Chapitre 108

Jésus ati na ya gbanda ti ala pepee

JÉSUS afa nda ti ye na ya temple awe. Ka, lo fa na awato ti lo, amokonzi ti lege ti vorongo nzapa, atoli ota so afa na gigi nda ti sioni ti ala. Ngonzo agbu aFarizien, na ala wa tele ti ala ti gi tene na yanga ti lo si ala lingbi ti wara lege ti gbu lo. Ala leke tene na lingo na ala to adisciple ti ala, nga na ambeni zo ti Hérode, ti gi ti wara mbeni tene ti sioni na yanga ti lo.

Azo ni atene: “Wafango ye, e hinga mo yeke tene gi taa tene, mo fa lege ti Nzapa biani, na mbito ti ye so azo ayeke bi be ti ala da asala mo pepee, teti mo zia be ti mo na kota ti zo pepee. Tongaso, mo tene na e, Be ti mo atene nyen? Ndia amu lege na e ti futa lapo na César? wala pepee.”

Tene ti ala ti gunda Jésus ahanda lo pepee. Lo hinga so tongana lo tene: ‘Pepee. Ndia ake wala a yeke na lege ni pepee ti futa lapo’, fade azo abaa so lo londo ti ke Rome. Nde na so, tongana lo kiri tene: ‘Biani. A lingbi i futa lapo ni’, fade aJuif so ake ti duti na gbe ti Rome, ake lo. Tongaso Jésus akiri tene tongaso: “Teti nyen i tara mbi, i awandendia? I fa na mbi mbeni nginza ti lapo.”

Ala ga na oko na lo, na lo hunda na ala: “So le ti zo wa laa? So iri ti zo wa laa asala ni ge so?”

Ala kiri tene: “A yeke ti César.”

“I futa na César ye so ayeke ti César, na i futa na Nzapa ye so ayeke ti Nzapa.” Na tongana azo ni ama tene so, be ti ala ado. Ala zia lo, ala gue.

Tongana ala baa so aFarizien awara tene ti sioni na yanga ti Jésus pepee, aSadducéen aga, ala so atene londongo ti awakinda ayeke pepee, na ala hunda Jésus na tene so: “Wafango ye, Moïse atene: ‘Tongana zo akui, na molenge ti lo ayeke pepee, a lingbi ita ti lo akamata wali ti lo, na lo du molenge na iri ti ita ti lo.’ Giriri aita-koli mbasambala ayeke na popo ti e; kozo ita akamata wali, lo kui, na teti molenge ayeke pepee, lo zia wali ti lo na ti ti ita ti lo. Ita use ni asala tongaso nga, na ita ota ni, juska asi na ita mbasambala ni. Na peko ti ala kue, wali ni akui nga. Tongaso, na la ti londongo ti awakinda, fade wali so aga wali ti zo nyen na popo ti ala mbasambala so teti ala kue akamata lo na wali?”

Jésus akiri tene na ala tongaso: “A yeke teti tene so pepee si i glisa lege mingi? Teti i hinga Mbeti ti Nzapa wala ngangu ti Nzapa pepee. Teti na la ni so azo alondo na popo ti awakinda, akoli na awali ayeke mu ande tele pepee, me fade ala yeke duti tongana a-ange na yayu. Na ndo tene ti akua, so ayeke kiri na fini, i diko na mbeti ti Moïse pepee? Lege so Nzapa asala tene na lo na ya kaïgna, lo tene: ‘Mbi yeke Nzapa ti Abraham na Nzapa ti Isaac na Nzapa ti Jacob’? Lo yeke Nzapa ti awakinda pepee, me ti azo so ayeke na fini. I glisa lege mingi.”

Tongana azo ama tene so, be ti ala akiri ado mingi. Même ambeni wafango ndia atene: “Wafango ye, mo sala tene na lege ni.”

Tongana aFarizien abaa so Jésus asala si aSadducéen akaï, ala bungbi tele ti ala na ala ga na lo. Ti kiri ti tara lo, mbeni wafango ndia oko na popo ti ala ahunda Jésus: “Wafango ye, ndia so wa si ayeke kota ahon atanga ni kue?”

Jésus atene na ala: “Ndia ti kozoni ayeke so: ‘I ma, ô Israël, Jéhovah Nzapa ti e ayeke gi Jéhovah oko, na a lingbi mo ndoyee Jéhovah Nzapa ti mo na be ti mo kue, na âme ti mo kue, na bibe ti mo kue, na ngangu ti mo kue.’ Ndia ti use ni ayeke so: ‘A lingbi mo ndoyee zo so ayeke ndulu na mo lege-oko tongana mo ndoyee mo mveni.’ Mbeni ndia so ahon ala so use so ayeke da pepee.” Na Jésus atene nga: “Ndia kue na aprophète aduti na ndo ndia use so.”

Wafango ndia ayeda, lo tene: “Wafango ye, mo sala tene na lege ni, tene ti mo ayeke taa tene. ‘Lo yeke Oko, na mbeni Nzapa ayeke pepee gi Lo oko’; tongana zo andoyee lo na be ti lo kue, na bibe ti lo kue, na ngangu ti lo kue, na tongana lo ndoyee zo so ayeke ndulu na lo lege-oko tongana lo ndoyee lo mveni, so ayeke nzoni mingi ahon sadaka ti anyama so azo na wa na amara ti sadaka kue.”

Tongana Jésus abaa so wafango ndia akiri tene na ndara, lo tene na lo: “Mo yeke yongoro na royaume ti Nzapa pepee.”

A sala fadeso lango ota awe—dimanche, lundi, mardi—Jésus afa ye na ya temple. Azo ayeke na kota ngia ti ma lo. Nde na so, amokonzi ti bungbi ti vorongo nzapa aye ti fa lo me ade ala wara lege ti sala ni pepee. Matthieu 22:15-40; Marc 12:13-34; Luc 20:20-40.

▪ A-Farizien azia gbanda wa na gbele Jésus? Ye nyen alingbi ti si tongana Jésus ayeda na kiringo tene wala tongana lo ke?

▪ Na lege wa Jésus ahon ndo ti gbanda ti aSadducéen?

▪ A-Farizien asala nyen ti tara Jésus mbeni? Ndani ayeke tongana nyen?

▪ Na la ti ndangba kusala ti lo na Jérusalem, Jésus afa nda ti ye na ya temple teti lango oke? Kusala so asala nyen?