye mingi. Lo fa ni polele na lege wa?

Bâ tongana nyen na yâ ti lisoro ti Jésus na Nicodème, lo luti mingi na ndo ti nene ti kiringo ti dü zo fini. Lo tene: “Tongana a kiri a dü zo mbeni pëpe, lo lingbi pëpe ti bâ royaume ti Nzapa.” (Jean 3:3). Tënë “tongana” nga na tënë “lingbi pëpe” afa so a hunda ti kiri ti dü zo fini. Zia e mû mbeni tapande: Tongana mbeni zo atene, “Tongana lâ asu pëpe, kota lâ alingbi ti duti dä pëpe,” lo ye ti tene so a hunda ti tene lâ asu si kota lâ aduti dä. Legeoko nga, Jésus atene so a hunda ti kiri ti dü zo mbeni si lo bâ Royaume ti Nzapa.

Na nda ni, ti zi kite kue na ndo ti tënë so, Jésus atene: “A lingbi a dü ala mbeni si.” (Jean 3:7). A yeke polele so na lê ti Jésus, a hunda ti kiri ti dü zo mbeni si lo “lï na yâ ti Royaume ti Nzapa.”​—Jean 3:5.

Teti so Jésus abâ kiringo ti dü zo fini tongana mbeni kota ye mingi na lê ti lo, a yeke nzoni aChrétien asara kue ti gbu nda ti tënë so nzoni. Na tapande, mo pensé so mbeni Chrétien alingbi ti soro lo wani ti tene a kiri a dü lo mbeni?

[Encadré na lembeti 5]

“Tongana lâ asu pëpe, kota lâ alingbi ti duti dä pëpe”

Kiringo ti dü zo fini: A yeke na zo oko oko ti soro?

ZO WA la asara si a kiri a dü zo fini? Na ngoi so ambeni pasteur ayeke hunda na azo so ayeke mä ala ti ga aChrétien so a kiri a dü ala mbeni, ala yeke tene peko ti atënë ti Jésus, ala tene: “A lingbi a dü ala mbeni si.” (Jean 3:7). Apasteur so amû atënë ti Jésus tongana mbeni yanga so a mû na zo ti sara ye; a yeke mo bâ mo tene, ala tene: “Sara si a kiri a dü mo fini!” Na sarango tongaso, ala yeke fa so a yeke na wamabe oko oko ti mä yanga ti Jésus na ti sara aye so a hunda si a kiri a dü lo fini. Ti ala, kiringo ti dü zo fini ayeke ye so a yeke na zo oko oko ti soro ti sara. Me bango ndo so ague oko na ye so Jésus atene na Nicodème?

Tongana e diko atënë ti Jésus nzoni, lo fa pëpe so a yeke na zo ni wani ti soro ti tene a kiri a dü lo fini wala pëpe. Ngbanga ti nyen e tene tongaso? A lingbi ti kiri na peko ti tënë ti yanga ti Grec so a kiri peko ni na tënë “a kiri a dü zo mbeni” na tënë “a yeke nzoni dungo zo alondo na nduzu.”a Ni la, ti gue oko na tënë so, kiringo ti dü zo fini “alondo na nduzu”, so ti tene, “a londo na Babâ”. (Jean 19:11; Jacques 1:17). Biani, a yeke Nzapa la asara si a kiri a dü zo fini.​—1 Jean 3:9.

Tongana e girisa pëpe tënë “alondo na nduzu”, a yeke ngangu pëpe ti hinga ndani so mbeni zo alingbi pëpe ti sara si a kiri a dü lo fini. Gbu gi li na ndo ti tâ dungo mo. Mo la mo soro ti tene a dü mo? Ên-ën! A dü mo ndali ti so babâ ti mo asara si a mû ngo ti mo. Legeoko nga, a lingbi ti kiri ti dü e fini gi tongana Nzapa, Babâ ti e ti yayu asara si a kiri a dü e fini (Jean 1:13). Ni la, a yeke na lege ni so bazengele Pierre atene: “Zia a gonda Nzapa na Babâ ti Seigneur ti e Jésus Christ, ndali ti so, na lege ti kota nzoni bê so lo sara, lo kiri lo dü e fini.”​—1 Pi. 1:3.

A yeke mbeni yanga la a mû?

Ye oko, ambeni zo alingbi ti hunda tere ti ala, ala tene: ‘Tongana a yeke tâ tënë so zo alingbi pëpe ti soro lo wani ti tene a kiri a dü lo mbeni, ngbanga ti nyen Jésus amû yanga lani, lo tene: “A lingbi a dü ala mbeni si”?’ So ayeke mbeni pendere hundango tënë. Kozoni kue, tongana fade mbeni yanga la Jésus amû, andâ lo hunda na e ti sara mbeni ye so ahon ngangu ti e. Me a yeke na lege ni pëpe ti tene lo sara tongaso. Tongaso, tënë a lingbi “a dü ala mbeni si” aye biani ti tene nyen?

Tongana e bâ nzoni tënë so lani a sû na yanga ti Grec, tënë ni ayeke mbeni yanga la a mû ni pëpe. Me a yeke gi mbeni tënë so zo atene senge. Ti tene ni nde, tongana Jésus atene a lingbi “a dü ala mbeni si”, lo tene mbeni tënë so ayeke tâ tënë, me lo mû yanga pëpe ti tene a sara mbeni ye. Lo tene: “A lingbi dungo ala alondo na nduzu.”​—Jean 3:7, La Bible Crampon.

Ti mû maboko na mo ti gbu nda ti tënë so, zia e bâ mbeni tapande so ayeke fa na mo tongana nyen tënë so zo atene senge ayeke nde na mbeni yanga so a mû. Bâ so mbeni gbata ayeke na gbâ ti a-ekole. A zia mbeni ekole ni nde ndali ti amolenge ti kodoro ni so alango na yâ ti akodoro so ayo na gbata ni. Mbeni lâ, mbeni molenge-koli so ayeke molenge ti kodoro ni pëpe atene na wayinda ti ekole ni, lo tene: “Mbi ye ti lï na yâ ti ekole so.” Wayinda ni atene na lo: “Ti lï na yâ ti ekole so, a lingbi mo yeke molenge ti kodoro ni.” Ti tâ tënë ni, atënë ti wayinda so ayeke yanga la lo mû pëpe. Lo mû yanga pëpe na wamandango mbeti so, lo tene: “Ga molenge ti kodoro ni!” Wayinda ni asara tënë ti mbeni ye so ayeke tâ tënë, ye so a hunda ti tene zo alï na yâ ti ekole so. Legeoko nga, tongana Jésus atene lani “a lingbi a dü ala mbeni si”, lo sara gi tënë ti mbeni ye so ayeke tâ tënë, ye so a hunda ti tene zo ‘alï na yâ ti royaume ti Nzapa.’

Ndangba tënë ni so ayeke Royaume ti Nzapa andu nga mbeni ye na ndo ti kiringo ti dü zo fini. A ndu hundango tënë so: ‘Nda ti kiringo ti dü zo fini ayeke nyen?’ Tongana e hinga kiringo tënë ni nzoni, a yeke mû biani maboko na e ti hinga nzoni ye so kiringo ti dü zo mbeni aye ti tene.

[Kete tënë na gbe ni]

[Foto na lembeti 6]

Ye wa ague oko na popo ti kiringo ti dü zo fini na tâ dungo zo?

Kiringo ti dü zo fini: Nda ni ayeke nyen?

AZO mingi apensé so a hunda ti tene a kiri a dü zo mbeni si lo wara salut ti lakue lakue. Ye oko, bâ ye so Jésus atene na ndo ti nda ti kiringo ti dü zo fini. Lo tene: “Tongana a kiri a dü zo mbeni pëpe, lo lingbi pëpe ti bâ royaume ti Nzapa.” (Jean 3:3). Tongaso, a hunda ti tene a kiri a dü zo mbeni si lo lï na yâ ti Royaume ti Nzapa, me pëpe ti wara salut. Ambeni zo alingbi ti hunda tere ti ala atene: ‘Me atënë so use so, lingo na yâ ti Royaume nga na warango salut, aye ti sara tënë ti oko futa?’ Ên-ën, a ye pëpe ti sara tënë ti oko futa. Ti gbu nda ti kangbi so ayeke na popo ti atënë use so, zia e bâ kozoni kue nda ti tënë “royaume ti Nzapa.”

Royaume ayeke mbeni ngorogbia. Tongaso, tënë “royaume ti Nzapa” aye ti sara tënë ti “ngorogbia ti Nzapa.” Bible afa so Jésus Christ, “Molenge ti zo”, ayeke Gbia ti Royaume ti Nzapa nga ambeni zo ayeke komande ande legeoko na Christ (Daniel 7:1, 13, 14; Matthieu 26:63, 64). Na ndo ni, suma so bazengele Jean abâ afa so azo so ayeke komande ande legeoko na Christ ayeke azo so a soro ala na popo ti azo “ti kete mara kue, azo ti yanga ti kodoro kue, azo ti kodoro kue nga na azo ti amara kue,” na ala yeke “komande tongana agbia na ndo ti sese.” (Apocalypse 5:9, 10; 20:6). Bible akiri afa so azo so ayeke komande ande tongana agbia ayeke mbeni “kete kundu” so wungo ti azo ni ayeke 144 000, “so a vo ala na ndo ti sese.”​—Luc 12:32; Apocalypse 14:1, 3.

Royaume ti Nzapa akomande na ndo wa? A iri “royaume ti Nzapa” nga “royaume ti yayu”, na ye so afa so Jésus na amba ti lo agbia ni ayeke komande na yayu (Luc 8:10; Matthieu 13:11). Ni la, Royaume ti Nzapa ayeke ngorogbia ti yayu so na yâ ni a yeke wara Jésus Christ na groupe ti amba ti lo agbia so a soro ala na popo ti azo.

Tongaso, Jésus aye ti tene nyen tongana lo tene so a lingbi a kiri a dü zo mbeni si lo “lï na yâ ti royaume ti Nzapa”? Lo ye ti tene so a hunda ti tene a kiri a dü zo mbeni si lo ga gbia legeoko na Christ na yayu. Na nduru tënë, nda ti kiringo ti dü zo fini ayeke ti leke mbeni kete wungo ti azo ti tene ala komande ande na yayu.

Juska ge, e bâ so kiringo ti dü zo fini ayeke mbeni kota ye mingi, Nzapa la ayeke na gunda ni nga a yeke leke mbeni kete wungo ti azo ti komande na yayu. Me, a yeke kiri ti dü zo fini tongana nyen?

[Encadré na lembeti 7]

Nda ti kiringo ti dü zo fini ayeke ti leke mbeni kete wungo ti azo ti tene ala komande ande na yayu

[Foto na lembeti 7]

Na yâ ti Royaume ti Nzapa, a yeke wara Jésus Christ na kete wungo ti amba ti lo agbia so a soro ala na popo ti azo

Kiringo ti dü zo fini: A yeke sara ni tongana nyen?

JÉSUS asara lisoro na Nicodème na ndo ti nene ti kiringo ti dü zo fini, ye so asara si a dü zo fini, ndani so a yeke kiri ti dü zo fini nga lege so a sara na ni. Jésus atene: “Tongana a dü zo na ngu nga na yingo pëpe, lo lingbi pëpe ti lï na yâ ti royaume ti Nzapa.” (Jean 3:5). Tongaso, a kiri a dü zo mbeni na lege ti ngu na yingo. Me tënë “ngu nga na yingo” aye ti tene nyen?

“Ngu nga na yingo” aye ti tene nyen?

Teti so Nicodème ayeke mbeni zo so ahinga ye mingi na ndo ti bungbi ti nzapa ti aJuif, kite ayeke dä pëpe so lo hinga nzoni mingi lege so Mbeti ti Nzapa so a sû ândö na yanga ti Hébreu asara kua na tënë “Yingo ti Nzapa”, ngangu ti Nzapa so alingbi ti pusu azo ti sara akpengba kusala (Genèse 41:38; Exode 31:3; 1 Samuel 10:6). Tongaso, tongana Jésus asara kusala na tënë “yingo”, Nicodème ahinga so lo ye ti sara tënë ti yingo vulu, wala ngangu ti Nzapa so lo yeke sara na kua.

Ka ti ngu so Jésus asara tënë ni, a yeke tongana nyen? Bâ aye so asi na so a sû tënë ni na yâ ti aversê so aga kozoni na lisoro ti Jésus na Nicodème nga aye so a sû na yâ ti aversê so aga na pekoni. Aye ni so afa so Jean Baptiste na adisciple ti Jésus ayeke batize lani azo na yâ ti ngu (Jean 1:19, 31; 3:22; 4:1-3). A yeke mbeni sarango ye so azo ahinga ni nzoni mingi lani na Jérusalem. Ni la, tongana Jésus asara tënë ti ngu, Nicodème ahinga so Jésus aye ti sara tënë ti senge ngu pëpe, me lo ye ti sara tënë ti ngu so a yeke batize azo na yâ ni.a

A batize azo “na yingo vulu”

Tongana ‘dungo zo na ngu’ aye ti sara tënë ti batême ti ngu, ‘dungo zo na yingo’ aye ti sara tënë ti nyen? Kozo na lisoro ti Jésus na Nicodème, Jean Baptiste atene so ngu nga na yingo ayeke akota ye na yâ ti batême. Lo tene: “Mbi batize ala na ngu, me ti lo [Jésus], lo yeke batize ande ala na yingo vulu.” (Marc 1:7, 8). Marc, mbeni zo ti sungo Évangile asara tënë ti kozo ngoi so mara ti batême so abâ gigi. Marc atene: “Na ngoi ni kâ, Jésus alondo na Nazareth ti Galilée lo ga, na Jean abatize lo na yâ ti Ngu ti Jourdain. Gi so lo londo na gbe ti ngu ni lo sigigi, lo bâ yayu so ayeke zi, na yingo vulu so ayeke zu na ndo ti lo tongana mbeni kolokoto.” (Marc 1:9, 10). Na ngoi so a yôro Jésus na yâ ti Ngu ti Jourdain, a batize lo na ngu. Na ngoi so yingo alondo na yayu azu na ndo ti Jésus, lo wara batême ti yingo vulu.

Ngu ota tongaso na peko ti batême ti Jésus, lo dë bê ti adisciple ti lo, lo tene: “Na yâ ti alango kete fade a yeke batize ala na yingo vulu.” (Kusala 1:5). Batême so asi lani lawa?

Na lango ti Pentecôte ti ngu 33, adisciple ti Jésus so wungo ti ala ayeke 120 tongaso abungbi na yâ ti mbeni dä na Jérusalem. “Mo ye ti bâ, mbeni toto ti ye tongana ti pupu so aya ngangu alondo na yayu amû yâ ti da ni kue so ala duti dä. Na ala bâ amenga tongana amenga-wa . . . Ala kue asi na yingo vulu.” (Kusala 2:1-4). Na oko lango ni so, a wa azo so ayeke na Jérusalem ti wara batême ti ngu. Bazengele Pierre atene na gbâ ti azo so abungbi, lo tene: “Ala changé bê ti ala, na zia a batize ala oko oko na iri ti Jésus Christ teti pardon ti asiokpari ti ala, na fade ala yeke wara yingo vulu so ayeke matabisi so a mû senge senge.” Azo ni asara ye tongana nyen? “Ala so ayeda na tënë ti lo na bê ti ala kue, a batize ala. Na lango ni so, a-âme saki ota tongaso aga na ndo ni.”​—Kusala 2:38, 41.

A hunda abatême use

Abatême so afa nyen na ndo ti kiringo ti dü zo fini? A fa so kiringo ti dü zo fini abâ gigi na lege ti aye use. Bâ so kozoni Jésus awara batême ti ngu. Na pekoni, lo wara yingo vulu. Legeoko nga, kozoni akozo disciple awara batême ti ngu (ambeni, Jean Baptiste la abatize ala), na pekoni ala wara yingo vulu (Jean 1:26-36). Nga, azo 3 000 so achangé lege ti ala awara kozoni batême ti ngu; na pekoni, ala wara yingo vulu.

Na batango na li abatême so a sara lani na Pentecôte ti ngu 33, e ku ti tene a kiri a dü zo fini laso tongana nyen? Gi tongana ti so a sara ni lani na abazengele ti Jésus nga na akozo disciple ti lo. Kozoni, zo ayeke changé bê ti lo ndali ti asioni ti lo, lo ke asioni sarango ye ti lo, lo mû fini ti lo na Jéhovah ti voro lo na ti sara na lo nga lo fa ni polele na lege ti batême ti ngu. Na pekoni, tongana Nzapa asoro zo ni ti komande tongana gbia na yâ ti Royaume ti lo, zo ni ayeke wara yingo vulu. Kozo mbage ti aye use so (batême ti ngu), a yeke zo ni la ayeke sara ni; ti use mbage ni (batême ti yingo), a yeke Nzapa la ayeke na gunda ni. Tongana zo awara batême ti ngu nga na ti yingo, a fa so a kiri a dü lo fini.

Ye oko, ngbanga ti nyen na yâ ti lisoro ti Jésus na Nicodème, lo sara tënë ti ‘dungo zo na ngu nga na yingo’? Ti fa so azo so a batize ala na ngu nga na yingo ayeke wara mbeni kota gbiango ye na yâ ti gigi ti ala. Article ti peko asara tënë na ndo ti tënë so.

[Kete tënë na gbe ni]

[Foto na lembeti 9]

Azo ti Israël so achangé bê ti ala, Jean abatize ala na ngu

Kiringo ti dü zo fini: A yeke sara nyen?

NGBANGA TI NYEN Jésus asara kusala na tënë ‘a dü zo na yingo’ na ngoi so lo yeke sara tënë ti batême ti yingo vulu? (Jean 3:5). Tënë “dü” na lege ti fä aye ti tene “tongo nda ni.” Ni la, tënë ‘a kiri a dü zo fini’ aye ti sara tënë ti “fini tongo nda ni.” Tongaso, tënë “a dü zo” nga na tënë ‘a kiri a dü zo fini’ afa polele so ala so awara batême ti yingo vulu ayeke to nda ti mbeni fini songo na Nzapa. Kota gbiango ye na yâ ti songo ti ala na Nzapa so asi tongana nyen?

Ti fa tongana nyen Nzapa ayeke leke azo ti tene ala komande na yayu, bazengele Paul amû tapande ti azo ti yâ ti sewa. Lo sû mbeti na aChrétien ti ngoi ti lo so fade Nzapa ayeke ‘mû ala ti ga amolenge ti lo’, na tongaso lo lingbi ti sara ye na mbage ti ala “tongana amolenge ti lo.” (aGalate 4:5; aHébreu 12:7). Ti bâ tongana nyen tapande ti mungo mbeni molenge so ayeke ti mo pëpe ti ga ti mo amû maboko na e ti hinga gbiango ye so asi na mbeni zo tongana lo wara batême ti yingo vulu, zia e kiri e bâ tapande ti molenge-koli so aye ti lï na yâ ti ekole so a zia ni gi ndali ti amolenge ti kodoro ni.

Gbiango ye so asi tongana zo amû mbeni molenge ti ga ti lo

Na yâ ti tapande ni, molenge-koli ni alingbi pëpe ti lï na yâ ti ekole so ndali ti so lo yeke molenge ti kodoro ni pëpe. Fadeso, tara ti bâ so mbeni lâ, mbeni kota gbiango ye asi. Mbeni babâ so ayeke zo ti kodoro ni asara aye so ndia ahunda, na lo mû molenge ni ti ga ti lo. Ye so asara nyen na ndo ti molenge-koli so? So babâ so amû lo ti ga molenge ti lo awe, lo lingbi fadeso ti duti na a-oko droit so amolenge ti kodoro ni ayeke na ni, so na popo ni a yeke wara droit ti lingo na yâ ti ekole so. Mungo lo ti ga molenge ti kodoro ni agbian biani aye so lo lingbi ti sara.

Tapande so afa na e gbiango ye so asi na azo so a kiri a dü ala fini. Me gbiango ye so asi na ala ayeke kota mingi ahon ti so asi na molenge-koli so. Bâ ambeni ye so aye ti gue oko na ni. A lingbi ti yeda na molenge so ti lï na yâ ti ekole so, mê gi tongana lo sara ye so a hunda ti sara si lo lï dä; so ti tene a lingbi lo duti molenge ti kodoro ni. Ye oko, gi molenge so lo wani, lo lingbi pëpe ti sara ye so a hunda. Legeoko nga, a yeda ti tene ambeni zo aduti na yâ ti Royaume ti Nzapa, wala ngorogbia ti yayu, me gi tongana ala sara ye so a hunda ti duti dä: a lingbi ‘a kiri a dü ala mbeni’. Ye oko, na ngangu ti ala wani, ala lingbi pëpe ti sara ye so a hunda ndali ti so Nzapa la asara si a kiri a dü zo fini.

Ye wa asara si dutingo ti molenge-koli so achangé? Sarango ye so ndia ahunda na mbeni babâ so aye ti mû mbeni molenge so ayeke ti lo pëpe ti ga ti lo. Ti tâ tënë ni, atâa so babâ ni asara aye so ndia ahunda na lo ti sara si molenge ni aga ti lo, ye so achangé pëpe sarango ye ti tere ti molenge so ndali ti so lo ngbâ gi oko zo ni. Me, na pekoni so babâ ni asara awe aye so ndia ahunda ti tene molenge ni aga ti lo, molenge ni awara mbeni fini dutingo. Biani, lo wara mbeni fini tongo nda ni: a lingbi ti tene so a kiri a dü lo fini. Mbeni babâ amû lo ti ga molenge ti lo ti koli, na ye so asara si lo yeke na droit ti lï na ekole ni nga ti ga mbeni zo ti yâ ti sewa ti babâ so.

Legeoko nga, Jéhovah achangé dutingo ti mbeni groupe ti azo so alingbi kue pëpe na lege so lo sara ye so a hunda ti tene ala ga amolenge ti lo. Bazengele Paul, so ayeke na yâ ti groupe so asû mbeti na amba ti lo aChrétien, lo tene: “Ala wara lani mbeni yingo so Nzapa amû ti mû ala ti ga amolenge ti lo. Na lege ti yingo so, e dekongo, e tene: ‘Abba, Babâ!’ Yingo wani afa na yingo ti e so e yeke amolenge ti Nzapa.” (aRomain 8:15, 16). Biani, na sarango ye so a hunda, Nzapa asara si aChrétien so aga mbage ti sewa ti lo, wala “amolenge ti Nzapa”.​—1 Jean 3:1; 2 aCorinthien 6:18.

Ti tâ tënë ni, so Nzapa amû aChrétien so ti ga amolenge ti lo asara pëpe si sarango ye ti tere ti ala achangé, ndali ti so a sara pëpe si ala lingbi kue (1 Jean 1:8). Ye oko, Paul akiri atene so na pekoni so Nzapa asara ye so a hunda awe, aChrétien so awara mbeni fini dutingo. Na oko ngoi ni, yingo ti Nzapa asara si aChrétien so ahinga biani so ala yeke duti ande na Christ na yayu (1 Jean 3:2). So yingo vulu afa na ala so ala yeke duti ande biani na tere ti Christ asara si ala yeke na mbeni fini bango ndo na ndo ti fini (2 aCorinthien 1:21, 22). Biani, ala wara mbeni fini tongo nda ni: a lingbi ti tene so a kiri a dü ala fini.

Bible asara tënë ti aChrétien so Nzapa amû ala ti ga amolenge ti lo, atene: “Fade ala yeke duti aprêtre ti Nzapa na ti Christ na fade ala yeke komande tongana agbia legeoko na Christ na yâ ti ngu saki oko ni.” (Apocalypse 20:6). Legeoko na Christ, fade amolenge ti Nzapa so ayeke duti ande agbia na yâ ti Royaume ti Nzapa, wala ngorogbia ti yayu. Bazengele Pierre atene na amba ti lo aChrétien so fade ala yeke wara “ye ti héritier so alingbi ti buba pëpe, so alingbi ti ga sioni pëpe nga so pendere ni alingbi ti hon pëpe”, so “a bata ni na ala na yayu”. (1 Pierre 1:3, 4). So ayeke biani mbeni pendere ye ti héritier!

Ye oko, tënë ti komandema so asara nga si mbeni hundango tënë abâ gigi. Tongana azo so a kiri a dü ala mbeni ayeke komande ande tongana agbia na yayu, ala yeke komande ande na ndo ti azo wa? E yeke bâ ande hundango tënë so na yâ ti article ti peko.

[Foto na lembeti 10]

Paul atene nyen na ndo ti mungo mbeni molenge ti ga ti mo?