Chapitre 44

Lo kaï kota pupu

JÉSUS asala kusala mingi na lango ni so, lo fa tene na azo so abungbi mingi mingi na yanga ti kota ngu, na pekoni, lo fa nda ti atoli gi na adisciple ti lo. Na lakui, lo tene: “I fa ngu, i gue ka na mbengu.”

Na mbengu ti kota ngu ti Galilée, na mbage ti to, ayeke mbeni ndo so ahiri ni Décapole. Iri so alondo na tene use na yanga ti grec, deka so aye ti tene “bale oko”, na polis so aye ti tene “kodoro”. Akodoro ti Décapole ayeke kota ndo ti hingango ye ti aGrec, kamême so aJuif mingi alango da nga. Me, Jésus asala kusala mingi na kodoro so pepee. Même na ngoi so, tongana e yeke baa ande, agbanzi lege na lo ti ninga da.

Tongana Jésus atene na ala ti gue ka na mbengu, adisciple ague na lo na ya ti ngo ni. Me ambeni zo abaa ala. Hio ala zia ngo ti ala na ya ti ngu nga na ala yeke hon na tele ti ala. Lege ti ala ayo pepee. Biani ngu ti Galilée ayeke gi mbeni kota lando ti ngu, yongo ni ayeke akilomètre bale use na kota ni ayeke akilomètre bale oko na ndoni use.

Lango asala Jésus teti lo sala kua mingi. Tongaso, ngoi kete na peko ti so ala zia sese ni lo gue lo lango na ngbonda ti ngo ni, lo zia li ti lo na ndo ti kusin na lo lango biani. Ambeni bazengele ahinga kua ti ngo nzoni mingi teti ala gi susu lakue na ngu ti Galilée. Tongaso ala gbi kaï.

Me fade a ga ngangu ti fa ngu so. Ndo wa ayeke mingi na le ti ngu, lando ti ngu so ayeke amètre ngbangbo use na gbe ti le ti kota ngu ti ingo. Na ngoi so pupu so ade so alondo na ahoto ndulu na ngu so asi na le ti ngu ni a sala si akota pupu alondo fade fade. A yeke ye so asi fadeso. A ninga pepee mapo alondo si ngu atuku na ya ti ngo ni. Ngu aga ndulu ti si ya ti ngo ni. Ye oko, Jésus angba ti lango lakue!

Adisciple ahinga kua ti ngo nzoni, tongaso ala sala ngangu ti fa lege na ni. Kota pupu awara ala kozoni na le ti ngu. Me fadeso ala hinga ye ti sala mbeni pepee. Ala tene ala yeke kui, tongaso ala zingo Jésus, ala tene: ‘Wafango ye, e yeke kui. So ayeke senge na le ti mo? Mo so e, teti e yeke linda!’

Jésus alondo, lo suku ngangu na pupu na ngu ni: “Kaï! Duti kpo!” Kota pupu ni akaï si ngu ade. Jésus abaa adisciple ti lo, lo tene: ‘Ngbanga ti nyen mbito asala i mingi tongaso? I de ti wara mabe pepee?’

Tongana adisciple ama tene ti lo, mbito agbu ala mingi. Ala hunda tele ti ala, atene: ‘Mara ti koli so alondo na ndo wa si pupu na ngu kue ama yanga ti lo?’

Jésus afa biani so lo yeke na ngangu mingi! A mu ngia na be ti e ti hinga so Gbia ti e ayeke na ngangu ti komande pupu na ngu, na fade ande, na la ni so lo bi le ti lo na ndo sese na ngoi ti komandema ti Royaume ti lo, azo kue ayeke duti nzoni, fade abata ala na aye ti ngangu so aga na lege ti ngu na pupu!

Tongana kota pupu akaï awe, ngoi kete na pekoni, Jésus na adisciple ti lo asi nzoni na mbengu ti ngu ti Galilée. Peut-être ambeni ngo so ayeke na tele ti ala akpe kota pupu so na ala kiri nzoni na ndo ti ala. Marc 4:35–5:1; Matthieu 8:18, 23-27; Luc 8:22-26.

▪ Décapole ayeke nyen? A yeke na ndo wa?

▪ Ye nyen asala si akota pupu alondo na le ti ngu ti Galilée?

▪ Tongana ala hinga lege ti so ngo ni pepee, adisciple asala nyen?