“A pardonné siokpari ti mo awe”

Fadeso, azo na ndo kue amä sango ti Jésus awe. Ambeni alondo na ando so ayo si a ga ti mä lo na fango ye na azo nga na bango lo na sarango amiracle. Me kete lango na pekoni, lo kiri na Capernaüm, ndo so lo sara mingi ti akua ti lo dä. Sango ti kiringo ti lo amû yâ ti kodro ni so kue, so a yeke na tere ti Kota ngu ti Galilée so. Ye ti pekoni ayeke so, gbâ ti azo aga na yâ ti da so lo yeke dä. Na milieu ti azo ni so, a yeke wara aFarizien na azo ti fango Ndia, so a londo na akete kodro ti Galilée kue, ti Judée nga na ti Jérusalem.

Bible atene: “Azo abungbi gbani gbani si ndo ti duti ayeke dä mbeni pëpe, même juska na yanga ti da ni. Lo to nda ti fa tënë ti Nzapa na ala.” (Marc 2:2). A yeke ge la fadeso si mbeni ye ti kpene ayeke passé. A yeke mbeni ye so ayeke pusu e ti yeda so Jésus ayeke na ngangu ti zi ye so ayeke sara si azo ayeke bâ pasi, nga ti sava azo kue so lo ye ti sava.

Na ngoi so Jésus angbâ ti fa tënë na azo so ayeke na yâ ti kete da ni so, ambeni koli osio aga na mbeni koli so mbage ti tere ti lo akui, na ndo ti mbeni gbogbo. Ala ye ti tene Jésus asava kamarade ti ala so. Me ngbanga ti so azo ayeke mingi, ala peut “ti gue na koli ni tâ na tere ti Jésus ape”. (Marc 2:4). Ye ni so adoit ti sara ala vundu mingi. Ala ngbâ amonté na ndo ti li ti da ni, so ayeke plat, na ala zi mbeni mbage ni. Na pekoni, ala descend gbogbo ni so zo ti kobela ni ayeke na ndo ni na yâ ti da ni.

Bê ti Jésus ason ngbanga ti so ala fâ tënë na yanga ti lo? Ên-ën, kete tongaso ape! A nzere na lo mingi ti bâ mara ti mabe ti akoli so, ni la lo tene na koli so mbage ti tere ti lo akui so, lo tene: “A pardonné siokpari ti mo awe.” (Matthieu 9:2). Me ti tâ tënë ni, eskê Jésus alingbi ti pardonné siokpari ti azo? A yeke ngbanga ni la si ascribe na aFarizien atene: “Koli so ayeke sara tënë tongaso ngbanga ti nyen? Lo yeke zonga Nzapa la. Zo wa la alingbi ti pardonné asiokpari, zo wa? Gi Nzapa oko awe.”—Marc 2:7.

Teti so Jésus ahinga ye so ayeke na yâ ti li ti ala, lo tene: “Ala yeke tene atënë tongaso na yâ ti bê ti ala ngbanga ti nyen? Ti tene na koli so mbage ti tere ti lo akui so: ‘A pardonné asiokpari ti mo awe,’ wala ti tene na lo: ‘Londo, mû gbogbo ti mo, mo tambela,’ so wa si ayeke ngangu ape?” (Marc 2:8, 9). Biani, na lege ti sacrifice so lo yeke mû ande, tongana ngoi ni alingbi Jésus apeut ti pardonné siokpari ti azo.

Na pekoni, Jésus afa na azo so aga, nga na awato ti lo, so lo yeke na ngangu ti pardonné siokpari ti azo na sese ge. Lo tourné na mbage ti koli so mbage ti tere ti lo akui so na lo tene na lo, lo tene: “Mbi tene na mo: ‘Londo, mo mû gbogbo ti mo, mo gue na yanga-da ti mo.’” Droit koli ni asara tongaso, lo londo, lo mû gbogbo ti lo na lo tambela, na azo kue abâ ni. Li ti azo kue akpe! Ala ngbâ agonda Nzapa na ala tene: “Ade e bâ mara ti ye tongaso lâ oko ape.”—Marc 2:11, 12.

A yeke kota ye ti bâ so Jésus afa so kamba ayeke na popo ti siokpari na kobela, na so tongana a pardonné siokpari ti mbeni zo, lo peut ti wara sava ti tere. Bible afa na e so, kozo babâ ti e, Adam, asara siokpari na lo mû na e kue siokpari, so ti tene kobela na kuâ. Me na gbe ti Royaume ti Nzapa, Jésus ayeke pardonné ande siokpari ti azo kue so aye Nzapa nga asara na lo. Na pekoni, a yeke zi ande kobela biani biani.—aRomain 5:12, 18, 19.