Chapitre 116

Lekengo abazengele teti guengo ti lo

KOBE TI dango be ahunzi awe, me Jésus na abazengele ti lo angba na ya da-nduzu. A ngba gi ngoi kete na fade Jésus ague me lo yeke na ye mingi ti tene na ala. “I zia be ti i agi i pepee”, lo sala tene so ti de be ti ala. “I ma na be na Nzapa.” Lo tene na pekoni: “I ma na be na mbi nga.”

Jésus akiri atene: “Na ya ti da ti Baba ti mbi, da ayeke da mingi. Mbi gue ti leke ndo na i. (...) si na ndo so mbi yeke da, i lingbi duti ka nga. Ndo so mbi gue da, i hinga lege ni.” Abazengele ahinga pepee so Jésus atene na ala so lo yeke gue na yayu, ni laa Thomas ahunda: “Seigneur, e hinga ndo so mo yeke gue da pepee. Fade e hinga lege ni tongana nyen?”

“Mbi yeke lege ni, na taa tene na fini”, atene Jésus. Mbeni zo alingbi li na ya da ti Baba so ayeke na yayu gi tongana zo so ama na be na Jésus na lo duti na fini lege-oko na Jésus. Ni laa, Jésus atene: “Mbeni zo aga na Baba pepee gi na lege ti mbi.”

Philippe ahunda: “Seigneur, fa na e Baba, na so alingbi na e.” Philippe aye si Jésus amu na ala mbeni fa ti Nzapa so zo alingbi ti baa, lege-oko tongana afa so Nzapa amu giriri na Moïse, Elisée nga na Esaïe ti baa na suma. Ye oko, abazengele ayeke na mbeni ye ti nzoni mingi ahon amara ti suma tongaso. Jésus afa ye so na ala: “Mbi duti na i la mingi fadeso, na mo hinga mbi pepee Philippe? Zo so abaa mbi abaa Baba awe.”

Jésus akpa Baba ti lo mingi. Tongaso, zo so aduti na Jésus na lo baa ye na tele ti lo, a yeke lege-oko tongana lo baa Baba ti lo. Me, Baba ayeke kota ahon Molenge ni, na Jésus ahinga tene so: “Tene so mbi tene na i, mbi sala tene so na be ti mbi mveni pepee.” Na lege ni Jésus afa so ye kue so lo tene alondo na Baba ti lo so ayeke na yayu.

Adisciple aduti na ngia mingi fadeso tongana Jésus atene na ala: “Zo so ama na be na mbi, kusala so mbi sala, fade lo sala tongaso nga; na lo sala kusala kota ahon mbi.” Jésus aye ti tene pepee so fade adisciple ti lo ayeke sala akota ye ti kpene mingi ahon aye ti kpene so lo sala ni. Pepee, me lo ye ti tene so fade ala yeke fa tene teti ngoi mingi ahon, na fade fango tene ti ala ayeke mu ndo sese kue, na fade azo mingi ahon ayeke ma ni.

Na peko ti guengo ti lo, Jésus ayeke glisa adisciple ti lo pepee. Lo mu zendo so: “Ye kue so i hunda na iri ti mbi, fade mbi sala ye so.” Lo tene nga: “Fade mbi hunda Baba, na fade lo mu na i mbeni wamungo maboko si lo lingbi duti na i lakue, yingo ti taa tene.” Na pekoni so lo kiri na yayu awe Jésus asa na ndo adisciple ti lo yingo ti nzoni-kue, so ayeke wamungo maboko so.

Guengo ti Jésus aga ndulu awe. Tongaso lo tene: “A ngba kete, sese so abaa mbi mbeni pepee.” Fade Jésus ayu tele ti yingo na fade zo oko alingbi baa lo pepee. Ye oko, lo kiri lo mu zendo so na abazengele so aduti be-taa-zo na lo: “Fade i baa mbi, teti mbi yeke na fini, na fade i yeke na fini nga.” Tongaso, fade Jésus ayeke si na adisciple ti lo ande na tele ti zo na pekoni so azingo lo na kua, na nga na ngoi so alingbi fade lo zingo adisciple ti lo na kua, na lo mu na ala tele ti yingo si ala lingbi duti na yayu lege-oko na lo.

Fadeso Jésus alu kpengba ndia so: “Zo so ayeke na komandema ti mbi, na lo bata komandema ni, a yeke lo so andoyee mbi. Na zo so andoyee mbi, fade Baba ti mbi andoyee lo, na fade mbi fa mbi mveni na lo.”

Tongana lo de ti sala tene so, bazengele Judas, lo so ahiri lo nga Thaddée, atene: “Seigneur, ye nyen asi si mo ye ti fa mo mveni polele na e na mo fa mo mveni na sese so pepee?”

Jésus akiri tene na lo: “Tongana zo andoyee mbi, fade lo bata tene ti mbi, na fade Baba ti mbi andoyee lo (...). Zo so andoyee mbi pepee, lo bata tene ti mbi pepee.” Nde na adisciple ti Christ so ama yanga ti lo, azo ti sese so abi be ti ala pepee na fango tene ti lo. Ni laa, Christ afa lo mveni na ala pepee.

Na la ni so lo sala kusala ti fango tene na ndo sese, Jésus afa na abazengele ti lo nda ti tene mingi. Na lege ti nyen ala lingbi da be ti ala na aye kue so lo fa na ala, na mingi ahon ti da be ti ala na aye so ala gbu ndani nzoni pepee juska na ngoi ni so? Jésus amu zendo so: “Wamungo maboko, yingo ti nzoni-kue, lo so fade Baba ato lo na iri ti mbi, fade lo fa na i ye kue, na lo da be ti i na tene kue so mbi tene na i.”

Ti de be ti ala mbeni, Jésus atene: “Mbi zia siriri na i, mbi mu siriri ti mbi na i. (...) I zia be ti i agi i pepee.” Jésus ayeke gue biani, me lo tene: “Tongana i ndoyee mbi, ka i yeke na taa ngia, teti mbi gue na Baba, teti Baba ayeke kota ahon mbi.”

Ngoi so Jésus ayeke duti na adisciple ti lo angba gi kete. Lo tene: “Fade mbi sala tene na i mbeni mingi pepee, teti mokonzi ti sese so ayeke ga. Na ye oko ti lo ayeke na ya mbi pepee.” Mokonzi ti sese so ayeke Satan Diable, lo so alingbi li na ya Judas na lo sala si lo ga ngbaa ti lo. Me Satan alingbi pepee ti wara na ya Jésus mbeni ye ti siokpari so lo lingbi sala ye na ni ti pusu Jésus ti ke kusala ti Nzapa.

Dutingo na nzoni songo

Na peko ti kobe ti dango be, Jésus amu maboko ngangu na abazengele ti lo na salango taa tene polele na popo ti ala. A hon be ti bi awe, ni laa Jésus atene: “I londo na ndo so, e gue.” Me, kozo si ala gue, teti so lo ndoyee ala mingi, Jésus angba ti sala tene na ala, lo fa mbeni toli ti kpengba ala.

“Mbi yeke taa vigne, na Baba ti mbi ayeke zo ti fango yaka ni”, lo tondani tongaso. Kota Zo ti fango yaka, Jéhovah Nzapa, alu vigne so ayeke tongana fa na la ni so lo sa yingo ti nzoni-kue na ndo Jésus na la ti batême ti lo na ngu 29 ti ngoi ti e. Ti fa so vigne ayeke fa ti gi lo oko pepee, Jésus atene: “Ti ti vigne oko oko kue na ya mbi so ale pepee, lo fa, na ti ti vigne oko oko kue so ale, lo leke ni si a le mingi ahon. (...) Lege-oko tongana ti ti vigne alingbi le na be ti lo mveni pepee, gi tongana lo ngba na ya vigne, tongaso, tongana i duti na ya mbi pepee, i lingbi le nga pepee. Mbi yeke vigne, i yeke ti ti vigne ni.”

Na la ti Pentecôte, lango bale oku na ndoni oko na pekoni, abazengele na ambeni chrétien aga ati ti vigne na la ni so asa yingo ti nzoni-kue na ndo ala. Na ndani, azo 144 000 aga ati ti vigne ti fa so. Lege-oko na gere ti vigne, Jésus Christ, fade ala kue aga fa ti vigne so ale alengo ti Royaume ti Nzapa.

Jésus afa mbilimbili tongana nyen ti le lengo ni: “Zo so aduti na ya mbi, na mbi duti na ya lo, zo so ale mingi; teti i lingbi sala ye oko pepee tongana mbi duti na ya i pepee.” Me Jésus atene tene so na ndo zo so ale pepee: “A bi lo na gigi tongana ti ti vigne, na lo hule; na azo abungbi ati ti vigne so, abi ala na wa, na ala gbi.” Na mbage Jésus amu zendo so: “Tongana i duti na ya mbi, na tene ti mbi aduti na ya i, i hunda ye so i ye, na fade mbi sala ye so na i.”

Jésus afa na abazengele nga: “Baba ti mbi awara gloire na lege ti so, tongana i le mingi, tongaso fade i yeke adisciple ti mbi.” Alengo so Nzapa aku ti baa na ndo ati ti vigne ni, ayeke asalango ye ti ala so alingbi kpa ti Christ, na mbilimbili a yeke fa ti ndoyee. Na mbage nga, teti Christ ayeke giriri mbeni wafango tene ti Royaume ti Nzapa, alengo so lo ku ni andu nga kusala ti sala si azo aga adisciple lege-oko tongana lo sala giriri.

Jésus amu fadeso wango so na ala: “I duti na ya ndoyee ti mbi.” Me fade abazengele asala ni tongana nyen? Lo tene: “Tongana i bata akomandema ti mbi, fade i duti na ya ndoyee ti mbi.” Na lo kiri lo tene: “So ayeke komandema ti mbi, i ndoyee tele ti i na popo ti i, lege-oko tongana mbi ndoyee i. Tongana mbeni zo amu fini ti lo teti andeko ti lo, mbeni ndoyee ti hon ndoyee so ayeke pepee.”

Na ya ti ambeni ngbonga so ayeke ga, Jésus ayeke fa na gigi mara ti kota ndoyee so na lege ti mungo fini ti lo teti abazengele ti lo, nga teti azo kue so fade ama na be na lo. Tapande ti lo so alingbi pusu adisciple ti lo ti duti na ndoyee so na popo ti ala, mara ti ndoyee so apusu zo ti yeda ti kui teti amba ti lo. Fade ahinga ala na lege ti ndoyee so, tongana Jésus atene kozoni: “Na lege so, fade azo kue ahinga i yeke adisciple ti mbi, tongana i ndoyee tele ti i na popo ti i.”

Ti fa na gigi azo wa ayeke andeko ti lo, Jésus atene: “I yeke andeko ti mbi tongana i sala ye so mbi komande i ti sala. Mbi di iri ti i angbaa mbeni pepee, teti ngbaa ahinga pepee ye so mveni ti lo asala. Me mbi di iri ti i andeko, teti ye kue so mbi ma na yanga ti Baba ti mbi mbi fa na i awe.”

So ayeke nzoni songo​—ti duti taa ndeko ti Jésus! Me ti ngba ti sala nzoni songo so na lo, adisciple alingbi “ti ngba ti le lengo”. Tongana ala sala tongaso, “ye so kue i hunda na ti ti Baba na iri ti mbi, fade lo mu ye so na i”, Jésus atene la ni na ala. Biani, so taa nzoni matabisi so zo alingbi wara ande tongana lo le lengo ti Royaume! Na peko ti so lo kiri lo wa abazengele ti ‘ndoyee tele ti ala na popo ti ala’, Jésus afa na ala so fade sese ake ala. Me, lo de be ti ala na tene so: “Tongana sese so ake i, i hinga sese ni ake mbi kozoni si a ke i.” Na pekoni Jésus afa ngbanga ti nyen sese ake adisciple ti lo, lo tene: “Teti i yeke ti sese so pepee, me mbi hiri i ti zia lege ti sese so, tongaso sese so ake i.”

Ti fa mbilimbili ngbanga ti nyen sese ayeke ke ala ande, lo kiri lo tene: “Fade ala sala ye so kue na i teti iri ti mbi, teti ala hinga pepee lo [Jéhovah Nzapa] so ato mbi.” Biani akusala ti kpene so Jésus asala afa ngbanga na ndo ala so ake lo, tongana so lo fa ni ge: “Tongana mbi sala kusala pepee na popo ti ala so mbeni zo asala pepee, ka siokpari ayeke na ala pepee; me fadeso ala baa awe, na ala ke mbi na Baba ti mbi.” Ni laa, tene ti mbeti aga taa tene, tongana so Jésus atene: “Ala ke mbi senge senge.”

Ni laa, tongana so lo sala kozoni awe, Jésus akpengba abazengele ti lo na lege so lo ze ti to wamungo maboko na ala, so ayeke yingo ti nzoni-kue, wala kota ngangu ti Nzapa ti sala na kusala. “Fade lo sala tene ti témoin ti mbi; na fade i sala tene ti témoin nga.”

Ambeni wango kozo na guengo ti lo

Jésus na abazengele ti lo aga ndulu ti sigigi na ya da-nduzu. “Mbi tene ye so na i ti bata i si i ti pepee”, lo tene. Na pekoni, lo mu nenee wango so na ala: “Fade ala lungula i na ya synagogue. Biani, fade ngoi ayeke ga tongana zo so afa i, atene na be ti lo, lo yeke sala kusala ti Nzapa.”

Abazengele agi be ti ala mingi na lege ti wango so ti Jésus. Ataa Jésus atene na ala kozoni awe so fade sese ni ayeke ke ala, lo tene na ala polele tongaso pepee so fade azo ayeke fa ala. Jésus afa ndani: “Mbi tene ye so kozoni na i pepee teti mbi yeke na tele ti i.” Me, Jésus asala nzo kusala tongana lo leke adisciple ti lo na lege ti fa nda ti ye so na ala kozoni na guengo ti lo!

Jésus akiri asala tene: “Me fadeso, mbi gue na lo so ato mbi, na zo oko na popo ti i ahunda mbi pepee: ‘Mo gue na ndo wa?’ ” Ngoi kete kozoni, na peko ti so la akui awe, adisciple ahunda lo na ndo so lo yeke gue da. Me fadeso, ala hunda lo na ndo tene so mbeni pepee teti be ti ala agi ala na lege ti tene so lo tene na ala. Tongaso Jésus atene: “Me be ti i asi na vundu teti so mbi tene ye so na i.” Be ti abazengele asi na vundu gi teti so ala hinga so fade azo asala ye ti ngangu na afa ala pepee, me nga teti so Maître ti ala aga ndulu ti zia ala awe.

Ni laa, Jésus atene na ala: “A yeke nzoni teti i tongana mbi yeke gue. Teti tongana mbi gue pepee, fade wamungo maboko aga na i pepee; me tongana mbi gue, fade mbi to lo na i.” Tongana zo Jésus alingbi duti gi na ndo oko, me tongana lo duti na yayu, lo lingbi ti to wamungo maboko ni, yingo ti nzoni-kue ti Nzapa, na adisciple ti lo so ayeke na ndo nde nde na ndo sese. Tongaso ala lingbi wara nzoye mingi tongana Jésus ague.

Yingo ti nzoni-kue, atene Jésus, ayeke “zingo na sese so tene ti siokpari, tene ti mbilimbili, na tene ti ngbanga”. Fade a fa na gigi siokpari ti sese so ake ti ma na be na Molenge ti Nzapa. Na mbage nga, fade a fa na gigi polele mbilimbili ti Jésus na lege so lo kiri na Baba ti lo na yayu. Azo alingbi baa so afa ngbanga ti sioni na ndo mokonzi ti sese na lege so Satan na sioni sese ti lo awara lege pepee ti pusu Jésus ti zia be-biani ti lo.

Lo kiri lo tene: “Mbi yeke na mbeni tene mingi ti tene na i, me i lingbi ma tene so fadeso pepee.” Ni laa, Jésus amu zendo ti sa yingo ti nzoni-kue, so ayeke ngangu ti Nzapa, na ndo adisciple ti lo. Fade yingo so amu na ala maboko ti gbu nda ti aye so a lingbi na ngangu ti ala ti hinga aye ni.

Ye so abazengele agbu ndani nzoni pepee ayeke so fade Jésus akui na lo yeke si na ala na peko ti so Nzapa azingo lo na kua. Ni laa, ala hunda tene so na popo ti ala: “Tene so lo tene na e aye ti tene nyen: ‘A ngba kete, fade i baa mbi mbeni pepee, na ndani kete fade i kiri i baa mbi’, na: ‘teti mbi gue na Baba’?”

Jésus ahinga so abazengele ayeke na nzala ti hunda tene na lo, ni laa lo tene: “Biani, biani, mbi tene na i: fade i toto na ngule, na i toto kua, me fade sese so asala ngia. Fade vundu asala i, me vundu ti i agbian aga taa ngia.” Na pekoni na lango oko so, tongana afa Jésus na peko ti midi awe, amokonzi ti vorongo nzapa ayeke duti na ngia, me adisciple ayeke toto kua. Ye oko vundu ti ala ayeke gbian ti ga taa ngia tongana Nzapa azingo Jésus na kua! Na taa ngia ti adisciple ayeke ngba ti wu mingi tongana Jésus asa yingo ti nzoni-kue ti Nzapa na ndo ala na la ti Pentecôte ti ga atémoin ti lo!

Tongana lo haka ye so asi na abazengele ti lo na ye so asi na wali na la ni so lo yeke du, Jésus atene: “Tongana wali aye ti du, vundu asala lo teti ngoi ti vundu ti lo asi awe.” Me lege-oko tongana wali so ada be ti lo na songo ni pepee tongana molenge ni asigigi awe, Jésus atene na abazengele ti lo: “Tongaso vundu asala i fadeso; me fade mbi kiri mbi baa i [tongana ayaa mbi na du-kua], na fade ngia ayeke na be ti i, na zo oko alingbi lungula taa ngia ti i pepee.”

Abazengele ade ti hunda mbeni ye na iri ti Jésus la oko pepee. Me lo tene fadeso: “Tongana i hunda mbeni ye na ti ti Baba, fade lo mu ye so na iri ti mbi. (...) Teti Baba mveni andoyee i, teti i ndoyee mbi, na i ma na be so mbi londo na Baba. Mbi londo na Baba, na mbi ga na sese so awe. Fadeso mbi zia sese so na mbi gue na Baba.”

Tene ti Jésus ayeke mbeni ye so amu ngangu mingi na abazengele. Ala tene: “Teti tene so, e ma na be so mo londo na Baba.” Jésus ahunda ala: “I ma na be fadeso? Baa! Ngoi ayeke ga, biani, a si awe, so fade a kangbi i oko oko na da ti i, na fade i zia mbi si mbi ngba gi mbi oko.” Ataa zo alingbi ma na be na tene so pepee, ye so asi kozoni si bi ni so akondani!

“Mbi tene ye so na i, si i lingbi wara siriri na ya mbi.” Jésus akonda ti tene ti lo: “Fade ye ti vundu asala i na sese so, me be ti i aduti nzoni! Teti mbi hon sese so na ngangu awe.” Jésus ahon sese so na ngangu teti so lo ngba be-taa-zo na lege ti sala ye so be ti Nzapa aye kamême so Satan na sese so lo komande ni asala ngangu na Jésus ti pusu lo ti ke be-biani ti lo.

Sambela ti ndani na da-nduzu

Na kota ndoyee na be ti lo, Jésus ayeke leke abazengele ti lo teti so la ti guengo ti lo aga ndulu mingi awe. Na peko ti so lo mu ngoi mingi ti wa ala na ti mu na ala ngangu, lo yaa le ti lo na nduzu na lo sambela Baba ti lo: “Mu gloire na molenge ti mo, si molenge ni alingbi mu gloire na mo, lege-oko tongana mo mu ngangu na lo ti komande mitele kue, si lo lingbi mu fini ti lakue lakue na ala kue so mo mu na lo.”

Jésus asala tene na ndo ti mbeni kota ye so asala si be ti zo ado​—fini ti lakue lakue! Teti so lo wara ‘ngangu ti komande mitele kue’, Jésus alingbi ti mu na azo so ayeke kui anzoni ye mingi na lege ti sadaka ti kota ngere ti lo. Ye oko, lo yeke mu “fini ti lakue lakue” gi na azo so Baba ni aye ala. Ti zia mbeni tene na ndo tene ti fini ti lakue lakue, Jésus ague na sambela ti lo na li ni:

“Na so ayeke fini ti lakue lakue: ti hinga mo, mo so gi mo oko ayeke taa Nzapa, na ti hinga Jésus Christ, lo so mo to lo awe.” Biani, zo alingbi ti wara salut gi na lege ti hingango Nzapa na Molenge ti lo. Ye oko hingango ala gi senge senge alingbi pepee.

A lingbi zo ahinga ala na ya ti be ti lo, na lo duti ndeko ti ala. A lingbi lo duti na bibe so ala yeke na ni na lo baa ye tongana so ala yeke baa. Na mingi ahon, a lingbi lo sala kue ti mu ala tongana tapande ti lo na ya dutingo ti lo na amba ti lo.

Na pekoni, Jésus atene: “Mbi mu gloire na mo na sese so, teti mbi sala kusala awe so mo mu na mbi ti sala.” Teti so lo sala kusala ti lo juska na ngoi so, na teti so lo hinga lo yeke sala ande si tanga ni kue aga nzoni, lo hunda na Nzapa: “Na fadeso, Baba, mu gloire na mbi na tele ti mo mveni, gloire ni so ayeke na mbi tongana mbi yeke na mo giriri kozoni si sese so ayeke.” Biani, lo hunda ti kiri, na lege ti londongo na popo ti awakinda, na ya gloire so lo yeke na ni kozoni na yayu.

Ti fa kota kusala so lo sala na ndo sese, Jésus atene: “Mbi fa iri ti mo na azo ti sese so mo mu na mbi. Ala yeke ti mo giriri, na mo mu ala na mbi, na ala bata tene ti mo.” Jésus adi iri ti Nzapa, Jéhovah, na kusala ti lo ti fango tene na lo fa taa lege ti di iri so, me lo sala ambeni ye mingi nga ti fa iri ti Nzapa na abazengele ti lo. Lo sala nga si hingango ndo ti ala na ndo Jéhovah, dutingo ti lo, na ye so lo leke na be ti lo ti sala awu, na lo sala si ala mu aye so kue na nenee ni mingi ahon.

Ti fa so Jéhovah ayeke Kota zo ti lo, Lo so lo ma yanga ti Lo, na taa-be-ti-molenge Jésus atene: “Teti mbi mu na ala tene so mo mu na mbi, na ala ma tene ni na ala hinga mbi londo na mo biani, na ala ma na be so mo to mbi.”

Na salango kangbi na popo ti adisciple ti lo na tanga ti azo kue, Jésus ague na li na sambela ti lo: “Mbi sambela teti sese so pepee, me teti ala so mo mu na mbi (...). Tongana mbi yeke na ala, mbi bata ala (...), mbi bata ala, na zo oko ti ala aglisa pepee, gi oko so, molenge ti futingo”, so ti tene, Judas Iscariote. Na taa ngoi ni so, Judas ayeke sala sioni kusala ti lo ti ka Jésus. Tongaso, Judas, na lege so lo hinga pepee, asala si tene ti Mbeti ti Nzapa aga taa tene.

Jésus angba ti sambela: “Sese so ake ala. Mbi hunda mo ti lungula ala na sese so pepee, me ti bata ala si wato sioni asala ye na ala pepee. Ala yeke ti sese so pepee, lege-oko tongana mbi yeke ti sese so pepee.” Adisciple ti Jésus ayeke na sese so, wala bungbi ti azo so Satan afa lege na ni, me ala duti nde na sese ni na sioni ti lo, na ala lingbi ti duti lakue nde na ni.

Jésus atene: “Bata ala nde na lege ti taa tene, tene ti mo ayeke taa tene.” Na ndo so, Ambeti so asala ala na yanga ti hébreu na gbe ti ngangu ti Nzapa, ambeti so lo yeke diko tene na ya ni lakue, Jésus ahiri ala “taa tene”. Me aye so lo fa na adisciple ti lo, na ambeti so fade ala su na lege ti yingo ti Nzapa tongana Ambeti so achrétien asala na yanga ti grec, ayeke nga “taa tene”. Taa tene so alingbi ti bata zo nde, si fini ti lo agbian kue, na ti sala si lo duti nde na sese ni.

Fadeso Jésus asambela “gi teti ala so pepee, me teti ala nga so ama na be na mbi na lege ti fango tene ti ala”. Tongaso Jésus asambela teti ala so ayeke ga ande adisciple ti lo so asa yingo na ndo ala na teti ambeni disciple so ayeke bungbi ala ande na ya ti “kundu oko”. Nyen si lo hunda teti azo kue so?

“Si ala kue alingbi ga oko, lege-oko tongana mo, Baba, mo yeke na ya mbi, na mbi yeke na ya mo, (...) si ala lingbi ga oko lege-oko tongana e yeke oko.” Jésus na Baba ti lo ayeke biani zo oko pepee, me yanga ti ala ayeke oko na ndo ti ye kue. Jésus asambela si adisciple ti lo awara ngia ti duti oko tongaso nga “tongaso sese so alingbi hinga biani mo to mbi giriri na mo ndoyee ala lege-oko tongana mo ndoyee mbi”.

Teti ala so ayeke ga ande adisciple ti lo so asa yingo na ndo ala, Jésus ahunda fadeso mbeni ye na Baba ti lo na yayu. Lo hunda nyen? “Si ala duti na mbi nga, na ndo so mbi yeke da, si ala lingbi baa gloire ti mbi so mo mu na mbi giriri, teti mo ndoyee mbi giriri kozoni si asala gere ti sese”, so ti tene, na ngoi ti mengo ngo ti kozo molenge ti Adam na Eve. Ngoi mingi kozoni na so, Nzapa andoyee Molenge ti lo ngengele oko, lo so aga Jésus Christ.

Na hunzingo sambela ti lo, Jésus akiri afa tene so: “Na mbi fa na ala iri ti mo, na fade mbi kiri mbi fa na ala iri ti mo, tongaso ndoyee so mo ndoyee mbi na ni alingbi duti na ya ala, na mbi na ya ala.” Teti abazengele, ti hinga iri ti Nzapa ahunda ala ti hinga biani ndoyee ti Nzapa. Jean 14:1–17:26; 13:27, 35, 36; 10:16; Luc 22:3, 4; Exode 24:10; 1 aGbia 19:9-13; Esaïe 6:1-5; aGalate 6:16; aPsaume 35:19; 69:4 [69:5, sango]; aProverbe 8:22, 30.

▪ Jésus ayeke gue na ndo wa? Lo kiri tene wa na Thomas tongana lo hunda lo na ndo so lo yeke gue da?

▪ Na lege ti ye so lo hunda, Philippe aye si Jésus amu nyen?

▪ Ngbanga ti nyen zo so abaa Jésus abaa nga Baba ni?

▪ Na lege wa fade adisciple ti Jésus ayeke sala kusala kota ahon kusala so lo sala ni?

▪ Na lege ti nyen mbeni ye oko ti Satan ayeke na ya Jésus pepee?

▪ Na ngoi wa Jéhovah alu keke ti vigne na lege ti fa, nga lawa na tongana nyen si ambeni zo atonda ti ga mbage ti vigne ni?

▪ Na ndani ati ti vigne ni kue ayeke oke?

▪ Alengo wa so Nzapa aku ti baa na ndo ati ti vigne ni?

▪ Tongana nyen e lingbi ti ga andeko ti Jésus?

▪ Ngbanga ti nyen si sese so ake adisciple ti Jésus?

▪ Wango wa ti Jésus asala si abazengele agi be ti ala?

▪ Ngbanga ti nyen abazengele ahunda Jésus pepee teti ndo so lo yeke gue da?

▪ Ye nyen abazengele agbu ndani mbilimbili pepee?

▪ Na lege ti tene ti toli wa Jésus afa so fade totongo na ngule ti abazengele ayeke gbian ti ga taa ngia?

▪ Jésus atene fade abazengele ayeke sala nyen?

▪ Na lege wa Jésus ahon sese so na ngangu?

▪ Ti tene Jésus awara ‘ngangu ti komande mitele kue’ aye ti tene nyen?

▪ Ti manda ti hinga Nzapa na Molenge ti lo aye ti tene nyen?

▪ Jésus afa iri ti Nzapa na lege ti aye wa?

▪ “Taa tene” ayeke nyen, na lege wa si a “bata” mbeni chrétien nde?

▪ Nzapa, Molenge ti lo, na ataa wavorongo Jéhovah kue ayeke oko tongana nyen?

▪ A tonda ti “sala gere ti sese” lawa?