“A mû ye na i senge senge, i mû ye na azo senge senge”

“A MÛ ye na i senge senge, i mû ye na azo senge senge.” (Matthieu 10:8). Jésus amû wango so na abazengele ti lo tongana lo to ala ti fa nzo tënë. Abazengele asala ye lani alingbi na tënë ti lo so? Biani, ala sala ye alingbi na ni, na ala ngbâ lani ti sala tongaso même na pekoni so Jésus azia ala na sese ahon.

Na tapande, tongana Simon so ayeke giriri mbeni zo ti yorö abâ angangu ti salango amiracle so abazengele Pierre na Jean ayeke na ni, lo hunda ti mû nginza na ala si ala mû nga ngangu so na lo. Me Pierre azingo na Simon, lo tene: “[Zia] argent ti mo akui legeoko na mo, teti mo bi bê ti mo ti wara matabisi ti Nzapa na lege ti nginza.”​—Kusala 8:18-20.

Bazengele Paul afa na gigi mara ti bibe so Pierre ayeke na ni. Paul alingbi fade ti hunda na aita ti lo Chrétien ti Corinthe ti bâ lege ti aye kue so atia lo, na tongaso ti duti mbeni kungba so ane na ndo ti ala. Ye oko, lo sala kusala na maboko ti lo mveni ti wara aye so atia lo (Kusala 18:1-3). Na lege so, lo lingbi lani ti tene na bê kue so lo fa nzo tënë na azo ti Corinthe “senge senge”.​—1 aCorinthien 4:12; 9:18.

Mawa ni ayeke so, azo mingi so atene ala yeke adisciple ti Christ afa pëpe so ala kue ayeke ndulu ti ‘mû ye senge senge’. Mingi ti amokonzi ti lege ti vorongo ti Chrétienté ayeke ‘fa tënë teti futa’. (Michée 3:11). Ambeni mokonzi ti vorongo aga akota zo ti mosoro na lege ti nginza so ala ro na tïtî azo ti église ti ala. Na ngu 1989, a bi na da ti kanga teti angu 45 mbeni évangéliste ti Amerika. Ngbanga ti nyen? Lo “nzi na tïtî azo so amû peko ti lo anginza alingbi na dollar kutu mingi na lo sala kusala na ambeni mbage ti nginza ni ti vo ada, akutukutu, ti gue na vacance, na même ti vo da ti mbo ti lo so climatiseur ayeke dä.”​—People’s Daily Graphic, ti lango 7 ti octobre ngu 1989.

Mbeti-sango Ghanaian Times ti lango 31 ti mars ngu 1990 atene so na Ghana, mbeni prêtre catholique ti Rome amû nginza so a wara na ngoi ti mbeni messe ti église, na lo bi ni na azo ni. Ngbanga ti nyen? Mbeti-sango ni afa so a yeke “ngbanga ti so ti ala so ayeke akangba, a yeke ku fade na mbage ti ala ti bi akota nginza ahon so.” Ndani la si mingi ti ambeni église atara même ti zingo nzara ti warango aye na yâ azo ti église ti ala, na pusungo ala na wâ ti mû mbage na angia ti nginza nga na ambeni ye ni tongaso ti wara pata.

Me aTémoin ti Jéhovah ayeke sala tongaso pëpe. Ala yeke sala ti ala ngangu ti mû tapande ti Jésus na ti akozo disciple ti lo. A yeke wara pëpe na li ti ala akota zo ti vorongo so ala yeke futa ala. Témoin oko oko ayeke mbeni wafango tënë so kungba ti lo ayeke ti fa “Tene-nzoni so ti royaume” na amba ti lo (Matthieu 24:14). Azo so wungo ti ala ahon kutu omene abi tele ti ala ti mû “ngu so amû fini” senge senge na azo (Apocalypse 22:17). Na salango tongaso, même ala so ayeke “na nginza pëpe” alingbi ti wara nzoni na lege ti tokua ti Bible (Esaïe 55:1). Atâa so a yeke a-offrande so azo ayeke mû na bê ti ala kue si ayeke mû ngangu na kusala ti ala na ndo sese kue, aTémoin ni ayeke hunda nginza lâ oko pëpe. Teti so ala yeke awakua ti Nzapa, ala yeke pëpe azo ti ‘mû tënë ti Nzapa ti dë buze na ni’, me ala yeke ‘tene tâ tënë’ tongana azo so ‘Nzapa si atokua ala’.​—2 aCorinthien 2:17, Fini Mbuki, 2001.

Ye oko, ngbanga ti nyen aTémoin ti Jéhovah ayeke ndulu ti mû maboko na amba ti ala na ti sala ni na nginza ti ala mveni? Ye nyen apusu ala ti sala ni? Tongana a tene so ala yeke mû ye senge senge, so aye ti tene so ala yeke bi tele ti ala dä kue me futa ti peko ti angangu ti ala ni ayeke dä pëpe?

Mbeni kiringo tënë na tënë ti kite so Satan abi

Kozo ye so ayeke pusu atâ Chrétien laso na kusala ayeke so ala ye ti nzere na Jéhovah; a yeke pëpe ti gi ti wara mosoro mingi teti ala mveni. Tongaso, lege ayeke dä teti e ti kiri tënë na mbeni tënë ti kite so Satan abi na sese a sala fadeso angu mingi awe. Na ndo mbeni zo ti mbilimbili so iri ti lo ayeke Job, Satan agi Jéhovah na tënë na hundango na lo: “Job akpe mbito ti Nzapa senge senge?” Satan abi tënë na li ti Job na tenengo so Job ayeke sala lani na Nzapa gi ngbanga ti so Lo sala mbeni gbagba na tele ti lo ti bata lo. Satan atene so tongana a lungula aye ti mosoro ti Job kue, fade lo yeke zonga Nzapa na lê ti Lo mveni!​—Job 1:7-11.

Ti kiri tënë na Satan, Nzapa azia lege na lo ti tara Job; lo tene: “Bâ, ye ti lo kue ayeke na tïtî mo.” (Job 1:12). Ye ti pekoni ayeke so wa? Job afa na gigi so Satan ayeke gi mbeni zo ti mvene. Atâa aye ti ngangu so asi na lo, Job angbâ lakue be-ta-zo. Lo tene: “Fade mbi zia mbilimbili ti mbi pëpe juska mbi kui.”​—Job 27:5, 6.

Atâ wavorongo Nzapa laso afa na gigi mara ti bango ndo ti Job so. Kusala ti ala teti Nzapa aluti pëpe na ndo nzara ti ala ti wara gi aye ti mitele.

Matabisi ti grâce so Nzapa amû senge senge

Mbeni nda ti tënë nde so a sala si atâ Chrétien ayeke ndulu ti ‘mû ye senge senge’ ayeke so ala mveni nga, Nzapa ‘amû ye na ala senge senge’. Azo ayeke na gbe ti ngbâa ti siokpari na kui ngbanga ti siokpari ti kotara ti e Adam (aRomain 5:12). Na lege ti ndoye, Jéhovah aleke ti tene Molenge ti lo akui kuâ ti sandaga, na a yeke mbeni ye so a hunda lani ye mingi na mbage ti Nzapa. Azo alingbi biani oko pëpe na ye so, teti a yeke mbeni matabisi so alondo na Nzapa.​—aRomain 4:4; 5:8; 6:23.

Tongana ti so a sû ni na aRomain 3:23, 24, Paul atene nga na aChrétien so a sa yingo na ndo ti ala: “Azo kue asala siokpari awe, ala lingbi na gloire ti Nzapa pëpe; na lege ti grâce ti Lo, so ayeke matabisi, A diko ala azo ti mbilimbili, na lege ti ton e na yâ Christ Jésus.” Ala so ayeke na beku ti ngbâ na fini teti lakue lakue na sese ayeke wara nga nzoni na lege ti mbeni “matabisi”. Matabisi so amû nga lege na ala ti tene a diko ala azo ti mbilimbili, andeko ti Jéhovah.​—Jacques 2:23; Apocalypse 7:14.

Sandaga ti kota ngele ti Christ azi nga lege na aChrétien kue ti sala na Nzapa tongana awakua ti lo. Bazengele Paul asû na mbeti: “Mbi ga zo ti kusala ti [tënë so a honde] na lege ti grâce ti Nzapa so Lo mû na mbi na lege ti kusala ti ngangu ti Lo.” (aEphésien 3:4-7). Teti so a hiri atâ wakua ti Nzapa na kusala so na lege ti mbeni matabisi so ala lingbi na ni pëpe wala so ala lingbi pëpe ti wara ni ala mveni, ala lingbi pëpe ti ku ti tene a futa ala na mbeni ye teti so ala yeke fa nzo tënë ti matabisi so na amba ti ala.

Nyen si ayeke na gunda ti nzara ti fini ti lakue lakue?

Ye so aye ti tene so Nzapa ayeke ku na mbage ti aChrétien ti sala na lo na beku oko pëpe ti wara mbeni futa na pekoni? Oko pëpe, teti bazengele Paul atene na aita ti lo na yâ vorongo: “Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo.” (aHébreu 6:10; Deutéronome 32:4). Nde na so, Jéhovah ayeke “Zo ti futa ye na ala so agi Lo.” (aHébreu 11:6). Me zendo ti wara fini ti lakue lakue na yâ paradis ayeke pëpe mbeni ye ti pusungo zo ti gi ye gi teti lo mveni?​—Luc 23:43.

Oko pëpe. Mbeni nda ti tënë ni ayeke so nzara ti duti na fini ti lakue lakue na yâ paradis na sese alondo na Nzapa mveni. A yeke lani lo si afa beku so na kozo koli na kozo wali (Genèse 1:28; 2:15-17). Lo fa nga so lo yeke kiri ti sala si beku so aga tâ tënë tongana Adam na Ève agirisa ni lani teti amolenge ti ala. Ni la, Nzapa amû zendo na yâ Tënë ti lo so “création mveni aku si A zi lo na yâ ye ti futi so asala lo na ngbâa, na A zia lo na yâ liberté ti gloire ti amolenge ti Nzapa.” (aRomain 8:21). Ni la, a yeke tâ na lege ni teti aChrétien laso, legeoko na ti Moïse giriri, ti “zia bê ti [ala] na futa so ayeke ga.” (aHébreu 11:26). Nzapa amû futa so pëpe mo bâ mo tene lo yeke pete goro na ala. Lo mû ni tâ na ndoye teti ala so asala na lo (2 aThessalonicien 2:16, 17). Ndali ti salango ye ti lo so, “e yeke na ndoye, teti Lo ndoye e kozoni.”​—1 Jean 4:19.

Nzoni bibe so apusu e ti sala na Nzapa

Ye oko, a lingbi aChrétien laso agi na ngangu ti bâ abibe wa biani ayeke pusu ala ti sala na Nzapa. Na mbeti ti Jean 6:10-13, e diko so Jésus asala miracle ti mû kobe na gbâ ti ambeni zo so wungo ti ala ahon saki oku. Na pekoni, ambeni ato nda ti mû peko ti Jésus gi ngbanga ti warango ye teti ala mveni. Jésus atene na ala: “I gi Mbi . . . teti i te mapa na yâ ti i asi.” (Jean 6:26). Angu mingi na pekoni, ambeni Chrétien so amû tele ti ala na Nzapa asala legeoko tongaso nga; ala sala na Nzapa me ‘bê ti ala ayeke sioni’. (aPhilippien 1:17, FM 01). Ambeni so ‘ayeda pëpe na nzo tënë ti Jésus Christ’ agi même alege ti wara faïda teti ala mveni na lege ti bungbingo ti ala na aChrétien.​—1 Timothée 6:3-5.

Laso, mbeni Chrétien so asala na Nzapa gi teti so lo ye gi ti wara fini ti lakue lakue na yâ Paradis alingbi nga ti duti zo so ayeke sala na Nzapa gi ti wara ye teti lo mveni. Na nda ni, lo lingbi ti tï na lege ti yingo. Teti so ye ni akpa mo bâ mo tene sese ti Satan aninga mingi ahon ngoi so lo yeke ku tele ti lo fade na ni, lo lingbi ti ‘nze’ wala ti woko, na bango so a kiri na futingo ti aye so na peko (aGalate 6:9). Bê ti lo alingbi même ti so teti aye ti mitele so lo zia lani. Jésus adabe e tongaso: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue.” (Matthieu 22:37). Biani, tongana mbeni zo so ayeke sala na Nzapa kozoni kue ngbanga ti ndoye, lo yeke tene na yâ li ti lo pëpe so lo yeke sala na Nzapa gi teti mbeni ngoi tongaso. Lo leke ti sala na Nzapa teti lakue lakue! (Michée 4:5). Lo wara vundu pëpe na aye so kue lo zia ndali ti kusala ti lo teti Nzapa (aHébreu 13:15, 16). Ndoye teti Nzapa apusu lo ti zia aye ti Nzapa na kozo ndo na yâ fini ti lo.​—Matthieu 6:33.

Laso, atâ wavorongo Nzapa so wungo ti ala ahon kutu omene “amû ala mveni na nzobe” na yâ kusala ti Jéhovah (Psaume 110:3). Mo yeke na popo ti ala? Tongana mo yeke na popo ti ala pëpe, tara ti gbu li na ndo ye so Nzapa amû: nzoni hingango tâ tënë (Jean 17:3); sigingo na gbe ti ngbâa ti afango ye ti wataka ti alege ti vorongo (Jean 8:32); beku ti fini ti lakue lakue (Apocalypse 21:3, 4). A-Témoin ti Jéhovah alingbi ti mû maboko na mo ti hinga tongana nyen ti wara aye so kue na mbage ti Nzapa, senge senge.

[Kete tënë na lembeti 22]]

Kozo ye so ayeke pusu atâ Chrétien laso na kusala ayeke so ala ye ti nzere na Jéhovah; a yeke pëpe ti gi ti wara mosoro mingi teti ala mveni

[Foto na lembeti 21]

Matabisi ti sandaga ti kota ngele ti Christ so Nzapa amû senge senge apusu aChrétien ti fa nzo tënë senge senge