Abazengele agi encore ti duti na kota ndo

Tongana Jésus na adisciple ti lo angbâ ti gue na Jérusalem na hongo na mbage ti sud, na yâ ti Pérée, ala fâ Ngu ti Jourdain, nduru na Jéricho. Ambeni zo atambela legeoko na ala, ti gue ti sara matanga ti Pâque ti ngu 33.

Jésus la ayeke na devant ti adisciple ti lo ni, na lo ye si ala si kozoni si matanga ni akomanse. Me, mbeto agbu adisciple ni. Lani, na ngoi so Lazare akui, na tongana Jésus aye ti londo na Pérée ti gue na Judée, Thomas atene na amba ti lo atene: “E nga e gue, si e na lo kue e kui.” (Jean 11:16, 47-53). Tongaso, ti gue na Jérusalem alingbi ti ga na kpale, na a yeke na lege ni ti tene mbeto agbu adisciple ni.

Ti leke ala ndali ti ye so ayeke si ande, Jésus agboto abazengele ti lo yamba, na lo tene na ala, lo tene: “E yeke montê na Jérusalem la, a yeke zia ande Molenge ti zo na maboko ti aprêtre-mokonzi nga na ascribe. Ala yeke fâ ngbanga ti kuâ na li ti lo, na ala yeke zia lo na maboko ti azo ti amara nde ti tene ala he lo, ala pika lo na zaza nga ala fâ lo na ndo ti keke. Me na ota lango ni, a yeke zingo lo na kuâ.”—Matthieu 20:18, 19.

A yeke fani ota ti tene Jésus asara tënë ti kuâ ti lo nga na londongo ti lo na kuâ na adisciple ti lo la (Matthieu 16:21; 17:22, 23). Me ti ge, lo tene so a yeke fâ ande lo na ndo ti mbeni keke. Adisciple ni amä tënë ni, me ala mä yâ ni ape. Peut-être ala yeke ku lani kungo ti tene a kiri na royaume ti Israël na place ni, tongaso si ala lingbi ti wara gloire nga na yango iri na yâ ti Royaume ni so, na tere ti Christ.

Mama ti abazengele Jacques na Jean, so e lingbi ti tene a yeke Salomé, ayeke nga lani na milieu ti azo so ayeke voyagé na tere ti Jésus. Jésus amû lani iri ti “aMolenge ti Bekpa” na abazengele use so, ndali ti so ala ninga ka ti sara ngonzo ape (Marc 3:17; Luc 9:54). A sara mbeni ngoi awe la abazengele use so asara nzara ti warango kota ndo na yâ ti Royaume ti Christ. Mama ti ala kue ahinga tënë ni so. Tongaso, mama ni aga na tere ti Jésus na iri ti ala, lo kuku na gbe ti Jésus ti hunda mbeni ye na lo. Jésus angbâ atene na lo atene: “Mo ye nyen?” Lo tene: “Mû yanga ti tene amolenge ti mbi ti koli use so aduti na tere ti mo na yâ ti Royaume ti mo, oko na mbage ti maboko ti mo ti koli na oko na mbage ti maboko ti mo ti wali.”—Matthieu 20:20, 21.

Jacques na Jean la adoit ti pusu mama ti ala ti ga ti hunda ye ni so. Jésus agboto lê ti ala na ndo ti zonga nga na ye ti kamene so a yeke sara ande na lo, lo tene: “Ala hinga ye so ala yeke hunda so ape! Ala lingbi ti nyon kopo so mbi ga nduru ti nyon ni so?” Ala tene: “En, e peut ti nyon ni.” (Matthieu 20:22). Ye oko, peut-être ade ala hinga nda ti ye so tënë so aye ti tene ndali ti ala ape.

Me, atâa so kue, Jésus atene na ala, lo tene: “Ti kopo ti mbi ni, ala yeke nyon ande ni. Me ti duti na mbage ti maboko ti mbi ti koli nga na mbage ti maboko ti mbi ti wali, mbi la mbi yeke mû ni na azo ape. Me Babâ ti mbi la ayeke mû ni na azo so a leke ni ndali ti ala.”—Matthieu 20:23.

Bê ti tanga ti abazengele bale-oko kue ason tongana ala mä ye so Jacques na Jean ahunda so. Peut-être a yeke lani Jacques na Jean la asara tënë mingi na ngoi so papa atï lani na milieu ti abazengele ni, na ndo ti tënë ti zo so ayeke kota mingi na popo ti ala (Luc 9:46-48). Me, atâa ye ni ayeke lani tongana nyen, ye so Jacques na Jean ahunda lani so afa so abazengele ni kue asara ye pëpe alingbi na wango so Jésus amû na ala lani na ndo ti sarango tere kete. Bibe ti warango kota ndo angbâ na yâ ti bê ti ala.

Jésus agi fadeso lege ti leke tënë ni so nga ti sara si papa ni akaï. Lo iri abazengele ni kue place oko. Na ndoye, lo mû wango so na ala, lo tene: “Ala hinga so azo so a bâ ala tongana amokonzi ti amara ayeke sara mokonzi na ndo ti amara ni, na akota zo ti ala ayeke na komandema na ndo ti ala. Ti ala, a doit ti duti tongaso ape. Me zo so aye ti ga kota zo na popo ti ala, a lingbi lo duti zo ti kua ti ala; na zo so aye ti duti na li ni na popo ti ala, a lingbi lo duti ngbâa ti ala kue.”—Marc 10:42-44.

Jésus afa na ala so a lingbi ala mû tapande ti lo. Lo tene: “Molenge ti zo aga ti tene azo asara kua na lo pëpe, me ti sara kua na azo na ti mû fini ti lo tongana ye so a futa ti zi na azo mingi.” (Matthieu 20:28). Teti ngu ota tongaso, Jésus ayeke fa tënë na azo ndali ti nzoni ti ala. Na ndo ni, na yâ ti kete ngoi, lo yeke sara mbeni ye ndali ti nzoni ti azo ti dunia kue! A lingbi adisciple asara ye tongana ti Jésus, so ayeke na nzara ti sara kua na azo ahon ti tene azo la asara na lo, nga so aye ti sara tere ti lo kete ahon ti duti na kota ndo.