Tongana Nyen ti Wara Ngia Mingi Ahon na Lege ti Abungbi
1 Abungbi ayeke kota ye mingi na yâ nzoni dutingo ti e na lege ti yingo. Ngia so e yeke wara ndali ni aga mbilimbili na lege ti ye so e yeke sala kozo, na ngoi ni, nga na peko ti bungbi. Tongana nyen ti ngbâ ti wara kota ngia na guengo na abungbi, nga ti mu maboko na ambeni zo ti duti na oko bibe so?
2 Kozo na abungbi: Ngia so abungbi ayeke mu na e aga mingi na lege ti lekengo tele. Tongana e leke tele ti e nzoni, a yeke ngangu na e pepe ti dengi mê na ti mu mbage dä. Nga, a lingbi e leke nzoni akusala kue so a mu na e. A lingbi e zia na gbele e ti fa tene tâ na lege ni alingbi na awango so amu, nga na salango si azo aye lakue ti mä tene ni. A lingbi e tara tele ti e nzoni. Tongana e mu mbage ti e ti sala si abungbi ni aduti na wâ na aga na ye ti nzoni na azo kue, fade guengo na li ni ti e mveni ayeke ga polele na ngia ti e ayeke kono.—1 Tim. 4:15, 16.
3 Na ngoi ti abungbi: Na mungo acommentaire na abungbi, e yeke wara ngia dä mingi ahon. Tongana a leke ti tene azo akiri tene, a lingbi zo oko oko ti kongrégation aba ni tongana kusala so amu na lo mveni. Fani mingi, akiringo tene so ayeke ndulu na afa ye polele ayeke nzoni ahon. Andulu tapande so akpengba zo alingbi ti mu maboko na wâ mingi; tongaso e duti ndulu ti fa pekoni lakue tongana a hunda na yâ programme ni. (aProv. 15:23; Kus. 15:3) Tongana e yeke sala mbeni mbage ti bungbi, a lingbi e sala tene na wâ nga na bê kue; e fa atene so agbu bê, so akpa tâ ye nga so alingbi ti sala kusala na ni.
4 Na peko ti abungbi: E kangbi na ambeni zo mbeni nzoni tene, mbeni balao ti ndoye, na ambeni tene so afa pekoni na bungbi; a yeke ga na nzoni ye na azo kue. E fa na gigi ngia so e wara na bango apendere, ambakoro, nga na afini zo so amu mbage ti ala dä; ye so akpengba ndoye na popo ti aita-koli na aita-wali. Ahon ti sala tene na ndo ala so aga pepe na abungbi, e kangbi na ala ngia so e wara na guengo dä, ye so ayeke pusu ande ala ti ga.—aHéb. 10:24, 25.
5 Zia e gbanzi tele ti e pepe na kota ye so aleke; fade a yeke dü mungo maboko na popo ti e. (aRom. 1:11,12) Tongana e sala angangu ti e kue na bê kue, fade e yeke bata ngia ti e ti ga na abungbi ti aChrétien.