BIBLIOTHÈQUE NA NDÖ TI INTERNET Watchtower
Watchtower
BIBLIOTHÈQUE NA NDÖ TI INTERNET
Sango
  • BIBLE
  • AMBETI
  • ABUNGBI
  • be l. 272-l. 281 par. 4
  • Tokua so a lingbi e tene na azo

Vidéo ayeke na yâ ti mbage ni so ape.

Pardon, mbeni kpale asi na ngoi ti zingo vidéo ni.

  • Tokua so a lingbi e tene na azo
  • Ekole ti Kusala ti aChrétien
  • Akete li ti tënë ni
  • Ambeni mbeti nde na ndö ti oko tënë ni
  • “MO KPE MBITO TI NZAPA, NA MO BATA KOMANDEMA TI LO”
  • “SALA NZONI TËNË TI JÉSUS”
  • “TENE-NZONI SO TI ROYAUME”
  • Ngbanga ti nyen ti mû peko ti “Christ”?
    Tour ti Ba Ndo Afa Tene ti Royaume ti Jéhovah: 2009
  • Royaume ti Nzapa Akomande
    Hingango Ye So Ague na Fini ti Lakue Lakue
  • Royaume ti Nzapa ayeke nyen?
    Bible afa nyen biani?
  • Mbeni Royaume so “afuti lâ oko pëpe”
    Voro oko tâ Nzapa
Bâ ambeni ye ni
Ekole ti Kusala ti aChrétien
be l. 272-l. 281 par. 4

Tokua so a lingbi e tene na azo

Jéhovah amû na e mbeni kungba nga na mbeni kota matabisi, lo tene: “I yeke atémoin ti Mbi, Mbi yeke Nzapa.” (Es. 43:12). E yeke pëpe azo so amä gi na bê na Nzapa awe. Me e yeke atémoin so ayeke tene na gbele azo kue akota tâ tënë so ayeke na yâ Tënë ti Nzapa, so a sû na gbe ti yingo ti lo. Tokua so Jéhovah amû na e ti tene laso ayeke so wa? Tokua so agboto lê na ndo Jéhovah Nzapa, Jésus Christ nga na Royaume ti Messie.

“MO KPE MBITO TI NZAPA, NA MO BATA KOMANDEMA TI LO”

NGU mingi kozoni na ngoi ti aChrétien, Jéhovah asala tënë na be-ta-zo Abraham na ndo mbeni ye so lo leke ti tene “amara kue ti sese” ahiri deba nzoni na ndo ala mveni (Gen. 22:18). Lo zia nga si yingo ti lo apusu Salomon ti sû na mbeti mbeni kota ye so lo hunda na azo kue. A yeke: “Mo kpe mbito ti Nzapa, na mo bata komandema ti Lo, teti so ayeke kusala ti azo kue.” (Zo-ti. 12:15). Me azo ti amara kue ayeke manda aye so tongana nyen?

Atâa so a yeke wara lakue ambeni zo so amä na bê na tënë ti Nzapa, Bible afa so a yeke fa ande nzo tënë ngangu mingi na ndo sese kue, na amara kue. A bata fango tënë so teti “lâ ti Seigneur”. Na a to nda ni na ngu 1914 (Apoc. 1:10). Na ndo ngoi so, Apocalypse 14:6, 7 atene giriri so, na gbe ti fango lege ti mbeni ange, a yeke gue na kpengba tokua so na “amara kue, akete mara kue, azo ti yanga nde nde kue, na azo nde nde kue”. A yeke wa ala tongaso: “I kpe mbito ti Nzapa, i mû gloire na Lo, teti l’heure ti Lo ti fâ ngbanga asi awe; i sambela Lo so asala yayu na sese, kota ngu ti ingo na lingu.” Ye so bê ti Nzapa aye ayeke ti tene azo atene tokua so. E yeke na matabisi ti mû mbage na kusala so.

“Tâ Nzapa.” Tongana Jéhovah atene “I yeke atémoin ti Mbi,” a yeke na ngoi so a yeke sala tënë na ndo zo wa si ayeke tâ Nzapa (Es. 43:10). Tokua so a lingbi a tene ni ayeke pëpe ti tene so a lingbi azo aduti na yâ mbeni vorongo wala amä na bê na mbeni nzapa. Nde na so, a lingbi a mû na ala lege ti hinga so Wasalango yayu na sese ayeke oko tâ Nzapa (Es. 45:5, 18, 21, 22; Jean 17:3). A yeke gi oko tâ Nzapa si alingbi ti tene ye so ayeke si ande, na zo alingbi ti zia bê dä. A yeke matabisi ti e ti fa so gango tâ tënë ti zendo ti Jéhovah giriri amû tâ nzoni nda ti tënë ti mä na bê kue so ye oko oko kue so lo mû zendo ni teti kekereke ayeke ga ande tâ tënë.​—Jos. 23:14; Es. 55:10, 11.

Biani, azo mingi so e yeke fa tënë na ala ayeke voro ambeni nzapa nde wala ala tene so ala yeke voro nzapa oko pëpe. Ti tene azo azi mê ti ala ti mä e, e lingbi peut-être ti to nda ti fango tënë ni na mbeni ye so anzere na azo ni nga. E lingbi ti wara ye ti nzoni mingi na lege ti tapande so a fa pekoni na Kusala 17:22-31. Bâ so atâa so bazengele Paul asala tënë na ndara, lo fa polele so azo kue ayeke na tënë ti kiri na Nzapa so ayeke Wasalango yayu na sese.

Fango iri ti Nzapa na azo. Girisa lâ oko pëpe ti fa iri ti tâ Nzapa na azo. Jéhovah aye iri ti lo mingi (Ex. 3:15; Es. 42:8). Lo ye si azo ahinga iri so. Lo sala si pendere iri ti lo so aduti na yâ ti Bible ahon fani 7 000. A yeke kungba ti e ti fa ni na azo.​—Deut. 4:35.

Gigi ti kekereke ti azo kue aluti mingi na ndo hingango Jéhovah nga na dingo iri ti lo na mabe (Joël 2:32; Mal. 3:16; 2 aThes. 1:8). Ye oko, mingi ti azo ahinga Jéhovah pëpe. So andu azo mingi so atene ala yeke voro Nzapa ti yâ ti Bible. Atâa tongana ala yeke na Bible na ala diko ni, ala de lakue ti hinga pëpe iri ti Nzapa mveni ndali ti so a zi ni na yâ ti aBible mingi ti laso. Oko ye so ambeni zo ahinga na ndo iri Jéhovah ayeke ti so amokonzi-nzapa ti ala atene na ala ti sala kusala na ni pëpe.

Tongana nyen e lingbi ti fa iri ti Nzapa na azo? Kode so ayeke lë lengo ahon atanga ni kue ayeke ti fa ni na ala na yâ ti Bible. Tongana lege ayeke dä, e lingbi ti fa ni na yâ ti Bible ti ala mveni. Na yâ ti ambeni Bible na yâ ti ambeni yanga ti kodoro, iri so asigigi dä saki mingi. Na yâ ti ambeni, a lingbi peut-être ti sigigi gi na Psaume 83:19, Exode 6:3-6, Genèse 22:14, wala a lingbi ti wara ni na yâ ti mbeni kete tënë na gbe ti lembeti so andu Exode 3:14, 15 wala 6:3. Na yâ ti aBible mingi, na ndo so mbeti so a sû ni giriri na tongo nda ni ayeke na iri ti Nzapa mveni dä, a zia ambeni tënë tongana “Seigneur” nga na “Nzapa” na place ni, na a sû ni na mbeni lege so ayeke nde. Na ndo so azo so akiri na peko ti Bible na yanga ti kodoro ti ala laso azi iri ti Nzapa mveni dä kue, peut-être a lingbi mo sala kusala na mbeni ngbele Bible ti fa na azo ye so a sala. Na yâ ti ambeni kodoro mo lingbi ti fa iri ti Nzapa na yâ ti abia ti nzapa wala na tele ti akota da.

Même teti azo so ayeke voro ambeni nzapa nde, a lingbi ti sala kusala nzoni na Jérémie 10:10-13 na yâ Traduction du monde nouveau. Aversê so afa gi pëpe iri ti Nzapa, me a fa nga polele zo wa la lo yeke.

Zia si atënë tongana “Nzapa” na “Seigneur” akanga pëpe ndo ti iri Jéhovah, tongana ti so aÉglise asala. So aye ti tene pëpe so a lingbi a sala kusala na iri ni ti to nda ti lisoro oko oko kue. Ndali ti asioni bibe so ambeni zo ayeke na ni, ala lingbi ti kaï lisoro ni. Me na pekoni so mo leke awe gere ti mbeni lisoro, gbanzi tele ti mo pëpe ti sala kusala na iri ti Nzapa.

A yeke kota ye ti bâ so Bible asala kusala na iri ti Nzapa mveni mingi ahon atënë “Seigneur” na “Nzapa” use kue. Atâa so a yeke tongaso, azo so asû Bible agi lani pëpe ti zia iri ti Nzapa na yâ atënë oko oko kue. Ala sala ni tongana ye so ala yeke sala ka, na bê ti ala mveni nga na yekiango ndo. So ayeke mbeni nzoni tapande ti mû pekoni.

Zo so ayeke na peko ti iri ni. Atâa so tënë so atene Nzapa ayeke na iri ti lo mveni ayeke mbeni kota tâ tënë, ye so ayeke gi tongo nda ni ti hinga lo.

Ti ndoye Jéhovah na ti di iri ti lo na mabe, a lingbi azo ahinga mara ti Nzapa so lo yeke. Na ngoi so Jéhovah afa iri ti lo na Moïse na Hoto ti Sinaï, Lo sala ye mingi ahon gi tenengo peko ti iri ti lo ni “Jéhovah.” Lo gboto lê na ndo ambeni pendere salango ye ti Lo (Ex. 34:6, 7). So ayeke mbeni tapande teti e ti mû pekoni.

Atâa mo yeke fa tënë na afini zo so asala nzara ti tënë ni wala mo yeke sala devoir na yâ ti kongregation, tongana mo yeke sala tënë na ndo adeba nzoni ti Royaume, gboto lê na ndo ye so adeba nzoni so afa na ndo Nzapa so amû ni. Tongana mo yeke sala tënë ti akomandema ti lo, luti mingi na ndo ndara nga na ndoye so ayeke na yâ ni. Fa polele so aye so Nzapa ahunda azia nene ye na ndo e pëpe, me, nde na so, a yeke ndali ti nzoni ti e (Es. 48:17, 18; Mi. 6:8). Fa tongana nyen ye oko oko so Jéhovah afa ngangu ti lo na yâ ni afa na gigi mbeni ye na ndo salango ye ti lo, andia ti lo nga ye so lo leke ti sala. Gboto lê na ndo tongana nyen Jéhovah asala ye na lege ni na yâ fango na gigi asalango ye ti lo. Zia azo amä mo na fango na gigi atënë ti bê ti mo mveni na ndo Jéhovah. Ndoye so mo yeke na ni ndali ti Jéhovah alingbi ti mû maboko ti zingo mara ti ndoye so na yâ ti ambeni zo.

Tokua so a lingbi e tene fade fade na ngoi ti e ahunda na azo ti kpe mbito ti Nzapa. Na lege ti ye so e tene, a lingbi e gi ti maï mbito ti Nzapa so na yâ ti azo. Mbito so ayeke mbeni mbito so ayeke nzoni, mbeni dongo bê ndali ti Jéhovah, mbeni kota nengo lo ngangu mingi (Ps. 89:8). A hunda ti hinga so Jéhovah ayeke Juge ti kota ahon kue, na so tongana lo yeda na e, gigi ti e ti kekereke ayeke ga nzoni (Luc 12:5; aRom. 14:12). Ni la, mara ti mbito tongaso ague oko na kota ndoye ndali ti lo, nga ye so aga na pekoni ayeke mbeni kota nzara ti nzere na lo (Deut. 10:12, 13). Kpengo mbito ti Nzapa ayeke pusu e nga ti ke ye so ayeke sioni, ti yeda na akomandema ti Nzapa na ti voro lo na bê ti e kue (Deut. 5:29; 1 Chron. 28:9; aProv. 8:13). A yeke kanga lege na e ti gi na oko ngoi ti sala na Nzapa nga ti ndoye aye ti sese so.​—1 Jean 2:15-17.

Iri ti Nzapa ayeke “tour ti ngangu.” Azo so ahinga biani Jéhovah awe ayeke wara kota batango ndo. A yeke pëpe gi ngbanga ti so ala yeke sala kusala na iri ti Nzapa mveni wala ala lingbi ti fa ambeni ti asalango ye ti lo. Me a yeke ngbanga ti so ala zia bê ti ala kue na Jéhovah mveni. Na ndo ala, aProverbe 18:10 atene: “Iri ti L’Eternel [“Jéhovah”, NW ] ayeke tour ti ngangu; zo ti mbilimbili akpe dä na lo bata tele ti lo.”

Sala kusala nzoni na alege so mo yeke na ni ti wa azo ti zia bê ti ala na Jéhovah (Ps. 37:3; aProv. 3:5, 6). Mara ti ziango bê tongaso afa so azo ni amä na bê na Jéhovah nga na azendo ti lo (aHéb. 11:6). Tongana azo ‘adi iri ti Jéhovah’ ngbanga ti so ala hinga so lo yeke Gbia ti Dunia Kue, ala ndoye aye so lo hunda nga ala mä na bê kue so tâ salut ayeke ga gi na lege ti lo, fade a yeke sö ala; Tënë ti Nzapa adë bê ti e tongaso (aRom. 10:13, 14). Na ngoi so mo yeke fa ye na ambeni zo, mû maboko na ala ti maï mara ti mabe tongaso na yâ mbage oko oko ti fini ti ala.

Azo mingi ayeke na gbele angangu kpale so ahon ndo ti ala kue. Ala lingbi peut-être ti bâ pëpe mbeni yorö ndali ni. Wa ala ti manda ti hinga aye so Jéhovah aye, ti zia bê ti ala na lo na ti sala ye alingbi na ye so ala manda (Ps. 25:5). Wa ala nga ti sambela na bê kue ti tene Nzapa amû maboko na ala na ti kiri singila na lo ndali ti adeba nzoni ti lo (aPhil. 4:6, 7). Tongana ala hinga Jéhovah awe, ala yeke wara ande nzoni dutingo ndali ti so ala bâ biani na nene ni ye so iri ti Jéhovah aye ti fa. Ala yeke hinga Jéhovah na lege ti so ala bâ na yâ fini ti ala mveni gango tâ tënë ti azendo ti lo, me pëpe gi na lege ti so ala diko ambeni tënë na yâ ti Bible.​—Ps. 34:9; Jér. 17:7, 8.

Sala kusala nzoni na lege oko oko kue so azi na mo ti mû maboko na azo ti bâ na nene ni ndara ti kpengo mbito ti tâ Nzapa, Jéhovah, na ti batango akomandema ti lo.

“SALA NZONI TËNË TI JÉSUS”

NA PEKONI so lo londo na popo ti akuâ nga kozoni si lo kiri na yayu, Jésus Christ amû awango so na adisciple ti lo, lo tene: “Fade i ga atémoin ti Mbi . . . juska na nda ti sese kue.” (Kus. 1:8). A fa awakua be-ta-zo ti Nzapa ti ngoi ti laso tongana azo so ayeke “na kusala ti sala nzoni tënë ti Jésus.” (Apoc. 12:17, NW ). Mo yeke sala tënë so na bê kue tongana nyen?

Azo mingi so atene na bê ti ala kue so ala mä na bê na Jésus ahinga ye oko pëpe na ndo fini ti lo kozo ti ga na sese. Ala hinga pëpe so lo ga lani biani na sese. So lo yeke molenge ti Nzapa, ala gbu nda ni pëpe. Ala hinga ye mingi pëpe na ndo kusala ti lo na yâ gango tâ tënë ti ye so Nzapa aleke ti sala. Ala hinga pëpe ye so lo yeke sala fadeso, na ala hinga pëpe tongana nyen ye so lo yeke sala ande ayeke ndu fini ti ala. Azo ni so alingbi peut-être ti bâ na lege ni pëpe so aTémoin ti Jéhovah amä na bê pëpe na Jésus. A yeke kungba ti e ti sala kue ti fa tâ tënë na ndo aye so.

Ambeni zo nde amä na bê pëpe so mbeni zo tongana Jésus, so a sala tënë ti lo na yâ ti Bible, aduti biani lani na fini. Ambeni abâ Jésus gi tongana mbeni zo so ahon amba ti lo mingi. Azo mingi ake tënë so atene lo yeke Molenge ti Nzapa. “Ti sala nzoni tënë ti Jésus” na popo ti mara ti azo tongaso ahunda ngangu, kangango bê nga salango ye na ndara.

Atâa bango ndo ti azo so e yeke sala tënë na ala ayeke tongana nyen, tongana ala ye ti wara nzoni na lege ti ye so Nzapa aleke ti mû na azo fini ti lakue lakue, a lingbi ala hinga Jésus Christ (Jean 17:3). Ye so bê ti Nzapa aye, so lo fa ni na gigi polele, ayeke ti tene azo kue so ayeke na fini “atene na gigi so Jésus Christ ayeke Seigneur” na ala duti na gbe ti ngangu ti komande ti lo (aPhil. 2:9-11). Ni la, e lingbi pëpe gi ti kpe tënë ni tongana e tingbi na azo so aluti ngangu na ndo abango ndo ti ala so ayeke na lege ni pëpe, wala so ayeke na kota sioni bibe na mbage ti ambeni zo. Na yâ ti ambeni ye, e lingbi ti sala tënë polele na ndo Jésus Christ, atâa gi na kozo tingbingo na azo ni. Me na yâ ti ambeni ye nde, a lingbi e sala tënë na ndara ti mû maboko na azo ni ti to nda ti gbu li nzoni na ndo lo. E lingbi peut-être nga ti gbu li na ndo alege ti yôro ambeni mbage ti tënë ni nde na yâ avizite ti peko. Ye oko, e lingbi peut-être pëpe ti sala tënë ti aye so kue juska e manda Bible na mbeni zo si.​—1 Tim. 2:3-7.

Kota kusala ti Jésus na yâ ye so Nzapa aleke ti sala. A yeke ti e ti mû maboko na azo ti hinga so, ndali ti so Jésus ayeke “Lege ni” na ‘zo aga na Babâ pëpe, gi na lege ti Lo’, lege ayeke dä pëpe ti wara mbeni nzoni songo na Nzapa tongana zo ayeke na mabe na Jésus pëpe (Jean 14:6). Tongana mbeni zo ahinga pëpe kota kusala so Jéhovah amû na kozo Molenge ti lo, a yeke ngangu na lo ti gbu nda ti Bible. Ngbanga ti nyen? Ngbanga ti so Jéhovah azia Molenge ti lo ti duti kota ye so asala si ye so Lo leke ti sala atambela nzoni (aCol. 1:17-20). Aprophétie ti Bible angoro gi na tele ti ye so (Apoc. 19:10). Jésus Christ ayeke lo so na lege ti lo a mû yorö ndali ti akpale kue so kengo yanga ti Satan nga na siokpari ti Adam aga na ni.​—aHéb. 2:5-9, 14, 15.

Ti hinga kusala ti Christ, a lingbi mbeni zo ayeda so azo ayeke na yâ ti mbeni dutingo so ayeke ye ti mawa. Ala mveni ala lingbi pëpe ti zi tele ti ala dä. A dü e kue na yâ ti siokpari. Ye so alingbi ti ndu e na alege nde nde na yâ fini ti e. Ye oko, atâa lawa, ye so ayeke ga na pekoni ayeke kui (aRom. 3:23; 5:12). Fa nda ti ye so na azo so mo yeke fa tënë na ala. Na pekoni fa so, na lege ti sandaga ti Jésus Christ, na ndoye, Jéhovah asala si lege ayeke dä ti tene a zi na gbe ti siokpari na kui azo so afa na gigi so ala mä na bê na sandaga so (Marc 10:45; aHéb. 2:9). Ye so azi lege na ala ti wara fini ti lakue lakue na yâ dutingo ti mbilimbili-kue (Jean 3:16, 36). Mbeni lege nde ayeke ti lo dä pëpe (Kus. 4:12). Mo so mo yeke wafango ye, atâa so mo yeke gi na ambeni zo wala na kongregation, sala ye ahon gi ti fa aye so. Na nzobe nga na kangango bê, maï na yâ azo so mo yeke sala tënë na ala singila ndali ti kusala ti Christ tongana Wazingo zo. Singila ndali ti ye so a leke ndali ti azo alingbi ti sala kota ye mingi na ndo bango ndo ti mbeni zo, salango ye ti lo nga aye so lo zia na gbele lo ti si dä.​—2 aCor. 5:14, 15.

Biani, Jésus amû fini ti lo na sandaga gi fani oko awe (aHéb. 9:28). Ye oko, lo yeke sala kua ngangu fadeso tongana Kota Prêtre. Mû maboko na azo ti hinga ye so aye ti tene. Ndali ti salango ye na nzobe pëpe ti azo so ayeke ndulu na ala, ala yeke na gbele kota vundu, pasi wala akpale? Na ngoi so Jésus ayeke lani zo ti mitele, lo hinga aye so kue. Lo hinga atënë ti bê ti e. Ndali ti so e yeke mbilimbili-kue pëpe, e bâ so e yeke na bezoin ti be-nzoni ti Nzapa pëpe? Tongana e sambela na Nzapa ti wara pardon na lege ti sandaga ti Jésus, Jésus ayeke sala ye tongana “Avocat na tele ti Babâ”. Na bango mawa, lo yeke “sambela teti e”. (1 Jean 2:1, 2; aRom. 8:34). Na lege ti sandaga ti Jésus nga na ti akusala ti lo tongana Kota Prêtre, e lingbi ti ga ndulu “na trône ti grâce” ti Jéhovah ti wara mungo maboko na ngoi so alingbi (aHéb. 4:15, 16). Atâa so e yeke mbilimbili-kue pëpe, mungo maboko ti Jésus tongana Kota Prêtre amû lege na e ti sala na Nzapa na mbeni yingo-ti-hinga so ayeke na sioni pëpe.​—aHéb. 9:13, 14.

Na ndo ni, Jésus ayeke na kota ngangu ti komande tongana lo so Nzapa azia lo tongana Li ti kongregation ti aChrétien (Mat. 28:18; aEph. 1:22, 23). Na kamba ti kusala so, lo yeke fa lege alingbi na ye so Nzapa aye. Tongana mo yeke fa ye na azo, mû maboko na ala ti hinga so Jésus Christ, me pëpe mbeni zo ti mitele, si ayeke Li ti kongregation (Mat. 23:10). Na kozo tingbingo tele ti mo na azo so asala nzara ti tënë ni, tisa ala ti ga na abungbi ti kongregation ti mo, ndo so e yeke manda Bible na lege ti ambeti so “ngbâa be-ta-zo na ti ndara” amû ni. Fa gi na ala pëpe zo so “ngbâa” ni ayeke, me nga Maître ni ayeke zo wa, si ala hinga dutingo Mokonzi ti Jésus (Mat. 24:45-47, NW ). Fa ala na a-ancien, fa nga aye so Mbeti ti Nzapa ahunda, so a lingbi a-ancien asala ye alingbi na ni (1 Tim. 3:1-7; Tite 1:5-9). Fa so kongregation ni ayeke ti a-ancien pëpe, me so a-ancien ayeke mû maboko na e ti tambela na peko ti gere ti Jésus Christ (Kus. 20:28; aEph. 4:16; 1 Pi. 5:2, 3). Mû maboko na azo so asala nzara ti tënë ni ti bâ so mbeni bungbi so a leke yâ ni nzoni ayeke dä na ndo sese kue, so ayeke sala kua na gbe ti komandema ti Christ.

Na lege ti aÉvangile, e manda so tongana Jésus alï lani na Jérusalem ngoi kete kozoni na kuâ ti lo, adisciple ti lo asepela lo tongana “Gbia so aga na iri ti Seigneur” Jéhovah (Luc 19:38). Na ngoi so azo ayeke manda Bible alï mingi, ala yeke hinga so Jéhovah amû fadeso na Jésus ngangu ti komande so andu azo ti amara kue (Dan. 7:13, 14). Tongana mo yeke sala devoir na kongregation wala mo yeke manda Bible na azo, mû maboko na ala ti kiri singila ndali ti ye so komandema ti Jésus aye ti tene teti e kue.

Fa mbilimbili so lege so e yeke duti na fini afa wala e mä na bê biani so Jésus Christ ayeke Gbia, wala e yeda na bê ti e mveni ti duti na gbe ti komandema ti lo. Gboto lê ti azo na ndo kusala so Jésus, na pekoni so a zia lo Gbia, amû na adisciple ti lo ti sala (Mat. 24:14; 28:18-20). Sala tënë na ndo ye so Jésus, Nzoni Wawango, atene na ndo akozo ye so a lingbi zo azia na yâ fini ti lo (Es. 9:5, 6; Mat. 6:19-34). Gboto lê ti azo na ndo bibe so Mokonzi ti Siriri atene adisciple ti lo ayeke fa ande na gigi (Mat. 20:25-27; Jean 13:35). Sala hange si mo bâ pëpe so a yeke na mo ti tene so azo ayeke sala wala pëpe ye kue so ala lingbi ti sala. Me wa ala ti bi bê na ye so akusala ti ala afa na ndo dutingo ti ala na gbe ti komande ti Gbia Jésus Christ. Tongana mo yeke mû wango so, hinga so a lingbi mo sala oko ye ni.

Ziango Christ tongana gunda ti ye. Bible ahaka kusala ti sala si mbeni zo aga disciple ti Christ na kusala ti lekengo mbeni ye na ndo Jésus Christ tongana gunda ni (1 aCor. 3:10-15). Ti sala ye so, mû maboko na azo ti hinga Jésus tongana ti so a fa lo na yâ ti Bible. Sala hange si ala bâ mo pëpe tongana zo so ala yeke mû peko ti lo (1 aCor. 3:4-7). Gboto lê ti ala na ndo Jésus Christ.

Tongana a leke gere ti ye ni nzoni awe, awamandango ye ni ayeke hinga ande so Christ azia mbeni tapande teti e ti “tambela na senda ti Lo.” (1 Pi. 2:21). Ti leke ye na ndo ye so, wa awamandango ye ti diko aÉvangile tongana tapande so a lingbi a mû pekoni, me pëpe gi tongana senge mbaï so ayeke tâ tënë. Mû maboko na ala ti bata na bê ti ala abango ndo nga na asalango ye so a hinga na Jésus. Wa ala ti bâ tongana nyen Jésus andoye Babâ ti lo, tongana nyen lo sala ye na gbele atara, tongana nyen lo fa so lo duti na gbe ti komandema ti Nzapa nga tongana nyen lo sala ye na azo na yâ ti aye nde nde. Gboto lê na ndo kusala so Jésus azia asi yâ ti fini ti lo kue. Tongaso, tongana lo yeke na gbele mbeni desizion ti mû nga na gbele tara, mbeni wamandango ye ayeke hunda ande tele ti lo: ‘Jésus ayeke sala fade ye tongana nyen na gbele ye so? Gigi ti mbi afa so mbi bâ biani na nene ni ye so lo sala awe ndali ti mbi?’

Tongana mo yeke sala tënë na kongregation, tene pëpe so teti so aita ti mo amä na bê awe na Jésus, a yeke kota ye pëpe ti gboto mbilimbili lê na ndo lo. Nda ti tënë ti mo ayeke kiri ande ti ne tongana mo leke ye na ndo mabe so. Tongana mo yeke sala tënë na ndo abungbi, tingbi ni na kusala ti Jésus tongana Li ti kongregation. Tongana mo yeke sala tënë na ndo fango tënë, gboto lê mbilimbili na ndo bibe so Jésus afa na ngoi so lo yeke sala kusala ti lo, nga fa so a yeke na lege ti fango tënë so si Gbia Jésus Christ ayeke bungbi azo ti bata ala si ala lï na fini sese.

A yeke polele so a hunda ye mingi ahon gi mandango akozo tënë na ndo Jésus. Ti ga atâ Chrétien, a lingbi azo afa na gigi so ala mä na bê na lo nga ala ndoye lo biani. Mara ti ndoye tongaso ayeke pusu zo ti mä yanga na bê kue (Jean 14:15, 21). A yeke mû lege na azo ti luti ngangu na yâ mabe na gbele kpale, ti ngbâ lakue ti tambela na peko ti gere ti Christ na yâ fini ti ala kue, na ti fa na gigi so ala yeke aChrétien biazo so aluti ngangu tongana “keke so gere ni alï na sese, na [ala] kpengba dä”. (aEph. 3:17). Mara ti salango ye tongaso ayeke ga na gloire na Jéhovah, Nzapa nga na Babâ ti Jésus Christ.

“TENE-NZONI SO TI ROYAUME”

TONGANA Jésus ayeke fa anzene nzene tënë na ndo fä ti singo ti lo na ti hunzingo ti aye ti fadeso, lo tene so ye so ayeke si ande. Lo tene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.”​—Mat. 24:14.

Tokua so a lingbi a sala sabango ni na ndo kue so ayeke tâ nyen biani? A yeke na ndo Royaume so Jésus afa na e ti sambela Nzapa ndali ni, tongana lo tene: “E ye royaume ti Mo aga.” (Mat. 6:10). Apocalypse 11:15 afa ni tongana “royaume ti Seigneur ti e [Jéhovah] . . . na ti Christ ti Lo,” ngbanga ti so ngangu ti komande ni alondo na Jéhovah na a mû ni na Christ tongana Gbia. Ye oko, bâ so yâ ti tokua so Jésus atene a yeke tene pekoni laso akono mingi ahon ti so adisciple ti lo afa na ngoi ti ala. Ala tene lani na azo: “Royaume ti Nzapa aga ndulu na i.” (Luc 10:9). Jésus, lo so a sa ye na ndo ti lo tongana Gbia, ayeke lani kâ na popo ti ala. Me tongana ti so a fa pekoni na Matthieu 24:14, Jésus afa so a yeke fa ande singo ti mbeni kpengba ye nde na yâ gango tâ tënë ti ye so Nzapa aleke ti sala.

A mû na prophète Daniel mbeni suma ti kpengba ye so. Lo bâ “Zo oko tongana Molenge Ti Zo”, Jésus Christ, so ayeke wara na tïtî “Lo Ti Giriri,” Jéhovah Nzapa, “ngangu ti komande, na gloire, na royaume, si azo kue, amara kue, na azo ti yanga nde nde kue, asala na Lo”. (Dan. 7:13, 14). Ye so andu dunia kue asi na yayu na ngu 1914. Na pekoni, a bi Zabolo na ayingo sioni ti lo na sese (Apoc. 12:7-10). Aye ti fadeso asi na andangba ngoi ti ala awe. Me kozoni si a lungula ni biaku, a yeke fa fadeso na ndo sese kue so Gbia Messie ti Jéhovah ayeke komande fadeso na ndo trône ti lo na yayu. A yeke fa ye so na azo na ndo kue. Salango ye ti azo ni ayeke fa na gigi polele bango ndo ti ala na mbage ti Lo Ti Nduzu Ahon Kue so ayeke Mokonzi ti “royaume ti azo”.​—Dan. 4:32.

Tâ tënë, ambeni ye mingi angbâ ti ga, mingi ahon so! E ngbâ lakue ti sambela “e ye royaume ti Mo aga”, me pëpe na bibe ti tene so ade a leke gere ti Royaume ti Nzapa pëpe. Nde na so, a yeke na bibe ti tene so Royaume ti yayu ayeke sala ande biani mbeni ye si aprophétie tongana Daniel 2:44 na Apocalypse 21:2-4 aga tâ tënë. Fade a yeke gbian sese ti ga mbeni paradis so asi singo na azo so andoye Nzapa nga na amba ti ala azo. Na ngoi so e yeke fa “Tene-nzoni so ti royaume”, e yeke gboto lê ti azo na ndo abeku ti kekereke so. Me e yeke fa nga na azo na bê ti e kue so Jéhovah amû awe na Molenge ti lo ngangu kue ti komande. Mo yeke gboto lê ti azo na ndo nzo tënë so tongana mo yeke fa tënë na ndo Royaume?

Fango nda ti Royaume. E lingbi ti sala kusala ti e ti fa tënë ti Royaume ti Nzapa tongana nyen? E lingbi peut-être ti zingo nzara ti azo na tongo nda ti alisoro na ndo ti atënë nde nde, me a lingbi e fa polele hio so tokua ti e ayeke na ndo Royaume ti Nzapa.

Mbeni kota mbage ti kusala so andu dikongo aversê so andu Royaume wala fango peko ti atënë ni. Tongana mo sala tënë ti Royaume, sala kue si azo so mo yeke sala tënë na ala agbu nda ti ye so Royaume ni aye ti tene. Peut-être a yeke hunda ye mingi ahon gi tenengo so Royaume ti Nzapa ayeke mbeni ngorogbia. Ambeni zo alingbi ti bâ so a yeke ngangu ti tene so mbeni ye so zo alingbi ti bâ pëpe ayeke mbeni ngorogbia. Mo lingbi ti fa nda ti tënë na alege nde nde. Na tapande, zo alingbi pëpe ti bâ pupu, me a yeke sala kota ngangu na ndo fini ti e. E lingbi pëpe ti bâ zo so ayeke fa lege na pupu, me a yeke polele so lo yeke na kota ngangu. Bible asala tënë ti lo tongana “Gbia ti lakue lakue”. (1 Tim. 1:17). Wala mo lingbi ti tene so, na yâ ti mbeni kota kodoro, azo mingi ague lâ oko pëpe na li-kodoro ni wala abâ lâ oko pëpe gbia ti ala na tâ lê ti ala mveni. Ala yeke hinga ye na ndo aye so na lege ti asango. Legeoko nga, Bible, so a sigigi na ni na yanga ti kodoro ahon 2 200, asala tënë na ndo Royaume ti Nzapa; lo fa na e zo wa a mû na lo ngangu ti komande nga ye so Royaume ni ayeke sala. Tour ti Ba Ndo, so a sigigi na ni na yanga ti kodoro mingi ahon atanga ti mbeti-sango kue, ayeke fa ti lo “Tënë ti Royaume ti Jéhovah” tongana ti so a tene na kozo lembeti ni.

Ti mû maboko na azo ti hinga ye so Royaume ayeke, mo lingbi peut-être ti sala tënë ti ambeni ye so ala ye angorogbia asala. A yeke aye tongana ti duti na kpale ti nginza pëpe, ti duti na siriri, ti bâ pasi pëpe ndali ti so azo adoro ndia; nga ti tene a zia kangbi mbeni pëpe na popo ti akete mara kue, na ndo tënë ti mandango mbeti nga na ti nzoni seni. Fa so a yeke gi na lege ti Royaume ti Nzapa oko si a yeke kaï ande nzara so kue ti azo, nzara so ayeke na lege ni, nga na ambeni nde.​—Ps. 145:16.

Sala ngangu ti zingo na yâ ti bê ti azo nzara ti ga azo so ayeke duti na gbe ti Royaume ni, so Jésus Christ ayeke komande tongana Gbia na yâ ni. Fa amiracle so lo sala tongana tapande ti ye so lo yeke sala ande tongana Gbia ti yayu. Sala tënë fani mingi na ndo apendere salango ye ti lo (Mat. 8:2, 3; 11:28-30). Fa so lo mû fini ti lo ndali ti e, nga so na pekoni Nzapa azingo lo na kuâ ti wara fini na yayu na ti kui mbeni pëpe. A yeke kâ si lo yeke komande tongana Gbia.​—Kus. 2:29-35.

Fa so Royaume ti Nzapa ayeke komande fadeso na yayu. Luti mingi na ndo ni. Ye oko, hinga so mingi ti azo ayeke bâ pëpe aye so ala tene ayeke fa biani so Royaume ti Nzapa ayeke dä. Yeda na ye so, na hunda wala ala hinga ye so Jésus Christ atene a yeke duti fä ni. Gboto lê na ndo ambeni mbage ti aye so ayeke na yâ ti fä ni so a sala tënë ni na Matthieu chapitre 24, Marc chapitre 13 wala Luc chapitre 21. Na pekoni hunda ngbanga ti nyen ziango Christ na mbata ti gbia na yayu ayeke ga na mara ti aye tongaso na ndo sese. Gboto lê na ndo Apocalypse 12:7-10, 12.

Ti mû tapande ti fa tâ ye so Royaume ti Nzapa ayeke sala, diko Matthieu 24:14, na fa programme ti fango nda ti Bible na azo na ndo sese kue so ayeke tambela fadeso (Es. 54:13). Sala tënë na ndo a-ekole nde nde so aTémoin ti Jéhovah ayeke wara ye ti nzoni dä; a-ekole so kue aluti na ndo Bible, na a yeke futa ye ndali ni pëpe. Fa so na ndo ti fango tënë ti e da na da, e yeke hunda na azo nga na asewa ti manda Bible na ala na yâ ti akodoro ahon 230. Mbeni ngorogbia ti duti na mara ti kota programme ti fango ye na azo tongaso, pëpe gi na azo ti kodoro ti lo me nga na azo ti sese kue, ayeke dä? Tisa azo ti ga na Da ti Royaume, ti gue na akota bungbi ti aTémoin ti Jéhovah, ti tene ala bâ tâ na lê ti ala tongana nyen mara ti fango ye tongaso ayeke sala ye na ndo fini ti azo.​—Es. 2:2-4; 32:1, 17; Jean 13:35.

Me fade zo so mo yeke sala lisoro na lo ayeke hinga tongana nyen so ye so andu fini ti lo? A lingbi mo fa na ndara so ye so mo yeke gi ayeke ti sala lisoro na ndo lege so azi na azo kue ti soro fini tongana azo so ayeke duti na gbe ti Royaume ti Nzapa. Tongana nyen? Na lege so ala manda ti hinga ye so Nzapa ahunda nga ti sala ye alingbi na ni fadeso.​—Deut. 30:19, 20; Apoc. 22:17.

Mungo maboko na azo ti zia Royaume na kozo ndo. Atâa na pekoni so mbeni zo ayeda na tënë ti Royaume, a lingbi lo mû ambeni desizion. Lo yeke zia ande Royaume ti Nzapa na ndo wa na yâ fini ti lo? Jésus awa adisciple ti lo ti “gi royaume . . . kozoni”. (Mat. 6:33). Tongana nyen e lingbi ti mû maboko na amba ti e Chrétien ti sala ye so? E yeke sala ni na alege nde nde. Na tapande e yeke zia mbeni nzoni tapande e mveni nga e yeke sala lisoro na ndo alege nde nde so azi na gbele azo ti sala ambeni ye. Na ambeni ngoi, e yeke hunda na mbeni zo wala lo bâ awe ambeni lege so azi na lo ti sala ye, nga e yeke sala tënë na ndo aye so asi ti fa ye so ambeni zo nde ayeke sala. E yeke sala lisoro na ndo atondo ti Bible na mbeni lege so asala si atondo so akiri akono ndoye so mbeni zo ayeke na ni na mbage ti Jéhovah. E yeke fa so Royaume ni ayeke komande biani. E yeke gboto lê na ndo tongana nyen kusala ti fango tënë ti Royaume ayeke biani kota ye. Mingi ni zo ayeke sala ye ti nzoni, pëpe na lege ti so lo tene na azo ye so a lingbi a sala, me na lege ti so lo zia na yâ ala nzara ti sala ni.

Biani, kota tokua so a lingbi e kue e tene aluti kozoni kue na ndo Jéhovah Nzapa, Jésus Christ nga na ndo Royaume. A lingbi e sigigi na kpengba tâ tënë so na yâ fango tënë ti e, na yâ ti kongregation ti e nga na yâ fini ti e mveni. Tongana e sala ye so, e yeke fa na gigi so e yeke wara biani ye ti nzoni na lege ti Ekole ti Kusala ti aChrétien.

A LINGBI AZO KUE AMÄ. . .

  • So Jéhovah ayeke Wasalango yayu na sese.

  • So Jéhovah ayeke oko tâ Nzapa.

  • So Jéhovah ayeke mbeni Nzapa so ayeke na ndoye so ayeke nde mingi, lo yeke na ndara so ahon atanga ni kue, mbilimbili ti lo alingbi kue nga ngangu ti lo ahon ye kue.

  • So e yeke na tënë ti kiri na Jéhovah ndali ti ye so e sala.

A LINGBI VORONGO JÉHOVAH. . .

  • Aluti na ndo ndoye so e yeke na ni ndali ti lo.

  • Alondo na bê so ayeke oko, pëpe na bê so andoye nga aye ti sese so.

  • Afa na gigi tongana nyen e bâ na nene ni dutingo na nzoni songo na lo.

MÛ MABOKO NA AZO TI HINGA . . .

  • So mbeni zo alingbi ti wara nzoni songo na Nzapa gi na lege ti Jésus Christ.

  • So a lingbi ti zi zo na yâ ti siokpari na kui gi na lege ti mabe na Jésus Christ.

  • So ye so Nzapa aye ayeke ti tene azo kue ayeda na Jésus tongana Seigneur, pëpe gi na lege ti so ala hiri lo Seigneur me na lege ti so ala bata akomandema ti lo.

  • So ye so Bible atene na ndo Jésus Christ ayeke tâ tënë, me so mingi ti aye so aÉglise atene na ndo lo aba yâ ti aye so ayeke tâ tënë.

HUNDA TELE TI MO:

  • Mbi fa polele so mbi hinga nzoni mingi kusala ti Jésus Christ tongana zo so Nzapa azia lo tongana Li ti kongregation?

  • Singila ndali ti sandaga ti Christ ayeke mbeni kpengba ye so ayeke pusu mbi ti sala ye tongana ti so a hunda?

  • Tongana nyen mbi lingbi ti sala si akusala ti mbi ague oko biani na tapande so Molenge ti Nzapa azia?

ZIA AZO AMÄ . . .

  • So Royaume ti Nzapa akomande fadeso na yayu, nga so na yâ ngoi kete a yeke lungula komandema ti azo kue.

  • So Royaume ayeke gbian ande sese ti ga mbeni paradis so asi singo na azo so andoye Nzapa nga na amba ti ala azo.

  • So gi na lege ti Royaume oko si a yeke kaï ande biaku nzara kue ti azo, nzara so ayeke na lege ni.

  • So na lege ti ye so e yeke sala fadeso e yeke fa so e yeda ti ga azo so aduti na gbe ti Royaume ti Nzapa.

HUNDA TELE TI MO:

  • Fini ti mbi afa so mbi yeke gi Royaume kozoni?

  • Ambeni ye ayeke dä so mbi lingbi ti gbian ti sala ye so mingi ahon ti kozo?

  • Mbi lingbi ti sala nyen ti zingo nzara ti gi Royaume kozoni na yâ ambeni zo nde?

    Ambeti na Sango (1997-2025)
    Sigi
    Linda
    • Sango
    • Kangbi ni na mbeni zo
    • Aye so mo ye
    • Copyright © 2025 Watch Tower Bible and Tract Society of Pennsylvania
    • Lege ti sara kua na ni
    • Ye so a yeke sara na asango so mo mû
    • Paramètres de confidentialité
    • JW.ORG
    • Linda
    Kangbi ni na mbeni zo