Ndoye: kelele ti kusala so alë lengo
1 “I ga na Mbi, . . . na fade Mbi mû na i lege ti wu tere.” (Mat. 11:28). Pendere tënë so afa kota ndoye so Jésus ayeke na ni teti azo. Teti so e yeke awafango tënë, e ye ti mû tapande ti Jésus na fango ndoye na mbage ti azo so bê ti ala anze na yâ mbeni sese so ndoye ayeke dä pëpe. Tongana nyen e lingbi ti sara ni na ngoi so e yeke fa nzo tënë na azo?
2 Na lege ti tënë ti yanga ti e: Ndoye ti Jésus ndali ti azo apusu lani lo ti gbu alege kue so azi na lo ti fa na ala nzo tënë (Jean 4:7-14). Ndoye ayeke mû maboko na e ti gi bê mingi pëpe na ndo fango tënë na alege kue so azi. Mbeni molenge-wali ti ngu omene afa tënë na mbeni wali so aduti na ndo so azo ti kobela ayeke ku ti bâ wanganga. Ye nyen apusu lo ti sara ni? Lo tene: “Wali ni akpa zo so aye ti hinga ye na ndo ti Jéhovah.”
3 E lingbi ti fa na azo so e yeke bi bê na ala na sarango tënë na ala na bê kue nga na ngia. Na ndo ni, ti dengi mê nzoni na tënë so azo ayeke tene na e, ti hinga aye so agbu bê ti ala na ti fa tâ bingo bê na mbage ti ala afa so e ndoye ala (aProv. 15:23). Na tapande ti Jésus, a yeke nzoni e gboto lê ti azo na ndo tokua ti Royaume, na ndo be-nzoni nga na ndoye so Jéhovah ayeke na ni teti azo.—Mat. 24:14; Luc 4:18.
4 Na lege ti sarango ye ti e: Jésus ayeke lani nduru ti mû maboko na azo na lege ti mitele alingbi na bezoin ti ala (Mat. 15:32). E nga e lingbi ti wara alege ti sara anzoni ye na azo na fango tënë. Mbeni ita-wali abâ mbeni wali so ayeke tiri ti mä yâ ti mbeni kota tënë so mbeni zo ayeke tene na lo na singa. Ita ti e so na bê ti lo ahunda ti kiri peko ti atënë ni nzoni na lo. Mara ti sarango ye na ndoye tongaso asara si lege azi na ita ni ti sara lisoro na ndo Bible na wali ni ayeda ti manda Mbeti ti Nzapa. Mbeni lâ nga, mbeni ita-koli so akiri ti sara mbeni vizite atingbi na mbeni koli so ayeke sara ngangu ti lï na nene divan na da ti lo. Na peko ti so lo mû maboko na koli so ti lï na divan ni, mbeni lâ kete na pekoni, ita-koli ni aduti na ndo divan so lo mû maboko ti yô ni na lo, na lo to nda ti manda Bible na koli ni so akiri singila na lo mingi.
5 Na ngoi so e yeke fa tënë, e yeke fa ndoye ti e teti Nzapa nga teti zo so ayeke nduru na e (Mat. 22:36-40). Fango ndoye tongaso na lege ti tënë ti yanga ti e nga na sarango ye ti e ayeke mû maboko na azo ti nzoni bê ti bâ so e yeke na tâ tënë.