Chapitre 80

Ayangbo na Berger ni

JÉSUS aga na Jérusalem teti matanga ti Dédicace, wala Hanukkâh, matanga so adabe zo na mungo temple na Jéhovah mbeni. Na ngu 168 kozo na ngoi ti e, ndulu na ngu ngbangbo use kozoni, Antiochus IV Epiphane akamata Jérusalem na ngangu na lo sala si temple na balaga ni aga sioni. Ngu ota na pekoni, a kiri amu Jérusalem na amu temple ni na Jéhovah mbeni. Matanga ti Dédicace aga mbeni matanga so asala ni ngu oko oko kue.

A sala matanga ti Dédicace na lango 25 Kislev, nze na calendrier ti aJuif so alingbi na use mbage ti nze ti novembre na kozo mbage ti nze ti décembre na calendrier ti e. Tongaso, gi lango ngbangbo oko angba ti si na kota matanga ti Pâque ti ngu 33. A yeke na ngoi so de ayeke mingi, ni laa bazengele Jean asala tene ti “ngoi ti de”.

Jésus amu fadeso mbeni tapande so na ya ni lo sala tene ti yangbo ota na kusala so lo lingbi sala tongana Nzo Berger. Kozo yangbo ni aduti fa ti ye so aleke ni na lege ti mbele ti Ndia ti Moïse. Ndia ni ayeke tongana mbeni gbagba so abata aJuif yongoro na sioni kusala ti azo so ayeke pepee na ya mbele so ayeke nde so ate ni na Nzapa. Jésus afa nda ti tene so: “Biani, biani, mbi tene na i: zo so ali na yangbo ti angasangbaga na yanga ni pepee, me lo ma na ya ni na mbeni lege nde, zo so ayeke wanzi, na zo so asala nzi na mbito pepee. Me zo so ali na yanga ni, zo so ayeke berger ti angasangbaga.”

Ambeni zo aga na ala tene so ala yeke Messie, wala Christ, me ala yeke pepee taa berger so Jésus asala tene ti lo tongaso: “Sinziri ni alungula yanga ni na lo, na angasangbaga ama yanga ti lo, na lo hiri angasangbaga ti lo mveni na lege ti iri ti ala, na lo tambela na li ni ti fa lege na ala ti sigigi. (...) Ala tambela na peko ti wande pepee, me ala kpe lo, teti ala hinga yanga ti wande pepee.”

“Sinziri” ti kozo yangbo ni ayeke Jean Wabatizengo zo. Jean asala kusala ti lo ti sinziri, na lo ‘zi yanga’ ti yangbo ni na Jésus na lege so lo fa lo na azo so akpa angasangbaga so fade lo fa lege na ala ti gue na ndo ti tengo kobe. Angasangbaga so Jésus ahiri ala na lege ti iri ti ala na so lo sigigi na ala ayeke li na ndani na ya mbeni yangbo nde. Jésus afa nda ti tene so tongaso: “Biani, biani, mbi tene na i: mbi yeke yanga ti yangbo ti angasangbaga”, so aye ti tene, yanga ti mbeni fini yangbo. Tongana Jésus ate fini mbele ni na adisciple ti lo, na nga, tongana lo si na yayu na lo sa yingo ti nzoni-kue na ndo ala ande na la ti matanga ti Pentecôte so aga ndulu, fade a mu lege na ala ti li na ya fini yangbo so.

Ti fa nda ti kusala ti lo nzoni ahon, Jésus atene: “Mbi yeke yanga ni; tongana zo ali na ya ni na lege ti mbi, fade lo wara fini, na lo lingbi gue na ya ni na sigigi, na fade lo wara kobe. (...) Mbi ga si ala lingbi wara fini, na si fini so alingbi ti wu mingi na ala. (...) Mbi yeke nzo berger, na mbi hinga angasangbaga ti mbi, na angasangbaga ti mbi ahinga mbi, lege-oko tongana Baba ahinga mbi, na mbi hinga Baba; na mbi mu fini ti mbi teti angasangbaga ni.”

Ngoi kete kozoni, Jésus alungula vundu na be ti adisciple ti lo tongana lo tene: “Kete kundu, zia mbito asala i pepee, teti a yeke nzoni na le ti Baba ti i ti mu royaume na i.” Kete kundu, so wungo ti ala kue ayeke si ande 144 000, ali na ya fini yangbo wala yangbo use ni. Me Jésus asala tene so nga: “Mbi yeke na ambeni ngasangbaga nga, so ayeke na yangbo so pepee; a yeke ngbanga ti mbi ti ga na ala nga, na fade ala ma yanga ti mbi, fade kundu ayeke oko, na berger ayeke oko.”

Teti so “ambeni ngasangbaga” ayeke “ti yangbo so pepee”, ala yeke ti mbeni yangbo nde, yangbo ota ni. Tanga ti ayangbo use so, wala ndo ti bata angasangbaga, ayeke na abeku nde nde. Na ya oko, “kete kundu” ayeke komande ande lege-oko na Christ na ayayu, me na ya mbeni yangbo ni, “ambeni ngasangbaga” ayeke duti na fini ti lakue lakue na ndo sese so ayeke ga paradis. Kamême so ala duti na yangbo so ayeke nde nde, angasangbaga asala manda na popo ti ala pepee, na ala baa so a sala kangbi na popo ti ala pepee, teti lege-oko tongana so Jésus atene, ala ga “kundu oko” na gbe ti “berger oko”.

Jésus Christ, Nzo Berger, aduti ndulu ti mu fini ti lo teti angasangbaga ti ayangbo use so. Lo tene: “Mbi zia fini so na be ti mbi mveni. Mbi yeke na ngangu ti zia fini so, na mbi yeke na ngangu ti kiri ti kamata fini so. Baba ti mbi amu komandema so na mbi.” Tene so ti Jésus abi kangbi na popo ti aJuif.

Na popo ti azo mingi mingi ambeni atene: “Lo yeke na yingo sioni, na lo ga buba awe. Teti nyen i ma lo?” Ambeni akiri tene na ala, atene: “Tene so ayeke tene ti zo ti yingo sioni pepee.” Na tongana ala dabe ala so Jésus azi le ti mbeni waziba nze use kozoni, ala tene: “Yingo sioni alingbi lungula le ti waziba?” Jean 10:1-22; 9:1-7; Luc 12:32; Apocalypse 14:1, 3; 21:3, 4; Psaume 37:29.

▪ Matanga ti Dédicace ayeke nyen? A sala matanga so la nyen?

▪ Kozo yangbo ayeke nyen? Na sinziri ni ayeke zo nyen?

▪ Na lege wa sinziri azi yanga ni na berger? na pekoni angasangbaga awara lege ti li na ndo wa?

▪ Zo nyen ayeke na ya ayangbo use ti Nzo Berger? na ala ga kundu oke?