Jéhovah ayeke bâ ndo na ndo asenge zo

TONGANA e ye ti gboto lê ti Nzapa na ndo e, a hunda na e ti tene salango ye ti e ahon ti tanga ti azo wala apika bê ti azo mingi? A tene so Abraham Lincoln, président 16 ni ti Amerika, amû mbeni lâ tënë so: “Seigneur aye ti lo gi asenge zo. Nda ni la si lo sala ala mingi tongaso.” Azo mingi abâ tele ti ala so ala yeke gi asenge zo so mbeni ye ti ala ayeke dä pëpe. Ti duti senge zo alingbi peut-être nga ti tene “ti duti wanzinga, ti duti na gbe ti tanga ti azo.” Legeoko nga, tongana a sala tënë ti “senge” zo, a lingbi ti duti mbeni zo so awara pëpe mbeni kota matabisi wala mbeni dutingo so ayeke nde, mbeni zo so alingbi pëpe na tanga ti azo, wala même mbeni zo so ayeke na peko mingi. Mara ti azo wa mo ye ti ga ndulu na ala? Azo ti fandara wala ti baba? Wala mo ye azo so ayeke sala ye na nzobe, azo so ayeke na tâ be-ti-molenge, so ayeke na fandara pëpe na so ayeke bi bê mingi na ndo amba ti ala?

Teti so laso azo aye mingi ti sala ye na ngangu na amba ti ala na nga ti he ala, ambeni abâ so a yeke ngangu ti mä na bê so Nzapa ayeke bi bê ti lo na ndo ala oko oko kue. Mbeni koli so ayeke diko ka périodique so, atene: “A dü mbi na yâ mbeni sewa so afa na gigi ndoye mingi pëpe. A bâ mbi tongana mbumbuse zo, a zia kamene na lê ti mbi, na a he mbi. Ni la, gi na tongo nda ti alâ ti fini ti mbi, mbi bâ tele ti mbi so mbi yeke ye oko pëpe. A yeke tâ ngangu mingi na mbi ti lungula abibe so, na tongana lakue mbeni ye ti ngangu asi na mbi, mbi kiri mbi yeke wara abibe so na a yeke sala si mbi nze.” Ye oko, anda ti tënë ayeke dä ti mä na bê so Nzapa ayeke bi bê na ndo asenge zo oko oko kue.

Nzapa ayeke bi bê ti lo na ndo asenge zo

Gbia David asû na mbeti: “L’Eternel ayeke kota, na a lingbi azo asepela Lo mingi; zo alingbi gi nda ti kota ti Lo pëpe.” (Psaume 145:3). Ye oko, ye so akanga lege pëpe na Jéhovah ti bâ ndo na ndo e na lege ti ndoye na ti be-nzoni (1 Pierre 5:7). Na tapande, wasungo psaume atene: “L’Eternel ayeke ndulu na azo so bê ti ala afâ awe, na Lo sö ala so yingo ti ala ayeke na vundu.”​—Psaume 34:19.

Aye so agboto lê mingi na sese so, na tapande pendere ti tele, yango iri, wala mosoro ayeke pëpe aye so ayeke kota na lê ti Nzapa. Ndia so Nzapa amû lani na Israël afa so lo yeke bâ ndo na nzobe na ndo awanzinga, anyindu, awomua, na awande. Na azo ti Israël so a sala nga sana mingi na ala na Egypte, Nzapa atene: “A lingbi mo sala sioye wala ye ti ngangu na wande pëpe . . . A lingbi i sala ye ti vundu na awomua pëpe wala na amolenge so babâ ti ala ayeke pëpe. Tongana mo sala ye ti vundu na ala, na ala toto na Mbi, fade Mbi mä toto ti ala biani”. (Exode 22:21-24). Na ndo ni, prophète Esaïe afa so lo hinga biani so fade Nzapa ayeke bâ ndo na ndo asenge zo tongana lo tene: “Mo yeke Gbada Ti Bira ti zo so ayeke na ngangu pëpe, Gbada Ti Bira ti zo so ye amanke lo na yâ vundu ti lo, Ndo Ti Bata Tele ngbanga ti pupu ti ngu, na Gbede ti bata zo teti sungo ti lâ, na lâ ni so mbö ti yanga ti azo so asala ngangu na zo ayeke tongana pupu ti ngu so aya mingi na tele ti gbagba ti bira.”​—Esaïe 25:4.

Na yâ kusala ti lo na sese, Jésus Christ, so ayeke “tâ image” ti Nzapa, aga mbeni tapande teti adisciple ti lo na fango so lo yeke bi bê ti lo biani na ndo asenge zo (aHébreu 1:3). Tongana lo bâ azo mingi so “ye nde nde agi ala, na ala kangbi kirikiri tongana angasangbaga so ayeke na berger pëpe”, ‘mawa agbu lo’.​—Matthieu 9:36.

Bâ nga mara ti azo wa Jésus asoro ti ga abazengele ti lo; a yeke azo so a fa ala tongana “azo so amanda mbeti pëpe, na ala yeke azo senge”. (Kusala 4:13). Na peko ti kuâ ti Jésus, adisciple ti lo ato nda ti tisa mara ti azo nde nde ti mä Tënë ti Nzapa. Bazengele Paul asû na mbeti so ‘mbeni senge zo wala zo so amä na bê pëpe’ alingbi ti lï na yâ kongregation ti aChrétien na ti ga mbeni zo so amä na bê (1 aCorinthien 14:24, 25, Mbeti ti Nzapa, Fini Mbuki, 2001). A hon ti soro gi ala so a yeke yekia ala na bango ndo ti sese so, Nzapa asoro asenge zo mingi teti kusala ti lo. Bazengele Paul atene: “Aita, i bâ lege so Nzapa ahiri i, Lo hiri azo mingi pëpe so sese so abâ ala tongana awandara, Lo hiri azo mingi pëpe so ayeke na ngangu, na Lo hiri azo mingi pëpe so a dü ala na kota ndo. Me Nzapa akamata ye ti buba ti sese so, ti sala si kamene amû lê ti ala so ayeke na ndara; na Nzapa akamata ye ti ngangu pëpe ti sese so, ti sala si kamene aga na ndo ye so ayeke na ngangu; na ye senge ti sese so, na ye so azo ake, ye so ayeke ye pëpe, Nzapa akamata ye ni so ti sala si ye so ayeke aga ye senge, si zo oko alingbi yä iri ti lo mveni pëpe na gbele Nzapa.”​—1 aCorinthien 1:26-29.

Laso, Nzapa angbâ lakue ti bi bê ti lo biani na ndo e. Ye so lo ye ayeke ti tene “azo kue awara salut, na ahinga tene-biani mbilimbili.” (1 Timothée 2:4). Tongana Nzapa andoye azo mingi si lo to Molenge ti lo na sese ti kui teti e, e yeke na nda ti tënë oko pëpe ti bi bê so zo oko aye e pëpe wala e yeke ye oko pëpe (Jean 3:16). Jésus Christ afa na adisciple ti lo nene ti sala ye même na mbage ti lo so ayeke kete mingi ti aita ti Christ na lege ti yingo, tongana ti so ala yeke sala na mbage ti Jésus lo mveni. Lo tene: “Teti i sala ye so na mbeni zo so ayeke kete na popo ti aita ti Mbi, i sala so na Mbi.” (Matthieu 25:40). Atâa lege so sese alingbi ti bâ na e, tongana e ndoye tâ tënë, e yeke na ngele mingi na lê ti Nzapa.

A yeke bibe so Francisco,a mbeni molenge-koli ti Brésil so babâ ti lo ayeke dä pëpe, awara lani na pekoni so lo to nda ti lë songo na Nzapa. Lo tene: “Hingango Jéhovah na bungbi ti lo amû maboko na mbi ti hon ndo ti abibe ti mbi ti mbito na ti kamene. Mbi manda so Jéhovah ayeke bi bê ti lo na ndo zo oko oko kue na popo ti e.” Jéhovah aga mbeni tâ Babâ teti Francisco biani.

Jéhovah ayeke bi bê ti lo na ndo apendere

Jéhovah ayeke bi bê ti lo mingi na ndo apendere; lo yeke bi bê ti lo pëpe gi na ndo bungbi kue ti apendere ni, me na ndo pendere oko oko kue. Biani, atâa e yeke pendere wala mbakoro, e ye lâ oko pëpe ti bâ tele ti e so e yeke nzoni mingi ahon tanga ti azo kue. Ye oko, e lingbi peut-être ti duti na akode nga na alengo so Nzapa alingbi ti sala na kusala kekereke. Jéhovah ahinga aye wa a lingbi e leke na yâ salango ye ti e nga fango lege wa a lingbi e wara ti tene e sala kusala nzoni kue na akode nga alengo so e yeke na ni. Na tapande, bâ tondo so a mû ni na 1 Samuel chapitre 16. Teti so Samuel abâ ti lo so ambeni zo nde alingbi nzoni mingi fade ti ga gbia, Jéhovah afa anda ti tënë wa apusu Lo ti soro David so ayeke tanga ti amolenge ti Jessé ti koli, ti duti ande gbia na Israël, lo tene: “Mo zia bê ti mo na pendere ti lo [yaya ti David ti koli] pëpe, wala na yongo ti lo nga pëpe; teti Mbi ke lo awe. L’Eternel abâ ye pëpe tongana so zo abâ ye, teti zo abâ lê ti zo, me L’Eternel abâ bê ti lo.”​—1 Samuel 16:7.

Apendere laso alingbi ti duti na beku biani so Jéhovah ayeke bi bê ti lo tâ na ndo ala? Bâ tapande ti Ana, mbeni maseka-wali ti Brésil. Legeoko tongana ambeni pendere mingi, bê ti lo aso na lege so azo ayeke doro na ndia na ayeke sala ye kirikiri. Na pekoni, babâ ti lo ato nda ti gue na lo nga na aita ti lo ti wali na abungbi ti aChrétien. Tongana ngoi ayeke hon, lo to nda ti wara ngia na yâ ye so lo yeke manda na yâ Tënë ti Nzapa. Ana ato nda ti diko Bible legeoko na ambeti so aChrétien asala, na nga ti sambela Jéhovah Nzapa. Yeke yeke, lo to nda ti lë tâ songo na Nzapa. Lo tene: “A nzere ka na mbi mingi ti kpe na vélo ti mbi juska na mbeni kete hoto so ayeke ndulu na da ti mbi; kâ, mbi lingbi ti bâ apendere lindango ti lâ. Mbi sambela Jéhovah na mbi kiri singila na lo teti nzobe na bibe ti lo ti mû ye na zo, na mbi tara ti fa na gigi tâ kota ndoye ti mbi na mbage ti lo. Hingango Jéhovah Nzapa nga na aye so lo leke ti sala amû na mbi siriri ti bibe na mbi yeke pëpe na mbito ti mbeni kpale.” Mo nga kue mo yeke gi ti wara ngoi ti gbu li na ndo lege so Jéhovah ayeke bâ ndo na ndo mo na lege ti ndoye?

E yeke yeda so ndo so e londo dä alingbi ti sala si a duti ngangu na e ti lë tâ songo na Jéhovah. Mû tapande ti Lidia. Tongana lo zi bê ti lo na babâ ti lo ti fa tâ kota gingo bê ti lo na ndo mbeni ye, babâ ti lo atene gi: “So gi asenge tënë la.” Atâa so lo bâ so babâ ti lo aye si lo girisa kpale ni, Lidia atene: “Mandango Bible amû na mbi ye kue so mbi yeke na nzara ni, na même ye mingi ahon so. Anzoni salango ye ti Jéhovah so ayeke gboto zo na mbage ti lo asala si lo ga tâ kota ndeko ti mbi. Fadeso, mbi yeke na mbeni Babâ so ayeke na ndoye na so alingbi ti gbu nda ti akpale ti mbi; mbi lingbi ti zi bê ti mbi kue na lo ti fa abibe ti mbi na anzene nzene ye so ayeke mû mbito na mbi. Mbi lingbi ti mû angbonga mingi ti sala tënë na Kota zo ti ndagigi kue, na dutingo na beku so fade lo yeke mä sambela ti mbi.” Aversê tongana aPhilippien 4:6, 7 amû lani maboko na lo ti bâ lege so Jéhovah ayeke bâ ndo na ndo lo na lege ti ndoye. Versê ni atene: “I gi bê ti i na ye oko pëpe; me na yâ ye kue i fa na Nzapa ye so i ye, na lege ti sambela na ti hunda mingi na tënë ti merci. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.”

Ye ti mungo maboko na mo na ndo aye so atia mo

Jéhovah afa gingo bê ti lo teti awakua ti lo oko oko nga teti kongregation ti azo ti lo kue na ndo sese. E lingbi nga ti fa ndoye ti e na mbage ti Babâ ti e ti yayu tongana e mû ngoi ti sala tënë na lo. A lingbi e bâ songo ti e na lo lâ oko pëpe tongana senge ye. David ayeke gi bê ti lo lani lakue na ndo songo ti lo na Jéhovah. Lo tene: “O L’Eternel, fa na mbi lege ti Mo; fa nda ti lege ti Mo na mbi. Fa lege ti tene-biani ti Mo na mbi, fa nda ti tënë na mbi, teti Mo yeke Nzapa ti salut ti mbi; mbi yeke ku Mo lakue.”​—Psaume 25:4, 5.

Tënë ti lë tâ songo na Nzapa alingbi peut-être ti duti fini tënë na mo. Atâa akpale so mo lingbi ti wara, mo lingbi lakue ti duti na beku biani so fade Lo ti Nduzu Ahon Kue ayeke wara lege ande ti mû maboko na mo tongana ti so bê ti lo aye (1 Jean 5:14, 15). Tongaso, manda ti tene asambela so andu aye mbilimbili na so tongana mo yeke tene ni, mo yeke bi bê na aye so asi na mo nga na aye so atia mo.

Nene ti gi ti hinga nzoni aye so atia e asigigi polele na yâ sambela so Gbia Salomon amû na ngoi ti matanga ti zingo yanga ti temple; lo tene: “Tongana boma aya na sese ni, tongana kobela ti futi kodoro ayeke, tongana pupu ti wâ ahule ye, wala tongana kuka, wala akih, wala azeze ayeke; tongana awato ti ala angoro mbeni kodoro ti sese ti ala; tongana kobela nde nde ti futi kodoro, wala mbeni kobela nde ayeke; na tongana mbeni zo, wala azo ti Israël kue, asambela Mo na ahunda Mo, na azo oko oko kue ti ala kue ahinga kobela ti ala na vundu ti ala mveni, . . . Mo mä tënë so na yayu . . . na Mo pardone ala, . . . Mo futa azo oko oko kue alingbi na lege ti ala kue”. (2 Chronique 6:28-30). Biani, gi mo oko si ‘mo hinga kobela ti mo na vundu ti mo mveni.’ Tongaso, a yeke tâ kota ye mingi teti e ti hinga atâ ye so atia e nga atâ ye so e yeke na nzara ni! Tongana mo sala tongaso, “fade [Jéhovah ayeke] mû na mo ye so bê ti mo aye.”​—Psaume 37:4.

Kpengba songo ti mo na Jéhovah

A nzere mingi na Jéhovah ti zia asenge zo alë tâ songo na lo. Tënë ti Lo adë bê ti e tongaso: “Mbi ga Babâ ti i, na fade i yeke amolenge ti Mbi ti koli na amolenge ti Mbi ti wali, Seigneur Ti Ngangu Ahon Kue atene.” (2 aCorinthien 6:18). Biani, Jéhovah na Molenge ti lo aye si e wara ye ti nzoni nga na fini ti lakue lakue. A yeke tâ ye ti kpengbango zo mingi ti hinga so fade Jéhovah ayeke mû maboko na e ti yô akungba ti e na yâ sewa, na ndokua ti e, nga na yâ kongregation ti aChrétien!

Ye oko, e kue e yeke tingbi na angoi ti ngangu. Kpale ti seni, ti sewa, ti nginza, nga na ambeni ye nde alingbi ti mû vundu na e. E lingbi peut-être pëpe ti hinga lege ti hon ndo ti mbeni tara wala mbeni ye ti ngangu. Tongana e yeke tingbi na aye ti ngangu na peko ti tele, a yeke sioni wabingo tënë na li ti e Satan Zabolo, lo so ayeke tiri bira ti yingo na azo ti Nzapa, si ayeke na gunda ni, atâa polele wala na mayele. Ye oko, mbeni zo ayeke dä so ahinga akpale ti e nzoni, na so ayeke mû maboko na e ti bata nzoni songo na Jéhovah. Zo ni so ayeke gi Jésus Christ na yâ kota ndo ti lo na yayu. E diko: “Teti e yeke na Kota Sacrificateur pëpe, so alingbi ke ti sala be-nzoni na ndo so e yeke na ngangu pëpe; me a tara Lo na ye kue legeoko tongana e, me Lo sala siokpari pëpe. Tongaso, a lingbi e gue na trône ti grâce na mbito pëpe, si e lingbi wara be-nzoni na grâce ti sala na e na lâ ni so ye amanke e.”​—aHébreu 4:15, 16.

So tâ ye ti dengo bê ti hinga so a hunda pëpe na mbage ti e ti tene azo ahinga e mingi wala ti duti na mosoro mingi si e lingbi ti nzere na lê ti Nzapa! Même tongana e yeke na ngangu ye ti vundu, zia e duti tongana wasungo psaume so atene: “Mbi yeke wanzinga na ye amanke mbi mingi; me Seigneur abi bê ti Lo na mbi. Mo yeke Zo ti sala na mbi, na Sauveur ti mbi; O Nzapa ti mbi, Mo ku pëpe.” (Psaume 31:10-15; 40:18). Hinga biani so Jéhovah andoye azo ti tâ be-ti-molenge, asenge zo. Biani, ‘ye kue so e gi bê ti e dä, e zia na tïtî Lo, teti Lo yeke bata e.’​—1 Pierre 5:7.

[Kete tënë na gbe ni]

[Afoto na lembeti 29]

Mingi ti adisciple ti Jésus ayeke lani asenge zo so ague na akota da-mbeti pëpe

[Foto na lembeti 30]

A-Chrétien ayeke tiri ti bata ngangu mabe

[Afoto na lembeti 31]

A hunda pëpe na e ti duti kota zo si e nzere na lê ti Nzapa