Chapitre 4

Lo me ngo, me lo mu koli pepee

FADESO Marie ayeke na ngo ti nze ota. Mo dabe mo so na akozo lango ti ngo ti lo lo duti na ndo ti Elisabeth, me fadeso lo kiri na ndo ti lo na Nazareth. Na ya ngoi kete, fade azo kue ti kodoro so lo lango da ayeke hinga so lo yeke na ngo. Biani, lo yeke na ya tene!

Tene ni aga ngangu mingi teti Marie aye ti mu Joseph so ayeke zo ti kpakango keke. Na lo hinga, na gbe ti Ndia so Nzapa amu na Israël, tongana mbeni masia so aze lo na mariage ayeda ti bungbi na mbeni koli nde na taa koli ti lo, a lingbi abolo lo na tene. Fade lo yeke sala tongana nyen ti fa nda ti ngo ti lo na Joseph?

So Marie ahon asala nze ota, Joseph ayeke biani na nzala ti baa lo. Na ngoi so ala wara tele, Marie asala na lo tene ti ye so asi na lo. Lo sala kue ti fa na lo so a yeke na lege ti yingo ti nzoni kue ti Nzapa si lo me ngo. Me, tongana so e hinga, fade a duti ngangu mingi na Joseph ti ma na be na tene so.

Joseph ahinga nzoni tambela ti Marie, na biani lo ye lo mingi. Me, ataa Marie asala tene tongana nyen, na le ti zo lo bungbi biani na mbeni koli ti me ngo so. Ataa ye ni ayeke tongaso, Joseph aye pepee si afa Marie wala abi zonga na ndo ti lo na gbele azo kue. Tongaso, lo leke na be ti lo ti kangbi na lo na lingo. Na ngoi ni ka, abaa ala so aze ala na mariage tongana ala so amu tele awe, na a lingbi ala sala divorce si ahinga so ala kangbi tele.

Na pekoni, tongana Joseph ague ti lango, tene so angba lakue na li ti lo. Ni laa, ange ti Jéhovah asi na lo na suma na atene na lo: “Sala mbito pepee ti kamata Marie tongana wali ti mo, teti so lo me ngo so ayeke ngo so yingo ti nzoni kue ti Nzapa amu na lo. Fade lo du molenge koli na fade adi iri ti lo Jésus, teti fade lo so azo ti lo na ya ti asiokpari ti ala.”

Tongana Joseph azingo, be ti lo asi na ngia! A lingbi na tene so ange atene na lo, lo ku pepee ti mu Marie na da ti lo. Salango tongaso ayeke tongana matanga ti mariage, teti a fa na le ti azo kue so Joseph na Marie aga fadeso koli na wali. Me ye oko, na ngoi so Jésus angba na ya ti Marie Joseph abungbi na lo pepee.

Baa! Fadeso ya ti Marie akono mingi, me Joseph azia lo na ndo lele. Ala yeke gue na ndo wa? Ngbanga ti nyen ala yeke gue na yongoro ndo na ngoi so Marie aga ndulu ti du? Luc 1:39-41, 56; Matthieu 1:18-25; Deutéronome 22:23, 24.

▪ Joseph asala tongana nyen tongana lo hinga so Marie ayeke na ngo? Ngbanga ti nyen?

▪ Tongana nyen Joseph alingbi ti kangbi na Marie tongana ade ala mu tele pepee?

▪ Tongana nyen Joseph na Marie amu tele na gbe le ti azo kue?