POINT 11

Yapu na yâ ti sarango tënë ti mo

aRomain 12:11

NA NDURU TËNË: Yapu na yâ ti sarango tënë ti mo ti pusu azo so ayeke mä mo ti sara ye.

Zia tënë ni andu bê ti mo. Na ngoi so mo yeke leke terê ti sara devoir ti mo, gbu li nzoni na ndö ti nene ti tokua so mo ye ti fa. Gi ti hinga devoir ti mo nzoni tongaso si mo sara tënë ni na bê ti mo kue.
Pensé na azo so ayeke mä mo. Gbu li ti mo ti bâ tongana nyen la ye so mo yeke diko ande wala mo yeke fa na azo ni ayeke sara nzoni na ala. Gbu li ti mo nga na ndö ti fason so mo yeke zi na nda ti atënë ni ti tene ala bâ tënë ni na nene ni mingi.
Dedengo pëpe na sarango tënë me yapu na yâ ti sarango tënë ti mo. Yapu na sarango tënë. Sara ageste so ayeke naturel nga zia si lê ti mo afa ye so ayeke na yâ ti bê ti mo.

Hange si mo sara pëpe gï même geste na peko ti terê, ye so alingbi ti gboto lê ti azo, na a ga mbeni ye so a hinga mo na ni. Sara ageste so afa mbeni ye na zo. Yapu na sarango tënë mbilimbili tongana mo yeke fa ambeni kota tënë wala mo ye ti pusu azo so ayeke mä mo ti sara mbeni ye. Tongana mo yapu ahon ndö ni na sarango tënë na yâ ti devoir ti mo ni kue mo yeke sara si azo so ayeke mä mo afatigué.