Chapitre 115

Wuluwulu alondo

KOZONI, ngoi kete na pekoni so la akui awe, Jésus afa na abazengele ti lo nzoni tapande ti lege ti duti na taa-be-ti-molenge tongana lo sukula gere ti ala. Na pekoni, lo fa na ala lege ti dabe ala na kui ti lo so aga ndulu. Fadeso be ti e ado ti baa so ngoi kete na peko ti so Jésus asukula gere ti abazengele ti lo, wuluwulu alondo. Abazengele atonda ti degaba ngangu ti hinga zo wa na popo ti ala ayeke kota ahon ambeni! Tene ti dengo gaba so aninga ngoi mingi fadeso awe.

E dabe e so, na peko ti la ni so Jésus agbian tele ti lo na ndo hoto, abazengele adegaba ti hinga zo wa na popo ti ala ayeke kota ahon ambeni. Na pekoni, abazengele adegaba na popo ti ala mbeni, tongana Jacques na Jean ahunda na Jésus ti wara kota ndo na ya Royaume. Fadeso, na tanga ti ngoi so lo duti na ala, Jésus ayeke na kota vundu mingi ti baa abazengele ti lo adegaba na popo ti ala mbeni! Lo sala nyen?

Ahon ti zingo na abazengele ti lo teti sioni tambela ti ala, na lege ti be-nzee-pepee, Jésus akiri afa na ala nda ti ye: “Agbia ti amara asala mokonzi na ndo ala, na ala di iri ti azo so akomande ala, Azo ti sala be-nzoni. Me a lingbi i sala tongaso pepee. (...) Teti zo wa ayeke kota ahon? Zo so aduti na table wala zo so asala kua? A yeke zo so aduti na table ti te kobe pepee?” Na tongana lo dabe ala na tapande so lo zia na ala awe, lo tene: “Me mbi yeke na popo ti i tongana zo so asala kua.”

Ataa mitele ti ala awoko, abazengele angba na tele ti Jésus na ya aye ti tara ti lo. Tongaso lo tene na ala: “Mbi te mbele na i, lege-oko tongana Baba ti mbi ate mbele na mbi, teti royaume.” Mbele so Jésus ate lo mveni na adisciple ti lo so ayeke be-taa-zo abungbi lo na ala ti komande lege-oko na lo na ya Royaume ti lo. Gi azo kete so wungo ti ala ayeke 144 000 aduti na ya mbele so teti Royaume.

Ataa amu na abazengele nzoni beku ti komande lege-oko na Christ na ya Royaume, ala woko na ngoi ni so na lege ti yingo. Jésus atene: “Na bi so, fade i kue i pika gere ti i tene ti mbi.” Tongana lo tene na Pierre so Lo sambela teti lo awe, Jésus amu na lo wango so: “Na mo, tongana mo kiri na lege ni, mo sala si aita ti mo akpengba.”

Jésus afa ndani na ala: “Akete molenge, mbi ngba na i mbeni kete. Fade i gi mbi; na lege-oko tongana mbi tene na aJuif giriri, fadeso mbi tene na i nga: ‘Na ndo so mbi gue da, i lingbi ti si ka pepee.’ Mbi mu na i fini komandema, i ndoyee tele ti i na popo ti i; lege-oko tongana mbi ndoyee i, a lingbi i ndoyee tele ti i na popo ti i nga. Na lege so fade azo kue ahinga so i yeke adisciple ti mbi, tongana i ndoyee tele ti i na popo ti i.”

“Seigneur, mo gue na ndo wa?” Pierre ahunda.

Jésus akiri tene: “Ndo so mbi gue da, mo lingbi ti gue ka na peko ti mbi fadeso pepee, me mbeni la fade mo gue na peko ti mbi.”

“Seigneur, teti nyen mbi lingbi gue na peko ti mo fadeso pepee?” Pierre aye ti hinga. “Mbi ye ti mu fini ti mbi teti mo.”

“Mo ye ti mu fini ti mo teti mbi?” Jésus ahunda. “Biani, mbi tene na mo: gi na bi so, kozo ti tene kondo atoto fani use, fade fani ota mo yeke tene na yanga ti mo, mo tene mo hinga mbi pepee.”

“Même tongana a yeke ngbanga ti mbi ti kui na mo”, Pierre akiri atene na ngangu, “fade mbi ke tene ti mo pepee.” Na ambeni bazengele kue atene tongaso nga. Tongaso baba asala Pierre na lo tene: “Kamême azo kue azia mo, fade mbi zia mo kete pepee!”

Tongana lo sala tene ti la ni so lo to abazengele ti lo ti gue ti fa tene na ya kodoro ti Galilée, na bozo ti nginza wala na bozo ti kobe pepee, Jésus ahunda na ala: “Mbeni ye atia i?”

Ala kiri tene: “Oko pepee!”

“Me fadeso, zo so ayeke na bozo ti nginza, zia lo kamata bozo ni, na lo kamata bozo ti kobe nga, na zo so ayeke na épée pepee, zia lo ka kota bongo ti lo, na lo vo épée. Teti mbi tene na i, a lingbi tene so aga taa tene na ya mbi, lege-oko tongana Mbeti ti Nzapa atene: ‘Ala diko lo na popo ti awakengo ndia.’ Teti tene so atene na iri ti mbi ayeke si.”

Na lege so, Jésus asala tene ti ngoi so ayeke kanga lo na keke ti pasi na tele ti awasiokpari, wala azo so ake ndia. Lo fa nga so, na peko ti kua ti lo, fade adisciple ti lo ayeke wara ye ti tara mingi. “Seigneur, baa! a-épée use ayeke na ndo so”, ala tene.

“So alingbi”, Jésus atene. Lege-oko tongana e yeke baa ande, épée use so ayeke mu lege na Jésus ti fa mbeni kpengba tene na ala. Matthieu 26:31-35; Marc 14:27-31; Luc 22:24-38; Jean 13:31-38; Apocalypse 14:1-3.

▪ Ngbanga ti nyen wuluwulu so alondo na popo ti abazengele alingbi ti do be ti zo mingi?

▪ Jésus aleke wuluwulu so alondo tongana nyen?

▪ Mbele so Jésus ate na adisciple ti lo alingbi mu na ala lege ti sala kusala wa?

▪ Jésus amu fini komandema wa? Komandema ni ayeke kota mingi?

▪ Na lege wa Pierre afa na gigi lo zia be ti lo na ngangu ti lo mveni mingi ahon? Jésus atene nyen na lo?

▪ Ngbanga ti nyen akpengba tene ti Jésus na ndo abozo ti nginza na ti kobe ayeke nde na akpengba tene so lo tene kozoni awe?